Hébreux 7

Yesù Mɛlɛkisɛdɛkì tsuru saaka goojaabobaa kudɛyn

1 Àyìwà, wɔ̀ nìi na kir'là Salɛmù, tɔ̀ Mɛlɛkisɛdɛkì rìì na tɔ̀ wɔ̀ɔ̀ màsà kpir'là, è bà na Jìran nɔ̀n Ŋaablàa rè saaka goojaabobaa. Ibraximà bèu kaà fa màsa niì reè ka è dzi è ra, à dankɔɔn tɔ̀ kaà kpà, Mɛlɛkisɛdɛkì rìì bèu à kùùntsi è dzwɛ ji à ra.

2 Gè o ge na ni Ibraximà rè, à y'à sapɛ yaà bo, à y'à sìn Mɛlɛkisɛdɛkì rà. Mɛlɛkisɛdɛkì, tɔ̀ tsoò dzuɔn nì yɛ ci: «Màsa riì tereòn.» È bà na Salɛmù wɔ̀ɔ̀ màsà kpiri kɔn. Salɛmù, tɔ̀ dzuɔn ci "Jaancin". Nìi y'à kpàdèe, ci à Janciàn màsà kpiri sa.

3 Mòò na à fà tɔ̀, mòò na à na tɔ̀, à to boo tsu riì ɲàn, mòò na tɔ̀ tsu tɔ. Mòò na à kere goòmà deò min sɔn pɛn, mòò to na à san goòmà deò min sɔn pɛn. À saaka goojaabobaa kudɛyn a ci Ŋaablà Dzin Kpir'la.

4 Y'a jàa ci tɔ̀ kpir'la na mòdzin bla dɛ ! È bè wɔ fɔ ɲe fàbɔɔ Ibraximà gè o ge tàrau kaà kpà, è tɔ̀ kàjaa cereomaà bo sìn à ra yaa.

5 Lɛvì raa tsua mòò rèè ɲàn, nìì reè na saaka goojaa bo reè, à kpàdeò kɛɛra Musà rè sàrìyaa doùn ci twɛy rìì yè yaà tsià Dzyèèsìbee mòdzìn dzyee reè rè. È tɔ̀ faa, tɔ̀ to y'à tàrà twɛy nìì reè yè è fàdzìnsi reè, è sa dzyeèmaa Ibraximà tsua dzin ì nì.

6 Mɛlɛkisɛdɛkì naà Lɛvì tsua dzin mòdzin waa, Ibraximà to yè e re gè rèè sapɛ yaà bou à re. À to yè dzwɛ ji Ibraximà nà, Ŋaabla làyir'là seun tɔ̀ niì rè.

7 Àwà, dzwɛɛ̀ jibaà, tɔ̀ rii blà dzwɛɛ̀ tàràbaà mà, sɔ̀swɛy na ni tɔ̀ ɲan waa.

8 Lɛvì raa tsua mòò rèè, twɛy nìì reè saaka goojaa bo reè yè bà yaà tsià, twɛy mòdzin maana ì nì, nìi reè saàn. Ŋà, Mɛlɛkisɛdɛkì, yaà sìun tɔ̀ niì sa ra, Ŋaablà re goomaa y'à kpàdeò, ci tɔ jaama.

9 Lɛvì ko e tsua dzin nèè, twɛy nìì reè yaà tsià Dzyèèsìbee mòdzìn dzyee reè rè, mòo dzia dzin ci è fàbɔɔ Ibraximà baraka rɔ̀n, è sa yaà bou Mɛlɛkisɛdɛkì rè

10 Mòo dzia tɔ̀ dè kàtsu, Ibraximà ko Mɛlɛkisɛdɛkì yè e si kùntsià watsi riì bwèy, Lɛvì kpɛ̀yn naà kereo ŋe waa, ŋà, à na ni Ibraximà ɲàn.

11 Àwà, Sàrìya riì sìun Dzyèèsìbee mòdzin neè rà, tɔ̀ Sàrìyaa gbaɔn Lɛvì ko e tsua mòò rèè raa saaka goojaaboo rìì tsɛ. Twɛy raa saaka goojaaboo yè bà na dzia goò sapɛ dzii tsyɛn, a ci Ŋaablà y'a gaa nìi tsuru, saaka goojaabobaa kpɛrɛ yè gaa kɔn a ci Mɛlɛkisɛdɛkì tsuru, tɔ̀ kùn naà ni dɛ waa. À na nà to è suun, a ci Arunà na ni nìi tsuru.

12 Àwà, làkere ye dɔn saaka goojaa bo reè raa goò ɲàn, fɔ Sàrìyaa sa yeè laker'li.

13 Twɛy gooma reè to deò mòò riì tsɛ, tɔ̀ yeè bà Ŋaablà Jaara Modzìàn, tɔ̀ na Arunà tsua mòdzian sɔn waa. À tsu riì mòdzin, tɔ̀ mòò pɛn na ba jà saaka goojaabobaa ŋe waa.

14 È sapɛ y'a tɔ̀, ci mùn Tsìfaà Yudà raa tsua mòdzian sɔn ni. Kɛɛra Musà to saaka goojaa bo reè gooma deè watsi riì bwèy, à na tɔ̀ tsua gooma de à ɲan waa.

15 Àwà, saaka goojaabobaa kpɛrɛ yè nà, nìi ni a ci Mɛlɛkisɛdɛkì, tɔ̀ goò y'à kpàdeò à fyɛ kɔn ci à ko Lɛvi raa tsua ye e si e si ra.

16 À na ba saaka goojaabobaa è dan mòdzìnbè saan ɲàn, a ci mòdzian rè sàrìya tsuuŋmaà y'à kpàdeò nìi tsuru waa. Ŋà, à bàu saaka jɔɔndzin kàtsu è to tsùù jaamabee rà kudɛyn, tɔ̀ dzia ni à ɲan.

17 Àwà, à deò à re goò ɲàn nèe tsuru ci:

Wo nà bà tsùù saaka goojaabobaa kudɛyn,

a ci Mɛlɛkisɛdɛkì na ni nìi tsuru.

18 Tà doùn, Sàrìya tsuuŋma jɔ̀naà mɛrɔn, kàtsu à dzii naà tsyɛɔ̀n waa, à to naà gèsɔn wùbee waa.

19 Tɔ̀ Sàrìyaa na goo sɔn pɛn bà goo dzii tsyɛunma waa. Ŋà dòònun, ɲe si ɲɛnma kpɛrɛ tàrau, nìi wù jɔ̀naà mà, è b'a toò, ɲe yè e kpɛrɛ Ŋaablà ra.

20 Àwà, è ɲɛn tɔ̀ sapɛ tsɛ, Ŋaabla làyiri sa seun e Jaara Moò rè, saaka goojaaboo tsɛ. Nìi to dzyee rèè, twɛy yè bà saaka goojaabobaa, Ŋaablà na tɔ̀ tsuru làyiri sen waa.

21 Ŋà, Yesù, Ŋaabla làyir'là seun tɔ̀ raà doùn nì, a ci à deò nìi tsuru ci:

«Dzyèèsìbee Ŋaabla nèe làyir'lèe seun,

à to fa à mɛɛy waa.

Wo nà bà tsùù saaka goojaabobaa kudɛyn.»

22 Tà doùn, Ŋaabla Dzyèèsìbe dɔun ɲe ko e fi, nìi fyan jɔ̀naà mà peu. Tɔ̀ Dzyèèsìbee ni Yesù rìì suun.

23 Kàjaa kpɛrɛ yè bà ni kɔn. Nìi Lɛvì raa tsua saaka goojaa bo reè, twɛy na giri, kàtsu, saàn naà à toò yè to tsùù kudɛyn saaka goojaaboo rà waa.

24 Ŋà Yesù, tɔ ni tsuù jaama kudɛyn nìi fa, dò na ni à re saaka goojaaboo mà waa.

25 Tɔ̀ kamà, nìì reè yè e kpɛr'la Ŋaablà ra à baraka rɔ̀n, à dzia twɛy tsià kudɛyn, kàtsu à ni tsuù jaama kudɛyn, è bà Ŋaablà mafyɛ̀ɛn è re.

26 Tà doùn, mùn màgoo na ni saaka jɔɔndzin niì kaatsi ra taki, tɔ Yesù rìì. À fɛnɛɔ̀, jààma na n'a na, à na gooɲaan pɛn fa ja, à sen bou gooɲaan fa reè ɲàn, è sen teyn fɔ ŋaablaxɔɔ̀ dààn rà.

27 Nìi saaka jɔɔndzin dzyee reè, twɛy saakaà boò jisee sapɛ e yɛr'la raa gooɲaan neè kamà, yè sèè yè sɔn bo mòdzian raa rèè kamà. Ŋà Yesù, tɔ̀ màgoo na ni tɔ̀ ra waa. È yɛr'la rìì sìun jaa soo kerekete saaka, saaka kpɛrɛ na ni nìi shɔ̀ùn dɛ.

28 Musà rè Sàrìyaa mòò riì reè tsùɔ saaka jɔɔndzin ì, twɛy mòdzin ì, nìì reè ŋɔn fyɛn. Ŋà, sàrìyaa raa goò shɔ̀ùn, Ŋaabla làyir'là seun è mòò riì tsùù saaka jɔɔndzin, tɔ y'a Dzin Kpir'la rìì, è bà à baɔ̀ modzin dzii tsyɛunma kudɛyn.