Hébreux 6

N mà sèè e re jaamabe bɔrɔɔ kpɛyn waa

1 Àwà, tɔ̀ gàneè doùn, goo jɔna niì reè kàraun mùn na, Ŋaablà Jaara Moò raa goò tsɛ, mùn mà to tsùù tɔ̀ ra dɛ waa, ŋà, mìn bè jɔɔn, mìn bà ni mɔunma tàrà à ɲan, a ci mòòbɔɔ. Goo jɔna niì reè y'à dzunbamaà, n mà sèè twɛy tsɛ kpɛrɛ dɛ. Twɛy goo rèè rìì siin: E sèè bo fa bɛy goo reè kpɛyn, e ɲɛn Ŋaablà ra.

2 Jaara foo kaatsi nìì reè ni, twɛy raa kàr'nà, tà ko si rèè yè tsùù mòò tsɛ màfyɛyn yè fa à re, tà ko fùn nèè sèè kpunaàn raa goò, ko kitsi latan niì nà kùnùn.

3 Mìn twɛy kàr'nèè to mɔn dòònun, mìn bè jɔɔn. Ŋaa ye e tsiì à ra, mùn nà tɔ̀ rii fa.

4 Swey ni twɛy sèè boò Ŋaablà kpɛyn, yè sèè e re jaamabee fau'n kuru ɲaan bɔrɔɔ tsɛ. Àwà, Ŋaablà re vyevyeè twɛy ɲan viu, yè Ŋaablà ɲanwùɔ nèè jà, è nìn yè jà Ŋaablà re Dzi Fɛnɛɛ ɲàn.

5 È Ŋaablà re Goomaa nèèŋ, y'à jà ci à wù, yè watsi na nàmaà doùn naa dzia tɔ̀.

6 Tà ko e sa ra, è sèèŋ e re jaamabee fau'n kuru bɔrɔɔ tsɛ. Twɛy tsìfa ì yè bà ni dzi seè bo tɔ̀ kpɛyn, yè e re jaamabee fau'n kur'la lakere kɔn yeu, tɔ̀ na dzia fa dɛ, kàtsu, è Ŋaablà Dzin Kpir'la gbaun e re gban doùn e jaa fiira ɲan gɔɔ̀ rà y'à sìn ɲɛ̀ɛn nà.

7 M'a siin dzùà sɔn na ŋe: ŋaà nàumaà jaa giri à tsɛ à yuà mìn cɛɛ̀n. Yuà mìunmaà shɔ̀ùn tɔ̀ tsuru, gè ku ì ye xe à ɲan, nìi dzùtsi rèe nàfaà, Ŋaabla re dzwɛ bàa ni dzù rèe tsɛ.

8 Ŋà, daaku ì rìì ye xe à ɲan, tà ko vun ɲaan neè, nàfa na ni à ɲan waa, danga rii to y'à nìn, à lataan yè bà sàà fɔ̀nɔ̀n.

Mìn maxɔbe fɔ à lataan

9 N neema ì, mun ye nìì reè kɛ̀niɔ̀n, nèe sapɛ dèumaà ko e raà sa, mùn y'a tɔ̀ nìi ye, ye ni shi wuɔ tsɛ, nìi ye tsià shia.

10 Mòdzin niì reè Ŋaablà raa, ye goo faa twɛy rè, ye yè bà tɔ̀ faa arì she. Twɛy goo rèè y'à kpàdèe, ci ye y'à kɛ̀niɔ̀n. Àwà, Ŋaabla tereòn, à taa fa myɛ̀n twɛy goo fauma rèè rè waa.

11 Ɲe nìi gaa, tɔ̀ rii yɛ, ci ye soo sookɔɔn sa yeè e maxɔbe fɔ à lataan, ye si xɔ nìi tsɛ, tɔ̀ dzii tsyɛunma yè bo e shi tsɛ.

12 Àwà, e maà bà mòdzin, nìì reè gɔn vuɔ̀ waa, nìì reè ɲɛɔ̀n Ŋaablà ra, yè bà e mɔɲɔɔ̀n, ɲe ci ye yè bà twɛy rìì tsuru. Nìì reè ni tɔ̀ tsuru, Ŋaabla nìi làyiri seòn, twɛy rìì tɔ̀ tàr'la.

Ŋaabla vusootsi

13 Àwà, Ŋaabla làyiri sɔn sen dɔun Ibraximà rè. À ci e ye tɔ̀ làyir'là sen, è kɛrɔn e yɛr'la rìì là, kàtsu, gè na ni nìi blà à mà, è bà nà e kɛɛ̀y tɔ̀ ra waa.

14 À dziun ci: «Sààben fyan, mun nà dzwɛ kun wo mà, min wo tsua dzin nèè buu.»

15 Àwà, Ibraximà sa to yè e mɔɲɔn, fɔ Ŋaablà na nìi làyiri seòn à re, tɔ̀ yeè bè bo e shi tsɛ.

16 Mòdzian ye ba e kɛɛ, gè niì blà è yɛ̀r'la mà, yè e kɛɛ tɔ̀ rii là. Kɛ̀ɛ̀ ye dzi fa nòn, sɔ̀swɛy na ni à goò ɲàn dɛ.

17 Tɔ̀ rii y'à to, Ŋaabla làyir'là seòn nìì reè rè, à sào ni è goo nìi ka à kpàdè twɛy rà ci làyir'lèe fa to bo bɛy e shi tsɛ waa, è kɛɛ̀y ɲɛn à tsɛ.

18 Àwà, làyir'là ko kɛ̀ɛ̀, twɛy goo blà bla fiɛ̀ na dzia lakere waa. Ŋaablà to yè bà ni doò dè è doùn, tɔ̀ na dzia fa waa. Ɲe nìì reè vwɛ̀ɛ̀rɔɔ̀n ɲe yè e kungɔ mɛnɛn Ŋaablà re, tɔ̀ goò ɲe màxɔ̀ɔn cèreoma, à y'à to ɲe ye e si xɔbe arì she Ŋaablà re làyiri seunmaà tsɛ ɲe re.

19 Ɲe si xɔbeò tɔ̀ niì tsɛ, tɔ ɲe dɔ̀ɔn fɔ vyaà kɛ̀yn, Ŋaabla ni min niì. À ɲe xɔɔn kun tsùuŋnà kpan fɔ tɔ̀ vyaà kɛ̀yn, a ci myɛ̀ɛ̀n kunun gbanàkàntàn nìi shiɔ̀ konkor'na nà, è bà ka à tsìɛ.

20 Yesù jɔ̀na dɔ̀un mɔn, ɲe kamà. À bàu saaka jɔɔndzin kudɛyn, a ci Mɛlɛkisɛdɛkì na ni nìi tsuru.