Hébreux 5

1 Àyìwà, saaka jɔɔndzian gè o ge, à boò mòdzian nì ɲàn, è tsùù, à yè è re goo rèè jaa boò Ŋaablà re. À raa faagoò rìì yɛ, gè o ge ka kɔ̀ì faa Ŋaa re, ko saaka nìì reè boò, è twɛy ladzi Ŋaablà tsɛ, mòdzian re gooɲaan faakɔɔn reè kamà.

2 Nìì reè fìr'la, goò jaa tɔ bɛybeè yè bà saabu, à twɛy tsɛ tɔ̀. À yè è tsɛ tɔ̀, kàtsu goo o goo doùn mòdzin gbaa e yɛrɛ dzuun, tɔ nàa à sa ma.

3 Tɔ̀ rii kamà, à wù è bà saaka boò e yɛr'la sa re, e raa gooɲaan neè kamà, a ci à y'à boò dzyee rèè sa re nìi tsuru, è re gooɲaan neè kamà.

4 Àwà, mòò pɛn na dzia saaka jɔɔndzinbee blàbee ɲɛn e yɛrɛ tsɛ waa, Ŋaablà rii mòò kir'là, à y'à bà saaka jɔɔndzin, a ci à Arunà kiriu nìi tsuru dan.

5 Ŋaablà Jaara Modzìàn raà sa tɔ̀ rii tsuru. À yɛ̀r'la na saaka jɔɔndzinbee blàbee ɲɛn e yɛrɛ tsɛ waa. Ŋà, Ŋaablà yɛr'la rìì y'à kiriu, ci:

«Wo rìì mun Dzin kpir'la.

Mun bàu wo fàà she.»

6 Ŋaablà yeè bà dziɔn e re Goomaa gàne sɔn ɲan kɔn ci:

«Wo nà bà tsùù saaka goojaabobaa kudɛyn,

a ci Mɛlɛkisɛdɛkì na ni nìi tsuru.»

7 È Yesù to e re jaamabee rà dziɲan doùn, à Ŋaablà mafyɛ̀un fyɛ̀ùn'n kur'la, nìi doùn è vu bou fààn na, fɔ è bè wɔ jaayu boma à re. À re màjaa kamà, dzi ni Ŋaablà riì rà à y'à tsi saàn rà, tɔ̀ sa to y'à re màfyɛɛ̀n latsi.

8 À bàumaà ko e raà sa Ŋaablà Dzin Kpiri, à byɛnbe niì fau, tɔ̀ y'a tou, è Ŋaablà dzugoomaa blàbeu'n kuru tɔ.

9 Àwà, twɛy goo rèè y'à bàu mòdzin dzii tsyɛunma. Tà tsuru, nìì reè y'à dzugoomaa blàbee, à bàu twɛy tsibaa kudɛyn.

10 Ŋaablà rii y'à bou à y'à tsùù saaka jɔɔndzin, a ci Mɛlɛkisɛdɛkì na ni nìi tsuru.

À wɔu mìn Ŋaablà re goo rèè fàànmun

11 Àyìwà, tɔ̀ goo nìi yɛ nèe, goo giri ni ɲe re, ɲe y'à dè ye ra tɔ̀ tsɛ. Ŋà, ɲe nà à jaa dè ye ra nìi tsuru, ye yè bà ni à fàànmun, tɔ ɲan, kàtsu ye ɲancinbeu goo rèè fàànmuan nà.

12 À na wù dòònun, ye sa yeè bà dzia mòò kàràn Ŋaablà re goo rèè rà, kàtsu, watsia gbàmaun. Goo jɔna niì reè kàraun ye ra Ŋaablà re gooma reè tsɛ, arì she fɔ tɔ̀ rii yè kàràn ye ra kɔn. Ye beò bà ye na dzia ɲwɛyn màxɔu ɲɔn, fɔ nɔnɔn.

13 Mòò riì na gè kpɛrɛ ɲɔɔ̀n nɔnɔn tɛy waa, tɔ dzinyɛy rìì. Goo rìi tereòn, à na tɔ̀ tɔ̀ waa.

14 Nìi ɲwɛyn màxɔɔ̀, mòòbɔɔ rèè rìì tɔ̀ ɲɔɔ̀n. È yè e akir'là dɛ̀rɔɔ̀n è goowùɔ ko gooɲaan tɔ̀ bo e si ɲan.