Nìì reè nà dɔ̀n Ŋaablà re ɲànwɔma nɔ̀n
4
1 Àwà, Ŋaabla ɲànwɔma nìi làyiri seòn mùn ne tɔ̀ goò na mɛrɔɔn waa. Tà doùn, è tɔ̀ to tsùù sààn, mìn yɛrɛ kaàwɔ, mòò mà nà jà e ɲan, nìi raa goo nà à to, è to dɔ̀n bɛy waa.
2 Kùnàgoo Dziɔ̀ goomaa dèu ɲe ra, a ci à dèu ɲe fàbɔɔ rèè sa ra nìi tsuru. Ŋà, à myɛ̀unmaà ko e raà sa twɛy rè, à na è màgoo wube waa, kàtsu nìì reè y'à myɛ̀un yè ɲɛn à ra, è na e tsiì yè e ba twɛy tɛ̀y waa.
3 Ɲe nìì reè ɲɛun à ra, tɔ̀ ɲànwɔ̀maà ɲe rii laa. Ŋaabla tɔ̀ rii dèu nèe tsuru ci:
«Tɔ̀un, mun ne vununtaà doùn, min kɛɛ̀y ci,
mun ɲànwɔma nìi lamɔnɔ̀n tsùuŋnà, min bà ni mɔn, è fa dɔ̀n mɔn dɛ fyeu.»
Ŋaabla twɛy gooma reè dèu, tɔ̀ y'a tàrà a na dòonà e re faagoò rà fɔ dziɲan ɲɛn bwey.
4 Àwà, Ŋaablà re Goomaa doùn, à deò gàne sɔn ɲan jisee ɲɛɛnunaa tsɛ nèe tsuru ci: «Ŋaabla dòu e re faagoò sapɛ ra bwèy tsùnmɛn doùn, à ɲɛ̀ɛ̀nùnaa è ɲanwɔ.»
5 È bà deò tɔ̀ gàne soo ɲan ci: «È fa dɔ̀n mun ne ɲànwɔma nɔ̀n byɛ.»
6 Nìì reè jɔ̀na Kùnàgoo Dziɔ̀ goomaa myɛ̀un, twɛy na dɔn mɔn waa, kàtsu, è na ɲɛn à ra y'à shi jiì waa. Àwà, à kpɛ̀yn fyɛɔ, ci mòdzin ì nà dɔ̀n tɔ̀ ɲànwɔma nɔ̀n.
7 Tɔ̀ rii kamà, Ŋaablà yeè jisee soo tsuù kɔn yeu, è tɔ̀ kiri ci "she". Watsi gbaan dɔn bouma shɔ̀ùn, à nàu tɔ̀ gooma soo rìì dè è bo màsà kpiri Dawùda dzu, nìi yɛ ci:
«E ye Ŋaablà gooma vuà myɛ̀n she,
e maà e ba à myɛ̀n bɛy waa.»
8 Awà, Yosuwè ye ba na à tou ɲe fàbɔɔ rèè yè dzi ɲànwɔ tarà, Ŋaablà fa ni ɲànwɔ jisee kpɛrɛ gooma de tà shɔ̀ùn dɛ.
9 Tà doùn, ɲànwɔ kpɛrɛ too Ŋaablà re mòò rèè rè, nìi Ŋaablà re jisee ɲɛɛnunaa ɲànwɔɔ kaatsi.
10 Àwà, mòò riì ye dɔn Ŋaablà re ɲànwɔma nɔn, Ŋaablà re faagoò dòu nìi tsuru è ɲanwɔ, tɔ̀ tsìfa sa raa faagoò dòo tɔ̀ rii tsuru, è ɲanwɔ.
11 Tɔ̀ kamà, y'a to mìn maxɔbe, mìn dɔ̀n tɔ̀ ɲànwɔma nɔn. Y'a to mìn tɔ̀ fa, sànko, mòò mà nà jà mùn ɲan, Ŋaablà dzugoomaa shi jiìbɛ̀ybeè kamà, a ci ɲe fàbɔɔ rèè, è to dɔ̀n bɛy waa.
12 Àwà, Ŋaablà re goomaa jaama, à ŋɔ̀n yè bà vùn. À dzii dzi è geren bànmunun dzii fiɛ̀ sa tsɛ. À dɔ̀ɔn mòdziin ɲàn, è bè wɔ fɔ xɔɔn ko akir'là tsɛ, a ci bànmunun ka xɔ tsuma rèè kùn'na nìi tsuru è dɔ̀n è bè wɔ fɔ sɔmɛɛ tsɛ. À mòdzian kɛ̀sɛ̀maà ko à duungoo sapɛ ɲansiɛ̀n, è tɔ̀.
13 Ŋaabla gè o ge ɲɛun, à jaà ni è sapɛ ra panparapa, è pɛn na mɛnɛɔn à mà waa. Mùn sapɛ nà bè e tsiì wò rii jaaterema, mìn kùn dei fa à ra.
Yesù, mùn ne saaka jɔɔndzin blaa
14 Tà doùn, saaka jɔɔndzin bla ni ɲe re, nìi ni dzyee rèè sapɛ kuùn, è bà ŋaablaxɔɔ̀ fi shɛun è bè fɔ Ŋaablà re. Tɔ̀ saaka jɔɔndzin blaa rìì Yesù, Ŋaablà Dzin Kpir'la. Tɔ̀ gàneè kamà, mùn ɲɛɔ̀n goo nìi rà, mìn to tsùù tà tsɛ m'a kun gban gban.
15 Àwà, goo nìi reè doùn, mùn gbaa e yɛrɛ dzuun, ɲe raa saaka jɔɔndzian saaka jɔɔndzin, nìi ɲe tsɛ tɔ̀ twɛy doùn. À ɲe tsɛ tɔ̀, kàtsu, Sùtana y'à sa dzuun bo siin kàjaa sapɛ tsɛ, a ci à ɲe tàr'la nìi tsuru. Ŋà, tɔ̀ pɛn na à to è gooɲaan soo fa.
16 Tɔ̀ doùn, y'a wa mùn akiri tsùuŋma yè e kpɛrɛ Ŋaablà re màsà gbaaniɛn nà, wùu ni tɔ̀ riì ɲàn. Tɔ̀ tsuru Ŋaablà nà màtsuru mùn na, è ɲanwùɔ kpàdè mùn na, è wɔ mùn na e watsi wuu ɲan.