Jean 11

Lazarì saun min niì Betani wɔ̀ rɔ̀n

1 Àyìwà, kpiri sɔn na ɲìniɔ̀n Betani wɔ̀ rɔ̀n, nìi tsoo ci Lazarì. Tàan fii swey sa na tsùuŋnà Betani wɔ̀ rɔ̀n, twɛy tseyn ko tsìnà: soo tsoo ci Maritsì, soo tsoo yè bà ci Mariyamùn.

2 Tàan sɔn ɲinin kinin dziù kon dɔ̀un Tsìfaà sàn nèè tsɛ, è kungwɛ̀ɛn ka à tsùsa. Tɔ̀ taàn na Mariyamùn nì. Tɔ̀ keresi Lazar'lì naà cɛrɛma waa.

3 Maritsì ko Mariyamùn yè mòò ka Yesù kpɛyn, è bè dè à ra ci: «Tsìfaà, wo dzunwɛynsi riì goojaa xɔ wo re, fɔ è bè geren, tɔ̀ na cɛrɛma waa.»

4 Yesù tɔ̀ myɛ̀un min niì, è dzin ci: «Nèe ɲìn'nèe na Lazarì saàn ɲìn'nà waa, à goo rìì, nìi nà blàbe ɲɛn Ŋaablà tsɛ, tà ko è Ŋaablà Dzin Kpir'la blàbee kpàdè.»

5 Maritsì, ko Mariyamùn ko Lazarì, è sapɛ goo na dzi Yesù rà, fɔ è bè geren.

6 Yesù rè à myɛ̀unmaà shɔ̀ùn ci Lazarì na cɛrɛma waa, à na ni min niì, è to mɔn bwèy fii kɔn.

7 Tɔ̀un, è dzin e re kàràndzin neè rà ci: «Y'a wa, mìn kpɛyn sèè Yude mar'la ɲàn.»

8 Kàràndzin neè yè dzin à ra ci: «Kàrànfaà, à na ciɔ̀n waa, Yude mar'la mòdzin neè na wo dzyɛn vuma gaa kpàa ì ka. Arì she wo to n'a re, wo yè bè mɔn ŋe.»

9 È dzin è ra ci: «Watsi teeŋ fii rìì na ni bwèy sɔɔ̀n doùn ɔ̀n ? Awà, mòò ye ba jìɛ bwèy rɔ̀n, à na e san nà baan waa, kàtsu vyevyeè kamà, à jɛ̀y faa cɛyn.

10 Ŋà, mòò ye ba jìɛ fene rɔn, è san nà baan, kàtsu vyevyee na ni à ɲan waa.»

11 Twɛy gooma reè shɔ̀ùn, Yesù yè dzin è ra ci: «Ɲe dzunwɛynsi kpiri Lazarì cìiŋnà, ŋà, mun nà bè, min b'a kpunan.»

12 A tɔ̀ dèu min niì, kàràndzin neè yè dzin à ra ci: «Tsìfaà, è ba cìiŋnà, tɔ̀ y'a kpàdèe, ci à nà cɛrɛmabe.»

13 Yesù rè goomaa doùn, à na ci Lazarì saɔn rìì, ŋà, kàràndzin neè na à siɛ̀n, ci à cìi maana maànà nì gooma dekɔɔn.

14 Tɔ̀un, à y'à dè fyɛ è ra ci: «Lazarì saun ni.

15 Ŋà, mun na ba ni mɔn nìi fa waa, tɔ mun taama dzibeò ye kamà, kàtsu, tɔ nà bà saabu, ye yè ɲɛn mun na ŋe. Àwà, mùn y'a wa à re mɔn.»

16 Tɔ̀un, Yesù rè kàràndzin niì tsoo ci Tomà, yè bà à kir'là sa, ci fìrìkàmaa, tɔ̀ yeè dzin e koòsi kàràndzin neè rà ci: «Mùn sa y'a wa, mìn bè san à ka.»

17 Àyìwà, Yesù ci e ye bè wɔ mɔn watsi riì bwèy, tɔ̀ y'a tàrà, Lazarì fùàn na bwèy nààlen faɔ̀ fùn kɔɔ rè nòn, tɔ̀ ɲɛɛna faà ɲàn, a ci kpankɔɔ

18 Betani wɔ̀ɔ̀ ko Yerusalɛmùn fia gbànbee naà gereon cilo zhììgi tsuru tsɛ waa.

19 Àwà, Yude mar'la Dzyèèsìbee mòdzin neè giri na naɔ̀ Maritsì ko Mariyamùn kpà, yè nà è re mòdzian shì tswɛɛ̀ fa, yè è jaayu tsɛ̀ tɔ̀ ka.

20 Maritsì toro jiu à ɲan min niì, ci Yesù nàa, è bè, ci wo bèe à kùùntsi. Nìi Mariyamùn, tɔ̀ yeè e tsuù to gbàà doùn.

21 Maritsì bèu dzi Yesù tsɛ watsi riì bwèy, è dzin à ra ci: «Tsìfaà, wo ye ba na ni mìin, mun ne mòdzian fa ni san waa.

22 Ŋà, m'a tɔ̀, arì she wo ye goo o goo gaa Ŋaablà re, à nà tɔ̀ fa wo re.»

23 Yesù yè dzin à ra ci: «Maritsì, wo re mòdzian nà sèè kpunan.»

24 Maritsì yè dzin à ra ci: «Mun kpɛ̀ynto y'à tɔ̀, ci tsìɛ̀ sii sèè, à sa nà sèè kpunan bo saàn ɲàn ko fùn nèè ka.»

25 Yesù yè dzin à ra ci: «Fùn nèè sèè kpunaàn ko jaamabee, tɔ mun nì. Mòò o moò ye ɲɛn mun na, arì à tsìfa kɛ̀nsɛɛn ye san, à nà sèè è jaamabee fa.

26 Mòò o moò to jaama, à ye ɲɛn mun na, à fa san jà dɛ. Wo ɲɛɔ̀n tɔ̀ ra ɔ ?»

27 Maritsì yè dzin ci: «Ɔ̀ɔn Tsìfaà, mun ɲɛɔ̀n à ra, ci wo rìì Ŋaablà Jaara Modzìàn, Ŋaablà Dzin Kpir'la. Nìi na wù è nà dziɲaan doùn, à Wo rìì.»

28 Maritsì tɔ̀ goomaa dè dòu min niì, è dɔ̀n be, è bè e tseyn taan Mariyamùn kiri. E toro kɔɔ doun goòmà dè à ra ci: «Kàrànfaà nàu, à to wo lateè.»

29 Mariyamùn dziu tɔ̀ myɛ̀n min niì, è tabe fu, è dɔ̀n be Yesù kpà.

30 Àwà, Yesù naà dɔɔ̀n wɔ̀ɔ̀ doùn ŋe waa. Maritsì y'à kùùntsiu min niì, à na ni mɔn nì ŋe.

31 Mòdzin niì reè na ni Mariyamùn ka gbàà doùn, yè bà naɔ̀ shì tswɛɛ̀ fa, yè è jaayu tsɛ̀ tɔ̀ ka twɛy y'à tabe fuuma jàu è bo min niì, è sa yeè fù, yè e gban à kpɛyn. È na à siɛ̀n, ci à bèe gɛɛyma nì fùn kɔɔ rà.

32 Tɔ̀un, Yesù ni min niì, Mariyamùn yè bè dzi mɔn. À Yesù jàu nìi tsuru, è bè e kunun gban ji à sàn dzuun. E dzin à ra ci: «Tsìfaà, wo ye ba na ni mìin, mun ne mòdzian fa ni san waa.»

33 Yesù y'à jà à gɛɛ. Mòdzin niì reè na naɔ̀ à ka, twɛy sa yeè bà gɛɛ. À tɔ̀ jàu min niì, à goò yè dɔ̀n à ɲan, fɔ è bè geren, à akiri yè gbiiman.

34 È tey ci: «Ye y'à wɔu min ?»

Yè dzin à ra ci: «Nà Tsìfaà, wo nà à jà.»

35 Yesù yè gɛɛy.

36 Mòdzian yè dzin tɔ̀un ci: «Y'a jàa kɛ̀, Lazarì goo na dzi à ra dɛ !»

37 Ŋà, swey yè dzin è ɲan ci: «N ci à jaana kpir'là jaa dzii saun, à fa ni dzi à to Lazarì tsu mà san ɔn ?»

Yesù Lazarì fùàn kpunaun min niì

38 A goò yè dɔ̀n Yesù ɲàn kɔn kpɛrɛ, fɔ è bè geren. Àwà, Yesù yè wɔ fùn kɔɔ rà tɔ̀un. Kɔ̀ɔ̀ na ni a ci kpankɔɔ, kpàa yè bà ka à dzii tsyeeŋna.

39 È dzin ci: «Ye kpàa bo mɔn.»

Sanbaà keresi Maritsì yè dzin Yesù rà ci: «Tsìfaà, à kinin nà bà boò nòn, kàtsu à bwèy nààlen nì yɛ, à ni kɔ̀ɔ̀ doùn.»

40 Yesù yè dzin à ra ci: «Mun na dzin wo ra ci wo ye ba ɲɛɔ̀n Ŋaablà ra, wo nà à blàbee jà ɔ̀ ?»

41 Tɔ̀un, yè kpàa bo kɔ̀ɔ̀ dziɛ rà. Àwà, Yesù yè e jaà ɲansen jìran kèrè, è dzin ci: «Mun Fàà, wo y'à toro wɔ nìi fau mun ne, mun baraka sìan wo ra, è ɲɛn tɔ̀ tsɛ.

42 Mun y'à tɔ̀, ci wo y'a toro wɔɔ̀ mun ne kudɛyn, ŋà, mun nèe dèu nì, sànko jàma nìi sapɛ yɛ mun laguruɔ̀, yè ɲɛn à ra, ci wo rìì mun ka naɔ.»

43 À tɔ̀ dèu min niì, è sɛ̀ɛy fààn na ci: «Lazarì, bo na mìin !»

44 Àwà, Lazarì jaama yeè bo na kɔ̀ɔ̀ doùn tɔ̀un, kasangee ka à si rèè ko à sàn nèe sa miniunà, sɔn yeè bà miniɔ̀n à jaakɔrɔn. Nìì reè na ni mɔn, Yesù yè dzin è ra ci: «Ye nèe sapɛ bo à mà, y'a to è bèe.»

45 Àwà, mòdzin niì reè na naɔ̀ Mariyamùn nè, Yesù goo nìi fau twɛy jaadzin ɲɛun tɔ̀ mà, è giri yè ɲɛn à ra.

46 Ŋà, è ɲan, swey yè bè Faridziɲɛn rèè rè. Yesù goo nìi fau, yè bè tɔ̀ dè è ra.

Dzyèèsìbee mòdzin neè jɔɔndzin neè byɛ̀un à mà min niì, ci Yesù wù è vu

47 Tɔ̀un, saaka jɔɔndzin neè ko Faridziɲɛn rèè yè kitsikunun kuru blàa mòdzin neè kiri, yè e ladzyeè. Yè dziàn ci: «Mùn nà fee rìì fa ? Kpir'lee tàànmàshɛn kabagooma giri faa dɛ !

48 Mùn y'a to à y'à faa tɔ̀ tsuru, mòdzian sapɛ nà ɲɛn à ra. Ɔ̀rɔ̀mùka reè to nà nà mùn ne gàne fɛnɛɛ ci, yè mùn tsua mòò rèè sa bara.»

49 Àwà, mòò sɔn na ni è ɲan, tɔ̀ tsoo yè bà ci Kàyifè. Wò rii na saaka jɔɔndzin blaa tɔ̀ jiɛ rà. Tɔ̀ yeè goomaa sen tɔ̀un, è dzin è ra ci: «Ye kpɛ̀yn, ye na gèsɔn pɛn tɔ̀ waa.

50 Mòò sɔ̀n dzin soo yeè san mòdzian sapɛ tsɔsaan ɲàn, ye na à jàa ci tɔ fyan ye mà, sani jàmaàn mòdzian sapɛ yeè bara ɔ ?»

51 Tɔ̀ y'a tàrà, Kàyifè tɔ̀ niì dèu, tɔ̀ naà boo à yɛ̀r'la ɲàn waa. Ŋà, à na saaka jɔɔndzin blaa tɔ̀ jiɛ rà nìi fa, à Ŋaablà re kɛɛrabe rii fau tɔ̀ tsuru, ci Yesù nà san Dzyèèsìbee mòdzin neè tsua tsɔ̀saan ɲàn.

52 À to fa san Dzyèèsìbee mòdzin neè tsua bàsɔùn kamà waa, ŋà, Ŋaablà dzin nìì reè jee jiɔ̀ min niì sapɛ, à nà twɛy sa dzyeè soo.

53 È sen tɔ̀ jisee rà, Dzyèèsìbee mòdzin neè jɔɔndzin neè yè byɛ̀n à mà, ci Yesù yè vu.

54 Tɔ̀ kamà, Yesù tsu naà e kungɔ boò jàmaà fi, è bà ni e ɲantsyeere mòdzian ɲàn dɛ. È bo mɔn tɔ̀un, è bè jènjàà kor'nà tɛyn wɔ̀ sɔn ɲan, tɔ̀ tsoo ci Efarayimùn. È bè to e re kàràndzin neè ka mɔn, yè watsi fa.

55 Àwà, Dzyèèsìbee mòdzin neè rè Geren n tsɛɛ̀ sɛr'là fa watsi na tsyɛnbe naɔ. Tà doùn, mòdzian giri na boò jàmaàn gàne giri ɲan, yè bè Yerusalɛmùn, sànko ye yè bà ni tabe wɔ sɛr'là jɔɔn, ye yè e yɛrɛ fɛnɛbeuma tàrà, è bè è re làndà shi rèè tsɛ.

56 È na Yesù gaa beè. Tà doùn, è ni Ŋaablà re gbà blàa fɔɔn doùn, yè e si teè ci: «Y'a jàa dzùrù ? Y'a kɛ̀sɛɛ̀, ci à nà nà sɛr'là rè faan.»

57 Tɔ̀ y'a tàrà, saaka jɔɔndzin neè ko Faridziɲɛn rèè dziɔn mòdzian nà, ci mòò riì ye ba à tɔ̀ Yesù ni min niì, è nà e sarà ye ra, sànko è bè kun.