Jean 12

Mariyamù ɲinin kinin dziù koun Yesù sàn tsɛ min niì

1 Ayìwà, à dzyee na too bwèy tsùnmɛn tsuru, Geren n tsɛɛ̀ sɛr'là yè wɔ, Yesù yè bè Betani wɔ̀ rɔ̀n. A Lazarì nìi fùn kpunan bou fùn nèè fi, tɔ̀ na ni mɔn nì, e re wɔ̀ rɔ̀n.

2 Yè tɛy blà fa Yesù tsoo ra mɔn. Maritsì, tɔ̀ na ni ɲwɛyn goo jaa boo rà è re, Lazarì, tɔ̀ sa na ni Yesù ka è re ɲwɛyn ɲɔn koòn rà.

3 Awà, è ni ɲwɛɛ̀n nà, Mariyamùn yè mà yɛ̀ ɲinin kinin dziù sɔn sen tɔ̀un, nìi kpàxɔ. Ɲin'nèe faɔ̀ gɔ̀ɔ sɔn ni tèrèke ka, nìi kir'là nari. Tà doùn, à y'à kon Yesù sàn nèè tsɛ, è kungwɛ̀ɛn ka è tsùsa. Tɔ̀un, ɲin'nèe kin'nà yè gbàà doòn sapɛ duù.

4 Yesù rè kàràndzin neè ɲàn, nìi tsoo Yudà Sikariyɔtsì, tɔ̀ riì nà nà à jàànfa, tɔ̀ yeè dzin ci:

5 «Feera, ɲinin kinin dziù rèe na gɔɔ, à ɲɛɛn ye tanan gbakɔɔn reè rà ? A gɔrɔunmaà na dzia faagoofadzin kuu tsyeùn sàrà bo.»

6 Yudà naà tɔ̀ dèe, ci gbakɔɔn reè raa goò rìì wò ŋòoŋnà dɛ, ŋà, shɔnbe n'a ɲan nìi fa, tɔ̀ rii kamà, è bà na tɔ̀ dèe, kàtsu, wò rii na ɲɛɛn màr'la. Ɲɛyn niì na màr'la, à na tɔ̀ seen.

7 Ŋà, Yesù yè dzin à ra ci: «Taàn to e saoma, à nèe faɔ̀ mun fùn wɔ jisee raa rìì.

8 Nìi gbakɔɔn reè, twɛy fa dò jà ye ka waa. Ŋà, mun do, mun fa bà ni ye ka kudɛyn dɛ.»

Jàmaà bou min niì, yè Yesù kùùntsi è bà dɔ̀ɔn Yerusalɛmùn

9 Àyìwà, dzyèèsìbee mòdzin neè nàu à myɛ̀n ci Yesù ni Betani wɔ̀ rɔ̀n, è kuru brisi yè bè mɔn. È naà beò Yesù bàsɔùn siin kamà dɛ, ŋà, à Lazarì nìi fùn kpunan bou fùn nèè fi, è na beò tɔ̀ sa siinmà.

10 Saaka jɔɔndzin neè yè byɛ̀n fa à tsɛ tɔ̀un, ci ye nà Lazarì sa vu,

11 kàtsu, wò rii baɔ̀ saabu dzyèèsìbee mòdzin neè giri yè ɲɛn yesù rà, yè boò ye kpɛyn.

12 Àyìwà, tɔ̀ raa gbee rɔn, jàma brìsi nìi na naɔ̀ Geren n tsɛɛ̀ sɛr'là rè Yerusalɛmùn, twɛy y'à myɛ̀n, ci Yesù ni shia rè, à nàa wɔ̀ɔ̀ doùn.

13 Yè shɔ fyaa ì sen tɔ̀un, yè bo bè Yesù kùùntsimà nɔ̀n, yè bà dziàn fààn na ci: «Mìn tsoo dzi ɲɛn Ŋaa tsɛ ! Mòò riì nàa mùn Tsìfaà tsoo ra, mùn ci dzwɛ yè bà ni tɔ̀ kpɛyn. À Isirayɛlì màsà kpir'là rìì.»

14 Yesù yè shùkwɛ̀yn kpèr'nii sɔn tarà tɔ̀un, è tèyn tɔ̀ tsɛ, a ci à sɛbɛɔ̀n Ŋaablà re Goomaa doùn nìi tsuru ci:

15 Yerusalɛmùn mòdzin ì, e maà shi waa !

Ye re Màsà kpir'là nàkɔɔn siin,

è bà tèroòn shùkwɛ̀yn kperen boòn.

16 Twɛy goo rèè faa watsi riì bwèy, kàràndzin neè na à dzuɔn jà bo mɔn suu waa. Ŋà, Yesù dɔ̀unmaà nì shɔ̀ùn e blabee doùn, è taa yeè kòmànà to ci nìi na sɛbɛɔ̀n à re goò ɲàn, à tɔ̀ rii fauma à re tɔ̀ tsuru.

17 Yesù Lazarì fùàn kpunan boò kɔ̀ɔ̀ doùn watsi riì bwèy, nìì reè sapɛ na ni à ka mɔn, twɛy nìi jàu, è na tɔ̀ lakɛɛ̀y beè.

18 Yesù tɔ̀ kabagoo goo niì fau, jàmaà tɔ̀ myɛ̀n nìi fau, tɔ̀ rii kamà, yè bo bè giri yè b'a kùùntsi.

19 Tà doùn, Faridziɲɛn rèè yè dzin e si ra ci: «Y'a jàa kɛ̀, ɲe dzi pɛn na ni nèe goo rèe ra dɛ waa, mòdzian sapɛ yeè e gbaun à kpɛyn.»

Yesù dɔ̀unmaà shɔ̀ùn Yerusalɛmùn à gooma niì reè dèu

20 Àyìwà, nìì reè na naɔ̀ Yerusalɛmùn, yè bà naɔ̀ Ŋaablà blabe Geren n tsɛɛ̀ sɛr'là rè, twɛy mòdzin neè ɲàn kun kpɛrɛ mòdzin ì sa na ni nìì reè kir'là Gɛ̀rɛ̀ki rèè.

21 Yesù rè kàràndzin neè ɲàn, nìi tsoo Fìlipù, è bà boò Bɛtsisayidà wɔ̀ rɔ̀n Galile mar'la ɲàn, twɛy mòdzin neè yè e kpɛrɛ̀ tɔ̀ ra, yè dzin à ra ci: «Neema kpiri, ɲe sào ni, ɲe ko Yesù yè e si jà.»

22 Kàràndzin neè ɲàn, nìi tsoo Andère, Fìlipù yè b'a jaa dè tɔ̀ ra. Tà shɔ̀ùn, è fiɛ̀ sa yeè dzi Yesù tsɛ, y'à jaa dè à ra.

23 Yesù yè dzin è ra tɔ̀un ci: «Adamà dziàn yè dɔ̀n e blabee doùn, tɔ̀ watsi wɔu dòònun.

24 Sààben fyan, mun nì ci e ra, fɔ gèdzian yè ji dzù rɔ̀n a ci gè saunma, è kòmànà xe bo. Tɔ̀ ma fa fyeu à toò tɔ̀ rii tsuru soo ke. A ye ji dzù rɔ̀n è xe bo, à dzin gir'lì wɔɔ̀.

25 Mòò riì sɔ̀ɔn e xɔɔn kpɛyn, tɔ nà fɔn à ɲan. Ŋà, mòò riì na sɔɔn e xɔɔn kpɛyn mìin dziɲan ree doùn waa, tɔ̀ nà à màrà tsùù jaamabe dziù dòbɛɛ raa.

26 Mòò riì ye ba n'a re w'e faagoò fa mun ne, fɔ è gban mun kpɛyn. Tɔ̀ tsuru, mun ye ba ni min niì, mun ne faagoofadzian sa nà bà ni mɔn. Mòò riì ye ba ni faagoò rà mun ne, Fà Ŋaabla nà blà wɔ tɔ̀ ɲan.

27 Dòònun, mun akiri gbiimaɔ̀n, mun to nà dzi fee rìì dè ? Min dzin Fà Ŋaablà ra, n tsi nèe byɛnbe watsi ree ra rii gbɛ ? A jɔɔn to fa dzi bo nìi fa, tɔ̀ byɛnbee rìì mun nà kuàn è nà suu fɔ tɔ̀ watsia rà.

28 Fà Ŋaablà, a tsoò blàbe.»

Tɔ̀un, vu sɔn yeè myɛ̀n, è bo Ŋaablaxɔɔ̀ rà ci: «Mun yè n tsoò blàbeu nòn, mun to nà à blàbe kɔn yeu.»

29 Jàma nìi na ni mɔn, yè bà vu rèe myɛ̀un, twɛy na à siɛ̀n, ci ŋaa rìì kpìniɔ̀n. Swey na dziàn ci: «Mɛ̀rɛ̀kɛ rìì goomaɔ̀ à ka.»

30 Ŋà, Yesù yè dzin è ra ci: «Vu rèe na boo, ci mun nì y'à myɛ̀n dɛ, ŋà, à boo ci ye rìì y'à myɛ̀n è geren mun tsɛ.

31 Àwà dòònun, dziɲan modzian kitsi watsi wɔu. Ɔ̀ɔn, Sùtana, dziɲaan kùntsiɛ̀ kaa watsi wɔu dòònun.

32 Min na ɲansen fu jìran nɔ̀n watsi riì bwèy, mun nà mòdzian sapɛ lawɔ n tsɛ.»

33 Àwà, Yesù nà san saun'n kur'liì rà, à na tɔ̀ rii kpàdèe tɔ̀ tsuru.

34 Jàmaà yè dzin à ra ci: «Sàrìyaa nìi kàraun ɲe ra, tɔ̀ rii yɛ, ci Ŋaablà Jaara Modzìàn nà to tsùù jaama kudɛyn. À to bàa dzùrù, w'e dzin ci fɔ Adamà dziàn yè ɲansen fu jìran nɔ̀n ? Tɔ̀ Adamà dziàn yɛ̀r'la to tsì rii ?»

35 Yesù yè dzin è ra tɔ̀un ci: «Vyevyeè kpɛ̀yn ni ye fi ŋe, ŋà, tɔ̀ na watsi gbaan goo dɛ. Vyevyeè ni watsi riì bwèy, ye jìɛ̀ fa tɔ̀ bwèy, sànko, tsitsiɛ̀ mà nà bàràma e ɲan waa, kàtsu mòò riì jìɛ tsitsiɛ̀ ɲàn, tɔ̀ na à tɔ̀ wo bèe min niì waa.

36 Vyevyeè ni e fi watsi riì bwèy, ye ɲɛn à ra, sànko, e sa yeè bà vyevyee dzin ì.»

Yesù twɛy gooma reè dè dòu watsi riì bwèy, è bo è tààkuùn, è bè e mɛnɛn è jɔɔn.

37 Àwà, Yesù rè tàànmàshɛn kabagooma giri fauma ko e raà sa è jaa ra, tɔ̀ pɛn na à to yè ɲɛn à ra.

38 Tà tsuru, Ŋaablà re kɛɛra Esayì na nìi dè dɔɔ̀n bɔrɔɔ, tɔ̀ yeè bo e shi tsɛ, nìi yɛ ci:

Tsìfaà, nìi myɛ̀un è bo ɲe dzu, tsì rii ɲɛun tɔ̀ ra ?

Wo to y'à ɲan fàan kpàdèu tsì rii là Tsìfaà ?

39 È fa ni dzi ɲɛn à ra kùn nìi nà waa, Kɛɛra Esayì tɔ̀ rii dèu nèe tsuru kɔn ci:

40 Ŋaablà yeè è jaa rèè tsyeeŋ, à yè è dùsùkuan xɔbe,

sànko, è jaa rèè mà jɛ̀y fa waa, è akir'lèè tsu mà fàànmùnya tarà waa.

Tɔ fau, sànko è mà nà to e lakere yè e tsiì wò ra, wò yeè è tsi waa.

41 Kɛɛra Esayì tɔ̀ dèu, kàtsu à na Yesù blàbee jaɔ̀ rìì, è bà na à gooma deè.

42 Tɔ̀ to y'a tàrà, arì dzyèèsìbee mòdzin neè jɔɔndzin neè ɲàn, giri na ɲɛɔ̀n Yesù rà. Ŋà, Faridziɲɛn rèè jɔɔn shiɲaanbeè kamà, à goomaa naà dzia bo da waa, tà boshɔ̀ùn, a naà kaa waajibi fa gbaà tsɛ.

43 Mòdzian yè blà wɔ è ɲan, tɔ̀ na dzi è ra Ŋaablà raà mà.

44 Àwà, Yesù yè nà sɛ̀ɛ̀y nèe tsuru ci: «Mòò riì ye ɲɛn mun na, à na baà ɲɛɔ̀n mun bàsɔùn nà dɛ, ŋà, mòò riì mun ka naɔ, à bàa ɲɛɔ̀n tɔ̀ sa ra.

45 Mòò riì ye mun jà, tɔ mun kabaà rìì jàu.

46 Mun naɔ̀ vyevyee rìì dziɲan tsiɛ doùn, sànko mòò riì ye ɲɛn mun na, tɔ mà to tsùù tsitsiɛ̀ ɲàn waa.

47 Mòò riì ye mun ne goomaa myɛ̀n, à ma à shi jiì, tɔ̀ tsìfa kitsia na ni mun suun dɛ, kàtsu mun na naɔ̀ kitsi kunun dziɲan modzian tsɛ waa, ŋà, mun nà kuàn nì, min nà dziɲan modzian tsi e re gooɲaan neè rà.

48 Mòò riì ye e nɔn mun ne, à mà e tsiì mun ne gooma reè rà waa, tɔ̀ tsìfa kitsibaà ni nòn. Mun gooma niì taki deu dɛ, tɔ̀ rii nà tɔ̀ tsìfa raa kitsia kùnùn tsìɛ̀ sii sèè.

49 Tɔ nà fa, kàtsu mun nìi dèu, tɔ̀ na boo mun yɛ̀r'la ɲàn dɛ. Ŋà, Fà Ŋaablà riì mun ka naɔ, tɔ̀ ci min nìi dè, tà ko min nìi kàràn mòdzian nà, à tɔ̀ rii shi jiìkɔɔn mun ne.

50 Mun to y'à tɔ̀ cɔ, ci Fà Ŋaabla kàr'nìi wɔɔ mun suun, tɔ jaamabe dziù dòbɛɛ goomaa nì. Fà Ŋaablà to nìi deò mun na, mun sa tɔ̀ soo rìì kàr'na mòdzian nà.»