Jean 10

Yesù ci wò rii sàà gbaà dɔ̀nmà dziɛ

1 Àyìwà, Yesù yè dzin ci: «Sààben na, mun nì ci e ra, mòò riì sàà gbaà dɔ̀nmà dziɛ toò, è bè tèyn gàne kpɛrɛ ɲan è dɔ̀n sàà gbaà doùn, tɔ̀ tsìfa shɔn nì, è bà gookoronfabaa.

2 Ŋà, mòò riì dɔ̀ɔn dɔ̀nmà dziɛ takia rà, tɔ̀ rii sàà rèè kplatsuubaà yɛ̀r'la.

3 Sàà gbaà kplatsuubaà fùa, tɔ̀ yeè dziɛ̀ san sàà rèè kplatsuubaà rè, sàà rèè y'à vuà myɛ̀n. È raa sàà rèè sapɛ kir'là e tsoò rà tɔ̀un, è bo è ka da rɔ̀n.

4 A ye e raa sàà rèè sapɛ bo dò watsi riì bwèy, è bè e ji è jɔɔn, sàà rèè yè e gban à kpɛyn, kàtsu y'à vuà tɔ̀.

5 Ŋà, mòò riì yè è mà tɔnɔn, è na e gbaàn tɔ̀ kpɛyn byɛ. È vwɛ̀ɛ rìì, yè e dan gbànbe à ra, kàtsu, è na mòò kpɛrɛ ì vu tɔ̀ waa.»

6 Yesù yè tɔ̀ gooma bɔɔ̀ ka tàlen ban e lamyɛ̀nbaa rèè rè tɔ̀ tsuru. Ŋà, à kàjaa riì kaà gooma ree doùn è re, è akiri na tɔ̀ jà waa.

Yesù ci wò rii dzwɛka kplatsuubaa wùɔ

7 Tà shɔ̀ùn, Yesù yè dzin kɔn ci: «Sààben na, mun nì ci e ra, mun nì sàà gbaà dɔ̀nmà dziɛ.

8 Nìì reè sapɛ nàu mun jɔɔn, twɛy shɔn ì ko gookoronfabaa ì rìì. Ŋà, sàà rèè na e toro wɔ è re waa.

9 Mun nì dɔ̀nmà dziɛ, mòò riì ye dɔn mun ne, tɔ nà tsi. À tsìfa nà dɔ̀n, è bo e saoma, è dzii ra gaa ɲwɛyn jà.

10 Shɔɔ̀n nà kuàn na pɛn waa, è shɔnbeè rìì fa, è vui fa, è baragoò fa. Mun nà kuàn nì yɛ mòdzian yè jaamabee dziù tàrà, y'à tàrà, fɔ è jaa yè bè cɛn.»

11 Yesù yè dzin kɔn ci: «Mun nì dzwɛka kplatsuubaa wùɔ. Dzwɛka kplatsuubaa wùɔ yè e xɔɔn sìan e re sàà rèè kamà.

12 Ŋà, mòò riì sàà rèè kplatsuɔ sàr'là ma, tɔ̀ na è kplatsuubaa taki takià waa, sàà rèè to na à raa waa. Àwà, tɔ̀ ye kparan nakɔɔn ja nìi tsuru, tɔ̀ y'a vwɛ̀ɛ̀ykɔɔn, è sàà rèè bàto. Kpar'na kuin faa tɔ̀un è sàà rèè jee.

13 A vwɛ̀ɛ tà tsuru, kàtsu à faagoo rèe faa sàr'lì kpɛyn, sàà rèè, twɛy na à vyɛ̀ɛ goo waa.

14 Mun nì dzwɛka kplatsuubaa wùɔ. Min ne sàà rèè tɔ̀, mun ne sàà rèè yè bà mun tɔ̀.

15 Tɔ̀ ni a ci Fà Ŋaablà mun tɔ̀ nìi tsuru, mun sa yeè bà à tɔ̀. Mun yè n xɔɔn sìan n ne sàà rèè kamà.

16 Sàà kpɛrɛ ì ni mun ne, nìì reè na ni nèe sàà gba rèe doùn waa. Fɔ min bè twɛy sa xɔ na. È nà mun vuà myɛ̀n. Tà doùn, è sapɛ nà bà sàà kuru soo, kplatsuubaa soo yeè bà ni è ka.

17 A y'a jà mun goò dzi Fà Ŋaablà ra, à nèe goo rèe rìì kamà: min tsiɛ, min xɔɔn sìn, min kòmànà à sèè tsi.

18 Mòò pɛn na dzia mun xɔɔn bo mun na waa, à kuà mun nì ɲàn, m'a sìn. À dzi ni mun na m'a sìn, à dzi yeè bà ni mun na m'a sèè tsi. Tɔ dzugooma xɔù, mun nìi tàra bou n Fà Ŋaabla re.»

19 Twɛy gooma reè kamà, dzyèèsìbee mòdzin neè yè tara kɔn.

20 Giri na dziàn è ɲan ci: «À kweykɔɔn, è bà fàkɔɔn ! Feera ye yè bà e toro wɔɔ̀ à re ?»

21 Swey yè bà dziàn ci: «Nèe na kweykɔɔn gooma ì dɛ ! Kweykɔɔn dzia jaana ì jaa dzii san ɔn ?»

Yesù gooma niì dèu, à y'à to Ŋaablà re gbà blàa sɛr'là koùn

22 Àyìwà, dzyèèsìbee mòdzin neè na dɛ̀rɔɔ, yè Ŋaablà re gbà blàa goo rèè sɛrɛ sɔn faa Yerusalɛmùn mùnkɛɛ̀ watsi rɔn.

23 Tɔ̀ sɛr'là watsi wɔumaà, è ni à goo rèè rà, gàne nìi kir'là Ŋaablà re gbà blàa fɔɔn doùn, ci màsa Sɔ̀ɔ̀mɛyn naa fààkɔ̀r'laà, Yesù na e ɲantsyere tsyeree mɔn.

24 Àwà, à ni tɔ̀ ra, Dzyèèsìbee mòdzin neè yè nà à laguru, yè dzin à ra ci: «Wo ni ɲe akiri tsùù fɔ watsi kɛn nèe goo rèe ka ? Wo rìì ye ba Ŋaablà Jaara Modzìàn, à dè fyɛ mùn na.»

25 Yesù yè dzin è ra ci: «Mun y'à dèu ye ra nòn, ŋà, ye na ɲɛɔ̀n à ra waa. Mun goo nìì reè faa n Faà tsoo ra, twɛy rìì mun shɛɛrɛbe faa.

26 Ŋà, ye na ɲɛɔ̀n à ra waa, kàtsu ye na mun ne sàà rèè kuru waa.

27 Mun ne sàà rèè mun vuà myɛ̀ɛn. Mun yè è tɔ̀, yè bà e gbaàn mun kpɛyn.

28 Mun jaamabe dziù dòbɛɛ sìan è ra, bara na ni è mà waa, mòò pɛn to fa dzi è kun bo mun suun waa.

29 Mun Fà Ŋaablà niì yè è sìun mun na, tɔ blà gè sapɛ ma, mòò pɛn to na dzia è kun bo mun Fà Ŋaablà suun waa.

30 Mun ko n Fa Ŋaablà, ɲe sa wò soo rìì.»

31 Dzyèèsìbee mòdzin neè yè kpàa ì sen kɔn, ci ye nà Yesù dzyɛn vu.

32 Yesù yè dzin è ra tɔ̀un ci: «Mun goowùù wuu giri fau ye jaa ra n Fa Ŋaablà re fa ɲan. Ye to mun dzyɛn vua twɛy goo rèè kɛ̀nma ni soo kamà ?»

33 Dzyèèsìbee mòdzin neè yè dzin à ra ci: «Ɲe na wo dzyɛn vua goowùù fauma kamà dɛ, ŋà, ɲe wo dzyɛn vua, kàtsu, wo Ŋaablà tsoo bar'la, wo mòdzìn màànàkɔɔn yè bà a yɛrɛ baɔ̀ Ŋaablà.»

34 Yesù yè dzin è ra ci: «N ci à sɛbɛɔ̀n ye re sàrìyaa kìtaabuà min sɔn ci:

Mun Ŋaablà ci ye ŋaabla ì ?

35 Màa tɔ̀ ci nìi deò Ŋaablà re goomaa doùn, tɔ̀ na dzia mɛɛy waa. Ŋaablà re gooma ree to sìun nìì reè rà, gooma ree doùn, Ŋaabla twɛy kiriɔ ŋaabla ì.

36 Tà doùn, Fà Ŋaabla mun nìi boo e Jaara, è mun ka na dziɲaan doùn, ye dzia dzin dzùrù, ci mun Ŋaablà tsoo bar'la, kàtsu mun dziun ci mun Ŋaablà Dzin Kpir'la ?

37 Mun ma ba n Fa Ŋaablà raa goo rèè faa, e maà ɲɛn n na waa.

38 Ŋà, min ba twɛy goo rèè rìì faa, e kɛnsɛɛn ma ɲɛn mun na, ye ɲɛn twɛy goo rèè rà kɛ̀, sànko y'a tɔ̀, ye ɲɛn à ra, ci mun Fà Ŋaabla ni mun ɲan, min bà ni à ɲan.»

39 Àwà, tɔ dèu min niì, yè fù kɔn, ci ye nà Yesù kun, ŋà, è bo è si tsɔ̀ rè, è geren.

40 È dɔ̀n be, è bè to Yuridɛn baa kɛ̀yn, Mòdzìn Jààràfoobaa Yùxanà na mòdzian jaara foo min niì dan, Ŋaablà re shia goo rèè rà.

41 Mòdzian giri yè bè à re mɔn kɔn, yè bà dziàn ci: «Mòdzìn jààràfoobaa Yùxanà na kabagoo goo pɛn fa waa, ŋà, à goo o goo dèu nèe kpir'lee tsɛ, à sapɛ bàu sààben.»

42 Tɔ̀ gàne rɔ̀n mɔn, mòò giri yè ɲɛn Yesù rà.