Bənɨ bə Klistu lə kɨ ji nɨ bənɨ bə kɨŋgbooŋ'ə
5
Nɨ bə na ji beŋ bə Nyɔ lə bə yu na laŋkɨ kɨtso, bə kɨ ji nɨ yu. 2 Bə kɨ ji bə kɨnse diəŋ nɨ Klistu nə̀ laŋə bɨ ba nya gwɨ yihi ndzɨ bɨ. Kɨnya kɨhɨ kɨŋ nə̀ bintɔfiɛ bi nə̀ tɔfiə ntsɔŋfu yi ndzeŋe Nyɔ lɨ.3 Biɔŋ nɨ ndzenɛ bə fiə wu kɨnyənə lə chi ma yəsɨ yiyə, na jimiɛhɛ lə bə́ kɨ makɨ bi bəŋ ntɨŋ, ndzɨ biɔŋ biŋ na kə bi naji lə bi kɨ bambi bənɨ bə Nyɔ lə ntɨŋ. 4 Fi kə jimiɛ tɨ lə nchanyɛ yi kɨnyənə bə nchanyɛ yi mfidi ma ŋkə́ yi kɨlɔlɔ lə kɨ foto nə bəŋ dze. Bə kɨ nya kwa ji kɨmbafə bə Nyɔ.
5 Bə kkə̂ yɛyi lɨ lə miɨ wu ndzenɛ makə wu na fɨtɨ kɨnyənə makə wu na yɨtɨ yəsɨ, naji ɨ yu keŋkɛ kə dɨ buŋkuŋ bu bə Klistu lə bɔ bə Nyɔ ntɨŋ. Miɨ wu yəsɨ yiyə ba yu kɨ dze biɔŋ chi nyɔ wuhu. 6 Bə kə̂ bɨmiə lə miɨ fukiɛ bəŋ bə nchanyɛ yi kɨlɔlɔ tsukɔ biɔŋ biŋ wɨ. Bə kkə̂ lə na biɔŋ biŋ bi ba bi kɨ fɨtɨ shəŋ lo Nyɔ bə bənɨ bə na jikə wɔkɔhɔ yu. 7 Bəma, bə kə kɨ tɛshɛ gwɨ bə ba bənɨ. 8 Fiəfiə nə̀ ji bə ji bənɨ bə kɨjuwɔ lə. Bəmanɨ, fɛŋ nɨ bə na ji Baba ntɨŋ, bə na ji bənɨ bə kɨŋgbooŋ'ə. Bə kɨ ji nɨ bənɨ bə kɨŋgbooŋ'ə. 9 Fiɔŋ fi kɨŋgbooŋ ba fi kɨ ba bə fi na fiə wu ndzeŋe bə wu diəŋ ma wu na donchɛ kɨyɛyi. 10 Bə dîɔ lə bə kkə̂ fiɔŋ fi ba fi kɨ ndzeŋe Baba lɨ. 11 Bə kə̂ chɛsɛ kaŋ biɔŋ bi kɨjuwɔ lə biwa ntɨŋ. Bə kɨ shafiɛ bi ŋgbooŋ. 12 Na fiɔŋ fi yaa lə tɨmo bə nchanyɛ tsukɔ biɔŋ bi jimə ba bənɨ na fɨtɨ biŋ bunyələ. 13 Bəmanɨ fiɔŋ fichi fi kɨŋgbooŋ na tsalə fi wɨ ba fi kɨ yinshi ŋgbooŋ, 14 ndzɨ fiɔŋ fichi fi na yinshi ba fi kɨ ji kɨŋgbooŋ. Fia na fiɔŋ fi fəə lə bə́ kɨ tɨdi lə,
“Wə wu na me, dzâkɔ!
Dzâkɔ nə kkpə lɨ, kɨŋgbooŋ kɨ Klistu lə tsâlə wə wɨ.”
15 Bəma, bə tɨ̂ŋ ŋkɨ chi bə na gəndə. Bə kə kɨ ji nɨ bəŋfidi. Bə kɨ ji nɨ bənɨ bə na ji bə bufɨ. 16 Tsa yi bə' keŋkɛ dzə yi fənə fiɔŋ, bə ŋə̂ŋ lə tsa ya kə̂ chɛkɛ kɨlɔlɔ, ndzɨ díɔ yiŋ fɛŋ na díɔ yibiə. 17 Bəma, bə kə kɨ ji bəŋfidi. Bə fɨ̂ŋfə ba kkə fiɔŋ fi Baba na se lə bə kɨ fɨtɨ. 18 Bə kə kɨ mu mbiŋ bə chinchi, fiŋ na fiɔŋ fi na bɨsə bənɨ. Bə yî ji bə Kɨn'yɨntɨ kɨ Ntsaaŋ. 19 Bə kɨ chânyɛ bə gwɨ́ yənɨ yɨ́mbɨ ntɨŋ, yi na foto nə kɨŋwatɨ kɨ Kɨŋkuntə lə ntɨŋª, bə yɨ́mbɨ yidɔ yi kɨŋkuntə lə ma yɨ́mbɨ yi Kɨn'yɨntɨ kɨ Ntsaaŋ nya bəŋ. Bə kɨ tɨtɨ manɨ bə kuntə Baba shəŋ yɛnɨ ntɨŋ. 20 Bə kɨ nya kɨmbafə bə Taa waha Nyɔ tsá chi, fiɔŋ fichi ntɨŋ ə ba nə yɨ wu Baba waha Jisɔs Klistu lə lɨ.
Bitɨfiɛ bi bəkansɨ lə bə bənɨnsə bəbɔlə
21 Bə nyâ gwɨ́ yɛnɨ bə miɨ chi nə bəŋ ntɨŋ ə ba nə kɨŋkuntə kɨ bə na keŋkɛ Klistu wɨ. 22 Bəŋ bəkansɨ, bə nyâ gwɨ́ yɛnɨ bə bənɨnsə bɛnɨ nɨ bə nya bə Baba, 23 ndzɨ nyunso na fo wu kpansɨ lə, diəŋ nɨ Klistu na ji fo wu ntɛshɛ yi bənɨ bə kɨmbɨŋ'ə, ntɛshɛ ya ji gwɨ yihi, ɨji yu kɨbɛɛ wu na ji Nchitə wu ntɛshɛ ya. 24 Bəma bəkansɨ bə bənɨ lə naji lə bɔ kɨ nya gwɨ́ yibɔlə bə bənɨnsə bəbɔlə biɔŋ bichi ntɨŋ diəŋ nɨ ntɛshɛ yi bənɨ bə kɨmbɨŋ'ə nya gwɨ yi bɔ bə Klistu. 25 Bəŋ bənɨnsə, bə kɨ laŋkɨ bəkansɨ bɛnɨ diəŋ nɨ Klistu nə̀ laŋə ntɛshɛ yi bənɨ bə kɨmbɨŋ'ə ba nya gwɨ yihi ba kkpə ndzɨ yi. 26 Yu nə̀ nya gwɨ yihi bə mfə lə ntɛshɛ ya kɨ tsalə, nɨ yu nə̀ wwɔɔ yi bə ŋgɔŋ ma bə diɛ yihi. 27 Yu nə̀ fə manɨ fə yu dzɛɛ yi yu wɨ nɨ kpansɨ wu na ji bə kɨyunu, yu jikə jimiɛ bə finonso fidɔ yu wɨ, yu ji mfiuuŋ, yu jikə jimiɛ bə yidi, yu tsalə, yu jikə jimiɛ tɨmo bə ŋgbɔ yidɔ yu wɨ tsəsɨ. 28 Na diəŋ nɨ bənɨnsə naji lə bɔ kɨ laŋkɨ tɨ bəkansɨ bəbɔlə nɨ bɔ na laŋkɨ gwɨ́ yibɔlə. Ɨ miɨ na laŋkɨ kpansɨ, kɨjilə yu na laŋkɨ ji gwɨ yihi. 29 Miɨ wudɔ na sɨŋ su wu ba yu kɨ lo bə gwɨ yihi. Yu ba yu kɨ chɨyi yi buchɨyɛ, yu tɨntɨ ŋkɨ bə yi buni. Na tɨ diəŋ nɨ Klistu na fɨtɨ bə bɨ bə na ji ntɛshɛ yi bənɨ bə kɨmbɨŋ'ə, 30 ndzɨ kə na ji biŋuni bi gwɨ yihi lə. 31 Na fiɔŋ fi fi na ji bubɔndɔ Kɨŋwatɨ kɨ Nyɔ lə ntɨŋ lə,
“Na ndzɨ fiŋ fi nyunso ná kɨ shɨkɨ tɨɨ bə mɛni,
yu gəŋ tɛshɛ bə kpansɨ,
bɔ bəfɛ tsu miɨ miu.”