Bitɨfiə bi na gɨntɨ beŋ wɨ bə bəchɛ bɔ
6
Beŋ, bə kɨ woko bə bəchaa bə bəmma dzə́ yi Baba lə ntɨŋ, ndzɨ fiŋ na fiɔŋ fi diəŋ fi naji lə bə kɨ fɨtɨ. 2 Kɨlaŋ kɨ Nyɔ lə na tɨdi lə,“Kɨ kuntə chaa bə mma”,
“Miɨ wu na galɨ kɨlaŋ kɨŋ, yu jiwa ɨ yu wɔ buni
ba keŋkɛ kɨjimiɛ kɨ dəŋfɨ mbi no ntɨŋ.”
4 Bəchɛ beŋ, bə kə kɨ fɨtɨ lə shəŋ kɨ lo beŋ bɛnɨ. Bə kôso bɔ ba lɨmə bɔ, bɔ kɔ̂ bitɨfiə bi Baba lə ntɨŋ.
Bitɨfiə bi na gɨntɨ bəŋfia wɨ bə bəchɛ bɔ
5 Bəŋfia, bə kɨ woko bə bənɨ bɛnɨ bəbəŋ mbi no ntɨŋ bə lete bɔ bə nya bɔ kɨŋkuntə. Bə kɨ woko bɔ bə shəŋ yɛnɨ chi diəŋ nɨ bə na woko Klistu. 6 Bə kə kɨ fɨtɨ manɨ kwa tsa yi yəsɨ yibɔlə na ji bəŋ wɨ fə gwɨ kɨ ndzeŋe bɔ bə bəŋ. Bə kɨ fɨtɨ ji nɨ bəŋfia bə Klistu lə bə na fɨtɨ ji fiɔŋ fi Nyɔ na se bə shəŋ yibɔlə chi. 7 Bə dze kɨ nɨntɨ bɔ lɨ, bə kɨ nɨntɨ bə kɨnlaŋ diəŋ nɨ bə na nɨntɨ Baba lɨ, ə jikə jimiɛ miɨbəwəŋ'ɨ kə. 8 Bə kɨ nɨntɨ bə kkɨ lə fiɔŋ fi ndzeŋe fichi fi miɨ na fɨtɨ, yu ná keŋkɛ lɨ tɨ fiɔŋ fi ndzeŋe nə Baba lɨ, se lɨ kɨ ji mfia, makə yu jikə jimiɛ mfia.
9 Bəŋ bəchɛ bəŋfia, bə kɨ keŋkɛ bɔ dzə́ yi ndzeŋe ntɨŋ, bə kə kɨ lesɛ bɔ. Bə kɨ kkɨ lə bəŋ bə bɔ bəchi na ji bə miɨ wubəŋ miu wu na ji bɔ́. Nə yu lɨ, kɨchichi jimiɛhɛ.
Biɔŋ bi dzoŋ'ə bi Nyɔ nya bɨ
10 Bə ŋkanə, mɨ ŋkɨ ntɨdi bə bəŋ lə bə lə̂ŋ ŋkɨɨŋ Baba wɨ, bə kɨ yɨmi ji buŋga buhu bubəŋ wɨ. 11 Bə dɔ̂ŋ biɔŋ bi dzoŋ'ə bichi bi Nyɔ nya bəŋ fə bə ləmiə ba tunɔ dzoŋ bə Tsə dzə́ ntɨŋ chi yi yu na wɨdi yi ntɨŋ. 12 Bə kkə̂ lə kə na diɔhɔ ji bə bənɨ bəwəŋ. Kə na dio ji bə biɔŋ bichi bi na ji bə buŋga bə bubəŋ, bi na sakɨ mbi wu kɨjuwɔ no ntɨŋ. Biɔŋ biŋ na bin'yɨntɨ bibiə bichi bi ji bidɨ bi bɔ́. 13 Bəma, bə dɔ̂ŋ biɔŋ bi dzoŋ'ə bichi bi Nyɔ nya bəŋ, fə tsa yi kɨ ji díɔ yibiə ya ntɨŋ, ɨ bə ləŋ ŋkɨɨŋ nɨ bə ná kɨ ji ɨji bə' fə fiɔŋ fichi lə bə ləŋ ŋkɨɨŋ. 14 Bəma, bə lə̂ŋ ŋkɨɨŋ. Bə dzê kɨyɛyi kɨ kɨ ji nɨ kɨtsa kɨ bə dɔŋɔ chi, ba dze fiə wu diəŋ wu kɨ ji nɨ kɨtsu kɨ bə dɔŋɔ ba kusə gulu wɛnɨ su. 15 Bə fə̂ gwɨ lə bə kɨ tɨfiə shɔŋ yi ndzeŋe yi na ba bənɨ bə budə, fiŋ kɨ ji nɨ bikpa bi dzoŋ'ə bi bə dɔŋɔ. 16 Bə n'yinə su, bə gâ kwa shəŋ Klistu wɨ, fiŋ kɨ ji nɨ ŋkə wu dzoŋ wu bə keŋkɛ kaŋ. Na yu wu bə jiba ɨ bə baa bisɔ bi miɨ wu bubiə wa na liyi bəŋ wɨ bi ba bi doko. 17 Bə dzê tɨ mfɔ yi fo yi bə na ji bə yi, yi kɨ ji nɨ kɨfulɔ kɨ dzoŋ'ə kɨ bə chisə, ba dze tɨ mbiəlɨ wu Kɨn'yɨntɨ kɨ Ntsaaŋ na nya, ə ji diɛ yi Nyɔ.
18 Nə fiɔŋ fichi ntɨŋ, bə kɨ tsɨsə tsá chi, bə biəlɨ chi Kɨn'yɨntɨ kɨ Ntsaaŋ na donchɛ, bə kɨ tsɨsə bə bi fiɔŋ fichi fi bə na se nə Nyɔ lɨ. Bə fiŋfi bəŋ fi, bə kɨ tɨntɨ ŋkɨ, bə kansɨ shəŋ tsá chi, bə tsɨsəə, bə nendee Nyɔ bənɨ bə Nyɔ lə bɨŋ bəchi. 19 Bə kɨ tsɨsə tɨ bə mɨ lə tsa yi nna ŋguyi bifuŋ biɛŋ lə nchanyɛ, Nyɔ nya mɨ fiɔŋ fi chanyɛ, ŋkɨ nchanyɛ nle sɨŋ tsukɔ shɔŋ yi ndzeŋe yi Nyɔ wɨ yi na ji bunyələ. 20 Na shɔŋ nyi yi nna nji mfíaŋ ntɨŋ ndzɨ yi chi miɨ wu na ji yəsɨ wu Klistu lə. Bə kɨ tsɨsə lə tsa yi nna nchanyɛ diɛ nyi, ŋkɨ nchanyɛ yi chi nna nji lə nchanyɛ nle sɨŋ.
Kɨfəŋgbɨŋ
21 Tikikus ŋgwɨŋ waha wu shəŋ wu na nɨntɨ Baba lɨ bə shəŋ yihi chi jiwa yu tə bəŋ fiɔŋ fichi fi na tsukɔ mɨ wɨ, fə bə kkə tɨ chi nna nji ma fiɔŋ fi nna mfɨtɨ. 22 Mɨ mfaŋ yu bəŋ'ɨ bə kɨŋgɔmbiɛ lə yu bâ fə bə kkə̂ nɨ kə na ji ba koso shəŋ yɛnɨ.