Ɛfɛsɔ 4

Bənɨ bə Klistu lə kɨ ji fiɔŋ'ɨ fimo

Bəma, mɨ Pɔl wu nna nji tsɔŋ yi buŋfia ntɨŋ ndzɨ Baba Jisɔs, nna nende bəŋ lə bə jîŋ kɨjimiɛ kɨ na kwətsə, kɨ Nyɔ nə̀ bəndə bəŋ lə bə kɨ ji kɨ ntɨŋ. 2 Bə dzê gwɨ́ yɛnɨ koso ba kɨ ji bə budə, bə kânsɨ shəŋ. Bə kɨ ji kɨnse ntɨŋ bə gwɨ́ yɛnɨ. 3 Bə kɨ dio kɨtso lə bə kə̂tə fiɔŋ'ɨ fimo fi Kɨn'yɨntɨ kɨ Ntsaaŋ nə̀ ba bəŋ bə fi chi bə na ji budə ntɨŋ ɨji bu bu na tɛshɛ bənɨ. 4 Gwɨ yi bənɨ bə kɨmbɨŋ'ə na miuŋkpaŋ, Kɨn'yɨntɨ kɨ Ntsaaŋ ji kɨmo. Na tɨ diəŋ nɨ fiɔŋ fi Nyɔ nə̀ bəndə bɨ lə kə kɨ jiŋgə fiə fi wɨ na ji fimo. 5 Baba ji miu, kɨmbɨŋ ji kɨmo, nchɛse yi bə́ na chɛsɛ bənɨ biɔ ji tɨ miu. 6 Nyɔ na ji miu, əji yu Taa waha bɨ bəchi. Yu na ji biɔŋ bichi bɨŋ, yu nɨntɨ bɨ bəchi ntɨŋ, yu ji tɨ bɨ bəchi ntɨŋ. 7 Fi na ji tɨ lə Klistu nə̀ donchə shəŋ yihi yi ndzeŋe bə miɨ chi nə bɨ ntɨŋ, yu nya miɨ chi kɨhɨ kɨnya biəlɨ chi yu' fɨkə miɨ wa. 8 Na nɨ bə́ nə̀ bɔndɔ Kɨŋwatɨ kɨ Nyɔ lə ntɨŋ lə,

“Tsa yi yu nə̀ bəndə ba gəŋ bɔ́,

yu nə̀ fə lə bəŋfia kɨ biəlɨ yu.

Yu nə̀ nya bənɨ binya.”

9 Bə ntə lə, “Yu nə̀ bəndɨ ba gəŋ bɔ́” na lə la? Fi na donchɛ lə yu nə̀ shi tɨ ba gəŋ sha nəkoso.^ª 10 Bəma, yu wu nə̀ shɛɛ wa sha nəkoso nə̀ tɨ yu wu nə̀ bəndə ba yasə bɔlu chi gəŋ bɔ́, fə bidɨ bichi yisə bə yu. 11 Na yu tɨ wu nə̀ nya bənɨ binya. Yu nə̀ nya bə bədɔ lə bɔ kɨ ji beŋ buhu bə shɔŋ'ə, yu nya bədɔ lə bɔ kɨ tɨdi biɔŋ bi bɔ na woko Nyɔ chanyɛ, bədɔ kɨ gəndə bɔ tɨdi shɔŋ yi ndzeŋe yi Nyɔ, bədɔ bə na jiŋgə ntɛshɛ yi bənɨ bə kɨmbɨŋ'ə bɔ tɨfiə tɨ bənɨ. 12 Yu nə̀ nya binya biŋ fə yu lɨmə bənɨ bə Nyɔ lə, ɨ bɔ kwətsə bə nɨŋə nɨŋ yihi ba wɛyɛ gwɨ yi Klistu yi na ji ntɛshɛ yi bənɨ bə kɨmbɨŋ'ə, 13 gəŋ fɔ tsa yi bɨ bəchi kɨ ji fiɔŋ'ɨ fimo kɨmbɨŋ kaha ntɨŋ bə nə fiɔŋ fi kə na kkɨ tsukɔ Wɛŋ wu Nyɔ wɨ. Ɨ kə jiŋ manɨ, ɨ fi fə ɨ kə kɔ ba kwətsə tuŋ fəŋgbɨŋ ba kɨ ji tɨ nɨ Klistu kamo lɨ. 14 Bəma, ɨ kə tsukə jimiɛ nɨ beŋ bə ŋgwe yi bitɨfiə bi la ba bi kɨ finchə bə bɔ, bɔ gɨntɨ fiə bɔ tsu jiŋ nɨ fiɔŋ fi fiə na finchə bə fi, ɨ kə jikə kɨ bambi tɨ nɨ bənɨ bə bənɨ bə na lɔshɛ na gəndə bɔ fukiɛ bɔ bə biyɔndu bi bɔ bunsɔ. 15 Kə naji lə kə kɨ chanyɛ fiaha ji kɨyɛyi nə kɨnse ntɨŋ, kə ko dzə́ chi ntɨŋ lə kə ná kɨ ji nɨ Klistu wu na ji fo waha. 16 Na yu wu na fɨtɨ biŋuni bi gwɨ yihi lə bichi bi' tɛshɛ ba bɛsɛ yu wɨ kɨ ko, bi wɛyɛ gwɨ yihi kɨnse ntɨŋ chi kɨŋunə kɨmo na nɨntɨ yi kɨ nɨŋ, kɨdɔ kɨŋunə nɨntɨ yi kɨ nɨŋ buni.

Kɨjimiɛ kɨko bə kɨfa

17 Bə fɛŋ, yɨ wu Baba lə lɨ, nna nse lə nchanyɛ ba chi losɔ bəŋ lə bə kə kɨ bambi bə ji nɨ bənɨ bə na kkəhə Nyɔ. Biŋgɔmbiɛ bibɔlə ba bi kɨ ji kwa bi kɨlɔlɔ lə. 18 Bufɨ bubɔlə ji bu kɨjuwɔ lə, bɔ ji dzəbudə nə kɨjimiɛ kɨ Nyɔ na se wɨ, ndzɨ bɔ na kkəhə Nyɔ, ɨji ndzɨ bɔ na tɛti fo. 19 Bɔ nə̀ lasɨ bufɨ bubɔlə, bɔ ga gwɨ́ yibɔlə kɨnyənə kɨ ndzenɛ lə ntɨŋ, gwɨ́ yibɔlə shi kwa bə mfə yi biɔŋ bi kɨnyənə lə bichi.

20 Fiŋ na kə fiɔŋ fi bə́ nə̀ tɨfiə bəŋ tsukɔ Klistu wɨ. 21 Nna ŋgɔmbiɛ lə bə nə̀ wɔ tsukɔ yu wɨ ɨji bə́' tɨfiə tɨ bəŋ bə na ji yu ntɨŋ bə kɨyɛyi kɨ na tsukɔ Jisɔs wɨ. 22 Bəma, gwɨ́ yɛnɨ yiko yi biɔŋ bi kɨnyənə lə nə̀ bɨsə ya, bə sêdiɛ yi. 23 Bə yâshənɨ biŋgɔmbiɛ bi bə na ji bə bi, bi kɨ ji biŋgɔmbiɛ bifa. 24 Bə dɔ̂ŋ ji gwɨ́ yifa yi Nyɔ fəə yi kɨ boto yu. Nyi na gwɨ yi kɨjimiɛ kɨ yɛyi, kɨ ji kɨ diəŋ bə kɨ ntsaaŋ.

25 Fi kɨ ji lə, bə shə̂ biyɔndu, miɨ kɨ chanyɛ ji kɨyɛyi bə wəmɛni ndzɨ bɨ bəchi na ji biŋuni bi gwɨ miuŋkpaŋ lə. 26 Ɨ miɨ lɔ lɨ, yu dze tsa lə yu kə̂ fəkə bubiə. Yu kə̂ galə lə diɔ midi yu bambi bə bulo bwa. 27 Yu kə̂ nyaha dzə lə tsə be sɔ ntɨŋ. 28 Miɨ wu buyi shə̂ buyi ba kɨ nɨntɨ ji nɨŋ yi ndzeŋe bə kaŋ yihi fə yu keŋkɛ fiɔŋ fi yu jiwa ɨ yu kɨ chitə tɨ bənɨ bə fiəŋkə su. 29 Bə dzê tsa lə díɛ yibiə kə kɨ foto nə bəŋ dze. Miɨ kɨ chanyɛ ji fiɔŋ fi ndzeŋe fi naji ɨ fi wɛyɛ bənɨ nə fiɔŋ fi bɔ na fiəŋkə wɨ mɛ dɨ wula lɨ wu bɔ na ji, fə nchanyɛ yihi kɨ ba ji bə nchitə bə bənɨ bə na woko yi. 30 Bə kə kɨ fɨtɨ fiɔŋ fi naji ɨ Kɨn'yɨntɨ kɨ Nyɔ lə kɨ Ntsaaŋ kɨ dzudi gwɨ. Kɨn'yɨntɨ kɨŋ na ndonchɛ yi Nyɔ lə na yu wu na keŋkɛ bəŋ. Butsu ná ba kwətsə lɨ, ɨ yu kanə fosɔ bəŋ nə ŋgə ntɨŋ. 31 Bə tɔ̂fu shəŋ yi shi bə shəŋ yibiə bə shəŋ yilo bə bəŋkpanə ma bə mbɨsɨ yi yɨ́ yi bənɨ lə ma shəŋ yi yii. 32 Bə kɨ keŋkɛ ji fiə wu ndzeŋe bə shəŋ yi ndzeŋe bə miɨ chi. Ɨ miɨ fə bubiə bə wudɔ, miɨ wa gufiɛ yu diəŋ nɨ Nyɔ nə̀ chɛɛ Klistu wɨ ba gufiɛ mɛnɨ məmbiə.