Pɔl na miɨ wu bitɨfiə wu bənɨ bə na jimiɛhɛ Bəju
3
Nɨ Nyɔ fəə chiŋ biɔŋ biŋ bə bəŋ mɛni, mɨ ŋkɨ ntsɨsə bə bəŋ. Mɨ Pɔl nna nji tsɔŋ yi buŋfia ntɨŋ ndzɨ shɔŋ yi na tsukɔ Klistu Jisɔs wɨ, nnɨntɨ buŋfia buŋ ndzɨ bəŋ bənɨ bə na jimiɛhɛ Bəju. 2 Nna ndze lə bə' wɔ nɨ Nyɔ nə̀ sabiɛ ba nya mɨ nɨŋ lə nchanyɛ bə bəŋ tsukɔ shəŋ yihi yi ndzeŋe wɨ yi yu donchə bəŋ, 3 ɨji fiɔŋ fiŋ nə̀ sa fi ji bunyələ, Nyɔ' gu yəsɨ yɛmɨ. Mɨ ŋŋəŋ fi ba bɔndu tɨ tsəsɨ tsukɔ fi wɨ bə bəŋ. 4 Ɨ bə tanchɛ lɨ, ɨ bə ŋəŋ chi nna ŋkkɨ kɨ fiɔŋ fi na ji fiŋ bunyələ lə tsukɔ Klistu wɨ. 5 Fiəfiə Nyɔ nə̀ kə fəkə lə bəŋkɨkɨ bə fa lə kkə kɨ fiɔŋ fi na ji fiŋ bunyələ lə. Fɛŋ Kɨn'yɨntɨ kɨ Nyɔ lə ba ba donchɛ beŋ bə Jisɔs lə bə ntsaaŋ ma bə bənɨ bə na tɨdi shɔŋ yi Nyɔ, bɔ kkə. 6 Fiɔŋ fi bunyələ fiŋ na ji lə, ndzɨ shɔŋ yi ndzeŋe, bənɨ bə na jimiɛhɛ Bəju jiba bɔ keŋkɛ bishəŋə bi Nyɔ nə̀ galə bənɨ buhu lɨ. Bɔ na ji fiɔŋ'ɨ fimo bə Bəju, bikaŋə bi Nyɔ nə̀ kaa Bəju lɨ ji tɨ bɔ lɨ nɨ bɔ na ji Klistu Jisɔs ntɨŋ.7 Nyɔ nə̀ fə lə ŋkɨ nji wɛŋ wu nɨŋ wu shɔŋ yi ndzeŋe nyi. Nɨŋ nyi nə̀ kɨnya kɨ yu nə̀ nya mɨ ə ba nə shəŋ yihi yi ndzeŋe ntɨŋ. Yu nə̀ dze buŋga buhu ba nɨŋ bə bu mɨ wɨ, ba nya nɨŋ nyi lə ŋkɨ nnɨntɨ. 8 Nna nsɨ tɨmo nə miɨ wuntse lɨ nə kɨntsu kɨ bənɨ bə Nyɔ lə ntɨŋ kɨchi. Bəmanɨ Nyɔ nə̀ donchə mɨ shəŋ yihi yi ndzeŋe ba nya mɨ nɨŋ nyi lə ŋgəŋ ŋkɨ ntɨdi bə bənɨ bə na jimiɛhɛ Bəju shɔŋ yihi yi na tsukɔ bubəŋ bu Klistu lə wɨ bu na sɨŋ bə mfɨkənɨ. 9 Fi nə̀ ji manɨ fə bənɨ bəchi kkə bikaŋə bia ŋgbooŋ bi na ji bunyələ bu fiɔŋ fi Nyɔ wu nə̀ fəə biɔŋ bichi nə̀ nyələ biya lɨ biya lɨ. 10 Bikaŋə biŋ nə̀ ji fə kɨ ji tsa yi fɛŋ nyi ntɨŋ, ɨ Nyɔ chɛ ntɛshɛ yi bənɨ bə kɨmbɨŋ'ə ntɨŋ ba fə bənchinda bə bin'yɨntɨ bi na keŋkɛ buŋga bi sakɨ bidɨ bi bɔ́, ɨ bi ŋəŋ bufɨ bu Nyɔ lə bu na ji dzə́ ntɨŋ chichi chichi. 11 Yu nə̀ fə fiɔŋ fiŋ, yu biəlɨ nɨ yu nə̀ sesɛ nə mbɛyɛ bɨŋ. Yu fə manɨ ɨji yu' chɛ Klistu Jisɔs Baba waha ntɨŋ. 12 Na ndzɨ yu wu kə keŋkɛ dzə yi banə fə Nyɔ ku ŋkeŋkɛ sɨŋ nyiŋ makə kɨmasə ndzɨ shəŋ yi kə galə yu wɨ. 13 Chi fi na ji manɨ, nna nende lə shəŋ kə̂ kkpəhə bəŋ ndzɨ ŋgə wu nna nji no yu ntɨŋ ndzɨ bəŋ. Bə jiba bə wɔ buni busu.
Pɔl chi tsɨsə bənɨ bə Ɛfɛsɔ bɨŋ
14 Na ndzɨ biɔŋ biŋ wu nna ntuntu nú Taa waha nəfiə, 15 wu yɨ yi bitsɔŋ bichi lə bi bɔ́ bə bi sɛŋ koso na foto nə yu wɨ. 16 Nna ntuntu nú ntsɨsə lə, nə bubəŋ buhu bu kɨtso lə ntɨŋ, yu nyâ bəŋ buŋga bu na ba nə Kɨn'yɨntɨ kɨhɨ ntɨŋ, bu kôso shəŋ yənɨ. 17 Bəma, ɨ Klistu tə kɨ ji bəŋ shəŋ nɨ bə na galɨ shəŋ yu wɨ. Nna ntsɨsə tɨ lə kɨnse kɨ ji bəŋ ntɨŋ, kɨ fə̂ bə kɨ ji nɨ kɨtɨ kɨ na ji bə gaŋ kɨ, bə ji tɨ nɨ tsɔŋ yi bə́' wɛyɛ yi kɨchə kɨntaŋ bɨŋ, 18 fə bəŋ bə bənɨ bə Nyɔ lə bəchi keŋkɛ bufɨ bu naji ɨ bə kkə kɨnse kɨ Klistu lə. Kɨnse kɨhɨ kɨŋ na ŋgbɔŋkɔ kɨtso, kɨ dɨŋfi koso kɨtso, kɨ dzumbi kɨtso, kɨ dɨŋfi bɔ́ kɨtso. 19 Nna ntsɨsə lə bə kkə̂ kɨnse kɨhɨ kɨ na yakɨ ka bənɨ bə ŋkkə, fə bə yisə bə fiɔŋ fi Nyɔ na ji fi lɨ fichi. 20 Kɨŋkuntə kɨ ji bə yu wu naji ɨ yu fə fiɔŋ fichi bə buŋga buhu bu na nɨntɨ bɨ ntɨŋ. Naji ɨ yu fə tɨ ba ya nɨ kə na bi makə nɨ kə na gɔmbiɛ. 21 Kɨŋkuntə kɨ ji bə yu ndzɨ ntɛshɛ yi bənɨ bə kɨmbɨŋ'ə, bə ndzɨ Klistu Jisɔs tsá chi ŋka sɨŋ. Fi kɨ ji ma.