Nyɔ nə̀ tɛshɛ bɨ bə Klistu ba foso bɨ nə kkpə kaŋ
2
Fiəfiə nə̀ ji bə ji bənɨ bəŋkkpə ndzɨ bilaŋ bi Nyɔ lə bi bə nə̀ gboshɛ bə məmbiə mɛnɨ 2 mə bə nə̀ ji bə fɨtɨ. Bə nə̀ ji bə biəlɨ ji dzə́ yi bənɨ bə mbi no lə na ji, bə biəlɨ tɨ ŋkuŋ wu buŋga wubiə wu fiəfɨ ntɨŋ. Na yu kɨn'yɨntɨ ka kɨ na nɨntɨ fɛŋ bə bənɨ bə na tɛti fo bə Nyɔ. 3 Na tɨ nɨ bɨ bəchi nə̀ sa kə ji. Kə nə̀ ji kə fɨtɨ biɔŋ bi gwɨ́ yaha na se, kə biəlɨ biɔŋ bi gwɨ bə biŋgɔmbiɛ biaha nə̀ se lə kə kɨ fɨtɨ. Bɨ, nɨ bənɨ bəwəŋ kə nə̀ ji bənɨ bə shəŋ nə̀ lo Nyɔ bə bɔ, tɨ diəŋ chi miɨ chi na ji. 4 Bəmanɨ Nyɔ wu na kwesɛ yaa kɨtso bə bɨ, yu nə̀ ji bə kɨnse bɨ wɨ kɨtso, 5 yu tɛshɛ bɨ bə Klistu ba foso bɨ nə kkpə kaŋ mɛfə kə nə̀ ji bənɨ bəŋkkpə ndzɨ bilaŋ bi Nyɔ lə bi kə nə̀ gboshɛ. Nyɔ nə̀ tsu bəŋ ɨji ndzɨ shəŋ yihi yi ndzeŋe. 6 Nɨ yu nə̀ tɛshɛ bɨ bə Klistu Jisɔs ba foso bɨ nə kkpə kaŋ manɨ, yu bəndəsɨ bɨ ba ga bɨ bə yu mbi wu bɔ́ ntɨŋ. 7 Yu nə̀ fə manɨ fə ná kɨ ji tsa yi na ba wɨ, ɨ yu donchɛ shəŋ yihi yi ndzeŋe kɨtso yi naji ɨ miɨ jikə fɨkə. Yu nə̀ donchɛ bɨ shəŋ yihi yi ndzeŋe yiŋ nə kɨnse kɨhɨ ntɨŋ ə ba nə Klistu Jisɔs wɨ. 8 Bə kɨ kkɨ lə Nyɔ nə̀ chitə bəŋ ɨji ndzɨ shəŋ yihi yi ndzeŋe yi yu nə̀ donchə bəŋ ə ba nə shəŋ yi bə nə̀ galə Klistu wɨ. Nə̀ mfə yənɨ fiŋ fiɔŋ kə. Nə̀ kɨnya kɨ Nyɔ lə. 9 Na ndzɨ nɨŋ yidɔ yi miɨ nə̀ nɨŋə tə keŋkɛ lɨ kə, miɨ wudɔ tə kə gbɔɔ kɨ dze gwɨ. 10 Fiɔŋ fi na ji na lə, kə na ji nɨ kə na ji chiŋ mɛ, ɨji mfə yi Nyɔ bə kaŋ yihi. Yu tɛshɛ bɨ bə Klistu Jisɔs ba fə kə kɨ ji bənɨ bəfa, fə kə kɨ nɨntɨ nɨŋ yi ndzeŋe yi yu nə̀ kaa nə ndɛŋkəlɨ lə na yi kə ná kɨ ji kə nɨntɨ.Bənɨ bə na bɨmi bə Klistu na ji miɨ lɨ miu
11 Bəŋ bənɨ bə na jimiɛhɛ Bəju, bə gɔ̂mbiɛ fiɔŋ fi bə nə̀ ji fi lɨ fiəfiə. Bəju bə na tɨdi lə bɔ na ji bənɨ bə bə́' sɔmbiɛ dzɔ́ yibɔlə, bɔ nə̀ tɨdi lə bə na ji bənɨ bə na ji bə dzɔ́ yintsu. Nsɔmbu yi dzɔ́ nyi na fiɔŋ fi bɔ na fɨtɨ kwa ɨji nə gwɨ yi miɨ wɨ bə kaŋ. 12 Bə gɔ̂mbiɛ lə tsa ya wɨ nə̀ ji bə jikə keŋkɛ fiɔŋ fi fənə bə Klistu. Bə nə̀ jimiɛhɛ kɨntsu kɨ bənɨ bə Nyɔ lə ntɨŋ bə na ji bənɨ bə Isla. Bə nə̀ sɨŋ bə fiɔŋ fi fənə bə nchínə yi bikaŋə lə yi Nyɔ nə̀ diə bə bɔ. Bə nə̀ ji fiɛnɨ sɛŋ koso bə jikə keŋkɛ fiɔŋ fidɔ fi bə na jiŋgə fiə fi wɨ, bə ji tɨ Nyɔ kə kkə. 13 Bəmanɨ, fɛŋ nɨ bə na ji Klistu Jisɔs ntɨŋ, bəŋ bə nə̀ ji dzəbudə nə Nyɔ wɨ, yu ba bə bəŋ gwɨgwɨ ə ba nə ŋgwembe mə Klistu lə wɨ. 14 Na yu Klistu kɨbɛɛ wu ba bɨ bə budə. Yu fə Bəju bə bənɨ bə na jimiɛhɛ Bəju tsu miɨ lɨ miu. Yu foso kɨmbɨ kɨ kɨnjɛgwɨ lə ɨji nchɛnɛnɨ yi nə̀ ji bɨ fəntɨŋ. 15 Yu nya gwɨ yihi lə yu kkpə fə yu shiŋkiɛ kɨlaŋ bə biɔŋ bi kɨlaŋ na tɨdi lə bə́ kɨ fɨtɨ fə bə kɨ ji bənɨ bə Nyɔ lə. Yu fə manɨ fə yu tɛshɛ miɨ chi yu wɨ bɔ tsu miɨ lɨ miu wufa nə njiŋ'ɨ yi bənɨ bəfɛ bə kɨchichi. Nɨ yu fəə manɨ, yu tə ba bə budə. 16 Kkpə yihi kɨtɨ kɨ ŋ'wa lə wɨ nə̀ tɛshɛ bintsu bia bifɛ Nyɔ wɨ gwɨ lɨ miu, ba tə kkpɨsɨ kɨnjɛgwɨ kɨbɔlə kɨtɨ kɨ ŋ'wa lə wɨ, kɨ ka. 17 Yu nə̀ ba ba tɨfiə shɔŋ yi na ba bə budə bəŋ'ɨ bə nə̀ ji dzəbudə, yu tɨfiə tɨ shɔŋ nyi bə bənɨ bə nə̀ ji gwɨgwɨ. 18 Na yu wu fəə bɨ bəchi keŋkɛ dzə yi banə Taa waha wɨ ə ba nə Kɨn'yɨntɨ kɨmo wɨ. 19 Bəma, bə na tsɔhɔ jimiɛ bəbanə makə bənɨ bə lɛɛ jii kɨtuŋ kɨdɔ ntɨŋ. Bə na ji beŋ bə sha lə kɨbɛɛ bəŋ bə bənɨ bə kɨmbɨŋ'ə, bə ji tɨ beŋ bə tsɔŋ yi Nyɔ lə. 20 Bə́' wɛyɛ tsɔŋ nyi kɨchə bɨŋ kɨ na ji beŋ bə faŋə bə Jisɔs lə bə bənɨ bə na tɨfiə shɔŋ yi Nyɔ, Klistu Jisɔs kɨbɛɛ ji ta wu bo wu tsɔŋ ya lə. 21 Na nə yu bɨŋ wu tsɔŋ nyi chi tɛshɛ kɨ ko sɨŋsɨŋ lə yi ba kɨ ji tsɔŋ yi Baba yi ntsaaŋ. 22 Bə' tɛshɛ tɨ ba kɨ wɛyɛ Klistu bɨŋ lə bə ba kɨ ji dɨ wu Nyɔ na me mɨ Kɨn'yɨntɨ kɨhɨ ntɨŋ.