Kɨŋwatɨ kɨ Pɔl nə̀ bɔndɔ bə ntɛshɛ yi
Ɛfɛsɔ
1
Na mɨ Pɔl, wɛŋ wu faŋə wu Klistu Jisɔs nə kɨnse kɨ Nyɔ lə ntɨŋ. Nna mbondo kɨŋwatɨ kɨŋ bə bənɨ bə Nyɔ lə bə na ji Ɛfɛsɔ, bɔ lɨmi ŋkɨɨŋ Jisɔs Klistu wɨ.2 Taa waha Nyɔ bə Baba Jisɔs Klistu dônchə bəŋ shəŋ yi ndzeŋe ba nya bəŋ budə.
Budə bu na chitə bənɨ bə' galə shəŋ Klistu wɨ
3 Kɨŋkuntə kɨ ji bə Nyɔ wu na ji Nyɔ, yu ji tɨ chɛ Baba waha Jisɔs Klistu. Yu' nya bɨ budə buchi bu kɨtuŋ kɨ bɔ́ ntɨŋ bu na chitə bin'yɨntɨ biaha nɨ kə na ji Klistu ntɨŋ. 4 Fə Nyɔ nə̀ji lə yu fə mbi, nə̀ ji yu' sa bɨ lə kə ná kɨ ji Klistu ntɨŋ, fə kə kɨ ji ntsaaŋ, kə ji ŋkweŋ yidɔ sɨŋ yu nəfiə. 5 Nə kɨnse kɨhɨ ntɨŋ, yu nə̀ nachɛ lə yu ná dze lɨ bɨ kə kɨ ji beŋ buhu ə ba nə Jisɔs Klistu wɨ. Yu nə̀ fə manɨ, yu biəlɨ fiɔŋ fi nə̀ ndzeŋe yu lɨ fi yu nə̀ se lə fi kɨ ji. 6 Fi nə̀ ji manɨ fə kɨŋkuntə kɨ gɨntɨ bə yu ndzɨ kɨnya kɨhɨ kɨbəŋ kɨ yu nya bɨ kɨlɔlɔ lɨ, ə ba nə Wene wɨ wu na ji shəŋ yihi. 7 Yu nə̀ tsu bɨ nə bubiə kaŋ ɨji bə ŋgwembe mə Wene no lə. Fi na ji lə, yu nə̀ gufiɛ məmbiə maha, ə ba nə shəŋ yihi yi ndzeŋe wɨ yi yu nə̀ donchə bɨ kɨtso. 8 Tsa yi yu nə̀ se lə yu donchə, yu nə̀ donchə kɨtso. Yu nə̀ fə manɨ bə bufɨ buhu buchi ma bə kɨŋgɔmbiɛ kɨhɨ kɨchi. 9 Nyɔ' fə kə kkə fiɔŋ fi yu na gɔmbiə fi nə̀ ji bunyələ. Yu fə yu biəlɨ fiɔŋ fi ndzeŋe yu lɨ nɨ yu nə̀ sesɛ lə yu ná fəə ə ba nə Klistu wɨ. 10 Yu nə̀ ka lə tsa ná ba kwətsə lɨ, ɨ yu banchɛ biɔŋ bichi bi bɔ́ ma bi koso ba ga bi Klistu nəkoso yu kɨ ji fo wusu. 11 Nyɔ nə̀ sa bɨ tɨ lə kə kɨ ji bənɨ buhu Klistu ntɨŋ. Yu nə̀ sa nɨ yu nə̀ sesɛ nə ndɛŋkəlɨ ɨ biəlɨ kɨŋgɔmbiɛ kɨhɨ diəŋ nɨ yu ba yu kɨ fɨtɨ biɔŋ bihi bichi yu biəlɨ bikaŋə bihi nɨ yu na se lə fi kɨ ji. 12 Fi nə̀ ji manɨ fə bɨ bə nə̀ ji bənɨ bə fiəfiə bə ganə bufɨ Klistu wɨ kɨ jimi kɨjimiɛ kɨ kɨ fɨtɨ bubəŋ bu Nyɔ lə yinshi, kɨŋkuntə ji bə yu. 13 Bə nə̀ tɛshɛ tɨ Klistu wɨ tsa yi bə nə̀ wɔɔ diɛ yi kɨyɛyi yi na ji shɔŋ yi ndzeŋe yi nə̀ ba ya bəŋ bə mfɔ yi fo. Nɨ bə nə̀ wɔɔ manɨ, bə bu ga shəŋ Klistu wɨ, Nyɔ fə ndonchɛ yihi bəŋ wɨ yi na ji Kɨn'yɨntɨ kɨ Ntsaaŋ kɨ yu nə̀ kaa bənɨ. 14 Kɨn'yɨntɨ kɨ Ntsaaŋ kɨŋ na fiɔŋ fi na donchɛ bishəŋə bi kə ná keŋkɛ. Kə ná keŋkɛ tsa yi Nyɔ ná kanə tsuɔ bənɨ buhu nə bubiə kaŋ. Bəma, ɨ bubəŋ buhu kɨ yinshi, kɨŋkuntə ji bə yu.
Pɔl tsɨsɨ Nyɔ bənɨ bə Ɛfɛsɔ bɨŋ
15 Mɨ ŋ'wɔ kɨ shəŋ yi bə galə Baba Jisɔs wɨ bə kɨnse kɨ bə na keŋkɛ bə bənɨ bə Nyɔ lə bəchi. Na fiɔŋ fi fəə lə 16 tsa yi nna ntsɨsə, ŋkɨ ŋgɔmbiɛ bəŋ. Ŋkə nchindəsu bə nnya yi kɨmbafə bə Nyɔ ndzɨ bəŋ kɨntsɨsɨ kɛmɨ ntɨŋ. 17 Nna nnende lə Nyɔ wu Baba waha Jisɔs Klistu, Nyɔ wu na ji Chɛ bubəŋ, yu nyâ bəŋ Kɨn'yɨntɨ kɨ jika ɨ kɨ nya bəŋ bufɨ ba gû yəsɨ yɛnɨ fə bə kkə̂ yu buni. 18 Nna ntsɨsə tɨ lə yu wwɔ̂lɔsɨ bufɨ bwɛnɨ bə kkə̂ fiɔŋ fi bə na jiŋgə fiə fi wɨ, fi yu nə̀ bəndə bəŋ ndzɨ fi, bə kkə̂ tɨ bubəŋ bu kɨtso lə bu bishəŋə bi bənɨ bə Nyɔ lə. 19 Nna nnende tɨ lə Nyɔ gû bufɨ bwɛnɨ bə kkə̂ buŋga buhu bu na yakɨ buŋga buchi. Na buŋga bubəŋ buŋ bu yu na nɨntɨ bə bu bɨ ntɨŋ bə' galə shəŋ yu wɨ. 20 Na buŋga buŋ bu yu nə̀ nɨŋə bə bu ba tə dzakɔ Klistu nə kkpə lɨ ba bəndəsɨ yu, ba ga yu kɨbandə kɨhɨ kɨ nədiɨ wɨ mbi wu bɔ́ ntɨŋ. 21 Klistu na ko kɨtso ba ya biɔŋ bi na sakɨ bichi ma buŋkuŋ ma buŋga ma bubəŋ buchi. Yu keŋkɛ tɨ yɨ wu na ko ba ya yɨ chi yi bə́ doŋko bənɨ. Yu na jimiɛhɛ manɨ ɨji kwa tsa nyi wɨ kə. Yu jiwa ɨ yu kɨ bu jimiɛ manɨ tsa yi na ba ntɨŋ. 22 Nyɔ' ga biɔŋ bichi yu nəkoso, yu ga tɨ lə yu kɨ ji fo wu biɔŋ bichi lə bi ntɛshɛ yi bənɨ bə kɨmbɨŋ'ə. 23 Ntɛshɛ yi bənɨ bə kɨmbɨŋ'ə nyi na gwɨ yi Klistu. Klistu na ji yu' yi təəə ba kwətsə lɨ ndzɨ ntɛshɛ nyi, ɨji yu wu na fɨtɨ biɔŋ bichi yisə, bi kwətsə dzə́ ntɨŋ chi.