Klistu' foso bɨ nə buŋfia ntɨŋ
5
Klistu nə̀ foso bɨ nə buŋfia ntɨŋ. Yu nə̀ foso ma, fə kə jɛkə kɨ bambi kə ji buŋfia ntɨŋ bilaŋ nəkoso. Bəma bə lə̂ŋ ŋkɨɨŋ. Bə kə̂ tsɔhɔ bɨmiə lə bə be kɨmboŋ kɨ buŋfia lə ntɨŋ. 2 Bə wôkɔ bə wɔ̂ fiɔŋ fi mɨ Pɔl njiwa ntə. Jilə bə' bɨŋ lə bə́ sɔmbiɛ bəŋ dzɔ́ fə bə tə kɨ ji diəŋ Nyɔ nəfiə, tə fiɔŋ fi Klistu nə̀ fəə fia bəŋ'ɨ nə̀ kɨlɔlɔ. 3 Nna nchisə chanyɛ ŋkpɨ su lə, miɨchi wu bɨmiə lə bə́ sɔmbu yu dzɔ yu kɨ kkɨ lə yu naji lə yu kɨ galɨ bilaŋ bi Bəju lə bichi nɨ bi na ji. 4 Bəŋ bəchi bə na se lə bə kɨ ji ŋgbɔ sɨŋ Nyɔ nəfiə ɨji ndzɨ bə na galɨ bilaŋ, bə kɨ kkɨ lə bə' jɛ gwɨ nə Klistu wɨ. Bə' foso gwɨ yɛnɨ nɨ bənɨ bə Nyɔ' sabiɛ ntɨŋ. 5 Nə bɨ lɨ, fiɔŋ fi kə na jiŋgə fiə fi wɨ na lə, Nyɔ ná dze bɨ nɨ bənɨ bə na ji diəŋ yu nəfiə. Fiŋ na fiɔŋ fi Kɨn'yɨntɨ kɨ Nyɔ lə kɨ na nɨntɨ bɨ ntɨŋ ə ba nə shəŋ yi kə galə Klistu wɨ fəə lə kə kɨ wokɔ. 6 Bə kkə̂ lə ɨ miɨ na ji Jisɔs Klistu ntɨŋ, se lɨ ji bə́' sɔmbu dzɔ yihi makə bə́ kə sɔmbɔhɔ, tə fia na sɨŋ bə mbɨ wudɔ. Fiɔŋ fi na keŋkɛ mbɨ na shəŋ yi yu' galə Klistu wɨ, yu tseyɛɛ yi kɨnse ntɨŋ.7 Bə nə fɨtɨ biɔŋ diəŋ, ə fə yəŋ lə bə kə̂ tsɔhɔ biələ kɨyɛyi? 8 Ŋgwe yi biŋ bitɨfiə kə fɔkɔ nə Nyɔ lɨ wu nə̀ bəndə wa bəŋ. 9 Bə na gɔmbiɛhɛ ŋgaŋ wu bə́ ba bə́ kɨ mma lə, “Kɨko kɨmo ba kɨ bɨsɨ tsu?” 10 Nna ŋgalɨ bufɨ bəŋ wɨ ndzɨ Baba, lə bə kə̂ bɨmiə fiɔŋ fi bənɨ bədɔ na tɨdi fiəŋkə fi nna ntɨdi. Miɨ wu na tsaŋkɨ wa bufɨ bwɛnɨ, fa na yəŋ lɛɛ, Nyɔ jiwa yu li ŋgə yu wɨ. 11 Bəŋgwɨŋ, jilə nna mbambi ntɨfiə lə bə́ kɨ sɔmbiɛ bənɨ dzɔ́ fə bɔ tə kɨ ji diəŋ Nyɔ nəfiə, ɨ bənɨ tsu kɨ sesɛ gbo mɨ nəjiŋ ndzɨ la? Fi tə sə ji ma, fiɔŋ fi nna ntɨfiə fiŋ lə Klistu nə̀ kkpə kɨtɨ kɨ ŋ'wa lə wɨ bənɨ woko fi tinti bɔ, fi tə tsukə jimiɛ su. 12 Bə bənɨ bə na finchə ba bə bəŋ lə bə́ kɨ sɔmbiɛ bəŋ dzɔ́, nna nse lə bɔ gəŋ fiə ba kanə foshɛ tɨ ma biəlɨ yibɔlə.
13 Bəŋgwɨŋ, Nyɔ nə̀ bəndɨ bəŋ fə bə jɛkə kɨ bambi buŋfia bu fiɔŋ fidɔ lə ntɨŋ. Bəmanɨ, nɨ bə na bambiɛhɛ buŋfia ntɨŋ, bə kə̂ dzɛɛ lə naji ɨ bə kɨ fɨtɨ biɔŋ bibiə nɨ gwɨ́ yɛnɨ na se. Bə kɨ nɨntɨ ji bəwəma lɨ nə kɨnse ntɨŋ. 14 Bə kɨ fɨtɨ manɨ ndzɨ bilaŋ bichi na ji butɛshɛ kɨŋ wɨ kɨmo lə,
“Kɨ laŋkɨ miɨ wu naji fə wə ku nɨ wə na laŋkɨ gwɨ yɔhɔ.”
15 Bəmanɨ, ɨ bə dza kɨ gbechɛ gwɨ́ yɛnɨ nɨ nyɛ́ŋ yi ji, miɨ se lə yu diə wəmɛni, bə kɨ dze tsa bə tə kə bɨsə gwɨ́ yɛnɨ.
Miɨ wu na ji chi Kɨn'yɨntɨ kɨ Nyɔ lə na se ba yu jikə kɨ fɨtɨ nɨ gwɨ yihi se
16 Fiɔŋ fi nna nchanyɛ na lə, bə kɨ ji bə biəlɨ ji nɨ Kɨn'yɨntɨ kɨ Nyɔ lə na donchɛ bəŋ, bəma ɨ bə tsukə kɨ fɨtɨ ji nɨ gwɨ́ yənɨ na se lə bə kɨ fɨtɨ. 17 Nna nchanyɛ mɛ ndzɨ fiɔŋ fi gwɨ na se na gbɔnɔhɔ bə fi Kɨn'yɨntɨ kɨ Nyɔ lə na se. Fiɔŋ fi Kɨn'yɨntɨ kɨ Nyɔ lə na se na gbɔnɔhɔ bə fi gwɨ na se. Biɔŋ bifɛ biŋ na jimiɛhɛ fiɔŋ'ɨ fimo. Fia na fiɔŋ fi na ji lə naji ɨ bə kɨ fɨtɨ fiɔŋ fi bə na se kə. 18 Ɨ bə na ji bə biəlɨ nɨ Kɨn'yɨntɨ kɨ Nyɔ lə na donchɛ bəŋ, ɨ bə tsukə jimiɛ bilaŋ nəkoso. 19 Biɔŋ bibiə bi gwɨ ba yi kɨ se, bənɨ na masəhə bi. Na ndzenɛ bə ŋgɔmbiə yi biɔŋ bi na tsukɔ ndzenɛ wɨ ma bə njiŋ kɨnyənə kɨ ndzenɛ lə ntɨŋ. 20 Yi se tɨ ntsɨsɨ bə bənyɔ bə kɨlɔlɔ lə, butsə, nchɛnɛnɨ, ŋkpənənɨ, shəŋ yi yii, ŋkeŋkɛ yi shəŋ yilo, bə ŋgɔmbiɛ kɨ gwɨ yihi lə kwa. Yi se tɨ tsaŋ yi bənɨ lə bɔ kɨ ji bintsu ntɨŋ bɔ ji tɨ chichi chichi. 21 Yi se tɨ kɨndɔ kɨ chindiɛ, mmu yi mbiŋ wə chinchi bə kɨjimiɛ kɨ woo ma bə mfə yi bidɔ biɔŋ nɨ biŋ. Mɨ ŋkɨ nchanyɛ nlosɔ bəŋ. Nɨ nnə̀ nchanyɛ fiəfiə bə bəŋ lə bənɨ bə na fɨtɨ ŋgwe yi biŋ biɔŋ ná keŋkɛhɛ dɨ buŋkuŋ bu Nyɔ lə ntɨŋ.
22 Bəmanɨ, biɔŋ bi na ba nə Kɨn'yɨntɨ kɨ Nyɔ lə wɨ na biŋ: kɨnse, ŋ'wɔ yi buni, budə, shəŋ yi kansə, fiə wu ndzeŋe, njiŋ buni, nləŋ kɨyɛyi bɨŋ, 23 kɨyəfu, ma bə ŋkɨ yi gwɨ yɔhɔ. Kɨlaŋ kɨdɔ na sɨŋ su kɨ na chinə biɔŋ biŋ. 24 Bənɨ bə Klistu Jisɔs lə' bandɨ tɨ gwɨ́ yibɔlə kɨtɨ kɨ ŋ'wa lə kɨ Jisɔs lə wɨ bə biɔŋ bibiə bi gwɨ́ yi shi na se.