Bənɨ bə Nyɔ lə kɨ chitə miɨ chi
6
Bəŋgwɨŋ, ɨ bə kwe miɨ wudɔ ɨji yu' gbɔ bubiə ntɨŋ, bəŋ bə na ji Kɨn'yɨntɨ kɨ Nyɔ lə ntɨŋ, bə tɨ̂fiə yu dzə́ yi budə lə ntɨŋ fə yu fɔɔ nə bubiə bwa ntɨŋ. Bəmanɨ, tsa yi miɨ na tɨfiə yu, miɨ wa kɨ tɨntɨ ŋkɨ fə yu wu yu jɛkə gbɔɔ mfɔ ntɨŋ. 2 Miɨ chi kɨ dze ŋgə wu wəmɛni chi wuhu. Bə dze kɨ fɨtɨ manɨ, ɨ fi kɨ ji lə bə galɨ ba kɨlaŋ kɨ Klistu lə. 3 Jilə miɨ wudɔ na dze gwɨ yihi lə yu na ji fiɔŋ, ɨji yu jikə jimiə fiɔŋ fia, kɨjilə yu na fukiɛ gwɨ yihi. 4 Miɨ chi jîŋgə bifənə bihi ntɨŋ ba ŋəŋ lə yu na fɨtɨ bi diəŋ lə. Jilə yu na fɨtɨ diəŋ, yu tə sɛŋ gwɨ yihi. Bəmanɨ, yu kə kɨ fɨkə gwɨ bə miɨ wudɔ. 5 Bə kɨ kkɨ lə miɨ chi naji lə yu tɔ yihi ntə.6 Miɨ wu bə́ na tɨfiə yu diɛ yi Nyɔ, yu jɛ̂ biɔŋ bihi bi ndzeŋe bichi bə miɨ wu na tɨfiə wa yu.
7 Bə kə kɨ fukiɛ gwɨ́ yɛnɨ. Nyɔ na jimiɛhɛ mfidi. Bə kɨ kkɨ lə fiɔŋ yɨla fi miɨ na tishɛ, na tɨ fi fi yu ná banchə. 8 Miɨ wu na tishɛ yihi ŋgwe ji fiɔŋ fi gwɨ yihi na se, tə yu ná banchə fiɔŋ fi gwɨ yihi na se ɨji kkpə. Ɨ miɨ tishɛ yihi ŋgwe ji fiɔŋ fi Kɨn'yɨntɨ kɨ Nyɔ lə na se, tə yu ná keŋkɛ buwəŋ bu kəkaha, bu Kɨn'yɨntɨ kɨ Nyɔ lə na nya. 9 Bəma, gwɨ kə̂ kaha bɨ bə mfə buni ndzɨ ná kɨ ji tsa ya bɨŋ ɨ kə keŋkɛ bikwəntsə jilə kə kə fuŋkɔhɔ. 10 Fi kɨ ji lə, jilə dzə ya su, kə kɨ fɨtɨ buni bə miɨ chi, gwɨtɛɛ bə bə na ji ba bə kɨmbɨŋ'ə.
Bənchanyɛ bə nəjiŋ
11 Bə ŋə̂ŋ chi mbiɔndu yiŋ mɛ na ji yibəŋ yibəŋ! Na mɨ wu bɔndɔ bə kaŋ yɛmɨ! 12 Bənɨ bə na dze gwɨ bə biɔŋ bi gwɨ yi nəgwɨ lə, bɔ tombi bəŋ lə bə́ sɔmbiɛ bəŋ dzɔ́, bɔ fɨtɨ manɨ kwa lə bə́ kə kɨ sesɛ gbo bɔ nəjiŋ ndzɨ fiɔŋ fi bɔ na tɨfiɛ bənɨ lə Klistu nə̀ kkpə kɨtɨ kɨ ŋ'wa lə wɨ. 13 Ma tɨ bənɨ bə bə́ nə̀ sɔmbiɛ ba bɔ dzɔ́ na galəhə bilaŋ. Bəmanɨ bɔ noŋko kwa lə bɔ fə bə́ sɔmbiɛ bəŋ dzɔ́ fə bɔ kɨ kuntsɔ gulu lə bɔ' fə fiɔŋ fi bɔ nə̀ se lə bɔ fə bəŋ wɨ. 14 Bəmanɨ, nə mɨ lɨ, naji nshəshə ba kuntsu gulu kə, fiəŋkə ndzɨ fiɔŋ fiŋ lə Baba waha Jisɔs Klistu nə̀ kkpə kɨtɨ kɨ ŋ'wa lə wɨ. Na kɨtɨ kɨ ŋ'wa lə kɨŋ wɨ kɨ bə́ bandə biɔŋ bi mbi lə bi jɛ gwɨ nə mɨ wɨ, mɨ njɛ tɨ gwɨ nə bi wɨ. 15 Jilə miɨ wa su wu bə́ sɔmbɔ dzɔ yihi makə bə́ kə sɔmbɔhɔ, fia na keŋkɛhɛ mbɨ wudɔ. Fiɔŋ fi mbɨ lə na lə Nyɔ lɨ̂mə miɨ, miɨ wa kɨ ji miɨ wufa. 16 Budə bu Nyɔ lə bə yaa wuhu wu kwesɛ bâ bənɨ bəchi wɨ bə na biəlɨ dzə nyi, bɔ bə na ji Bəisla bə Nyɔ lə.
17 Dze nə fɛŋ bɨŋ kɨ gɨntɨ fiə, miɨ kə̂ tsɔhɔ funsə mɨ, ndzɨ ŋkándɨ yi na ji mɨ wɨ na tseyɛ lə nna nji miɨ wu nɨŋ wu Jisɔs.
18 Bəŋgwɨŋ, Baba waha Jisɔs Klistu dônchə shəŋ yihi yi ndzeŋe bin'yɨntɨ biɛnɨ bɨŋ. Fi kɨ ji ma.