4
Fiɔŋ fi nna ntɨdi na lə, tsa yi miɨ naji lə yu ná diə bishəŋə bi tɨɨ lə yu bambi wɛŋ wubiɨ, yu na jimiɛhɛ chichi nə mfia lɨ, mɛfə yu naji lə yu ná diə bishəŋə bia bichi. 2 Yu jiwa ɨ yu sa kɨ ji bənɨ bədɔ nəkoso, bɔ jiŋgəə yu, bɔ kɨki bishəŋə bihi, gəŋ fɔ tsa yi tɨɨ nə̀ sesɛ ba ga lɨ. 3 Na diəŋ chi fi na ji bə bɨ. Tsa yi kə nə̀ ji beŋ bəbiɨ, kə nə̀ ji bəŋfia bə biɔŋ bi nə̀ sakɨ mbi noª lə. 4 Bəmanɨ, lə tsa ba kwətsə, Nyɔ faŋ Wene, yu ba, miɨ kpansɨ bɛyɛ yu, yu kɨ ji tɨ bilaŋ nəkoso. 5 Yu nə̀ ba lə yu fə bənɨ bə nə̀ ji bilaŋ nəkoso lə bɔ fɔ fo, fə Nyɔ dzɛɛ bɨ nɨ beŋ buhu. 6 Nɨ Nyɔ dzɛɛ bɨ nɨ beŋ buhu manɨ, yu faŋ Kɨn'yɨntɨ kɨ Wene lə, kɨ ba bɨ shəŋ ba kɨ bɨndɨ yu lə, “Abba,ª Taa!” 7 Fi na ji fɛŋ lə Nyɔ' fə bə tsukə kɨ ji bəŋfia, bə na ji ji beŋ bə tsɔŋ fɛŋ. Nɨ bə na ji beŋ, kɨjilə bə jiba ɨ bə keŋkɛ biɔŋ bi yu galə beŋ buhu lɨ.Kɨgaŋ kɨ Pɔl nə̀ galə bənɨ bə Galɛsha wɨ
8 Fiəfiə tsa yi bə nə̀ kkəhə Nyɔ, bə nə̀ ji bəŋfia bə biɔŋ'ə bi bə nə̀ dze lə nə̀ bənyɔ, ɨji kə jimiɛ bənyɔ. 9 Bəmanɨ, fɛŋ chi bə kkə cha Nyɔ, makə nɨ Nyɔ kkə cha bəŋ chi naji ntə, ə fə la lə bə kɨ gɔmbiə lə bə tsu jiŋ bənyɔ bə kɨlɔlɔ lə bɛŋ wɨ bə na jimiɛhɛ bə buŋga. Bə na se lə bə chi tsɔ bəŋfia bə bənyɔ ba lə ndzɨ la? 10 Bə na kuntə díɔ yidɔ bə fiə yidɔ lə na yibəŋ ndzɨ la? Bə na kuntə tɨ tsɨ́fɨ yidɔ bə biya bidɔ lə na bibəŋ ndzɨ la? 11 Bə na fɨtɨ mɛ, nlete kɨtso lə nɨŋ yɛmɨ yi mɨ nnɨŋə bəŋ ntɨŋ' la kɨlɔlɔ.
12 Bəŋgwɨŋ, nna ŋkuchi kaŋ bə bəŋ lə bə yâshənɨ kɨ ji chi mɨ, diəŋ chi nnə̀ n'yashənɨ kɨ ji chi bəŋ. Bə nə̀ kə fəkə fiɔŋ fibiə bə mɨ. 13 Bə na kkɨ lɨ lə tsa yi fiəfiə yi nnə̀ ntɨdi shɔŋ yi ndzeŋe yi Nyɔ bə bəŋ nə̀ ndzɨ nnə̀ ŋgwente. 14 Mɛfə nnə̀ nji bə gwɨ manɨ, fi nə̀ ji chi mfɔ yidɔ yi nə̀ ba bəŋ wɨ, bə nə̀ kə lətə mɨ, makə lə bə nyənə mɨ. Bə nə̀ tsu ba ləkə mɨ wələ na nchinda wu Nyɔ wudɔ makə nɨ Klistu Jisɔs kɨbɛɛ. 15 Bə nə̀ woko buni bə mɨ tsa ya wɨ, ə fə la fɛŋ? Naji ntə lə bə́ tə nə̀ tə lə bə foshɛ yəsɨ yənɨ ba nya mɨ, bə tə nə̀ foshɛ, jilə dzə nə̀ ji lɨ. 16 Mɨ ntsu miɨ wɛnɨ wu nchɛnɛ ndzɨ nna ntɨdi bəŋ kɨyɛyi? 17 Bənɨ ba na se lə bɔ kɨ donchɛ lə bɔ na keŋkɛ kɨgaŋ kɛnɨ kɨtso, bəmanɨ, bɔ na se bəŋ ji nə fiɔŋ fi na jimiɛhɛ fi ndzeŋe bɨŋ. Bɔ na laŋkɨ lə kə jɛ gwɨ lə bə kɨ nya kɨgaŋ ji bə bɔ. 18 Fi na ndzeŋe lə miɨ kɨ keŋkɛ kɨgaŋ bə miɨ ji nə fiɔŋ fi ndzeŋe bɨŋ. Fiŋ na ji diəŋ tsá chi, ɨ jikə jimiɛ kwa tsa yi nna nji bə bəŋ. 19 Beŋ bɛŋŋ bə na ji shəŋ yɛŋ. Diəŋ chi kpansɨ na ba yu kɨ woko bulo tsa yi yu sə gbosɔ, na diəŋ bə bulo bu nna nchisə wɔɔ bəŋ'ɨ gəŋ fɔ tsa yi fiə wu Klistu lə kɨ ji bəŋ wɨ! 20 Kə dzê lə ntə ŋkɨ nji bə bəŋ fɛŋ fə n'yashənɨ dzə́ yi chanyɛ bə bəŋ. Bufɨ bwɛŋ' la bə fiɔŋ fi bə fəə fiŋ.
Kɨchichi beŋ bə Ablaham lə ntɨŋ
21 Bəŋ bə na se lə bə kɨ ji bilaŋ nəkoso, bə tə mɨ, bə na woko fiɔŋ fi bilaŋ bia na tɨdi? 22 Fi na ji bubɔndɔ lə Ablaham nə̀ keŋkɛ beŋ bə nɨnsə bəfɛ, wudɔ wa ji mbɛyɛ yi kpansɨ wu nə̀ ji wa mfia, wudɔ mbɛyɛ yi kpansɨ wu nə̀ ji kə jimiɛ mfia. 23 Wɛŋ wu kpansɨ wu nə̀ ji wa mfia, bə́ nə̀ bɛyɛ yu nɨ bə́ bɛyɛ beŋ bəchi. Bəmanɨ wɛŋ wu kpansɨ wu nə̀ jimiɛhɛ wa mfia, bə́ bɛyɛ yu ɨ biəlɨ nɨ Nyɔ nə̀ kaa. 24 Naji ɨ kə dze fiɔŋ fiŋ nɨ kɨŋfɨkə. Bəkansɨ bə bəfɛ bɛŋ na donchɛ nchínə fiɛ. Haga wu nə̀ ji mfia na dze dɨ wu nchínə yi Nyɔ nə̀ diə bə bənɨ bə Isla Dzo yi Sinai bɨŋ. Bənɨ bəchi bə na ji nchínə ya nəkoso na bəŋfia. 25 Nɨ Haga dzɛɛ dɨ wu nchínə yi Dzo yi Sinai lə, yi na ji sha yi Alɛbia ntɨŋ, yu dze tɨ dɨ wu kɨtuŋ kɨ Jɛlosalɛm wu fɛŋ'ə, nɨ bənɨ bə kɨtuŋ ka lə bəchi na ji buŋfia ntɨŋ bilaŋ nəkoso. 26 Bəmanɨ bənɨ bə Jɛlosalɛm wu bɔ́ lə na jimiɛhɛ bəŋfia. Wa Jɛlosalɛm na nɛ waha. 27 Na fiɔŋ fi na ji bubɔndɔ lə,
“Wə kpansɨ wu na ji gbɔmbu, mbɛyɛ sɨŋ, kɨ laŋkɨ.
Wə wu kə wɔkɔhɔ bulo bu ŋgboso yi wɛŋ'ə, kɨ kwakɨ kɨsəŋfɨ.
Kɨ kkɨ lə beŋ bə kpansɨ wu bə́ sə nɨŋŋə lə
ná yɛnti ba ya bə kpansɨ wu na ji bə nomo lə.”
28 Bəma bəŋgwɨŋ, bə na ji beŋ bə Nyɔ lə ə biəlɨ nɨ Nyɔ nə̀ kaa, diəŋ nɨ Adze nə̀ ji. 29 Nə̀ ji tsa ya wɨ, wɛŋ wu bə́ nə̀ bɛyɛ no nɨ bə́ bɛyɛ beŋ bəchi kɨ sesɛ gbo wudɔ wa nəjiŋ wu bə́ nə̀ bɛyɛ wa ə ba nə buŋga bu Kɨn'yɨntɨ kɨ Nyɔ lə ntɨŋ. Na tɨ mɛ diəŋ bə fiɔŋ fi na ji fɛŋ. 30 Fi na ji bubɔndɔ Kɨŋwatɨ kɨ Nyɔ lə ntɨŋ tsukɔ fiɔŋ fiŋ wɨ lə la? Fi na ji bubɔndɔ lə,
“Kɔ̂ŋ kpansɨ wu na ji wa mfia bɔ bə wene,
ndzɨ wɛŋ wu mfia wa naji ɨ yu ná shəshə ba jɛ bishəŋə bɔ bə wɛŋ wu kpansɨ wu na jimiɛhɛ wa mfia kə.”
31 Nɨ fi na ji manɨ bəŋgwɨŋ, fiɔŋ fichi fi nna nchanyɛ na donchɛ lə kə na jimiɛhɛ beŋ bə kpansɨ wu naji wa mfia lə, kə na ji ji beŋ bə kpansɨ wu na jimiɛhɛ wa mfia lə.