Tsukɔ bilaŋ wɨ bə ŋga yi shəŋ Klistu wɨ
3
Ɔ ɔhɔ bənɨ bə Galɛsha, bə na fidi lɨ! Na yəŋ wu jibiɛ bəŋ? Na tɨ bəŋ bɛŋ bə bə́ tseyɛ bəŋ buni nɨ bə́ nə̀ bandə Jisɔs Klistu kɨtɨ kɨ ŋ'wa lə wɨ bə ŋəŋ ŋgbooŋ? 2 Njiwa mbi bəŋ fiɔŋ fimo. Kɨn'yɨntɨ kɨ Nyɔ lə nə̀ ba bəŋ wɨ ndzɨ bə nə̀ fɨtɨ nɨ bilaŋ nə̀ tɨdi maa ndzɨ bə nə̀ bɨŋ fiɔŋ fi bə nə̀ wɔɔ lə? 3 Bə na fidi la mɛ? Bə bɛyɛ fiɔŋ bə Kɨn'yɨntɨ kɨ Nyɔ lə, fi kɨ ji fɛŋ lə bə jiba bə kanə fi ji bə buŋga bwɛnɨ? 4 Bə nə wɔ bəŋgə kɨyɛŋ kɨlɔlɔ? Nna ŋgɔmbiɛhɛ lə na kɨlɔlɔ. 5 Nyɔ na nya bəŋ Kɨn'yɨntɨ kɨhɨ, yu fɨtɨ biɔŋ biŋga bəŋ ntɨŋ ndzɨ la? Yu na fɨtɨ manɨ ndzɨ bə na galɨ bilaŋ maa ndzɨ bə' wɔ shɔŋ yi na tsukɔ Klistu wɨ ba ga shəŋ yi wɨ lə?6 Na nɨ fi na ji bubɔndɔ tsukɔ Ablaham wɨ Kɨŋwatɨ kɨ Nyɔ lə ntɨŋ lə,
“Yu nə̀ bɨŋ bə fiɔŋ fi Nyɔ nə̀ chanyɛ bə yu,
Nyɔ dze yu lə yu na ji miɨ wu diəŋ.”
7 Bə ŋə̂ŋ la lə na bənɨ bə galə shəŋ Nyɔ wɨ bə na ji beŋ bə Ablaham lə. 8 Kɨŋwatɨ kɨ Nyɔ lə nə̀ donchɛ nə ndɛŋkəlɨ lə Nyɔ ná dze bənɨ bə na jimiɛhɛ Bəju lə bɔ na sɨŋ bə ŋgbɔ yu nəfiə ndzɨ shəŋ yi bɔ galə yu wɨ. Kɨŋwatɨ ka nə̀ tə shɔŋ yi ndzeŋe bə Ablaham tsakɨtɨ lə,
“Nyɔ ná liyi budə bituŋ bichi bi mbi lə bɨŋ ə ba ndzɨ wə.”
9 Bəma, fi kɨ ji lə bənɨ bə' galə shəŋ Nyɔ wɨ, Nyɔ jiwa ɨ yu nya bɔ budə diəŋ nɨ yu nə̀ nya Ablaham wu nə̀ galə shəŋ yu wɨ.
10 Bənɨ bəchi bə na ŋɨntɨ lə naji ɨ bɔ kɨ ji diəŋ Nyɔ yəsɨ ndzɨ bɔ na galɨ bilaŋ, bɔ na toto ji lɔŋ bɔ fi, ndzɨ bə́ nə̀ bɔndu lə,
“Miɨ chi wu na jimiɛhɛ kɨjimiɛ nɨ bə́' bɔndɔ Kɨŋwatɨ kɨ Bilaŋ'ə ntɨŋ,
wu na fɨtəhə nɨ bilaŋ bichi na tɨdi,
yu na toto ji lɔŋ yu fi.”
11 Fi tə kɨ donchə ŋgbooŋ lə naji ɨ Nyɔ dze kə lə miɨ na sɨŋ bə ŋgbɔ ndzɨ yu na galɨ bilaŋ. Na ndzɨ fiŋ fi bə́ nə̀ bɔndɔ lə,
“Na kwa miɨ wu Nyɔ na dze lə yu na ji diəŋ ndzɨ shəŋ yi yu' galə yu wɨ
wu ná keŋkɛ buwəŋ.”
12 Bilaŋ na keŋkɛhɛ fiɔŋ fi fənə tsukɔ ŋga yi shəŋ Nyɔ wɨ. Fi na ji ji lə, “Miɨ wu na galɨ bilaŋ jiwa ɨ yu kɨ ji kwa ji bi wɨ.” 13 Klistu nə̀ tsu bɨ nə lɔŋ wu bilaŋ kaŋ. Yu nə̀ tɔ bəlɔŋ baha yu fi, ə ji nɨ bə́ nə̀ bɔndɔ lə,
“Lɔŋ na ji bə miɨ wu bə́' tiyɛ yu kɨtɨ wɨ.”
14 Yu nə̀ fə manɨ fə budə bu Nyɔ nə̀ nya Ablaham ba tɨ bənɨ bə na jimiɛhɛ Bəju wɨ ndzɨ Jisɔs Klistu, ɨ bɨ bə galə shəŋ yu wɨ, ɨ kə keŋkɛ tɨ Kɨn'yɨntɨ kɨ Nyɔ lə kɨ yu nə̀ kaa.
Naji ɨ bilaŋ chi bikaŋə bi Nyɔ lə koso kə
15 Bəŋgwɨŋ, kə dzê mfɨkə nə biɔŋ wɨ bi bənɨ ba bɔ kɨ fɨtɨ díɔ chi. Bənɨ ba bɔ sese fiɔŋ ba diə nchínə, tə naji ɨ miɨ chi fi koso kə makə lə yu yinə fiɔŋ fi wɨ. 16 Tsukɔ bikaŋə bi Nyɔ lə wɨ, yu nə̀ ka bi bə Ablaham ma bə wene wu jiwa yu ná fɔɔ nə kɨtsɔŋ kɨhɨ ntɨŋ. Fi na jimiɛhɛ bubɔndɔ lə, “Na beŋ kɨyɛŋ bə ná fɔɔ nə kɨtsɔŋ ka ntɨŋ,” Fi na donchɛ lə nchanyɛ nyi na ji tsukɔ wɛŋ miu wɨ, wɛŋ no ji Klistu. 17 Fiɔŋ fi nna nse lə ntə na lə, Nyɔ nə̀ ka bikaŋə biŋ, biya chɛ gɨna bə mbaatiɛ (430) fə yu tə nya bilaŋ. Nɨ fi na ji manɨ, naji ɨ bilaŋ bi nə̀ ba nəjiŋ shiŋkiɛ kə nchínə yi Nyɔ nə̀ diə fiəfiə ba fə lə fiɔŋ fi yu nə̀ kaa la kɨlɔlɔ. 18 Jilə naji ɨ miɨ keŋkɛ kɨnya kɨŋ ji kwa tsa yi yu na galɨ bilaŋ, ɨ fi tsukə jimiɛ lə Nyɔ nə̀ ka bənɨ kɨnya kɨŋ. Bəmanɨ, Nyɔ nə̀ nyaa Ablaham yu biəlɨ bikaŋə bi yu nə̀ kaa yu.
19 Bə́ nə̀ nya bilaŋ ndzɨ la? Bə́ nə̀ yinə bilaŋ lə bə́ tseyɛ biɔŋ bi bənɨ na fɨsə, dze nə tsa ya bɨŋ gəŋ fɔ tsa yi wɛŋ wu Nyɔ nə̀ fəə no bikaŋə tsukɔ yu wɨ ná ba. Nyɔ tə nya bilaŋ biŋ lə bənchinda buhu nya miɨ wudɔ kaŋ, yu nya bənɨ kaŋ. 20 Kə na kkɨ lə miɨ wu fəntɨŋ na jimiɛhɛ lə yu kɨ ji tsa yi miɨ miuŋkpaŋ na fɨtɨ fiɔŋ. Bəmanɨ, Nyɔ ji yu wumbɔŋª.
21 Nɨ fi na ji manɨ, kɨjilə naji ɨ kɨlaŋ tsu ba kɨ yimbiɛ fiɔŋ fi Nyɔ nə̀ kaa? Naji ɨ fi kɨ ji manɨ kə kpa! Jilə kɨlaŋ kɨdɔ ka su kɨ naji ɨ kɨ nya buwəŋ, kɨjilə naji ɨ miɨ kɨ ji diəŋ Nyɔ yəsɨ ndzɨ yu na galɨ bilaŋ buni. 22 Bəmanɨ, Kɨŋwatɨ kɨ Nyɔ lə na tɨdi lə miɨ chi na ji mfia bubiə nəkoso. Fi kɨ ji lə, bikaŋə bi Nyɔ nə̀ kaa bia, na kwa miɨ wu galə shəŋ yihi Jisɔs Klistu wɨ wu ná keŋkɛ bi.
Fiɔŋ fi nə̀ fəə lə bilaŋ kɨ ji
23 Fiəfiə tsa yi Jisɔs nə̀ bambi kə baha fə bənɨ galə shəŋ yu wɨ, bənɨ nə̀ ji bilaŋ nəkoso ɨji bi' kanshɛ bɔ nɨ bənɨ bə tsɔŋ yi buŋfia lə ba fɔ tsa yi Nyɔ nə̀ donchɛ Jisɔs lə bɔ ga shəŋ yu wɨ. 24 Bilaŋ nə̀ ji bɨ bɨŋ sɨŋsɨŋ ba fɔ tsa yi Klistu nə̀ ba fə bənɨ galə shəŋ yu wɨ lə Nyɔ tə dze bɔ lə bɔ na sɨŋ bə ŋgbɔ yu nəfiə. 25 Nɨ Klistu ba bənɨ kɨ galɨ shəŋ yu wɨ, kɨjilə kə na bambiɛhɛ bilaŋ nəkoso. 26 Bəŋ bə tɛshɛ Jisɔs Klistu ntɨŋ, bəŋ bəchi na ji fɛŋ beŋ bə Nyɔ lə ndzɨ shəŋ yi bə galə Klistu wɨ. 27 Bə kɨ kkɨ lə miɨ chi wu bə́ nə̀ chɛsɛ yu biɔ Klistu ntɨŋ, yu' tsu fiɔŋ fimo bə Klistu. 28 Miɨ wudɔ na tsɔhɔ jimiɛ chichi bəŋ ntɨŋ, se lɨ yu ji Miɨbəju makə miɨ wu na jimiɛhɛ miɨ Bəju, mfia makə wɛŋ wu tsɔŋ, nyunso makə kpansɨ. Bəŋ bəchi' tsu fiɔŋ fimo Jisɔs Klistu ntɨŋ. 29 Nɨ bə na ji bənɨ bə Klistu lə mɛni, kɨjilə bə na ji tɨ beŋ bə Ablaham lə. Bə jiba ɨ bə keŋkɛ fiɔŋ fi Nyɔ nə̀ kaa Ablaham lɨ.