Beŋ bə faŋə bə Jisɔs lə tambi shɔŋ yi Nyɔ yi Pɔl nə̀ tɨfiə
2
Lə biya yɔɔ ntse bina chɛ, nchi mbəndə Jɛlosalɛm bɨ bə Banabas. Tsa yi nnə̀ mbɨndɨ, nnə̀ ndze Taytus. 2 Nnə̀ mbɨndɨ tsa nyi bɨŋ, ɨji nshafu yi Nyɔ lə mbəndɨ. Lə mbəndɨ sɔ, ŋŋəŋ bənɨ bə bə́ nə̀ kkɨ bɔ lə na bənsafiə, bɨ bə bɔ baŋgə gwɨ, ŋga shɔŋ yi ndzeŋe ya bɔ nəfiə, shɔŋ yi nnə̀ ntɨdi ya bə bənɨ bə na jimiɛhɛ Bəju. Nnə̀ mfə manɨ fə nɨŋ yi mɨ nɨŋə, bə yi nna mbambi nnɨntɨ jɛkə laa kɨlɔlɔ. 3 Bɔ wɔ manɨ ba jikə kkpəhə su lə bɔ sɔmbu dzɔ yi Taytus wu nə̀ ji bə mɨ, mɛfə yu nə̀ ji miɨ Bəglek. 4 Tə nə̀ jikə jimiɛ ndzɨ bənɨ bədɔ bə nə̀ lənə lə bɔ na ji bənɨ bə kɨmbɨŋ'ə bə nə̀ wədiə ba be bɨ ntɨŋ, bɔ tə nə̀ jikə kɨ chanyɛ bɔ beke fiɔŋ fia ntɨŋ. Bənɨ bɛŋ nə̀ ba lə bɔ chənə ba ŋəŋ chi kə na lanshɛ gwɨ Jisɔs Klistu ntɨŋ fə bɔ tsɔ bə bɨ buŋfia ntɨŋ. 5 Kə jikə bɨmiə fiɔŋ fibɔlə fia mɛ kpa, kə nə̀ fɨtɨ manɨ fə kə galə kɨyɛyi kɨ shɔŋ yi ndzeŋe nyi lə bəŋ'ɨ. 6 Bənɨ bə bə́ nə̀ ŋɨntɨ ba lə bɔ na ji tə bənɨ, bɔ nə̀ kə yinə tɨmo mɨ fiɔŋ fidɔ shɔŋ yi nnə̀ ntɨdi nyi wɨ. (Bənɨ ba fa bɔ nə̀ ji la lɨ lɛɛ, fia nə̀ kə keŋkɛ fiɔŋ fi fənə bə mɨ ndzɨ Nyɔ na sakəhə bənɨ nəgwɨ.) 7 Bɔ tsu ba ŋəŋ lə Nyɔ nə̀ nya shɔŋ yi ndzeŋe nyi mɨ kaŋ lə ŋkɨ ntɨfiə bənɨ bə na jimiɛhɛ Bəju, diəŋ nɨ bə́ nə̀ nya cha bə Pita lə yu tɨfiə bə Bəju. 8 Fi na ji lə, Nyɔ wu nə̀ nya wa Pita buŋga lə yu kɨ nɨntɨ nɨ wɛŋ wu faŋə Bəju lɨ, na yu tɨ wu nə̀ nya bu lə ŋkɨ nɨntɨ nɨ wɛŋ wu faŋə bənɨ bə na jimiɛhɛ Bəju lɨ. 9 Lə bɔ ŋəŋ nɨ Nyɔ sabiɛ mɨ, Jɛm, Pita bə Jɔŋ, bɔ bə bə́ nə̀ kkɨ lə bɔ na ji bintɔŋ bi bənɨ bə kɨmbɨŋ'ə, bɔ nya bɨ bə Banabas kɨbandə bə ndonchɛ lə bɨ bə bɔ na nɨntɨ fiɔŋ'ɨ fimo. Bɨ bə bɔ bɨŋ lə kə gəŋ kɨ nɨntɨ bə bənɨ bə na jimiɛhɛ Bəju, bədɔ gəŋ kɨ nɨntɨ bə Bəju. 10 Bɔ nə̀ bi kwa fiɔŋ fimo, fi ji lə kə gɔmbiə kɨ bənɨ bə fiəŋkə lə, ə ji tɨ fiɔŋ fi nnə̀ nse kɨtso lə mfə.Pɔl kweŋ Pita Antiɔk
11 Tsa yi Pita nə̀ dza ba ba Antiɔk, ŋkweŋ yu yəsɨ bə yəsɨ ndzɨ yu nə̀ gbɔ. 12 Fi na ji lə, yu nə̀ sa yu diɨ bə bənɨ bə na jimiɛhɛ Bəju, lə bənɨ bədɔ bə Jɛm nə̀ faŋə ba, yu gbɔ kɨ tsuyɛ jiŋ, yu gatɨ gwɨ yihi, yu jikə tsɔhɔ diə bə bənɨ bə na jimiɛhɛ Bəju. Yu nə̀ gatɨ gwɨ manɨ ndzɨ yu nə̀ lete kɨntsu kɨ nə̀ chiŋfi ka nchi no lə bə́ naji lə bə́ sɔmbu miɨ wu na jimiɛhɛ Miɨbəju dzɔ fə yu tə tsɔ miɨ wu Klistu. 13 Lə yu fə manɨ, bənɨ bə kɨmbɨŋ'ə bədɔ bə nə̀ ji Bəju biə fiə wu lɔshə wa. Banabas yu wu yu fɨsə ba biə tɨ fiə wubɔlə wu lɔshə wa. 14 Lə ŋŋəŋ lə fiə wubɔlə na jimiɛhɛ diəŋ bə shɔŋ yi ndzeŋe chi Klistu nə̀ tseyɛ, nntə bə Pita bɔ bəchi nəfiə lə, “Mɛfə wə na ji fa Miɨbəju, kɨjimiɛ kɔhɔ na jimiɛhɛ chi kɨ Miɨbəju lə. Na dzɨ la tə fi wə na tombi bənɨ bə na jimiɛhɛ Bəju lə bɔ kɨ ji chi Bəju?”
15 Nnə̀ nchanyɛ bə Pita ma ndzɨ bɨ bə bɔ kɨbɛɛ bə na ji Bəju bə shinshi lə, kə na jimiɛhɛ bənɨ ba, bə na jimiɛhɛ Bəju, bə́ tsɨsə bɔ lə bənɨ bəbiə. 16 Bəmanɨ, kə na kkɨ lə Nyɔ na dzɛhɛ miɨ lə miɨ wa na ji diəŋ yu nəfiə ndzɨ miɨ wa na galɨ bilaŋ. Nyɔ na dze ndzɨ miɨ wa' ga shəŋ Jisɔs Klistu wɨ. Bɨ Bəju kɨbɛɛ, kə bɨŋ bə Klistu Jisɔs fə kə kɨ ji diəŋ Nyɔ yəsɨ, əjikə jimiɛ ndzɨ kə na galɨ bilaŋ. Fi na ji lə, naji ɨ Nyɔ dze kə miɨ lə yu wa diəŋ ndzɨ miɨ wa na galɨ bilaŋ.
17 Jilə bə ndiɔnɔ yaha yi kə na diɔnɔ lə kə kɨ ji diəŋ Nyɔ yəsɨ Klistu ntɨŋ, bənɨ bu bɨ ŋəŋə lə kə na ji bənɨ bəbiə, kɨjilə Klistu fɛŋ na tambi bubiə lə? Fi na jimiɛhɛ ma dududu! 18 Jilə mɨ nchisə gbɔɔ kɨ wɛyɛ dzə́ yi bilaŋ'ə, ə ji biɔŋ bi nnə̀ nshakiɛ, kɨjilə nna nji miɨ wu na gbosɔ bilaŋ. 19 Fiɔŋ fi na ji na lə, dia wu bilaŋ'ə, nna nji miɨ wuŋkkpə, ə kkpɨsɨ bilaŋ mɨ, mɨ ŋkkpə fə ŋkɨ nji nɨ Nyɔ na se. 20 Nna nji ji bə́' bandɨ mɨ kɨtɨ kɨ ŋ'wa lə wɨ, mɨ ŋkkpə bɨ bə Klistu. Buwəŋ bu nna ŋkeŋkɛ fɛŋ na bwɛŋ kə. Na Klistu wu na ji mɨ ntɨŋ. Buwəŋ bu nna ŋkeŋkɛ fɛŋ mɨ wɨ na ndzɨ shəŋ yi mɨ ŋgalə Wɛŋ wu Nyɔ wɨ. Yu nə̀ donchɛ kɨnse bə mɨ ba nya gwɨ yihi ba kkpə ndzɨ mɨ. 21 Naji nnɨŋŋ kə shəŋ yi Nyɔ lə yi ndzeŋe yi yu na donchɛ bənɨ bə mfə lə bɔ fɔfo. Jilə miɨ na ji diəŋ Nyɔ nəfiə ndzɨ miɨ wa na galɨ bilaŋ, kɨjilə kkpə yi Klistu nə ji kɨlɔlɔ lɨ.