Kɨŋwatɨ kɨ Pɔl nə̀ bɔndɔ bə ntɛshɛ yi
Galɛsha
1
Na mɨ Pɔl wɛŋ wu faŋə wu Jisɔs Klistu wu bɔndɔ kɨŋwatɨ kɨŋ. Nna nji wɛŋ wu faŋə, ɨjikə jimiɛ mfaŋ yi miɨbəwəŋ mɨ makə wu nya mɨ buŋga. Na Jisɔs Klistu bɔ bə Taa waha Nyɔ wu nə̀ dzakɔ Jisɔs nə kkpə lɨ bə faŋə mɨ. 2 Bɨ bə bəwəma bə kɨmbɨŋ'ə bəchi bə na ji mɛ bə mɨ, kə tsɨsə ba bəŋ bəntɛshɛ bə bənɨ bə kɨmbɨŋ'ə bə kɨtuŋ kɨ Galɛsha ntɨŋ. 3 Nyɔ Taa waha bə Baba Jisɔs Klistu dônchɛ bəŋ shəŋ yi ndzeŋe ba nya bəŋ budə. 4 Jisɔs Klistu na wu nə̀ nya wa gwɨ yihi ndzɨ məmbiə maha fə yu fosɔ bɨ nə mbi wu bubiə no kaŋ. Fiŋ na ji nɨ Nyɔ wu na ji Nyɔ, yu ji Taa waha nə̀ sesɛ. 5 Bubəŋ buchi kɨ ji bə yu tsá chi ŋka sɨŋ. Fi kɨ ji ma.Shɔŋ yi ndzeŋe tsukɔ Jisɔs Klistu wɨ na kwa miu
6 Kɨgəsə na wɨntɨ mɨ lə fɛŋfɛŋ mɛ bə dza ba kɨ fichə yasɨ Nyɔ wɨ wu nə̀ bəndə wa bəŋ ndzɨ shəŋ yi ndzeŋe yi Klistu na keŋkɛ bə bəŋ ba kɨ biəlɨ ji shɔŋ yidɔ lɨ chichi yi bə na gɔmbiɛ lə na yi ndzeŋe. 7 Fi na jimiɛhɛ ji lə shɔŋ yi ndzeŋe yidɔ ya su chichi. Fi na ji kwa lə bənɨ bədɔ na se lə bɔ tsaŋ bufɨ bwɛnɨ ba bɨsɨ shɔŋ yi ndzeŋe yi na tsukɔ Klistu wɨ. 8 Mɨ ŋkɨ ntɨdi lə se lɨ ba bɨ, makə nchinda wu Nyɔ wudɔ nə bɔ́ ba kɨ tɨdi bəŋ shɔŋ yidɔ chichi ɨjikə jimiə yi kə nə̀ tɨdi ya bəŋ, lɔŋ kwê miɨ wa! 9 Nɨ kə' tədiə cha, mɨ ŋkɨ ntsu su nchanyɛ ya wɨ ntɨdi lə, ɨ miɨ dza kɨ tɨdi bəŋ shɔŋ yidɔ chichi ɨ jikə jimiə yi bə nə̀ ləkə ya nə bɨ lɨ, lɔŋ kwê miɨ wa!
10 Bə na gɔmbiɛ lə nna nse ji lə bənɨ kɨ sɛnti mɨ maa lə Nyɔ kɨ sɛnti mɨ lə? Maa bə na gɔmbiɛ lə nna nse lə ŋkɨ mfɨtɨ bənɨ woko buni lə? Jilə nna nse lə ŋkɨ mfɨtɨ bənɨ woko buni, njikə kɨ ji miɨ wu nɨŋ wu Klistu.
Shɔŋ yi ndzeŋe yi Pɔl nə̀ tɨfiə nə̀ fɔ nə Jisɔs lɨ
11 Bəŋgwɨŋ, nna nse lə bə kkə̂ lə shɔŋ yi ndzeŋe yi Nyɔ yi nnə̀ ntɨfiə ya bəŋ na fiɔŋ fi nə̀ fɔɔ nə miɨbəwəŋ'ɨ kə. 12 Nnə̀ ŋkə wɔkɔhɔ nə miɨ wudɔ lɨ, miɨ wudɔ nə̀ kə tɨfiə mɨ. Nə̀ Jisɔs Klistu wu nə̀ donchɛ mɨ. 13 Nna nchanyɛ mɛ ɨji bə nə̀ wɔ nɨ fiə wɛŋ nə̀ sa wu ji tsa yi nnə̀ mbambi mbiəlɨ kɨmbɨŋ kaha kɨ Bəju lə. Nnə̀ mba ŋkɨ nsesɛ gbo bəntɛshɛ bə bənɨ bə Nyɔ lə nəjiŋ dzə́ yibiə ntɨŋ, nse tɨmo lə nshiŋkiɛ bɔ. 14 Nnə̀ ndəŋfɨ dzə kɨmbɨŋ kaha kɨ Bəju lə ntɨŋ ya butsɔ bwɛmɨ budɔ bənɨ baha ntɨŋ, nshi tɨ tsoo fiə wu bətaa baha lə ntɨŋ. 15 Bəmanɨ Nyɔ nə̀ sa mɨ ga lɨ, mbambi nɛ shəŋ. Shəŋ yihi yi ndzeŋe yi yu nə̀ donchɛ mɨ, yi fə yu bəndɨ mɨ. 16 Yu donchɛ wene bə mɨ nɨ yu nə̀ se, fə ŋkɨ ŋgəndə ntɨfiə kɨhɨ bə bənɨ bə na jimiɛhɛ Bəju. Nɨ yu nə̀ donchɛ manɨ, ntsukə jimiə wu naji lə mbi fiɔŋ bə miɨbəwəŋ. 17 Nnə̀ ŋkə mbəndə tɨmo Jɛlosalɛm lə ŋŋəŋ bənɨ bə nə̀ sa bɔ ji beŋ bə faŋə bə Jisɔs lə nə mɨ lɨ. Nnə̀ ndza ba gəŋ fiɛŋ ji Alɛbia, ndza nɔ ba fichə tsu jiŋ Damaskus.
18 Lə biya bitɛ chɛ, mbəndɨ Jɛlosalɛm lə bɨ bə Pita kənənɨ gwɨ́. Nɨ nnə̀ mbəndə, kə me bɨ bə yu díɔ yɔɔ ntse tɨŋ. 19 Nnə̀ ŋkə ŋəŋkəhə miɨ wudɔ nə kɨntsu kɨ beŋ bə faŋə bə Jisɔs lə ntɨŋ yasə kwa Jɛm jimə Baba waha Jisɔs. 20 Fiɔŋ fi nna mbondo fiŋ na yɛyi, Nyɔ kkɨ lə nna ntɨdiɛhɛ dyɛ. 21 Lə ba fɔ tsa yidɔ, ndza ba gəŋ sha yi Silia bə yi Silisha ntɨŋ. 22 Tsa ya wɨ nə̀ ji bəntɛshɛ bə bənɨ bə Klistu lə bə sha yi Judɛya nə̀ kkəhə mɨ nə bushi wɨ. 23 Bɔ nə̀ woko kwa bənɨ chanyɛ lə, “Miɨ wu nə sesɛ wa gbo bɨ nəjiŋ gəndə wa fɛŋ yu tɨfiə lə bənɨ gâ shəŋ Klistu wɨ, ɨji fiɔŋ fi yu nə̀ sa yu se lə yu bɨsɨ fi.” 24 Bɔ wɔ manɨ kɨ kuntə Nyɔ bə fiɔŋ fi yu fəə bə mɨ.