Məndəŋfɨ mə nə̀ kwɛɛ Pɔl bə biɔŋ bidɔ bi Baba nə̀ donchɛ yu
12
Nna nji lə ŋkɨ ndze gwɨ mɛfə mbɨ na jikə jimiɛ su. Njiwa ŋkɨ mfɨtɨ ma ndzɨ məndəŋfɨ bə biɔŋ bi bunyələ bi Baba nə̀ donchɛ mɨ. 2 Nna ŋkkɨ miɨ wu Klistu wudɔ wu Nyɔ nə̀ jɔŋɔ nə mbi no ntɨŋ, yu bəndɨ ba gəŋ bɔlu bɨŋ tɛ.ª Ndɛŋ na biya yɔɔ ntse bina nɨ fi nə̀ tɨchə. Fa yu nə̀ bəndɨ sɔ bə gwɨ yihi lɛɛ, fa yu nə̀ sɨŋ bə gwɨ lɛɛ, nna ŋkkəhə. Na kkɨ kwa Nyɔ. 3 Nna ntsu su lə, nna ŋkkɨ lɨ miɨ wa, (fa yu nə̀ bəndɨ mɨ bə gwɨ yihi lɛɛ, fa yu nə̀ sɨŋ bə gwɨ yihi lɛɛ, nna ŋkkəhə. Na kkɨ kwa Nyɔ). 4 Nyɔ nə̀ jɔŋ ba bəndɨ bə yu dɨ wu buni lə wu Nyɔ lə ntɨŋ, yu wɔ biɔŋ bi naji ɨ miɨ tə kə. Bia biɔŋ ji bi bə́ kə nyaha buŋga lə miɨbəwəŋ kɨ chanyɛ. 5 Na miɨ nɨ wa wu naji ŋkuntsu gulu ndzɨ yu. Naji ŋkɨ ŋkuntsɔ gulu ndzɨ gwɨ yɛmɨ kə, fiəŋkə kwa lə ŋkuntsu gulu tsukɔ kɨyee kɛmɨ wɨ. 6 Ɨji tɨmo lə nna nse lə ŋkuntsu gulu ndzɨ gwɨ yɛmɨ, njikə kɨ ji mfidi, ndzɨ fiɔŋ fi ŋkɨ nchanyɛ kɨ ji yɛyi. Bəmanɨ mɨ nɨŋŋ mfə fia fiɔŋ, fə miɨ wudɔ jɛkə kɨ gɔmbiɛ kəmɨ chichi ya fiɔŋ fi yu na ŋɨntɨ mɨ wɨ, bə fi yu na woko nə mɨ lɨ.7 Bəmanɨ, bə mfə lə ŋkə ŋgbɔɔ kɨ dze gwɨ kɨtso bə biɔŋ kɨyɛŋ bi kɨgəsə kɨ wɨŋə lə bi Nyɔ nə̀ donchɛ mɨ, yu nə̀ faŋ ŋgwe yi kɨmbɨmbiə kɨdɔ kɨ kɨ bɨmbɨ gwɨ yɛŋŋ. Kɨmbəmbiə kɨŋ ji nchinda wu Satan wu nə̀ finchə bə mɨ, fə njɛkə kɨ dze gwɨ kɨtso. 8 Ntsɨsɨ bə Baba tsukɔ fiɔŋ fisu wɨ tsá tiɛ, nnende lə yu tɔ̂ fiɔŋ fisu nə mɨ wɨ. 9 Bəmanɨ yu chi bə mɨ lə, “Nchitə yɛmɨ yi mɨ nchitə wə' kwətsə wə lɨ, ndzɨ buŋga bwɛŋ ba bu kɨ nɨntɨ miɨ wɨ gəŋ tuŋ fəŋgbɨŋ tsa yi yu na ji yee.” Bəma njiwa ŋkɨ ŋ'woko buni, ndze tɨ gwɨ tsukɔ kɨyee kɛmɨ wɨ ya manɨ, fə buŋga bu Klistu lə kɨ nɨntɨ mɨ wɨ. 10 Fi kɨ ji lə, nna ŋ'woko buni bə kɨyee kɛmɨ ma muntɔŋ mu bə́ na tumiɛ mɨ bə mu, ma bə ŋgə wu nna ŋ'woko, ma gbo wu bənɨ na sesɛ mɨ nəjiŋ bə bəŋgə bə nna nji bɔ ntɨŋ ndzɨ Klistu. Nna ŋ'woko buni manɨ ndzɨ tsa yi nna nji yee, tə na tsa ya wɨ yi nna nji lə ŋkɨ nji bə buŋga.
Kɨgaŋ kɨ Pɔl nə̀ keŋkɛ bə ntɛshɛ yi bənɨ bə kɨmbɨŋ'ə yi Kɔlɛn
11 Mɨ ntsu mfidi! Na bəŋ bə fəə lə ntsu manɨ. Na bəŋ bə nəji lə bə chanyɛ buni kɛmɨ. Məfə ŋkə ŋkwətsə fiɔŋ'ɨ, fi na jimiɛhɛ lə nna nsɨ nə bənɨ bə na ji ba bəŋgaŋ bə beŋ bə faŋə bə Jisɔs lə lɨ. 12 Biɔŋ bi na donchɛ buŋga bu Nyɔ lə bə biɔŋ bintaŋ bintaŋ ma biɔŋ bi kɨgəsə kɨ wɨŋə lə, nnə̀ ŋkansɨ shəŋ kɨtso kɨ fɨtɨ bi bəŋ ntɨŋ. Bimbi ji biɔŋ bi na donchɛ lə miɨ na ji wɛŋ wu faŋə wu Klistu wu yɛyi. 13 Fiɔŋ fi nnə̀ mfɨtɨ bə bəntɛshɛ bə bənɨ bə kɨmbɨŋ'ə bədɔ nshɨkɨ bəŋ na fi la, yasə lə nnə̀ ŋkə ntoso bəŋ ntə yidɔ lə bə kɨ chitə mɨ? Butɨɨ bə gûfiɛ mɨ bə fiŋ!
14 Na tsá tiɛ fɛŋ yi nna nse lə mba bəŋ'ɨ. Naji mba ntoso bəŋ ntə yi njitə yidɔ kə, ndzɨ nna nsɛhɛ biɔŋ biɛnɨ, nna nse ji bəŋ. Nna nchanyɛ mɛ ndzɨ na kə beŋ bə naji lə bɔ kɨ shɨkɨ bishəŋə bətɨɨ bəbɔlə bə bəmɛni bəbɔlə lɨ. Na bəchɛ beŋ bə bəmə beŋ bə ba bɔ kɨ shɨkɨ bishəŋə beŋ bəbɔlə lɨ. 15 Njiwa ŋkɨ ŋ'woko buni kɨtso bə mbɨsɨ yi fiɔŋ fichi fi nna ŋkeŋkɛ bəŋ'ɨ, bə nnya yi gwɨ yɛmɨ tɨ ndzɨ bəŋ. Jilə nna nlaŋkɨ bəŋ kɨtso, ɨ bə tsu kɨ laŋkɨ mɨ ji tsəsɨ? 16 Bə' ŋəŋ yɛyi lə nnə̀ ŋkə ntoso bəŋ ntə yidɔ yi njitə. Bəmanɨ bənɨ na tɨdi lə nnə̀ ŋ'wədi ba fukiɛ bəŋ. 17 Maa lə miɨ wudɔ nə bənɨ ntɨŋ bə nnə̀ mfaŋə ba bəŋ'ɨ nə̀ fukiɛ bəŋ bə yɨ wɛŋ lə? 18 Nnə̀ nnende Taytus lə yu bâ bəŋ'ɨ, nchi mfaŋə ŋgwɨŋ waha wa lə bɔ bə yu ba. Taytus nə̀ fukiɛ bəŋ tsa yi yu nə̀ ba ya? Bɨ bə yu nə̀ fɨtəhə biɔŋ bə kɨŋgɔmbiɛ kɨmo, kə gəndə tɨ gbo mo?
19 Diŋkəla bə na gɔmbiɛ lə nɨ kə kətə kɨ chanyɛ mɛ lə ma na ndzɨ kə na se ji lə kə tambi gwɨ yaha bəŋ nəfiə. Kə na chanyɛ ji nɨ bənɨ bə Klistu lə Nyɔ nəfiə. Nsáŋ yaha yi shəŋ'ə, fiɔŋ fichi fi kə na fɨtɨ bəŋ'ɨ kə na fɨtɨ ji lə bə kɔ̂. 20 Nna nlete lə naji mba ba ŋəŋ bə jikə jimiɛ nɨ nna nse lə bə kɨ ji, ɨ bə jikə ŋəŋkəhə tɨ nji nɨ bə na se lə ŋkɨ nji. Nna nlete lə naji mba ba ŋəŋ bənɨ kpanə, bɔ ji bə shəŋ yi yi, bɔ ji bə bulo kɨtso, bɔ nya kɨgaŋ kwa bə gwɨ́ yibɔlə, bɔ bɨsə yɨ yi bənɨ lə, bɔ ji bə ntsúŋ, bɔ ji bə tsasɨ, bɔ ji butsaŋə. 21 Nna nlete lə tsa yi nchisə mba, ɨ Nyɔ wɛmɨ fə ɨ yaa kwe mɨ, ŋkɨ ndzudi gwɨ ndzɨ bənɨ bə nə fəə bubiə nɨ mfə yi biɔŋ bi kɨnyənə lə bə fiə wu ndzenɛ lə, ɨji bɔ kə tɔkaŋ nə fiə wuŋ wɨ.