Pɔl bə bənɨ bə na yundi lə bɔ na ji beŋ bə faŋə bə Jisɔs lə
11
Nna nnende kwa lə bə nyâ mɨ dzə nchanyɛ nchanyɛ yi buŋfidi tsəsɨ. Butɨɨ, bə gâ ma nchanyɛ! 2 Nna n'yɨtɨ yəsɨ bə bəŋ ɨji dzə́ yi Nyɔ lə ntɨŋ. Bə na ji mɨ lɨ nɨ wɛŋ wu kansɨ wu na bambi sɔŋfa wu mɨ ŋkaa lə nnya yu bə nyunso miu, nyunso no ji Klistu. 3 Bəmanɨ nna nlete lə bə́ ná jibiɛ lɨ bufɨ bwɛnɨ diəŋ nɨ ye nə̀ wədiə ba fukiɛ Iff, ɨ bə shə dzə yi kɨyɛyi yi ntsaaŋ yi bə na biəlɨ Klistu yi ntɨŋ. 4 Nna nchanyɛ mɛ ndzɨ bə na bu kɔchɛ biɔŋ bichi. Ɨ miɨ ba kɨ chanyɛ tsukɔ Jisɔs wudɔ wɨ chichi, ɨjikə jimiə wu kə nə̀ tɨfiə bəŋ, makə kɨn'yɨntɨ kɨdɔ wɨ chichi, ɨji kɨ bə nə̀ kə ləkə nə Nyɔ lɨ, makə tsukɔ shɔŋ yidɔ wɨ chichi, ɨji yi bə nə̀ kə ləkə nə bɨ lɨ, bə bu kɔtu bukɔtɔ. 5 Nna ŋɨntəhə lə bənɨ bə bə na tsɨsə ba lə bəŋgaŋ bə beŋ bə faŋə bə Jisɔs lə na ko ba ya mɨ. 6 Mɛfə ŋkə mfɨyə nchanyɛ buni, fi na jimiɛhɛ lə nna ŋkkəhə fiɔŋ fi Nyɔ lə. Fiŋ na fiɔŋ fi kə donchɛ bəŋ dzə́ ntɨŋ chi ma biɔŋ bichi ntɨŋ.7 Chi nnə̀ ntɨfiə bəŋ shɔŋ yi ndzeŋe yi Nyɔ kɨlɔlɔ bikwəntsə sɨŋ, fɛŋ fi fɔ lə nnə̀ mfə ji bubiə bə nshisəsɨ gwɨ yɛmɨ koso manɨ fə mfəə bə kɔ? 8 Naji ntə lə nnə̀ n'yɨ nə bəntɛshɛ bə bənɨ bə kɨmbɨŋ'ə bədɔ lɨ, chi nnə̀ nləkə nchitə nə bɔ lɨ, nnɨntɨ ji bəŋ'ɨ. 9 Tsa yi nnə̀ nji bə bəŋ, nnə̀ ŋkə ntosɔ ntə yidɔ miɨ wudɔ fi nə bəŋ ntɨŋ tsa yi nnə̀ mfiəŋkə. Bəŋgwɨŋ bə nə̀ ba nə Mɛsɛdɔnia nə̀ nya fiɔŋ fichi fi nnə̀ nse. Bəma nə biɔŋ bichi ntɨŋ, nnə̀ nyaha bəŋ funyi. Njiwa ŋkətə mbu nɨŋŋə ma. 10 Nɨ kɨyɛyi kɨ Klistu lə na ji mɨ wɨ, miɨ na sɨŋ su nə sha yi Akɛya ntɨŋ wu naji ɨ yu baŋ bifuŋ biɛmɨ nə fiɔŋ wɨ fi nna ndze gwɨ ndzɨ fi. 11 Nnə̀ nɨnntɨ nchitə nə bəŋ'ɨ manɨ ndzɨ la? Na ndzɨ nna nsɛhɛ bəŋ? Nna nse lɨ bəŋ Nyɔ kkɨ nu.
12 Fiɔŋ fi nna mfɨtɨ, njiwa ŋkətə kwa mfɨtɨ, fə mbaŋə dzə yi bənɨ bə na gɔmbiə ba lə bɔ na ji diəŋ bə bɨ bə fiɔŋ fi bɔ na dze gwɨ bə fi. 13 Bənɨ ba na jimiɛhɛ tɨmo beŋ bə faŋə bə Klistu lə bə yɛyi. Bɔ na ji bənɨ bə nɨŋ'ə bə dyɛ lə. Bɔ doŋko kwa Klistu bushi wɨ lə bɔ na ji beŋ buhu bə faŋə. 14 Fiŋ na fiɔŋ fi masə kə, Satan yu wu yu na ba yu fiŋ gwɨ yihi lə yu na ji nchinda wu kɨŋgbooŋ. 15 Bəma na fiɔŋ fi masə kə bə tsa yi bənɨ buhu bə nɨŋ'ə sə fiŋɛ tɨ ba kɨ boto nɨ bənɨ bə na tɨfiə bənɨ chi fiə wu diəŋ naji lə wu kɨ ji. Kɨfəŋgbɨŋ kɨbɔlə ná kɨ ji diəŋ nɨ fiə wubɔlə na ji.
Pɔl kuntsu gulu ndzɨ bəŋgə bə yu nə̀ woko
16 Mɨ ŋkɨ nchisə chanyɛ lə miɨ kə̂ dzɛɛ mɨ lə nna nji mfidi. Bəmanɨ ɨ bə dze tɨmo mɨ lə nna nji mfidi, bə ga la fə nchanyɛ nchanyɛ yi nsɛŋ yi gwɨ tsəsɨ nɨ mfidi. 17 Fiɔŋ fi nna nchanyɛ fɛŋ ŋkuntsɔ gulu nle sɨŋ, na jimiɛhɛ fiɔŋ fi na ji ɨ Baba kɨ se lə nchanyɛ. Nna nchanyɛ chi mfidi. 18 Nɨ bənɨ kɨyɛŋ na dze gwɨ dzə́ yi bənɨ bə mbi no lə ntɨŋ, kɨjilə njiwa ŋkɨ ndze tɨ yɛmɨ gwɨ. 19 Mɨ nchanyɛ mɛ ndzɨ bə na ləkə bəŋfidi bə kɨnlaŋ, bə tɨdi lə bə na ji bə bufɨ! 20 Bə' ga lə bənɨ kɨ dze bəŋ bəŋfia bəbɔlə lɨ, bɔ jimi bəŋ bɨŋ, bɔ fichi nə bəŋ wɨ, bɔ dze gwɨ, bɔ kɨtɨ bəŋ bə kaŋ bushi wɨ. 21 Naji ntə lə kə nə̀ ji yee, kə jikə fəkə jimə bia biɔŋ!
Bəmanɨ, jilə fiɔŋ fia su fi naji ɨ miɨ kɨ dze gwɨ bə fi, tə mɨ wu mɨ njiwa ŋkɨ ndze tɨ gwɨ bə fiɔŋ fia. Nna nchisə chanyɛ fiŋ nɨ mfidi.
22 Jilə bənɨ ba na Bəhiblu, tə nna nji tɨ wudɔ. Jilə bɔ na ji Bəisla, tə nna nji tɨ wudɔ. Jilə bɔ na ji kɨtsɔŋ kɨ Ablaham lə, tə nna nji tɨ wudɔ. 23 Jilə bɔ na ji bənɨ bə na nɨntɨ Klistu lɨ, tə mɨ n'ya bɔ bə fiŋ. (Nna nchanyɛ fiŋ nɨ miɨ wu dza.) Mɨ nnɨŋ kɨtso ba ya bɔ, mɨ njiŋ tsɔŋ yi buŋfia ntɨŋ tsá kɨyɛŋ ba ya bɔ, bə́ bumbu mɨ tsá kɨyɛŋ yi kə bɔmbiɛ, kkpə gɨnsɨ mɨ tsá yi lɨ yi lɨ. 24 Bəju kə mɨ bə bəgala tsá shɨŋ, bɔ shoko tsá kɨyɛŋ, tsa miu ntɨŋ bɔ gəŋ bɔ shɔ mɨ bəgala ɨ shɨkɨ kwa miu lə fɔ mbaania. 25 Bəloma nə̀ kə mɨ tsá tiɛ bə bintɛ, bənɨ bədɔ tumiɛ mɨ bə tá tsa miu. Kɨkpɔŋkɔ kɨ biɔ nə̀ gbədiɛ tsá tiɛ nji kɨ ntɨŋ, mme ŋgɔŋ ntɨŋ ba shə mɔ ntɨŋ. 26 Mɨ ŋgəndə kɨtso. Gbəndɨ wɛŋ wuŋ ntɨŋ, mɨ mfɔfo nə binchɛŋ kaŋ, mɨ mfɔfo nə bənɨ bə buyi lə kaŋ, mɨ mfɔfo tɨ nə bənɨ bɛŋŋ bə kɨtuŋ'ə kaŋ ba chi fɔɔfo nə bəbanə kaŋ. Mɨ mfɔfo nə kɨtuŋ kaŋ, mɨ nchi fɔɔfo ba jikə kkpəhə kpa, mɨ mfɔfo ba jikə kkpəhə ŋgɔŋ məmbəŋ ntɨŋ, mɨ mfɔfo tɨ nə bənɨ kaŋ bə na yundi lə bɔ na ji bəŋgwɨŋ Klistu ntɨŋ. 27 Mɨ ŋkə gwɨ bə nɨŋ kɨtso. Mɨ me kɨnɨ kə mɛɛ tsá kɨyɛŋ. Mɨ njiŋ dzɔŋ ndiə sɨŋ, mu sɨŋ. Mɨ njiŋ tɨ tsá kɨyɛŋ mbɨkə sɨŋ fiɔŋ fidiənə, mɨ njiŋ fiəfɨ ntɨŋ gwɨ yiya. 28 Bə n'yinə biɔŋ biŋ bichi wɨ, nna nji ntə yibəŋ nəkoso díɔ chi ndzɨ biŋgɔmbiɛ bi nna ŋkeŋkɛ tsukɔ bəntɛshɛ bə bənɨ bə kɨmbɨŋ'ə wɨ bəchi. 29 Tsa yi miɨ na ji yee, ŋkɨ nji tɨ yee. Ɨ miɨ na fɨtɨ wudɔ fɨtɨ bubiə, fi kɨ lo mɨ wɨ kɨtso. 30 Jilə nna nji lə ŋkuntsu gulu, ŋkɨ ŋkuntsɔ ji bə biɔŋ bi na donchɛ lə nna nji yee. 31 Nyɔ wu ji Nyɔ, yu ji Chɛ Baba Jisɔs, wu kɨŋkuntə na ji bə yu tsá chi ŋka sɨŋ, yu na kkɨ lɨ lə nna n'yaləhə. 32 Tsa yi nnə̀ nji Damaskus, miɨ wu nə̀ sakɨ Ŋkuŋ Alɛtas nəkoso laŋə lə bə́ tɨ̂ŋkɨ fiənsɨ yi mbaŋ wu kɨtuŋ ka lə ntɨŋ ba kwe mɨ. 33 Bəmanɨ bə́ dze mɨ ba chɛse ŋka ntɨŋ ba foso kɨbɔŋɔ kɨ mbaŋ'ə ntɨŋ ba shisəsɨ mɨ binchi, ŋkpɔsɔ nə yu kaŋ.