Pɔl tambo nɨŋ yihi
10
Mɨ wu Pɔl kɨbɛɛ, nna ŋkuchi bəŋ kaŋ dzə́ yi kɨyəfu lə ntɨŋ bə budə bu Klistu lə. Na mɨ wu bə́ na tɨdi lə tsa yi nna nji dia wudɔ ŋkɨ nchanyɛ buntaŋ, mba fə bəŋ ku, ŋkɨ nji bə kɨyəfu. 2 Nna nnende bəŋ lə tsa yi mba, bə kə̂ fəkə lə ŋkɨ nji buntaŋ bə bəŋ nɨ mba ŋkɨ nji bə bənɨ bə na gɔmbiɛ lə kə na fɨtɨ biɔŋ kə biəlɨ ji biŋgɔmbiɛ bi bənɨ bə mbi no lə. 3 Na yɛyi lə kə na ji mbi no ntɨŋ, bəmanɨ kə na tunɔhɔ dzoŋ nɨ bənɨ bə mbi no lə na tunɔ. 4 Biɔŋ bi kə na tunɔ dzoŋ su na jimiɛhɛ bi mbi no ntɨŋ. Biɔŋ bi kə na tunɔ dzoŋ su na keŋkɛ buŋga bu fɔɔ nə Nyɔ lɨ lə kə kɨ kpodiɛ bidɨ bintaŋ su. 5 Kə na ba kə dze biɔŋ bi dzoŋ'ə biŋ ba kpodiɛ yímbiɛ yi bənɨ na yimbiɛ su, kə shisəsɨ gwɨ́ yi dzenɛ chi yi na baŋkɨ lə bənɨ kə kkə Nyɔ, kə ya tɨ biŋgɔmbiɛ bi bənɨ lə su, kə fɨtɨ bɔ woko ji bə Klistu. 6 Tsa yi bə donchɛ lə bə na woko bə Klistu bə shəŋ yɛnɨ chi, ɨ kə tə nya ŋgə bə miɨ chi wu na bambi yu tɛti fo bə Klistu.7 Bə na ŋɨntəhə fiɔŋ fi na ji bəŋ nəfiə! Jilə miɨ na kkɨ yɛyi lə yu na ji miɨ wu Klistu, yu kɨ gɔmbiɛ lə nɨ yu na ji miɨ wu Klistu, cha chi kə na ji tɨ. 8 Ɨji tɨ lə nna ŋkuntsɔ gulu kɨtso ndzɨ buŋga bu kə na keŋkɛ bu Baba nya, ɨ yaa kɨ jikə kwekɛhɛ mɨ. Buŋga buŋ na bu na ji lə bu koso bəŋ, bu na jimiɛhɛ lə bu tsaŋ bəŋ. 9 Nna nsɛhɛ lə fi kɨ yinshi wələ nna nlesɛ bəŋ bə biŋwatɨ biɛŋ. 10 Nna ntɨdi mɛ ndzɨ bənɨ bədɔ dza kɨ chanyɛ kɛmɨ, bɔ tɨdi lə, “Yu na ba yu kɨ bondo biŋwatɨ bintaŋ, bi ji bə díɛ yintaŋ sɔ ntɨŋ, bəmanɨ tsa yi yu sə ba bənɨ nəfiə, yu kɨ ji bə kɨyəfu, nchanyɛ yihi jikə fɔkɔ fiɔŋ.” 11 Ba bənɨ kɨ kkɨ lə fiɔŋ fi kə na chanyɛ biŋwatɨ ntɨŋ tsa yi kə na sɨŋ mɨ, kə ná fɨtɨ fi tsa yi kə sə ba.
12 Kə na diɔhɔ ji lə kə fɨkə gwɨ́ yaha, makə lə kə kɨ makɨ gwɨ́ yaha bə bənɨ bədɔ bə na chanyɛ ba buni kɨ gwɨ́ yibɔlə. Nɨ bɔ na fɨkə gwɨ́ yibɔlə bɔbɔ, bɔ makɨ tɨ gwɨ́ yibɔlə bɔbɔ, fi na donchɛ lə bɔ na kkəhə fiɔŋ. 13 Yaha na ji lə kə na kuntsɔhɔ gulu kə yasə ntandə. Kə na kuntsɔ gulu kə kətə ntandə ntɨŋ yi Nyɔ nə̀ nya bɨ kaŋ lə kə nɨŋ ba fɔ tɨ ma bəŋ wɨ. 14 Kə na ləhə ji ntandə nɨ kə na ba kə foto bəŋ wɨ. Kə nə̀ ji bənɨ bə fiəfiə bə gəndə bə shɔŋ yi ndzeŋe yi Klistu ba fɔ bəŋ wɨ. 15 Kə na kuntsɔhɔ gulu kə yasə ntandə, fi ji lə kə na kuntsɔhɔ gulu nɨŋ yi bənɨ bədɔ' nɨŋə wɨ. Bəmanɨ fiɔŋ fi kə na jiŋgə fiə kə kkɨ na lə nɨ kɨmbɨŋ kɛnɨ na ko kɨ gɨntɨ fiə, na nɨ ndəŋgə wu nɨŋ yaha dia wɛnɨ na ko yu gɨntɨ buni. 16 Bəma ɨ kə llə ntandə ba tə shɔŋ yi ndzeŋe bituŋ bidɔ ntɨŋ, ɨ fi jikə kɨ ji lə kə na kuntsɔ gulu bə nɨŋ yi bə́ sə nɨŋə dia wu miɨ wudɔ lə. 17 Na nɨ fi na ji bubɔndɔ Kɨŋwatɨ kɨ Nyɔ lə ntɨŋ lə,
“Ɨ miɨ na kuntsɔ gulu, yu kɨ kuntsɔ ji nə fiɔŋ wɨ fi na ji mfə yi Baba fi.”
18 Miɨ wu na donchɛ gwɨ yihi lə yu na ji miɨ wu diəŋ, na wa miɨ kə wu Baba na ŋɨntɨ lə yu na ji miɨ wu diəŋ. Miɨ wu Baba na ŋɨntɨ lə na wu diəŋ, na yu wu na ji miɨ wu diəŋ yu yəsɨ.