Miɨ wu Nyɔ na laŋkɨ kɨnya kɨhɨ
9
Mbɨ wudɔ na sɨŋ su tɨmo wu naji lə mbɔndu bəŋ kɨ nɨŋ yi chitə bənɨ bə Nyɔ lə bə Judɛya. 2 Nna ŋkkɨ lɨ lə bə na keŋkɛ lɨ shəŋ yi chitə bɔ. Na fiɔŋ fisu fi nna ŋkuntsɔ gulu bə bənɨ bə Mɛsɛdɔnia tsukɔ bəŋ wɨ, nchanyɛ lə bəŋ bənɨ bə sha yi Akɛya ntɨŋ bə nə̀ sese dze nə kɨya kɨ nə chɛɛ kɨŋ wɨ lə bə chitə bɔ. Shəŋ yi bə na ji yiŋ bə yi lə bə kɨ nya yi' fə shəŋ yi bənɨ lə kɨyɛŋ nə bɔ ntɨŋ dzakɔ. 3 Bəmanɨ, mfaŋkɨ wa bəŋgwɨŋ bɛŋ bəŋ'ɨ fə gulu wu kə na kuntsɔ tsukɔ bəŋ wɨ ndzɨ kɨdəndə kɨŋ jɛkə fɔkɔ lə na wu kɨlɔlɔ lə. Nna mfaŋkɨ bɔ fə bə fəə gwɨ nɨ nnə̀ ntədiə lə bə ná kɨ ji. 4 Jikə jimiɛ manɨ, ɨ fi tɨchə lə bɨ bə bənɨ bə Mɛsɛdɔnia bədɔ ba ba ŋəŋ ɨji bə kə fəkə gwɨ, ɨ wa yaa ná kɨ ji nəŋ bɨ wɨ, gwɨtɛɛ bəŋ bə bəŋə, ɨji kə nə galɨ bufɨ bəŋ wɨ? 5 Na fiɔŋ fi fəə mɨ ŋgɔmbiɛ lə fi na ndzeŋe lə nnende bəŋgwɨŋ bɛŋ lə bɔ sa fiə tsa bambi ba ba bəŋ'ɨ ba banchɛ kɨnya kɨ bə nə̀ kaa kɨŋ. Bəma, ɨ kɨnya ka kɨ ji lə na fiɔŋ fi bə na nya nə kɨnse kɛnɨ ntɨŋ, ɨjikə jimiə lə bə́ na tombi bəŋ.6 Bə kkə̂ lə miɨ wu na tishɛ tsəsɨ, yu jiwa yu banchɛ tɨ tsəsɨ, miɨ wu tishɛ kɨyɛŋ, jiwa yu banchɛ tɨ kɨyɛŋ. 7 Miɨ chi nə bəŋ ntɨŋ naji lə yu kɨ nya nɨ yu sə gɔmbiɛ nə yu shəŋ, yu jikə nyaha yu kpa gwɨ makə yu nya wələ bə́ na tombi yu. Bə kkə̂ lə Nyɔ na laŋkɨ miɨ wu na nya bə kɨnlaŋ. 8 Naji ɨ Nyɔ chitə bəŋ bə biɔŋ bichi ba fə tɨmo bi kɨyɛnti, fə bə kɨ keŋkɛ biɔŋ bichi tsá chi bi kwətsə bəŋ'ɨ bəchi, ɨ bə tə kɨ fɨtɨ nɨ́ŋ yi ndzeŋe chi su. 9 Fi na ji bubɔndɔ lə,
“Yu' yente kɨnya kɨhɨ bə bənɨ bə fiəŋkə,
biɔŋ bihi bi diəŋ ná kətə bi ji tsá chi.”
10 Nyɔ wu na nya ŋgwe bə miɨ wu na tishɛ bə bidiəŋ bə́ diɨ, yu jiwa ɨ yu nya ba chi yinə ŋgwe yi biɔŋ biɛnɨ ba fə ɨ fiə wɛnɨ wu diəŋ ba bəŋ bə mbanchə yi kɨtso. 11 Nyɔ jiwa ɨ yu nya bəŋ bubəŋ dzə́ ntɨŋ chi bə mfə lə bə kɨ yanshɛ kaŋ yɛnɨ buni bə bənɨ bədɔ, fə bənɨ kɨ nya kɨmbafə bə Nyɔ tsa yi bɔ' keŋkɛ kɨnya kɨŋ nə bɨ kaŋ. 12 Nɨŋ yɛnɨ yi ndzeŋe yi bə na nɨntɨ nyi na baha kwa ji bə biɔŋ bi bənɨ bə Nyɔ lə na se, yi na fɨtɨ tɨ bənɨ nya Nyɔ kɨmbafə dzə́ ntɨŋ kɨyɛŋ. 13 Nɨŋ nyi jiya yi donchɛ ŋgwe yi bənɨ bə bə na ji, fi fə bənɨ jiba ɨ bɔ nya Nyɔ bubəŋ ndzɨ ŋkuntə yi bə na kuntə shɔŋ yi ndzeŋe tsukɔ Klistu wɨ yi bə na lɨmi yi bɨŋ. Bɔ ná kɨ nya tɨ Nyɔ bubəŋ nɨ bə yanshɛ kaŋ yɛnɨ bə bɔ ma bə bənɨ bəchi. 14 Bɔ ná kɨ tsɨsə Nyɔ bəŋ'ɨ, shəŋ yibɔlə ji bəŋ wɨ kɨtso ndzɨ Nyɔ na chitə bəŋ kɨtso. 15 Kə kɨ nya kɨmbafə bə Nyɔ ndzɨ kɨnya kɨhɨ kɨbəŋ kɨ naji ɨ miɨ jikə tədiə nɨ kɨ na ji.