Nɨ naji ɨ bənɨ bə kɨmbɨŋ'ə kɨ nya
8
Bəŋgwɨŋ, kə na se lə bə kkə̂ nɨ Nyɔ chitə bəntɛshɛ bə bənɨ bə kɨmbɨŋ'ə bə na ji sha yi Mɛsɛdɔnia ntɨŋ. 2 Bəŋgə bəntaŋ nə̀ tɨchə bɔ kɨtso. Bəmanɨ buni bubəŋ bu bɔ nə̀ keŋkɛ fə bɔ dze tsa ba yanshɛ kaŋ yibɔlə chi bə bənɨ bədɔ mɛfə bɔ nə̀ ji bufiəŋkə bubəŋ ntɨŋ. 3 Fiɔŋ fi naji ntə na lə, bɔ nə̀ nya kɨnya nɨ bɔ nə̀ kafu. Lə bɔ kɨ nya, bɔ nya ba yasə lɨ tɨmo nɨ nə̀ ji ɨ bɔ nya. Bɔ nə̀ nya nə kɨŋgɔmbiɛ kɨbɔlə ntɨŋ. 4 Bɔ nə̀ nende bɨ kɨtso lə kə nya bɔ dzə bɔ chɛse kaŋ nɨŋ nyi ntɨŋ fə bɔ tambo bənɨ bə Nyɔ lə. 5 Bɔ nə̀ fə fiɔŋ dzə yi kə nə̀ kkəhə lə naji ɨ bɔ fə yi ntɨŋ. Bɔ nə̀ sa nya gwɨ́ yibɔlə bə Baba, bɔ tə nya bə bɨ nɨ Nyɔ na se. 6 Bəma, kə nende Taytus lə nɨ yu nə̀ gbɔɔ nɨŋ nyi bəŋ ntɨŋ, yu gəŋ fiə ba chitə bəŋ nɨŋ yi nchitə nyi ka. 7 Bə na kkɨ mfə biɔŋ bichi buni, bi na tsukɔ kɨmbɨŋ wɨ, bi na tsukɔ bənchanyɛ wɨ, bi na tsukɔ bufɨ wɨ, bi na tsukɔ shəŋ yi fənə fiɔŋ wɨ bə bi na tsukɔ kɨnse kɨ bə na ji bə kɨ bɨ wɨ. Dzenəfə bə na kkɨ mfə biɔŋ biŋ bichi, kə na se lə bə kkə̂ tɨ n'yanshɛ kaŋ yənɨ nɨŋ yi nchitə nyi ntɨŋ.8 Nna nchanyɛhɛ mɛ nnya ji kɨlaŋ. Nna nse ji lə mfɔ ba ŋəŋ lə kɨnse kɛnɨ na kɨ yɛyi lə, nɨ nna mfɨkə bə kɨgaŋ kɨ bənɨ bədɔ na ji bə kɨ. 9 Bə na kkɨ shəŋ yi ndzeŋe yi Baba waha Jisɔs Klistu nə̀ keŋkɛ. Mɛfə yu nə̀ ji miɨ wu bubəŋ, yu nə̀ tsu miɨ wu fiəŋkə ndzɨ bəŋ, fə bufiəŋkə buhu fəə ɨ bə tsu bənɨ bə bubəŋ'ə. 10 Tsukɔ kɨnya kɨŋ wɨ, nna nse lə nnya biɛmɨ bitɨfiɛ. Fi na ji diəŋ lə na bəŋ bə nə̀ gbɔɔ ba mfə fiɔŋ kɨya kɨ nə̀ chɛɛ ka wɨ, ɨjikə jimiə bə mfə yi fiɔŋ kwa kə, bə nə̀ ji tɨ bənɨ bə nə̀ gbɔɔ ŋkeŋkɛ shəŋ yi fənə fiɔŋ. 11 Bə gə̂ŋ fiə ba kanə nɨŋ ya, fə tsa yi bə kanə nɨ buŋga bwɛnɨ na ji, ɨ fi gbɔnɔnɨ bə shəŋ yi bə na keŋkɛ bə mfə yi fiɔŋ. 12 Bə kkə̂ lə ɨ miɨ na keŋkɛ shəŋ yi nyanə, tə Nyɔ jiwa ɨ yu ləkə kɨnya kɨhɨ ɨ ba nə fiɔŋ fi miɨ wa na ji bə fi wɨ, yu jikə biələ ji fiɔŋ fi miɨ wa na fiəŋkə. 13 Nna ntɨdiɛhɛ mɛ lə bə kɨ nya bə chitə bənɨ bədɔ lə bə tsu ba kkpə bukpənə. Na fiɔŋ fi fənə lə dia chi kɨ ji diəŋ. 14 Nɨ bə na keŋkɛ biɔŋ kɨyɛŋ fɛŋ, bənɨ bədɔ fiəŋkə, naji ɨ bə chitə bɔ. Jilə bɔ na keŋkɛ tɨ bi kɨyɛŋ tsa yidɔ, bə fiəŋkə, ɨ bɔ chitə bəŋ. Bəma ɨ dia chi tə kɨ ji diəŋ. 15 Na nɨ fi na ji bubɔndɔ lə,
“Miɨ wu nə̀ banchɛ kɨyɛŋ,
yu nə̀ keŋkɛ kwa kwətsə kwətsə.
Miɨ wu nə̀ banchɛ tsəsɨ,
yu nə̀ kə fiəŋkə.”
Pɔl faŋ Taytus Kɔlɛn
16 Nna nnya kɨmbafə bə Nyɔ wu nya Taytus shəŋ yi ndzeŋe lə yu keŋkɛ kɨgaŋ bəŋ wɨ diəŋ nɨ nna ŋkeŋkɛ tɨ. 17 Yu bɨŋ mba bəŋ'ɨ ɨjikə jimiɛ kwa lə ndzɨ kə' nende yu. Yu na ba bəŋ'ɨ nə kɨnse kɨhɨ ntɨŋ bə nə kɨgaŋ kɨ yu keŋkɛ bəŋ wɨ kɨtso. 18 Kə na faŋkɨ yu bə ŋgwɨŋ wu bə́ na kkɨ yu bəntɛshɛ bə bənɨ bə kɨmbɨŋ'ə ntɨŋ bəchi nə shɔŋ yi ndzeŋe wɨ yi yu na gəndə yu tɨdi. 19 Bə ŋkənə su, yu na ji tɨ miɨ wu ntɛshɛ yi bənɨ bə kɨmbɨŋ'ə sabiɛ lə yu kɨ gəndə bə bɨ nɨ kə na gəndə kə nɨntɨ nɨŋ yi na tsukɔ nchitə nyi wɨ. Nɨŋ nyi na fɨtɨ lə bənɨ kɨ nya bubəŋ bə Baba kɨbɛɛ, yi na ji tɨ bə ndonchɛ lə kə na keŋkɛ shəŋ yi chitə bənɨ bədɔ. 20 Kə na sɛhɛ lə fiɔŋ fidɔ kɨ ji su fi miɨ wudɔ kweŋɛ bɨ nə fi wɨ tsukɔ kɨnya kɨbəŋ kɨ kə na nɨntɨ kɨŋ ndzɨ kɨ. 21 Kə na dio kɨtso lə kə kɨ fɨtɨ ji fiɔŋ fi na ji diəŋ ɨjikə jimiɛ kwa Baba yəsɨ. Kə na dio lə kə kɨ fɨtɨ fi kɨ ji tɨ diəŋ bənɨ yəsɨ.
22 Kə faŋkɨ ba tɨ ŋgwɨŋ waha wudɔ bə bɔ wu kə nə fɔɔ yu tsá kɨyɛŋ biɔŋ kɨyɛŋ ntɨŋ ba ŋəŋ lə yu na keŋkɛ shəŋ yi fənə biɔŋ. Yu na keŋkɛ tɨmo kɨgaŋ bəŋ wɨ kɨtso fɛŋfɛ, ndzɨ yu nə ga shəŋ yihi bəŋ wɨ kɨtso. 23 Miɨ nɨ Taytus na miɨ wu kə na gəndə gbo mo bə yu, yu ji tɨ miɨ wu kə na nɨntɨ fiɔŋ'ɨ fimo bəŋ'ɨ. Tsukɔ bəŋgwɨŋ bədɔ ba wɨ, bɔ na ji bənɨ bə faŋə bə ntɛshɛ yi bənɨ bə kɨmbɨŋ'ə bə na fɨtɨ bubəŋ gɨntɨ bə Klistu. 24 Bəma, bə dônchɛ kɨnse kənɨ bə bɔ ŋgbooŋ, fə bəntɛshɛ bə bənɨ bə kɨmbɨŋ'ə ŋəŋə lə gulu wu kə na kuntsɔ ndzɨ bəŋ na wu yɛyi.