7
Nsáŋ yɛŋ yi shəŋ'ə, nɨ Nyɔ nya bɨ bikaŋə biŋ mɛ, kə wwɔ̂ fiɔŋ fichi fi na bɨsə gwɨ yaha ma kɨn'yɨntɨ kaha. Kə kɨ tsalə gəŋ tuŋ fəŋgbɨŋ nɨ kə na lete Nyɔ.Pɔl wɔ buni lə bənɨ bə Kɔlɛn nə̀ fichə shəŋ yibɔlə
2 Bə gû shəŋ yɛnɨ bɨ lɨ. Kə kə fəkə bubiə bə miɨ wudɔ. Kə kə finchə bə miɨ, kə kə diəhə miɨ wudɔ mfu ntɨŋ. 3 Nna nchanyɛhɛ mɛ lə nna ŋgalɨ bəŋ ŋgə ntɨŋ. Mɨ' nsa ntə bə bəŋ lə bə na ji shəŋ yaha, bə ŋkkpə lɛɛ makə bə ŋkətə bəwəŋ lɛɛ, kə jiba ɨ kə kɨ ji kwa kɨntsu lɨ. 4 Mɨ ŋga shəŋ yɛŋ bəŋ wɨ kɨtso. Nna nsɛnti gwɨ kɨtso ndzɨ bəŋ. Shəŋ yɛŋ na ji bə budə kɨtso ndzɨ bəŋ. Nə bəŋgə bəchi ntɨŋ bə kə na woko, nna ŋ'woko kwa ji buni.
5 Dze nə kə nə̀ bɛɛ sha yi Mɛsɛdɔnia ntɨŋ, kə nə̀ kə keŋkɛ budə. Kə nə̀ keŋkɛ bəŋgə bidia bichi. Bənɨ nə̀ ba bɨ bə bəŋgə, kə keŋkɛ tɨ nyiŋ bɨ shəŋ. 6 Bəmanɨ, Nyɔ wu na dzasə bənɨ bə na ji koso, yu nə̀ dɨshɛ shəŋ yaha bə mba yi Taytus. 7 Nə̀ kwa mba yihi ya yi nə̀ dɨsə shəŋ yaha kə. Nə̀ tɨ ndzɨ bə nə̀ dɨsɨ yihi shəŋ sɔ. Yu nə̀ tə bə bɨ lə bə na se kɨtso lə bə ŋəŋ mɨ, nɨ bə na dzudi gwɨ kɨtso bə fiɔŋ fi nə̀ tɨchə, ma nɨ bə na keŋkɛ kɨgaŋ mɨ wɨ. Lə ŋ'wɔ manɨ, nchi ŋ'wɔɔ buni kɨtso.
8 Se lɨ kɨ ji lə kɨŋwatɨ kɨ nnə̀ mbɔndɔ ka bə bəŋ nə̀ fə bə kɨ dzudi gwɨ, tə nna ndəhə gwɨ tɨmo. Bəmanɨ nnə̀ ndə gwɨ ndzɨ nna ŋŋɨntɨ lə kɨŋwatɨ kɛmɨ kɨŋ nə̀ fə bə kɨ dzudi gwɨ. Bəmanɨ, bə nə̀ dzudi gwɨ tsa ntɨŋ tsəsɨ. 9 Mɨ ŋkɨ ŋ'woko buni fɛŋ, jikə jimiə ndzɨ bə nə̀ dzudi gwɨ. Na ndzɨ ndzudi yi gwɨ nyi nə̀ fə bə fichə shəŋ yɛnɨ. Bə nə̀ dzudi gwɨ ɨji chi Nyɔ nə̀ se. Bəma kə nə̀ kə fəkə bəŋ fiɔŋ fidɔ fibiə. 10 Ɨ miɨ na dzudi gwɨ dzə yi Nyɔ na se ntɨŋ, tə naji ɨ fi fə lə yu fichə shəŋ yihi. Ɨ fiŋ ba yu ji bə nchitə, ɨ fi jikə baha yu ji bə fiɔŋ fi yu kɨ dɨ gwɨ bə fi. Bəmanɨ, ɨ miɨ na dzudi gwɨ dzə yi bənɨ bə mbi no lə ntɨŋ, tə ndzudi yi gwɨ ya ná ba yu ji bə kɨlanə. 11 Bə ŋə̂ŋ la fiɔŋ fi ndzudi yi gwɨ yi Nyɔ na se ba bəŋ bə fi. Bə ŋə̂ŋ nɨ bə dzɛɛ biɔŋ bə shəŋ chi. Bə ŋə̂ŋ tɨ nɨ bə fəə fiɔŋ fichi bə ndonchɛ lə bə na sɨŋ bə kaŋ fiɔŋ fibiə fia ntɨŋ. Bə ŋə̂ŋ nɨ fiɔŋ fisu lɔɔ bəŋ wɨ. Bə ŋə̂ŋ nyiŋ yi bə keŋkɛ. Bə ŋə̂ŋ kɨgaŋ kɨbəŋ kɨ bə nə̀ keŋkɛ lə bə ŋəŋ mɨ. Bə ŋə̂ŋ kɨgaŋ kɨ bə na ji bə kɨ lə bə kɨ fɨtɨ fiɔŋ fi diəŋ. Bə ŋə̂ŋ tɨ ŋgwe yi ŋgə wu bə nya bə miɨ wu fəə wa bubiə. Nə biɔŋ bichi ntɨŋ bə' donchɛ lə bə na sɨŋ tɨmo bə kaŋ fiɔŋ fia ntɨŋ. 12 Bəma, mɛ tɨ nɨ nnə̀ mbɔndɔ kɨŋwatɨ ka bə bəŋ, nnə̀ ŋkə mbɔndɔhɔ ndzɨ miɨ wu nə̀ gbɔɔ wa, makə miɨ wu bə́ nə̀ fəə wa bubiə bə yu. Nnə̀ mbɔndu fə bə ŋəŋə bə kaŋ yənɨ Nyɔ nəfiə lə bə na keŋkɛ kɨgaŋ kaha. 13 Bəma fiŋ nə̀ fə shəŋ yaha kɨ dɨ.
Bə n'yinə shəŋ yaha yi də wɨ, kə na woko buni kɨtso ndzɨ buni bu Taytus na woko ndzɨ bəŋ bəchi fə shəŋ yihi kɨ ji bə budə. 14 Chi nnə̀ mba ŋkɨ ŋkuntsu gulu bə Taytus ndzɨ bəŋ, bə kə saa nya mɨ yaa. Bə nə̀ donchɛ lə gulu wu kə nə̀ ba kə kɨ kuntsɔ bə Taytus nə̀ wu yɛyi, ɨji tɨ diəŋ nɨ fiɔŋ fichi fi kə nə̀ ba kə kɨ chanyɛ bə bəŋ nə̀ ji tɨ yɛyi. 15 Yu wu Taytus na ba yu gɔmbiə nɨ bəŋ bəchi nə̀ wɔɔ bə yu, bə nɨ bə nə̀ ləkə yu bə nyiŋ, bə jakɨ, yu laŋ bəŋ kɨtso ba ya lɨ. 16 Nna ŋ'woko tɨ buni ndzɨ mɨ ŋga bufɨ bwɛŋ buchi bəŋ wɨ ba tuŋ fəŋgbɨŋ.