Bəŋgə bə Pɔl nə̀ wɔɔ
6
Nɨ kə na nɨntɨ ntɛshɛ bə Nyɔ, kə na kuchi kaŋ bə bəŋ lə bə kə̂ dzɛɛ shəŋ yi ndzeŋe yi Nyɔ na donchɛ bəŋ yi tsu fiɔŋ fi kɨlɔlɔ lə. 2 Nyɔ nə̀ tə lə,“Tsa yi diəŋ nə̀ ba kwətsə lɨ, nnya bitiu biɛŋ bə wə.
Butsu bu fɔnɔ fo nə̀ ba kwətsə lɨ, nchitə wə.”
Bə wɔ̂, fɛŋ na tsa yi diəŋ, butsu buŋ ji bu fɔnɔ fo.
3 Kə na fɨtəhə fiɔŋ fi naji ɨ fi kɨ baŋkɨ dzə yi miɨ wudɔ. Kə na fɨtɨ manɨ fə bə́ jɛkə kɨ ŋɨntɨ ŋgbɔ yidɔ nɨŋ yaha ntɨŋ. 4 Bəmanɨ, kə donchɛ gwɨ́ yaha dzə́ ntɨŋ chi lə kə na ji bənɨ bə nɨŋ yi Nyɔ lə. Kə donchɛ nə dzə yi kə na kansɨ shəŋ kɨtso bəŋgə bə kə na woko ntɨŋ bə tsa yi biɔŋ na tɛti ma tsa yi biɔŋ na jikə gəndə. 5 Bənɨ na ba bɔ kɨ kɨtɨ bɨ, bɔ gəŋ bɔ ga bɨ tsɔŋ yi buŋfia ntɨŋ tsa yidɔ, bənɨ gəŋ bɔ kɨ noŋko bɨ gbansɨ. Kə na ba kə kɨ nɨntɨ kə yakɨ ŋgɨnə, kə gəŋ kə me kə mɛɛ, kə gəŋ kə kkpə dzɔŋ tsa yidɔ. 6 Kə na donchɛ lə kə na ji bənɨ bə nɨŋ'ə bə Nyɔ lə nə fiə waha wu ntsaaŋ ntɨŋ, bə chi kə na kkɨ fiɔŋ fi Nyɔ lə, bə nɨ kə na kansɨ shəŋ, kə ji bə kɨyaya. Kə na biəlɨ nɨ Kɨn'yɨntɨ kɨ Ntsaaŋ donchɛ, kə se bənɨ bə kɨnse kɨ yɛyi. 7 Kə na ba kə kɨ chanyɛ kwa ji nchanyɛ yi yɛyi, kə fɨtɨ biɔŋ nə buŋga bu Nyɔ lə ntɨŋ. Kə na ba kə kɨ chiŋfi fiə wu diəŋ, wu ji nɨ biɔŋ bi dzoŋ'ə kɨbandə kɨ nədiɨ bə kɨ nəməsə wɨ. 8 Kə na ba kə kɨ nɨntɨ kwa, mɛ bənɨ kɨ kuntə bɨ, mɛ bɔ jikə kɨ kuntə, mɛ bɔ kɨ chanyɛ biɔŋ bibiə tsukɔ bɨ wɨ, mɛ bɔ chanyɛ bi ndzeŋe. Bənɨ na ba bɔ kɨ dze bɨ lə kə na ji bənɨ bə biŋfukiɛ lə, bəmanɨ kə ji bənɨ bə kɨyɛyi lə. 9 Bənɨ na ba bɔ jiji bɔ kɨ fɨtɨ mɛ wələ bɔ na kkəhə bɨ, bəmanɨ ɨji bɔ kkɨ bɨ buni. Kə na ba kə kɨ ji nɨ bənɨ bəŋkkpə, bəmanɨ bə bô bə ŋəŋ, kə na ji bəwəŋ. Bənɨ na ba bɔ kɨ nya bɨ ŋgə, bəmanɨ bɔ jikə kpɨshɛ bɨ. 10 Kə na ba kə kɨ ji wələ kə na ji bənɨ bə na dzudi gwɨ, bəmanɨ kə ji bə kɨnlaŋ tsá chi, kə ji nɨ bənɨ bə fiəŋkə, bəmanɨ kə fɨtɨ kɨyɛŋ kɨ bənɨ lə keŋkɛ bubəŋ. Kə gəŋ kə kɨ ji wələ kə na sɨŋ tɨmo bə fiɔŋ, bəmanɨ kə keŋkɛ biɔŋ bichi.
11 Bənɨ bə Kɔlɛn, kə chanyɛ bə bəŋ nyələ sɨŋ fiɔŋ. Kə gu shəŋ yaha ba ga ŋgbooŋ bəŋ'ɨ. 12 Kə kə baŋkəhə shəŋ yaha bəŋ'ɨ. Na bəŋ bə baŋə yɛnɨ nə bɨ lɨ. 13 Ŋkɨ nchanyɛ bə bəŋ nɨ beŋ bɛŋŋ lə, bə kɨ fɨtɨ diəŋ nɨ kə na fɨtɨ bə bəŋ, bə kɨ guyi tɨ yɛnɨ shəŋ bɨ lɨ.
Miɨ wu kɨmbɨŋ kə kɨ ji fiɔŋ fimo bə miɨ wu na jimiɛhɛ miɨ wu kɨmbɨŋ
14 Bə kə kɨ ji fiɔŋ fimo bə bənɨ bə na jimiɛhɛ bənɨ bə kɨmbɨŋ'ə. Naji ɨ fiɔŋ fi ndzeŋe bə fibiə gəndə nəŋ tə kɨ ji fiɔŋ'ɨ fimo? Kɨŋgbooŋ na keŋkɛ la bə kɨjuwə? 15 Naji ɨ Klistu bə Tsəª kɨ ji bifuŋ fimo? Fiɔŋ fi na tɛshɛ miɨ wu kɨmbɨŋ bə miɨ wu na jimiɛhɛ miɨ wu kɨmbɨŋ na la? 16 Tsɔŋ yi bintɔfiɛ yi Nyɔ na keŋkɛ la fi fənə bə munyɔ mu sɛŋ mbi ntɨŋ? Bə kkə̂ lə kə na ji tsɔŋ yi bintɔfiɛ yi Nyɔ wu buwəŋ. Fiŋ na ji nɨ Nyɔ nə̀ tədiə lə,
“Njiwa ŋkɨ nji bɔ ntɨŋ, ŋgəndə bɔ ntɨŋ.
Njiwa ŋkɨ nji Nyɔ wubɔ,
bɔ ji bənɨ bɛŋŋ.”
17 Bəma, Baba na tɨdi lə,
“Bə fɔ̂ nə bɔ ntɨŋ ba kɨ ji chichi.
Bə kə̂ bukɔ fiɔŋ fi kɨnyənə lə,
ntə nləkə bəŋ.
18 Njiwa ŋkɨ nji Chaa wɛnɨ,
bə ji beŋ bɛŋŋ bə nɨnsə bə bə kansɨ.
Nyi na nchanyɛ yi Baba wu na Keŋkɛ Buŋga Buchi.”