Gwɨ yifa yi kə ná keŋkɛ Nyɔ ku
5
Kə na kkɨ lə jilə bə' shakiɛ kɨtsawu kɨ kə na ji kɨŋ kɨ ntɨŋ, ɨji gwɨ yaha mbi no ntɨŋ, tə kə keŋkɛ lɨ tsɔŋ nə Nyɔ lɨ, Nyɔ ku, yi bə́ kə wɛyɛ ji bə kaŋ, ɨji yi na tsɨ butsənə. 2 Nɨ kə na ji sɛŋ fɛŋ kə na bənshə ndzɨ kə na dɨ kɨtso lə bə́ dɔŋ bɨ tsɔŋ yi bɔ́ ya nɨ kɨndzu. 3 Ná kɨ ji tsa yi bə́ dɔŋɔ bɨ tsɔŋ ya, ɨ kə jikə kɨ ji gwɨ yiya. 4 Nɨ kə na bambi kə me kɨtsawu kɨŋ ntɨŋ, bəŋgə bə kə na ji bɔ ntɨŋ na fɨtɨ kə bənshə, bəmanɨ fi jikə jimiɛ lə kə na se lə bə́ se bɨ bindzu bi na ji bia gwɨ yaha. Kə na se lə bə dɔŋ bɨ bidɔ bi bɔ́ fə buwəŋ bu kəkaha mɨə gwɨ yi na ba ya yi kkpə. 5 Na Nyɔ wu nachə bɨ lə kə keŋkɛ biɔŋ biŋ. Yu nya bɨ Kɨn'yɨntɨ kɨ Ntsaaŋ nɨ fiɔŋ fi na donchɛ lə biɔŋ bichi ná kɨ ji biaha.6 Bəma, kə kɨ ji tsá chi kə kkɨ fiŋ masə sɨŋ. Kə na kkɨ lə nɨ kə na ji gwɨ nyi wɨ mbi no ntɨŋ, kə na ji dzəbudə nə Baba wɨ. 7 Kə na fɨtɨ biɔŋ ɨji ndzɨ shəŋ yi kə galə Nyɔ wɨ, kə na fɨtəhə bi ndzɨ kə na ŋɨntɨ yu wɨ. 8 Kə na masəhə fiŋ, kə na chinchi yaha lə kə shə̂ gwɨ nyi ba gəŋ kɨ ji bə Baba ku wuhu ntɨŋ. 9 Kɨ ji lə fa kə na ji bə yu ku wuhu ntɨŋ, makə kə na bambi mbi no ntɨŋ, fiɔŋ fi kə kɨ nya kɨgaŋ fi wɨ na bə mfə lə yu kɨ woko buni. 10 Bə kkə̂ lə bɨ bəchi kə naji lə kə ləŋ Klistu nəfiə yu sa bɨ, fə miɨ chi keŋkɛ bikwəntsə bihi bi ndzeŋe makə bibiə chi nɨŋ yihi nə̀ ji tsa yi yu nə̀ bambi gwɨ nyi ntɨŋ.
Fiɔŋ fi fənə fə bənɨ kɨ ndzəŋkə bə Nyɔ
11 Kɨjilə chi kə na lete Baba, kə kɨ diɔnɔ lə kə yashənɨ biŋgɔmbiɛ bi bənɨ lə. Nyɔ na kkɨ lɨ bɨ buni. Nna ŋgɔmbiɛ lə bə na kkɨ bɨ buni nə bəŋ shəŋ tɨ. 12 Nɨ kə na chanyɛ mɛ, kə na sɛhɛ lə kə chi sɛŋɛ gwɨ́ yaha bə bəŋ. Kə na nya bəŋ ji dzə lə bə kɨ sɛnti gwɨ ndzɨ bɨ. Bəma ɨ bə keŋkɛ fiɔŋ fi naji lə bə chi bə bənɨ bə na dze gwɨ bə biɔŋ bi bɔ na ŋɨntɨ bənɨ wɨ, ɨjikə jimiɛ nə bɔ shəŋ. 13 Jilə kə na yuŋfə lɨ, tə kə na yuŋfə Nyɔ lɨ. Jilə bufɨ bwaha bwa buni, tə bu na ji buni bəŋ'ɨ. 14 Fiɔŋ fi na fɨtɨ kə gɨntɨ fiə bə fiɔŋ fi kə na fɨtɨ na kɨnse kɨ Klistu na keŋkɛ bɨ wɨ. Kə na fɨtɨ manɨ ndzɨ kə' bɨŋ yɛyi lə miɨ miu nə̀ kkpə bənɨ bəchi lɨ, fi kɨ ji lə bənɨ ba bəchi nə̀ kkpə tɨ. 15 Yu nə̀ kkpə bənɨ bəchi lɨ fə bənɨ bə na ji ba tsɔ kə jimiɛ ndzɨ gwɨ́ yibɔlə. Bəmanɨ lə bɔ kɨ ji ndzɨ yu wu nə̀ kkpə wa ba dzakɔ nə kkpə lɨ ndzɨ bɔ.
16 Bəma, dze nə fɛŋ bɨŋ, kə tsɔhɔ jiŋgə miɨ nə dzə́ yi miɨbəwəŋ'ə ntɨŋ. Mɛ ji lə kə nə̀ sa kə jiŋgə Klistu ɨji nə dzə́ yi miɨbəwəŋ'ə ntɨŋ, kɨjilə naji ɨ kə tsu jiŋgə yu fɛŋ ya dzə ntɨŋ kə. 17 Fiɔŋ fi na ji na lə, jilə miɨ' tɛshɛ bə Klistu, tə yu na ji miɨ wufa. Biɔŋ biko' chɛ, bifa ba. 18 Ə fə Nyɔ fiɔŋ fiŋ, ɨji yu wu nə̀ dzɛɛ bɨ yu wɨ nɨ yu nə̀ fəə kə ndzəŋkə bə yu ə ba nə Klistu wɨ. Yu nya bɨ nɨŋ yi naji lə kə fə bənɨ ndzəŋkənɨ bə Nyɔ. 19 Fi na ji lə, Nyɔ nə̀ ndzəŋkə bə mbi no yu chɛti Klistu ntɨŋ. Yu tsukə galə bubiə bubɔlə fi. Lə yu fə mɛ, yu nya shɔŋ yi ndzəŋkənɨ nyi bɨ kaŋ lə kə kɨ tɨdi bənɨ. 20 Kə na ji fɛŋ ka wu Klistu lə, Nyɔ chɛti bɨ ntɨŋ, yu nende bənɨ. Bəma kə na kuchi kaŋ bə bəŋ yɨ wu Klistu lə lɨ lə bə fîchə ba ndzəŋkə bə Nyɔ. 21 Na ndzɨ bɨ bə bəŋ wu yu wu Nyɔ nə̀ fəə Klistu wu nə̀ kə kkə bubiə, yu tsu bubiə, fə kə tsɔ diəŋ Nyɔ nəfiə ndzɨ yu.