Fiɔŋ fi shaŋŋ'ə kənsɨ yi sha lə ntɨŋ
4
Bəma nɨ kə na keŋkɛ nɨŋ nyi, ɨji Nyɔ wu kwesɛ yaa ba nya bɨ, kɨjilə kə na lasəhə shəŋ nə yi wɨ kə. 2 Kə' nya yasɨ biɔŋ bi yaa lə wɨ, bi bənɨ na fɨtɨ bunyələ. Kə' nɨŋŋ dzə́ yi biyɔndu lə. Kə na galəhə dyɛ diɛ yi Nyɔ ntɨŋ. Kə na ba kə kɨ chanyɛ kwa ji kɨyɛyi ŋgbooŋ, kə donchɛ gwɨ́ yaha bə miɨ chi Nyɔ nəfiə, fə bə́ gɔmbiɛ ba kkə bənɨ bə kə na ji bɔ lɨ. 3 Ma kɨ ji tɨmo lə fiɔŋ na fuku shɔŋ yi ndzeŋe yi kə na tɨfiə nyi, tə fi na fuku ji bənɨ bə na la bulanə. 4 Bənɨ bə kə bɨmiə ba shɔŋ nyi, Satan wu na ji nyɔ wu mbi no' jibiɛ bufɨ bubɔlə. Yu fə manɨ fə bɔ jɛkə kɨ ŋɨntɨ kɨŋgbooŋ kɨ shɔŋ yi ndzeŋe lə yi na ji tsukɔ bubəŋ bu Klistu lə wu na boto Nyɔ. 5 Bə kɨ kkɨ lə kə na chanyɛhɛ ji kɨ gwɨ́ yaha lə. Kə na chanyɛ ji kɨ Jisɔs Klistu lə lə yu na ji Baba. Kə na ji fiaha ji bənɨ bə na nɨntɨ bəŋ'ɨ ndzɨ Jisɔs. 6 Nyɔ wu nə̀ tədiə wa lə,“Kɨŋgbooŋ fɔ̂ nə kɨjuwɔ ntɨŋ ba kɨtsalə,”
na tɨ Nyɔ no wu fəə kɨŋgbooŋ kɨhɨ kɨ tsalə bɨ shəŋ bə ŋ'wwɔlɔsɨ bɨ, kə kkə bubəŋ bu Nyɔ lə bu na ji bushi bu Jisɔs Klistu lə wɨ.
7 Fiɔŋ fi shaŋŋ'ə fiŋ fia bɨ ntɨŋ, bəmanɨ kə na ji kənsɨ yi sha lə. Kə na ji manɨ fə fi kɨ donchɛ lə buŋga bu na yakɨ buŋ buŋga buchi bɨ wɨ na bu Nyɔ lə, na bwaha kə. 8 Bəŋgə na chimə bɨ wɨ dia chi, bəmanɨ bɔ ji bɨ kə buŋkɔhɔ. Bufɨ bwaha na ba bu la, bəmanɨ shəŋ jikə kkpəhə bɨ. 9 Bə́ na ba bə́ kɨ sesɛ gbo bɨ nəjiŋ, bəmanɨ Nyɔ jikə gufiɛ bɨ. Bə́ na ba bə́ bumbu bɨ, kə gbɔ fəkoso, bəmanɨ kə jikə kkpəhə. 10 Kə na ba kə kɨ toto kkpə yi Jisɔs bɨ gwɨ tsá chi, fə buwəŋ bu Jisɔs lə kɨ yinshi bɨ wɨ tɨ. 11 Nɨ kə na ji bəwəŋ, kə na ba kə kɨ ji kwa nchitə bɨŋ tsá chi ndzɨ Jisɔs, fə buwəŋ bu Jisɔs lə kɨ yinshi gwɨ́ yaha wɨ yi na ji ɨ yi kkpə. 12 Fi na ji lə, kkpə na yinshi bɨ wɨ, bəmanɨ kkpə nyi ba bəŋ ji bə buwəŋ.
13 Kə ga shəŋ Nyɔ wɨ nɨ miɨ wudɔ nə̀ galə chi fi na ji bubɔndɔ lə,
“Mɨ' mbɨŋ ba tə kɨ chanyɛ,”
bɨ bə bɨ lə' bɨŋ tɨ ba tə kɨ chanyɛ. 14 Kə na kkɨ lə yu wu nə̀ dzakɔ wa Baba waha Jisɔs nə kkpə lɨ jiwa yu dzakɔ tɨ bɨ bə' tɛshɛ bə Jisɔs ba dze bɨ bə bəŋ gəŋ ga yu nəfiə. 15 Biɔŋ biŋ bichi na tɨchə ndzɨ bəŋ, fə kɨnse kɨ Nyɔ lə kɨ tsaŋkɨ kɨ gɨntɨ bənɨ wɨ kɨyɛŋ, ɨ kɨmbafə kɨ bənɨ na nya bə Nyɔ kɨ yinə, kɨŋkuntə gɨntɨ bə yu.
Biɔŋ bi kə na ŋɨntɨ na chɛti buchɛnɛ
16 Bəma gwɨ na kaha bɨ. Ma tɨ nɨ gwɨ́ yaha yiŋ na buku yi gɨntɨ mɛ, shəŋ yaha na tsu yifa díɔ chi. 17 Bəŋgə bəntse bə kə na woko bɛŋ tsa nyi wɨ, bɔ na nachɛ ji buni bubəŋ bu kəkaha bɨ lɨ bu na ji ɨ miɨ fɨkə kə. 18 Bəma, kə na galəhə fiaha bufɨ biɔŋ bi bə́ na ŋɨntɨ bi wɨ. Kə na galɨ bufɨ ji biɔŋ bi bə́ na ji bi wɨ kə ŋəŋkəhə, ndzɨ biɔŋ bi kə na ŋɨntɨ bi wɨ na chɛti buchɛnɛ, bəmanɨ bi kə na ji bi wɨ kə ŋəŋkəhə, na bi na ji kəkaha.