Mfɨkənɨ yi nchínə yifa bə yiko
3
Nna ntɨdi mɛ, fi ji lə kə na chisə sɛŋɛ gwɨ́ yaha bə bəŋ? Maa lə kə na se biŋwatɨ nɨ bənɨ bədɔ na se jimə biŋ biŋwatɨ bi bə́ faŋə bəŋ makə bi fɔɔ nə bəŋ'ɨ, bi na donchɛ ŋgwe yi bənɨ bə kə na ji bɔ lɨ lə? 2 Bəŋ kɨbɛɛ bə na ji kɨŋwatɨ kaha kɨ na ji bubɔndɔ bɨ shəŋ kɨ naji ɨ miɨ chi kkə ba tanchɛ lɨ. 3 Bə na donchɛ lə bə na ji kɨŋwatɨ kɨ Klistu lə kɨ kə bɔndɔ. Kɨŋwatɨ kɨŋ jikə jimiə kɨ bə́ bɔndɔ bə fitɨ fi kɨŋwatɨ lə. Bə́ bɔndu ji bə Kɨn'yɨntɨ kɨ Nyɔ wu buwəŋ'ə. Bə́ kə bɔndɔhɔ ji bidiadia bi ta yi mbafu lə bɨŋ. Bə́ bɔndu ji bidiadia bi ta lə bɨŋ bi na ji shəŋ yi bənɨ lə.4 Fiŋ na fiɔŋ fi kə na chanyɛ Nyɔ nəfiə masə sɨŋ ə ba nə Klistu wɨ. 5 Fi na jimiɛhɛ lə kə' kwətsə nə bɨ kaŋ bə mfə yi fiɔŋ fidɔ fi naji ɨ kə kɨ tɨdi lə fiɔŋ fidɔ fɔ nə bɨ lɨ. Na Nyɔ wu fəə kə kwətsə. 6 Yu fə kə kwətsə bənɨ bə nɨŋ'ə bə nchínə yifa lə. Nchínə yiŋ na jimiɛhɛ yi na biəlɨ ji bilaŋ bi bə́ bɔndɔ bə kaŋ. Na yi Kɨn'yɨntɨ kɨ Ntsaaŋ'ə. Bilaŋ na ba ji bə kɨlanə. Bəmanɨ Kɨn'yɨntɨ nya bənɨ ji buwəŋ. 7 Dzə yiko yi bə́ nə̀ fɨtɨ biɔŋ yi ntɨŋ, bə́ nə̀ bɔndu bilaŋ bia ta yi mbafu wɨ. Tsa yi Mose nə̀ ba bə bilaŋ bia bənɨ bə Isla nə̀ kə tsɔhɔ bobiə bushi buhu ndzɨ kɨŋgbooŋ kɨ Nyɔ lə nə̀ tsalə bushi buhu wɨ. Jilə ya dzə yiko yi nə̀ ba ji bə kɨlanə nə̀ ba yi keŋkɛ kɨŋgbooŋ kɨ Nyɔ lə, kɨŋgbooŋ kɨŋ ji kɨ nə̀ tsalə manɨ kɨ jimə kɨ gɨntɨ, 8 ɨ kɨŋgbooŋ kɨ dzə yi bə́ na fɨtɨ biɔŋ yi ntɨŋ kɨ na ji kɨ Kɨn'yɨntɨ kɨ Ntsaaŋ'ə jikə yakəhə tɨmo ka kɨŋgbooŋ? 9 Jilə dzə́ yi bə́ nə̀ fɨtɨ biɔŋ yi ntɨŋ, yi nə̀ ba bə fiɔŋ fi na galɨ bənɨ ŋgə ntɨŋ, nə̀ ba bə kɨŋgbooŋ kɨ Nyɔ lə, tə dzə́ yi bə́ na fɨtɨ biɔŋ yi ntɨŋ yi Nyɔ na dze bənɨ lə bɔ na ji diəŋ yu yəsɨ naji ɨ yi keŋkɛ kɨŋgbooŋ kɨ na yakɨ ka! 10 Kɨyɛyi kɨsu na lə fiɔŋ fi nə̀ ba fia fi ji bə kɨŋgbooŋ kɨ Nyɔ lə, fi lasɨ kɨŋgbooŋ kɨ fi lə ndzɨ kɨŋgbooŋ kɨ na ko kɨ yakɨ ka' ba. 11 Jilə fiɔŋ fi nə̀ ka fi gɨntɨ nə̀ ba bə kɨŋgbooŋ kɨ Nyɔ lə, kɨjilə kɨŋgbooŋ kɨ fiɔŋ fi na tsɨ butsənə lə na ko ba ya lɨ!
12 Nɨ kə na kkɨ manɨ masə sɨŋ, kə kɨ fɨtɨ biɔŋ nle sɨŋ. 13 Kə na jimiɛhɛ nɨ Mose wu nə̀ kusə bushi buhu bə kɨndzu bə mfə lə bənɨ bə Isla tə kə ŋəŋə nɨ kɨŋgbooŋ kɨ nə̀ tsalə bushi buhu wɨ na ka kɨ gɨntɨ. 14 Bəmanɨ bufɨ bu bənɨ ba lə nə̀ jibiɛ. Ba fɔ ndɛŋ no, bɔ na tanchɛ fiɔŋ nə Kɨŋwatɨ kɨ Nchínə Yiko lə ntɨŋ, fiɔŋ kɨ ji su fi na jibiɛ məŋfɨ məmbɔlə. Na kwa Klistu wu naji ɨ yu tɔ fiɔŋ fi na jibiɛ fia bɔ. 15 Yɛyi lɨ, ba fɔ ndɛŋ no, bɔ na tanchɛ fiɔŋ nə kɨŋwatɨ kɨ Mose lə ntɨŋ, fiɔŋ fi nə̀ fuku fia kɨ chisə fuɔ. 16 Bəmanɨ ɨ miɨ tsu kɨ ji bɔ bə Baba, fiɔŋ fi na baŋkɨ fia yu nya dzə. 17 Baba no na Kɨn'yɨntɨ, ma məŋ wu Kɨn'yɨntɨ kɨ Baba lə na ji, bənɨ na ba bɔ kɨ foto nə buŋfia ntɨŋ. 18 Fi na ji lə, bɨ bəchi bə na sɨŋ bə fiɔŋ fi na bambi fi baŋkɨ mənshi maha, kɨŋgbooŋ kɨ Baba lə na tsalə bɨ wɨ, kɨ fɨtɨ kə tsalə, kə yashənɨ, kə gɨntɨ fiəfiə, kə boto yu. N'yashənɨ nyi na Baba wu na ji Kɨn'yɨntɨ wu fəə yi.