2
Nɨ fi na ji ma, mɨ ŋga lə ntsɔhɔ nlɛɛ bəŋ jii wu naji ɨ gwɨ lɔ bəŋ. 2 Ntsu ba fə lə gwɨ lɔ bəŋ, ɨ yəŋ wudɔ kɨ ji su wu naji ɨ yu fə ŋ'wɔ buni yasə bəŋ bə mɨ mfəə ba gwɨ lɔ bəŋ? 3 Nə̀ fiɔŋ fi nə̀ fəə ntə mbɔndu kɨŋwatɨ ka dzə yi nnə̀ mbɔndɔ ya ntɨŋ, fi ji ndzɨ ntə ŋkə mba bəŋ'ɨ, ɨ bə bɨsɨ mɨ shəŋ ɨji bəŋ bə naji lə bə fə ŋ'wɔ buni. Nna ŋkkɨ lɨ ŋgbooŋ tsukɔ bəŋ bəchi wɨ lə kɨnlaŋ kɛmɨ na tɨ kɛnɨ bəŋ bəchi. 4 Bə kɨ kkɨ lə nnə̀ mbondo kɨŋwatɨ ka ŋ'woko bulo kɨtso, shəŋ tinti mɨ, məndəŋ ji mɨ yəsɨ kɨtso. Nnə̀ ŋkə mbɔndɔhɔ manɨ bə mfə lə bə wɔ ji bulo. Fi nə̀ ji bə mfə lə bə kɨ kkɨ kɨnse kɨbəŋ kɨ nna ŋkeŋkɛ bə bəŋ.Bə gûfiɛ miɨ wu bubiə
5 Jilə miɨ wudɔ nə̀ ba bə bulo bu wɔŋɔ, tə bulo bwa nə̀ kə baha kwa mɨ lɨ, bu nə̀ ba bəŋ bəchi bɨŋ dzə yidɔ ntɨŋ. (Fiŋ na jimiɛhɛ fiɔŋ fi nna nse lə ŋkɨ nchanyɛ tsukɔ fi wɨ buntaŋ kɨtso). 6 Ŋgə wu bənɨ kɨyɛŋ nə bəŋ ntɨŋ nya no bə wa miɨ, yu kwətsə manɨ. 7 Fɛŋ fi na ji lə bə gûfiɛ bubiə buhu ba fə shəŋ yihi də, fə yaa wu kɨtso lə jɛkə kkpɨsə yu bukkpɨsə. 8 Bəma ŋkɨ ŋkuchi kaŋ bə bəŋ lə bə chi dônchɛ yu lə bə bambi ba bə se yu. 9 Nə̀ fiɔŋ fi nə̀ fəə lə mbɔndu kɨŋwatɨ ka bə bəŋ, fə mfɔɔ bəŋ ba kkə lə bə na woko fiɔŋ fichi fi nna ntɨfiə bəŋ lə. 10 Ɨ bə gufiɛ bubiə bu miɨ lə, tə mɨ' ŋgufiɛ tɨ. Naji ŋgufiɛ fiɔŋ, jilə fiɔŋ fia su fi gufiɛ tə mɨ' ŋgufiɛ Klistu nəfiə ndzɨ bəŋ. 11 Kə na fɨtɨ manɨ Satan tə kə bɛɛ sɔ ba keŋkɛ buŋga bɨ bɨŋ. Kə na masəhə nɨ yu ba yu kɨ wɨdi bə bɨ.
Diɛ yi Nyɔ na bukɔ bənɨ dzə́ ntɨŋ chichi chichi
12 Tsa yi nnə̀ ŋgəŋə ba fɔ kɨtuŋ kɨ Tɔwas ntɨŋ lə ntɨfiə shɔŋ yi ndzeŋe yi na tsukɔ Klistu wɨ sɔ, Baba gu mɨ kɨgwəŋ lə nnɨŋ nɨŋ yihi sɔ. 13 Bəmanɨ bufɨ bwɛmɨ nə̀ kə jimiɛ sɔ ndzɨ nnə̀ ŋkə ŋəŋkəhə ŋgwɨŋ Taytus wɨ lə ŋkkə lə bə na ji nəŋ lə, mbu ntə bə bɔ lə kəshə, ŋgəŋ Mɛsɛdɔnia lə nnɔŋ yu sɔ.
14 Bəmanɨ kɨmbafə bə Nyɔ wu na ba yu kɨ sa bɨ sa fiə Klistu ntɨŋ tsá chi yu nya ŋkɨ, kə biəlɨ nəjiŋ nɨ bənɨ bə yu' keŋkɛ nə dzoŋ ntɨŋ. Yu na chɛti bɨ ntɨŋ yu tsaŋkɨ shɔŋ yi Klistu bidɨ bichi, bə́ kkɨ yu, bə́ woko ntsɔŋfu yihi nɨ kɨjəntɨ kɨ bə́' tiŋɛ. 15 Kə na ji nɨ ntsɔŋfu yi Klistu Nyɔ lɨ bənɨ bə na foto fo ntɨŋ ma bə na la bɔ gɨntɨ. 16 Bə bənɨ bə na la bɔ gɨntɨ, ntsɔŋfu nyi na ba bɔ ji bə kkpə. Bə bənɨ bə na foto fo, ntsɔŋfu nyi na ba bɔ ji bə buwəŋ. Nɨ fi na ji manɨ, kɨjilə na yəŋ wu kwətsə bə mfə yi jimə nyi nɨŋ? 17 Kə na jimiɛhɛ chi bənɨ kɨyɛŋ bədɔ bə dzɛɛ diɛ yi Nyɔ yi tsu ji fiɔŋ fi shɨ lə fi bə́ na gəndə bə́ taŋə. Kə na ji fiaha bənɨ bə na ji Klistu ntɨŋ, kə tɨdi diɛ yi Nyɔ, yu wu Nyɔ nəfiə bə shəŋ yi ntsaaŋ chi bənɨ bə Nyɔ faŋə.