Kɨŋwatɨ kɨ tsá fiɛ bɨŋ kɨ Pɔl nə̀ bɔndɔ bə ntɛshɛ yi
Kɔlɛn
1
Na mɨ Pɔl, nji wɛŋ wu faŋə wu Jisɔs Klistu nə kɨnse kɨ Nyɔ lə ntɨŋ. Na bɨ bə ŋgwɨŋ waha Timɔti. Nna mbondo kɨŋwatɨ kɨŋ bə ntɛshɛ yi bənɨ bə Nyɔ lə bə Kɔlɛn, ma bə bənɨ bə Nyɔ lə bəchi bə na ji sha yi Akɛya ntɨŋ. 2 Taa waha Nyɔ bə Baba Jisɔs Klistu dônchə bəŋ shəŋ yi ndzeŋe ba nya bəŋ budə.Nyɔ wu na dɨshɛ shəŋ
3 Kɨŋkuntə kɨ ji bə Nyɔ wu na ji Nyɔ, yu ji Chɛ Baba waha Jisɔs Klistu, yu na ji Chɛ yaa wu kwesɛ, yu ji Nyɔ wu na dɨshə shəŋ yi bənɨ lə dzə́ ntɨŋ chi. 4 Na yu wu ba yu kɨ dɨshɛ shəŋ yaha bəŋgə baha ntɨŋ bəchi fə kə kkə tɨ ndɨshɛ yi shəŋ yi bənɨ bədɔ lə tsa yi bɔ na ji mɛ ŋgə yɨla ntɨŋ. Naji ɨ kə kkə ndɨshɛ manɨ ɨji ndzɨ ndɨshɛ yi Nyɔ dɨshɛ yaha shəŋ. 5 Kə na kkɨ tɨ lə diəŋ nɨ kə na ji funyi wu Klistu lə ntɨŋ kɨtso, na tɨ diəŋ nɨ Nyɔ kɨ chɛti Klistu wɨ, yu dɨshɛ shəŋ yaha kɨtso. 6 Ɨ kə na ji funyi ntɨŋ, tə na bə mfə lə shəŋ yənɨ də ba fə tɨ lə bə fɔfo. Jilə bə́ na dɨshɛ shəŋ yaha, tə na bə mfə lə shəŋ yɛnɨ kɨ dɨ. Fiŋ jifia fi fə lə bə kansɨ shəŋ ba kɨ ji mɔɔŋ funyi wu kə na woko wuŋ ntɨŋ bɨ bə bəŋ bəchi. 7 Fiɔŋ fi kə na bobi fiə tsukɔ bəŋ wɨ na fiɔŋ fi naji ɨ miɨ nɨkə fi kə. Kə na kkɨ lə, nɨ bə na woko ŋgə miu bə bɨ, bə jiba ɨ bə keŋkɛ tɨ shəŋ yidə nɨ bɨ.
8 Bəŋgwɨŋ, kə na sɛhɛ lə bə kɨ ji maa, ŋkkə sɨŋ ŋgwe yi ŋgə wu kə nə̀ wɔɔ sha yi Ɛsha ntɨŋ. Wa ŋgə nə̀ tɛ kɨtso ba ya buŋga bwaha, kə kɨ gɔmbiɛ lə kə kkpəyɛ lɨ. 9 Yɛyi lɨ, kə nə̀ kkɨ lə fi' ləŋ lə kə kkpɨ lɨ. Bəmanɨ fiŋfi nə̀ tɨchə manɨ bə mfə lə kə kə kɨ nɨkɨ gwɨ́ yaha wɨ, lə kə kɨ nɨkɨ ji Nyɔ wɨ. Na yu wu ba yu kɨ foshɛ bənɨ nə kkpə kaŋ. 10 Yu wu nə̀ fosɔ wa bɨ nə ŋgwe yi wa ŋgə ntɨŋ wu nə̀ji ɨ yu kkpɨsɨ bɨ, yu jiwa ɨ yu kətə yu fosɔ bɨ. Kə ga kwa bufɨ ji yu wɨ, lə yu jiwa ɨ yu kɨ foshɛ bɨ tsá chi, 11 nɨ bə jiba ɨ bə kɨ tambo bɨ bə kɨntsɨsɨ kɛnɨ. Bəma bənɨ kɨyɛŋ jiba ɨ bɔ kɨ nya Nyɔ kɨmbafə ka waha, ndzɨ fiɔŋ fi ndzeŋe fi yu kuntə bɨ bə fi ə ba nə kɨntsɨsɨ kɨ bənɨ kɨyɛŋ'ə wɨ.
Fiɔŋ fi nə̀ fəə Pɔl tə yashənɨ kɨŋgɔmbiɛ kɨ gbəndɨ wuhu lə
12 Fiɔŋ fiasu fi kə na dze gwɨ bə fi, shəŋ yaha lɨmi nsa yi fiɔŋ fia. Fiɔŋ fia ji fiŋ lə, fiə waha sɛŋ mbi ntɨŋ kɨtso tsukɔ bəŋ wɨ na wu ntsaaŋ, ɨji diəŋ chi Nyɔ na se. Kə na fɨtəhə fiə wu na biəlɨ bufɨ bu mbi no lə. Kə na fɨtɨ kə biəlɨ ji buŋga bu Nyɔ lə. 13 Na fiɔŋ fi kə kə bɔndɔhɔ fiɔŋ fidɔ bə bəŋ chichi, yasə fi naji ɨ bə tanchɛ ba kkə lɨ. Nna ŋgɔmbiɛ lə bə jiba bə tanchɛ ba kkə fi fichi, 14 nɨ bə kkə bɨ fɛŋ tsəsɨ, ná kɨ ji butsu bu Baba waha Jisɔs ná ba, ɨ bə kɨ kuntsɔ gulu ndzɨ bɨ, diəŋ nɨ kə ná kɨ kuntsɔ gulu ndzɨ bəŋ. 15 Nɨ nnə̀ ŋkkɨ fiŋ masə sɨŋ, nna nse lə nsa mba bəŋ'ɨ, fə bə keŋkɛ mbɨ nə mba yəmɨ wɨ tsá fiɛ. 16 Nnə̀ ŋkakɨ lə nná ŋkɨ ŋgɨntɨ Mɛsɛdɔnia, nchɛ dzə bəŋ ku, fə tsa yi nna ŋkɨ mfichə, nchi nchɛɛ dzə yi bəŋ ku, ɨ bə chitə mɨ bə gbəndɨ wɛŋ wu Judɛya. 17 Bə na gɔmbiɛ lə nɨ nnə̀ ŋkə ntsɔhɔ chɛ lɨ, nnə̀ ŋkakɨ manɨ mfɨtɨ ji kɨnindiɛ? Maa lə nna ŋkakɨ fiɔŋ, ŋkakɨ nɨ miɨ wu sɛŋ mbi ntɨŋ wu bɨmi fiɔŋ lə “Ɨŋŋ,” yu chi nɨŋə kwa tsa ya bɨŋ lə “Yɛ” lə? 18 Bə yɛyi, nɨ Nyɔ ba yu kɨ lɨmi diɛ yihi bɨŋ, fiɔŋ fidɔ na sɨŋ su fi kə na chanyɛ bə bəŋ, kə bɨŋ lə “Ɨŋŋ” ba chi nɨŋŋə lə “Yɛ.” 19 Fi ji manɨ ndzɨ Jisɔs Klistu Wɛŋ wu Nyɔ wu bɨ bə Silas bə Timɔti nə̀ tɨdi bəŋ kɨhɨ nə̀ bɨmiɛhɛ fiɔŋ lə “Ɨŋŋ,” yu chi nɨŋŋə lə “Yɛ.” Nə̀ ba kɨ ji kwa lə “Ɨŋŋ” tsá chi. 20 Bə kɨ kkɨ lə na fiɔŋ fi Klistu fəə fi na donchɛ lə Nyɔ' bɨŋ lə “Ɨŋŋ” bikaŋə bihi ntɨŋ bichi. Na ndzɨ fiŋ fi kə na chɛti Klistu ntɨŋ kə tɨdi bə Nyɔ lə “Fi kɨ ji ma.” Cha chi kə na ba kə kɨ nya yu kɨŋkuntə. 21 Na Nyɔ wu lɨmə bɨ ba lɨmə tɨ bəŋ, kə kɨ ji fɛŋ buntaŋ Klistu ntɨŋ. Yu saª bɨ ba ga chichi. 22 Yu' tsə ntsə yihi bɨ bɨŋ yi na ji Kɨn'yɨntɨ kɨhɨ kɨ yu galə bɨ shəŋ nɨ fiɔŋ fi na donchɛ lə biɔŋ bichi ná kɨ ji biaha.