Pɔl tə bə bənɨ bə nə̀ fɨtɨ bubiə lə bɔ dzê tsa
13
Fɛŋ na tsá tiɛ yi nna mba bəŋ wɨ. Kɨŋwatɨ kɨ Nyɔ lə na tɨdi lə,“Ɨ bə́ sɔmɔ miɨ, tə bə́ jiba ɨ bə́ kɨ se bənɨ bəfɛ makə bətɛ,
bə ləmiə nsa ya nəjiŋ.”
2 Tsa yi nnə̀ mba mba yɛmɨ yi tsá fiɛ bəŋ, nnə̀ nloso bənɨ bə nə̀ ji bubiə ntɨŋ ma bə bədɔ ba bəchi. Fɛŋ nchisə wa losɔ bɔ bəchi mɛfə nna njimiɛhɛ bə bəŋ lə bə kɨ ŋɨntɨ, ndzɨ tsa yi nna nchisə mba, nná ŋkwesɛhɛ tɨmo yaa bə miɨ. 3 Dzenəfə bə na se lə mfə fiɔŋ fi na donchɛ lə na Klistu wu na chɛti mɨ ntɨŋ yu chanyɛ, njiwa mfə. Fi na jimiɛhɛ lə yu na ya bə nya bəŋ ŋgə. Yu na keŋkɛ lɨ buŋga bəŋ ntɨŋ. 4 Na yɛyi lə bə́ nə̀ bandɨ yu kɨtɨ kɨ ŋ'wa lə wɨ yu ji yee. Bəmanɨ yu wa wuwəŋ fɛŋ nə buŋga bu Nyɔ lə ntɨŋ. Nɨ kə na ji yu ntɨŋ, kə na ji yee tɨ nɨ yu nə̀ ji. Bəmanɨ nə buŋga bu Nyɔ lə ntɨŋ, kə jiba ɨ kə kɨ ji bə yu, kə nɨntɨ bəŋ'ɨ.
5 Bə sâ gwɨ́ yɛnɨ ba ŋəŋ lə bə na ji bə kɨmbɨŋ lə. Bə fɔ̂ gwɨ́ yɛnɨ. Bə na ŋɨntəhə lə Jisɔs Klistu na ji bəŋ ntɨŋ? Yu wa bəŋ ntɨŋ yɛyi lɨ, fiəŋkə lə bə' fɔ gwɨ́ yɛnɨ ba ŋəŋ lə bə' gbɔ. 6 Nna ŋkkɨ lə bə jiba bə kkə lə kə kə gbɔɔ. 7 Kə na tsɨsə Nyɔ lə bə kə gbɔɔ kɨ fɨtɨ fiɔŋ fi na jimiɛhɛ diəŋ. Kə na tɨdiɛhɛ mɛ lə ndzɨ kə na se lə bənɨ ŋəŋ lə kə' ya mfɔ ya. Kə na tsɨsə ji lə bə kɨ fɨtɨ fiɔŋ fi diəŋ mɛfə kə na yinshi tɨmo wələ kə' gbɔ mfɔ ya. 8 Naji ɨ kə kɨ fɨtɨ fiɔŋ fi na yimbiɛ kɨyɛyi kə. Kə naji lə kə kɨ fɨtɨ kwa ji fi na bɨmi bə kɨyɛyi. 9 Tsa yi kə na ji yee bə tɛti gwɨ, kə kɨ ji bə kɨnlaŋ kɨtso. Kɨntsɨsɨ kaha na lə bə kɔ̂ ba gəŋ tuŋ fəŋgbɨŋ. 10 Na fiɔŋ fi nna mbondo biɔŋ biŋ bə bəŋ mbambi kə baha, fə tsa yi mba, ɨ jikə jimiɛ lə ndze buŋga bu Baba nya mɨ ba kɨ ji buntaŋ bə bu bəŋ bɨŋ. Buŋga buŋ na bu yu nya mɨ lə ŋ'wɛyɛ bəŋ su, ɨjikə jimiɛ lə ntsaŋ bəŋ butsaŋə.
Pɔl tsɨsɨ bənɨ Kɨnntsɨsɨ kɨ fəŋgbɨŋ
11 Bə ŋkanə bəŋgwɨŋ, mɨ ntsɨsɨ bəŋ, kəshə. Bə lɨ̂mə fiə wɛnɨ tuŋ fəŋgbɨŋ, bə wɔ̂ kɨnende kɛŋ, bə kɨ ji diɛ miu, bə ji bə budə bəŋ ntɨŋ, bəma ɨ Nyɔ wu kɨnse bə wu budə kɨ ji bə bəŋ. 12 Bə tsɨ̂shə gwɨ́ yɛnɨ ba kanchɛ lɨ nɨ bənɨ bə Nyɔ lə. 13 Bənɨ bə Nyɔ lə bəchi tsɨsə ba bəŋ. 14 Shəŋ yi ndzeŋe yi Baba Jisɔs Klistu lə bə kɨnse kɨ Nyɔ lə ma kɨmbintsə kɨ Kɨn'yɨntɨ kɨ Ntsaaŋ'ə kɨ ji bə bəŋ bəchi.