Miɨ kɨ fɨtɨ fiɔŋ fi na ndzeŋe tɨ wəmɛni lɨ
15
Bɨ bə na lɨmi buntaŋ kɨmbɨŋ ntɨŋ naji lə kə kɨ kansɨ shəŋ bə ŋgbɔ yi bənɨ bə n'yelɛ. Kə kə kɨ fɨtɨ ji fiɔŋ fi na ndzeŋe kwa bɨ lɨ. 2 Miɨ chi nə bɨ ntɨŋ naji lə yu diɔnɔ ba fə fiɔŋ kɨ ndzeŋe wəmɛni lɨ bə nchitə yu kɨmbɨŋ kɨhɨ kɔ. 3 Bə na kkɨ tɨ lə Jisɔs Klistu nə̀ fɨtəhə biɔŋ bi naji lə gwɨ kɨ ndzeŋe kwa ji yu. Yu nə̀ fɨtɨ nɨ fi nə̀ ji bubɔndɔ miɨ wudɔ tɨdi bə Nyɔ lə,“Muntɔŋ mu bənɨ na tumiɛ wə bə mu, mu' tsu mɨ wɨ.”
4 Kə na kkɨ lə biɔŋ bichi bi bə́ nə̀ bɔndɔ Kɨŋwatɨ kɨ Nyɔ lə ntɨŋ fiəfiə, nə̀ lə bi tɨfiə bɨ, fə bi kɨ fɨtɨ kə lɨmi buntaŋ, shəŋ yaha shi, kə jiŋgə fiə fiɔŋ fi kə ná keŋkɛ wɨ. 5 Nna nnende lə Nyɔ wu na nya bənɨ shəŋ yi kansə, wu na kosɔ tɨ shəŋ yi bənɨ lə, yu fə̂ bə kɨ ji fiɔŋ'ɨ fimo, bəŋ bə bənɨ bəchi bə na biəlɨ nɨ Jisɔs Klistu na donchɛ, 6 fə bə tɛshɛ kɨmbintsə lɨ bə diɛ miu ba nya bubəŋ bə Nyɔ wu na ji Nyɔ, yu ji chɛ Baba waha Jisɔs Klistu.
Bə lə̂kə miɨ chi diəŋ nɨ Klistu ləkə bəŋ
7 Bəma, bə lə̂kə miɨ chi diəŋ nɨ Klistu ləkə bəŋ, fə bubəŋ kɨ ji bə Nyɔ. 8 Ntə bəŋ lə Klistu nə̀ dze gwɨ yihi nɨ wɛŋ wu nɨŋ Bəju lɨ bə ndonchɛ bɔ lə Nyɔ ji bə kɨyɛyi. Yu nə̀ fə manɨ lə yu tambo bikaŋə bi Nyɔ nə̀ kaa bəchɛ bəttɨ bəbɔlə. 9 Yu nə̀ fə manɨ fə bənɨ bə na jimiɛhɛ Bəju kɨ Nya tɨ Nyɔ bubəŋ ndzɨ yaa wu kwesɛ wu Nyɔ na keŋkɛ bə bɔ. Fiŋfi ji nɨ bə́ nə̀ bɔndɔ lə,
“Nɨ fi na ji manɨ, njiwa ŋkɨ ŋkuntə wə
bənɨ bə na jimiɛhɛ Bəju ntɨŋ.
Njiwa ŋkɨ ntɨtɨ, ŋkuntə yɨ wuhu.”
10 Fi ji tɨ bubɔndɔ lə,
“Bəŋ bə na jimiɛhɛ Bəju, bə kɨ ji bə kɨnlaŋ bəŋ bə bənɨ bə Nyɔ lə.”
11 Fi chisə jimiɛ tɨ bubɔndɔ lə,
“Bənɨ bə na jimiɛhɛ Bəju, bə kɨ kuntə Baba.
Bituŋ bichi, bə kɨ kuntə Baba.”
12 Adzaya nə̀ chanyɛ tɨ lə,
“Bumba ná mɨndɨ lɨ nə kɨtsɔŋ kɨ Jɛse lə ntɨŋ,
ɨji miɨ wu ná fɔɔ kɨ sakɨ bituŋ
bi bənɨ bə na jimiɛhɛ Bəju lə.
Na yu wu bənɨ bə na jimiɛhɛ Bəju ná galə bufɨ bubɔlə yu wɨ.”
13 Nna nnende lə Nyɔ wu kə na bobi fiə yu wɨ, yu yîsə shəŋ yɛnɨ bə kɨnlaŋ kɨchi bə budə nɨ bə' galə shəŋ yu wɨ, fə buŋga bu kɨn'yɨntɨ kɨ ntsaaŋ'ə fəə lə bə kɨ bobi kwa fiə tsá chi fiɔŋ wɨ fi bə na kkɨ lə bə ná bɨkə lɨ.
Fiɔŋ fi nə̀ fəə lə Pɔl bɔndu dzə́ yi yu nə̀ bɔndɔ yiŋ ntɨŋ
14 Bəŋgwɨŋ, mɨ kɨbɛɛ nna ŋkkɨ buni lə bə na ji bə fiə wu ndzeŋe kɨtso, bə' yi təəə bə bufɨ, bə kkɨ ntɨfiə gwɨ́ yənɨ. 15 Bəmanɨ, kɨ biɔŋ bidɔ lə, mɨ mbɔndu bə bəŋ ŋgbooŋ. Mɨ mbɔndu ma lə nse bəŋ kɨ bi lə busenɛ, ɨji ndzɨ shəŋ yi Nyɔ lə yi ndzeŋe yi yu nə̀ donchə mɨ, 16 lə ŋkɨ nji miɨ wu nɨŋ wu Jisɔs Klistu bənɨ bə na jimiɛhɛ Bəju lɨ. Nna nɨntɨ nɨŋ nyi nɨ chɛ bintɔfiɛ, nnɨntɨ shɔŋ yi ndzeŋe yi Nyɔ lɨ, fə bənɨ bə na jimiɛhɛ Bəju kɨ ji nɨ kɨnya kɨ Nyɔ bɨmiə, Kɨn'yɨntɨ kɨ Ntsaaŋ tsaləsɨ bɔ. 17 Bəma, naji ŋkɨ ndze gwɨ bə nɨŋ yɛmɨ yi nna nɨntɨ Nyɔ lɨ ndzɨ nna nji ntɛshɛ bə Jisɔs Klistu. 18 Naji mmɔŋ kə lə nchanyɛ tsukɔ fiɔŋ fidɔ wɨ chichi, yasə fi Klistu fəə yu chɛti mɨ ntɨŋ, bə mfə lə bənɨ bə na jimiɛhɛ Bəju bɨŋ bə Nyɔ. Bɔ nə̀ fə ma ə ba nə biɔŋ bi nnə̀ nchanyɛ wɨ bə bi nnə̀ mfɨtɨ. 19 Fi nə̀ ji tɨ manɨ biəlɨ nə buŋga bu biɔŋ bi na donchɛ buŋga bu Nyɔ lə wɨ bə biɔŋ bi kɨgəsə kɨ wɨŋə lə bi nnə̀ mfɨtɨ, bə nə buŋga bu Kɨn'yɨntɨ kɨ Nyɔ lə ntɨŋ. Bəma, bə mbɛyɛ nə Jɛlosalɛm ba fiədiə gəŋ fɔ kɨdia kɨ Ililikum, nnə̀ ndze tsa ba tə shɔŋ yi ndzeŋe sɔ yi na tsukɔ Klistu wɨ. 20 Nnə̀ mfɨtɨ manɨ kɨgaŋ kɛmɨ kɨbəŋ ji lə ntɨfiə shɔŋ yi ndzeŋe nyi ji bə bənɨ bə kə saa wɔ tsukɔ Klistu wɨ, ntə kə ndza ba gəŋ kɨ wɛyɛ kɨchə kɨ miɨ wudɔ lə bɨŋ. 21 Nnə̀ mfɨtɨ fiŋ mbiəlɨ ji nɨ fi nə̀ ji bubɔndɔ lə,
“Bənɨ bə bə́ nə̀ kə saa tə bɔ kɨhɨ, bɔ ná ŋɨntɨ lɨ kɨyɛyi kɨhɨ.
Bə nə̀ kə saa wɔ kɨhɨ, ná kkɨ lɨ yu.”
Pɔl sese lə yu gəŋ Lom
22 Fiŋ na fiɔŋ fi nə chisəə mɨ koso tsá kɨyɛŋ bə mba lə kə ŋənə. 23 Bəmanɨ, dɨ wudɔ na bambiɛhɛ su bə nɨŋ bidia biŋ ntɨŋ. Nɨ nnə nse biya kɨyɛŋ lə mba kə ŋənə, 24 nna njiŋgə fiə ŋkkɨ lə kə ná ŋənə lɨ tsa yi nná ŋkɨ nchɛti ŋgɨntɨ Spɛn. Nna ŋgɔmbiɛ lə bə jiba ɨ bə tambi mɨ bə gbəndɨ wuŋ bə ŋgəŋ ba fɔ sɔ, ɨji kə' shentɛ, mɨ ŋ'wɔ buni bəŋ ntɨŋ. 25 Bəmanɨ fɛŋ, njiwa ŋgəŋ Jɛlosalɛm lə nnɨŋ bə bənɨ bə Nyɔ lə sɔ. 26 Nna ŋgɨntɨ sɔ ndzɨ bənɨ bə kɨmbɨŋ'ə bə Mɛsɛdɔnia bə Akɛya nə laŋkɨ lə bɔ tsufiɛ ba chitə bənɨ bə Nyɔ lə bə fiəŋkə Jɛlosalɛm. 27 Nə̀ bɔ bə nə laŋə lə bɔ fə manɨ, ɨji yɛyi lə na fiɔŋ fi naji lə bɔ fə bɔ lɨ, ndzɨ jilə bɔ bə na jimiɛhɛ Bəju' keŋkɛ tɨ nə budə wɨ bu na chitə bin'yɨntɨ bibɔlə, ɨji na budə bu Bəju lə, kɨjilə bɔ naji tɨ lə bɔ chitə Bəju bə budə bu mbi no lə bu Nyɔ nya bɔ. 28 Bəma, tsa yi ŋkanə bə nɨŋ nyi ba ŋəŋ lə fiɔŋ fi bɔ tsufiɛ fia' be Bəju kaŋ, ntə ndza ba chɛ dzə bəŋ ku fə kə ŋənə, ntə ŋgəŋ Spɛn. 29 Nna ŋkkɨ lɨ lə tsa yi nna ŋkɨ mba bəŋ'ɨ, mba bəŋ bə budə bu Klistu lə bu təəə.
30 Bəŋgwɨŋ, nna nende bəŋ yɨ wu Baba waha Jisɔs Klistu lə lɨ ma bə kɨnse kɨ Kɨn'yɨntɨ kɨ Ntsaaŋ'ə lə bə tɛ̂shɛ mɨ kə kɨ tsɨsə shəŋ chi bə Nyɔ mɨ lɨ, 31 fə mfɔɔ nə bənɨ bə na jimiɛhɛ bə kɨmbɨŋ'ə kaŋ nə Judɛya. Kə kɨ tsɨsə tɨ lə bənɨ bə Nyɔ lə bɨŋ nɨŋ yi nna ŋgɨntɨ lə ŋgə mfə Jɛlosalɛm. 32 Jilə Nyɔ' bɨŋ, ŋkɨ mba bəŋ wɨ ŋ'woko buni, ɨ shəŋ yɛmɨ də bəŋ ntɨŋ. 33 Nyɔ wu na ji Nyɔ wu budə kɨ ji bə bəŋ bəchi. Fi kɨ ji ma.