Binntsɨsɨ
16
Nna nse lə ndonchɛ dzəmbɨtə yaha yidɔ yi yɨ wuhu na ji lə Fwɛbɛ fə bə kkə̂ yu. Yu na ji dikin ntɛshɛ yi bənɨ bə kɨmbɨŋ'ə yi Sɛŋklia ntɨŋ. 2 Tsa yi yu ba, bə ləkə yu nɨ miɨ wu Baba dzə yi bənɨ bə Nyɔ lə ntɨŋ. Jilə fiɔŋ fiasu fi yu na se lə bə chitə yu bə fi, bə chitə. Bə kkə̂ lə yu' chitə bənɨ kɨyɛŋ, yu' chitə ma mɨ.3 Bə tsɨ̂sɨ Plisilia bə Akwela mɨ lɨ. Na bənɨ bə bɨ bə bɔ tɛshɛ nɨŋ yi Jisɔs Klistu ntɨŋ. 4 Kkpə nə̀ gɨnsɨ bɔ ndzɨ mɨ. Na mɨ kwa kə wu na nya bɔ kɨmbafə. Bəntɛshɛ bəchi bə bənɨ bə kɨmbɨŋ'ə bə na jimiɛhɛ Bəju na nya bɔ kɨmbafə tɨ. 5 Bə tsɨ̂sɨ tɨ ntɛshɛ yi bənɨ bə kɨmbɨŋ'ə yi na tɛshɛ bɔ tsɔŋ. Bə tsɨ̂sɨ tɨ Apɛnɛtus mbwə wu shəŋ. Yu nə̀ ji miɨ wu fiəfiə wu jimiɛ miɨ wu Klistu kɨtuŋ kɨ Ɛsha ntɨŋ. 6 Bə tsɨ̂sɨ Maliya wu nə̀ nɨŋə bəŋ ntɨŋ kɨtso. 7 Bə tsɨ̂sɨ tɨ Andulnikus bə Junias bə na ji bənɨ bɛŋŋ bə kɨtuŋ'ə bə kə jimiɛ buŋfia ntɨŋ bə bɔ. Na bənɨ bə bə́ na kkɨ bɔ kɨntsu kɨ beŋ bə faŋə bə Jisɔs lə ntɨŋ. Nə̀ bɔ bə nə̀ sa ba ga shəŋ Klistu wɨ nə mɨ lɨ. 8 Bə tsɨ̂sɨ Ambliyatus mbwə wu shəŋ wu bɨ bə yu na ji butɛshɛ Baba ntɨŋ. 9 Bə tsɨ̂sɨ Ubanus wu na ji ntɛshɛ bə bɨ nɨŋ yi Klistu ntɨŋ. Bə tsɨ̂sɨ tɨ Stakis wu na ji mbwə wu shəŋ. 10 Bə tsɨ̂sɨ Ɛpɛlɛs. Na miɨ wu donchɛ lə yu na lɨmi ŋkɨɨŋ bə Klistu. Bə tsɨ̂sɨ tɨ bənɨ bə Alistɔbulus tsɔŋ. 11 Bə tsɨ̂sɨ Hɛlɔdiɔn wu na ji miɨ wɛŋ wu kɨtuŋ, bə tsɨ̂sɨ tɨ bənɨ bə na ji butɛshɛ Baba ntɨŋ, bə na ji Nasisus tsɔŋ.
12 Bə tsɨ̂sɨ Tilfena bə Tilfɔsa. Na bəkansɨ bə na nɨntɨ nɨŋ yi Baba. Bə tsɨ̂sɨ tɨ Bɛsis wu na ji shəŋ yɛŋ. Na tɨ kpansɨ wu na kkɨ nɨŋ nɨŋ yi Baba kɨtso. 13 Bə tsɨ̂sɨ Lufos wu Baba sabiɛ miɨ wuhu lɨ, bə tsɨ̂sɨ tɨ mɛni wu nna ndze lə yu na ji tɨ nɛ. 14 Bə tsɨ̂sɨ Asiŋklitus, Fligɔn, Hɛlmis, Batlɔbas bə Hɛlmas, ma bəŋgwɨŋ baha bə na ji bə bɔ. 15 Bə tsɨ̂sɨ Filɔlɔgus bə Julia, bə tsɨ̂sɨ Nelius bə dzəmbɨtə yihi. Bə tsɨ̂sɨ tɨ Ɔlimpas bə bənɨ bə Nyɔ lə bə na ji bə bɔ. 16 Bə tsɨ̂shənɨ gwɨ́ yɛnɨ, ba kukɔnɨ gwɨ́ yɛnɨ nɨ bənɨ bə Nyɔ lə. Bəntɛshɛ bə bənɨ bə kɨmbɨŋ'ə bə Klistu lə bəchi tsɨsə ba tɨ bəŋ.
Bitɨfiɛ bi fəŋgbɨŋ
17 Bəŋgwɨŋ, nna nnende bəŋ lə bə dze tsa bə bənɨ bə na ba bə kɨnjɛgwɨ, bɔ bɨsə bəŋ bə bitɨfiə bi na yimbiɛ bi bə́ nə̀ tɨfiə bəŋ. Bə gá gwɨ nə ba bənɨ wɨ. 18 Bə kɨ kkɨ lə ba bənɨ na nɨntəhə ji Baba waha Klistu lɨ. Bɔ na nɨntɨ ji bitɔ bibɔlə lɨ. Bɔ dze nchanyɛ yi ndzəŋgə yi na ji biŋfukiɛ, bɔ fukiɛ bənɨ bə na ji fiɔŋ kə kkə. 19 Nɨ bənɨ bəchi wɔɔ lə bə na ji bənɨ bə na woko fiɔŋ bə fɨtɨ, mɨ ŋkɨ ŋ'woko buni bə bəŋ. Bəmanɨ na nse lə bə kɨ fɨŋfə, bə biəlɨ ji biɔŋ bi ndzeŋe, bə jikə keŋkɛ kaŋ biɔŋ bibiə ntɨŋ.
20 Ə shə kwa tsəsɨ, ɨ Nyɔ wu na ji Nyɔ wu budə gboso Satan ɨ bə dənchə yu bɨŋ bə go. Nna nnende lə Baba waha Jisɔs Klistu dônchə bəŋ shəŋ yihi yi ndzeŋe. 21 Timɔti wu kə na nɨntɨ bə yu fiɔŋ'ɨ fimo tsɨsə wa bəŋ. Lusius bə Jasɔn ma Sɔsipata bə na ji bənɨ bɛŋŋ bə kɨtuŋ'ə na tsɨsə tɨ bəŋ. 22 Mɨ wu Tɛtius wu Pɔl na chanyɛ mbondo kɨŋwatɨ kɨŋ, ntsɨsɨ wa tɨ bəŋ bə yɨ wu Baba lə. 23 Gayɔs wu mɨ wu Pɔl na me yu tsɔŋ, ntɛshɛ yi bənɨ bə kɨmbɨŋ'ə chi tɛshɛ tɨ yu tsɔŋ, tsɨsə wa bəŋ. Ɛlastus wu na ji miɨ wu kɨbə wu kɨtuŋ kɨŋ ntɨŋ, bə ŋgwɨŋ waha wu yɨ wuhu na ji lə Kwatus tsɨsə wa tɨ bəŋ. 24 [Baba waha Jisɔs Klistu dônchə bəŋ shəŋ yihi yi ndzeŋe. Fi kɨ ji ma.]ª
Kɨŋkuntə kɨ ji bə Nyɔ
25 Kɨŋkuntə kɨ ji bə Nyɔ. Na yu wu naji ɨ yu fə ɨ bə kɨ ji gwɨ buntaŋ kɨmbɨŋ kɛnɨ ntɨŋ, biəlɨ nɨ shɔŋ yɛmɨ yi ndzeŋe na tɨdi. Shɔŋ yi ndzeŋe nyi na yi nna ntɨfiə tsukɔ Jisɔs Klistu wɨ. Yi nə̀ sa yi ji fiɔŋ fi bunyələ fi bə́ nə̀ nyələ nə ndɛŋkəlɨ, fɛŋ bə́' donchɛ fi bə bɨ. 26 Fiɔŋ fi nə̀ ji fiŋ bunyələ na ji fɛŋ ŋgbooŋ. Biɔŋ bi bənɨ bə shɔŋ yi Nyɔ lə nə̀ bɔndɔ' fə fiɔŋ fi bunyələ fiŋ fɔ ŋgbooŋ bituŋ bichi ntɨŋ. Nyɔ wu na ji tsá chi na yu wu fəə lə fiɔŋ fiŋ fɔ ŋgbooŋ bə bituŋ bichi fə bɔ galə shəŋ yu wɨ ba kɨ woko bə yu. 27 Kɨŋkuntə kɨ ji tsá chi bə Nyɔ no wu na ji kwa yu wu na fɨŋfə, ə ba nə Jisɔs Klistu wɨ. Fi kɨ ji ma.