Miɨ kə̂ sakəhə miɨ wudɔ
14
Bə kɨ dze bənɨ bə na ji yee kɨmbɨŋ ntɨŋ bəŋ wɨ. Bə kə kɨ kpanə bə ba bənɨ tsukɔ biɔŋ bi bɔ na gɔmbiɛ lə na bi diəŋ bi naji lə bə́ kɨ fɨtɨ. 2 Miɨ wudɔ na ji bə kɨmbɨŋ lə naji ɨ yu kɨdiɨ fiɔŋ fichi. Bəmanɨ wudɔ wu kɨhɨ kɨmbɨŋ na ji yee diɨ kwa fihi ji bubu bu nyí lə. 3 Miɨ wu diɨ biɔŋ bichi nsa sɨŋ, yu kə kɨ nyənə miɨ wu na sabi. Miɨ wu na sabi kə kɨ kɨmbɨ nsa yi miɨ wu na diɨ biɔŋ bichi yu jikə sabiɛ, ndzɨ Nyɔ' ləkə bɔ bəchi. 4 Wə na ji yəŋ wu saŋə miɨ wu nɨŋ wu miɨ wudɔ? Na miɨ wuhu wubəŋ wu naji lə yu ŋəŋ lə fa wene wu nɨŋ lɨmi wa buni maa yu na gbo lɨ lə. Wɛŋ wu nɨŋ no lɨmi lɨ wə, ndzɨ naji ɨ Baba lɨmə yu, ɨ yu ləŋ buni. 5 Miɨ wudɔ na ji tɨ su wu na dze lə díɔ yidɔ na ji yibəŋ nə yidɔ lɨ. Miɨ wudɔ dze yihi lə díɔ chi na ji kwa diəŋ. Fiɔŋ fi na ji na lə miɨ chi kɨ lɨmi ŋkɨɨŋ fiɔŋ fi yu na keŋkɛ kɨŋgɔmbiɛ kɨhɨ ntɨŋ lə na fi ndzeŋe. 6 Miɨ wu na dze lə butsu budɔ na bubəŋ, yu na fɨtɨ manɨ yu nyaa kɨŋkuntə bə Baba. Miɨ wu na diɨ fiɔŋ fichi diɨ tɨ yu nyaa kɨŋkuntə bə Baba, nɨ yu na fɨtɨ manɨ, yu nya kɨmbafə bə Nyɔ. Miɨ wu na nyənə ndiə yi biɔŋ bichi, yu na nyənə ma yu nya kɨŋkuntə bə Baba, nɨ yu na nya tɨ kɨmbafə bə Nyɔ. 7 Kə kɨ kkɨ lə ɨ miɨ na ji wuwəŋ, tə na yu kə wu na keŋkɛ gwɨ yihi. Ɨ yu kkpə lɨ, tə na tɨ yu kə wu na keŋkɛ gwɨ yihi. 8 Jilə kə na ji bəwəŋ, tə kə na ji bə Baba, kə kkpə lɨ, tə kə na ji tɨ bə Baba. Bəma, fa kə na ji bəwəŋ lɛɛ, makə bəŋkpə lɛɛ, na Baba wu na keŋkɛ bɨ. 9 Na fiɔŋ fi Klistu nə̀ kkpə ba dzakɔ nə kkpə lɨ kɨ ji wuwəŋ. Yu nə̀ fə manɨ fə yu kɨ ji Baba wu bənɨ bəchi bə na ji bəwəŋ bə bəŋkkpə. 10 Bəma, wə na sakɨ wəma wə kɨmbɨ lə yu' gbɔ nsa ndzɨ la? Ɨji tɨ ndzɨ la fi wə na nyənə wəma? Bə kɨ kkɨ lə bɨ bəchi ná jimi fita fi nsa lə fi Nyɔ lə bɨŋ, ɨ yu sa bɨ. 11 Na fiɔŋ fi fi na ji bubɔndɔ lə,“Mɨ Baba nna ntɨdi lə, nɨ nna nji wuwəŋ,
miɨ chi jiwa ɨ yu tuŋ nu mɨ nəfiə,
ɨ miɨ chi kɨ chanyɛ bə bifuŋ bihi lə nna nji Nyɔ.”
12 Bəma, miɨ chi nə bɨ ntɨŋ ná lɨmi Nyɔ nəfiə ba tə nɨ fiə wuhu nə̀ ji.
Miɨ kə̂ fəkə fiɔŋ fi naji ɨ wəmɛni gbɔ
13 Bəma, kə kə̂ tsɔhɔ saa miɨ kə kɨmbɨ lə miɨ wa sə gbɔ nsa. Fiɔŋ fi naji lə kə fə na lə miɨ dze kɨ fɨtɨ fiɔŋ, yu kɨ dze tsa fiɔŋ fia tə kɨ ji fi naji ɨ wəmɛni tsu gwɨ fi wɨ makə fi fə ɨ yu gbɔ. 14 Nna ŋkkɨ lɨ, mbɨmi nɨ miɨ wu Baba Jisɔs lə fiɔŋ fidiənə fidɔ na sɨŋ su nə fi kaŋ fi na tsaləhə. Bəmanɨ, ɨ miɨ wudɔ dze kɨ ŋɨntɨ lə fiɔŋ fidiənə fidɔ na tsaləhə, ɨ fi kɨ ji ma yu lɨ. 15 Jilə wə na diɨ fiɔŋ fi bɨsə shəŋ yi wəma lə, tə wə na donchɛhɛ yu kɨnse. Wə kə̂ galə lə fiɔŋ fi wə na diɨ gboso wəma wu Klistu nə̀ kkpə ndzɨ yu. 16 Bəma, wə kə̂ fəkə lə fiɔŋ fi ndzeŋe fi wə na fɨtɨ tsu ji fi bə́ kɨ chanyɛ lə na fibiə. 17 Bə kɨ kkɨ lə buŋkuŋ bu Nyɔ lə na jimiɛhɛ tsukɔ biɔŋ bidiənə bə biɔŋ bimunɔ wɨ. Na fiɔŋ fi na ji tsukɔ ŋkeŋkɛ yi fiə wudiəŋ bə wu budə lə ma bə ŋkeŋkɛ yi kɨnlaŋ kɨ fɔɔ nə Kɨn'yɨntɨ kɨ Ntsaaŋ wɨ. 18 Ɨ miɨ na nɨntɨ Klistu lɨ nə ya dzə ntɨŋ, tə Nyɔ jiwa yu kɨ woko buni bə yu, bənɨ sɛnti tɨ yu. 19 Bəma, kə kɨ biəlɨ ji biɔŋ bi na ba bə budə ma bi na chitə bɨ bə ŋkoso miɨ chi. 20 Bə kə̂ bɨsə nɨŋ yi Nyɔ ndzɨ biɔŋ bidiənə. Na yɛyi lə biɔŋ bidiənə bichi na ji ntsaaŋ, bəmanɨ ɨ wə na diɨ fiɔŋ fi naji ɨ fi fə miɨ wudɔ gbɔ, tə na fiɔŋ fibiə fi wə na fɨtɨ. 21 Na fiɔŋ fi ndzeŋe bə nɨŋŋ lə wə diəhə nyɛŋ, makə bə mu yi mbiŋ, makə bə mfə ma la fi naji ɨ fi fə lə wəma gbɔ. 22 Jilə shəŋ yi wə galə Nyɔ wɨ na bɨmi fiɔŋ fidɔ, wə ga kɨ kkɨ kwa bəŋ bə Nyɔ bəfɛ. Kɨnlaŋ kɨbəŋ na bə miɨ wu shəŋ yihi na sakəhə yu, ndzɨ yu na fɨtɨ fiɔŋ fi yu na ŋɨntɨ lə fi na ji diəŋ. 23 Bəmanɨ, miɨ wu na diɨ fiɔŋ yu masə, yu' be ŋgə, ndzɨ yu na fɨtəhə ji fiɔŋ fi shəŋ yi yu galə Nyɔ wɨ na bɨmi bə fi. Bə kɨ kkɨ lə fiɔŋ fichi fi miɨ na fɨtɨ ɨji shəŋ yi yu galə Nyɔ wɨ na bɨmiɛhɛ bə fi, na bubiə.