Bə kɨ woko bə bənɨ bə na keŋkɛ buŋga bu saŋə kɨtuŋ
13
Miɨ chi naji lə yu kɨ woko bə bənɨ bə na keŋkɛ buŋga bu saŋə, ndzɨ buŋga budɔ na sɨŋ su bu kə fɔkɔ ji nə Nyɔ lɨ. Bə na sakɨ ba na ŋga yi Nyɔ bɔ bitɨ bɨŋ. 2 Fi na ji lə, ɨ miɨ tɛ fo bə bənɨ bə na keŋkɛ buŋga bu saŋə, tə miɨ wa tɛ fo ji bə bənɨ bə Nyɔ sə galə. Bənɨ bə na tɛti fo ba bɔ kɨ dɨyi ji nsa bɔ fi. 3 Bə kɨ kkɨ lə bənɨ bə na ji bə fiə wu ndzeŋe ba bɔ jikə kɨ lete bənɨ bə na sakɨ mbi. Na bənɨ bə fiə wubiə lə bə ba bɔ kɨ lete. Jilə wə na se lə wə jikə kɨ lete miɨ wu na keŋkɛ buŋga bu saŋə, wə kɨ fɨtɨ fiɔŋ fi ndzeŋe, ɨ yu kɨ sɛnti wə. 4 Miɨ wu na sakɨ bənɨ na nɨntɨ ji Nyɔ lɨ, fə bənɨ kɨ ji buni. Bəmanɨ, ɨ wə dza kɨ fɨtɨ fiɔŋ fibiə, ɨ wə tə kɨ lete yu, ndzɨ buŋga bu bə́ nya yu, bu ganə bənɨ ŋgə ntɨŋ na bu kɨlɔlɔ lə kə. Na miɨ wu nɨŋ wu Nyɔ, ɨji yu wu Nyɔ galə lə yu kɨ donchɛ bulo bu Nyɔ lə bə bənɨ bə na fɨtɨ biɔŋ bibiə. 5 Bəma bə naji lə bə kɨ woko bə bənɨ bə na sakɨ mbi, ɨ jikə jimiɛ lə ndzɨ bə na lete bulo bu Nyɔ lə. Bə kɨ woko bɔ fə fiɔŋ kə jimiɛ fi kɨ sakɨ shəŋ yɛnɨ. 6 Fia na fiɔŋ fi na fɨtɨ lə bə tsufu kɨŋwatɨ, ndzɨ bənɨ bə na keŋkɛ buŋga bu saŋə na nɨntɨ ji Nyɔ lɨ, ɨji bɔ' nya tsa yibɔ chi nɨŋ ya wɨ. 7 Bə kɨ nya fiɔŋ fichi fi miɨ chi lə fi naji lə bə nya. Ɨ na ntsufu yi kɨŋwatɨ, bə tsufu. Jilə na nsɔmbu yi biɔŋ bi bə naji lə bə sɔmbu, bə sɔmbu. Jilə na miɨ wu bə naji lə bə le, bə le yu. Jilə na wu bə naji lə bə kuntə, bə kuntə yu.Bə kɨ laŋkɨ gwɨ́ yɛnɨ
8 Miɨ kə kɨ keŋkɛ tɨmo fie yi miɨ wudɔ, yasə fie yi kɨnse kwa. Bə kɨ kkɨ lə, ɨ miɨ na laŋkɨ miɨ wudɔ, tə yu' ga bilaŋ bichi. 9 Bilaŋ bi Nyɔ lə na tɨdi lə,
“Wə kə̂ biələ kpansɨ miɨ makə nomə miɨ,
wə kə̂ kkpɨsə miɨ,
wə kə̂ yəhə,
wə kə̂ yəkəhə yəsɨ,”
ma kɨlaŋ kɨ la, na ji butɛshɛ kɨlaŋ kɨŋ ntɨŋ, kɨ na tɨdi kɨŋ lə,
“Kɨ laŋkɨ miɨ wu na ji fə wə ku nɨ wə na laŋkɨ gwɨ yɔhɔ.”
10 Jilə miɨ na laŋkɨ wudɔ, ɨ yu jikə kɨ fɨtɨ fiɔŋ fibiə bə yu. Bəma, ɨ miɨ na laŋkɨ wudɔ, kɨjilə yu' ga bilaŋ bichi.
11 Bə kɨ fɨtɨ biɔŋ biŋ mɛ, bə kkɨ nɨ tsa yi fɛŋ na ji. Tsa yɛnɨ' kwətsə yi dzakɔ. Bə dzâkɔ ndzɨ tsa yaha yi fɔnɔ fo ya gwɨgwɨ ba ya nɨ yi nə̀ sa yi ji tsa yi kə nə̀ galə shəŋ Jisɔs Klistu wɨ. 12 Kɨjuwɔ ka kɨ ka, butsu bwa. Kə shə̂ fiə wu kɨjuwɔ lə ba dze ji fiə wu kɨŋgbooŋ'ə nɨ biɔŋ bi dzoŋ'ə. 13 Kə kɨ ji bə kɨjimiɛ kɨ kɨŋkuntə lə nɨ bənɨ bə na gəndə bbushə. Bə kə kɨdiɨ, bə mu, bə fɨtɨ nɨ bíə. Bə kə kɨ mu bə chinchi. Bə kə kɨ ji fiə wu kɨnyənə kɨ ndzenɛ lə ntɨŋ. Bə kə kɨ kpanə bə ji bə shəŋ yi yi. 14 Bə dzê ji fiə wu Baba Jisɔs Klistu lə nɨ wɛnɨ. Bə kə̂ nyaha tɨmo dzə bə gwɨ yi nəgwɨ ba kɨ fɨtɨ biɔŋ bibiə bi yi na se.