Bə nyâ gwɨ́ yɛnɨ bə Nyɔ
12
Bəŋgwɨŋ, nɨ Nyɔ kwesɛ yaa bə bɨ, nna ŋkuchi bəŋ kaŋ lə, bə nyâ gwɨ́ yɛnɨ bə Nyɔ nɨ bintɔfiɛ bi na bambi biwəŋ bi ji ntsaaŋ yu yəsɨ. Nyi na dzə yi ndzeŋe bəŋ'ɨ yi kuntə Nyɔ yi ntɨŋ. 2 Bə kə kɨ biəlɨ biɔŋ bi bənɨ bə mbi no lə na fɨtɨ. Bə gâma Nyɔ nyâ bəŋ biŋgɔmbiɛ bifa, bi yâshɛnɨ bəŋ, bə dze kɨ fɨtɨ manɨ, ɨ bə tə chənə ba kkə fiɔŋ fi Nyɔ na se, fi na ji fi ndzeŋe, Nyɔ bɨmi fi, fi ndzeŋe yu lɨ tuŋ fəŋgbɨŋ.3 Mɨ nɨ miɨ wu Nyɔ donchə mɨ shəŋ yihi yi ndzeŋe, nna nse lə ntə bə bəŋ bəchi lə, miɨ kə kɨ ŋɨntɨ gwɨ yihi lə yu na ji fiɔŋ fidɔ yasə fiɔŋ fi yu na ji fi lɨ. Miɨ kɨ gɔmbiɛ kɨ gwɨ yihi lə dzə yi ndzeŋe ntɨŋ yu biəlɨ kɨŋfɨkə kɨ kɨmbɨŋ'ə kɨ Nyɔ nya yu. 4 Kə na kkɨ lɨ lə gwɨ yi miɨ na ji miuŋkpaŋ, yi keŋkɛ biŋuni chichi chichi, biŋuni bia keŋkɛ nɨ́ŋ chichi chichi. 5 Na tɨ diəŋ nɨ kə na ji. Mɛfə kə na ji kɨyɛŋ, kə na ji gwɨ miu Klistu ntɨŋ. Miɨ wudɔ na jimiɛhɛ nə yu kaŋ. 6 Kə na keŋkɛ binya chichi chichi, ə ba nə shəŋ yi Nyɔ lə yi ndzeŋe wɨ yi yu donchə bɨ lə kə kɨ nɨntɨ bə bi. Jilə kɨnya kɨ miɨ lə na ji lə yu kɨ tɨdi shɔŋ yi Nyɔ, yu kɨ tɨdi yu biəlɨ mfɨkə yi kɨmbɨŋ kɨ Nyɔ nya yu. 7 Jilə kɨ miɨ lə na ji lə yu kɨ nɨntɨ bənɨ lɨ, yu kɨ nɨntɨ bɔ lɨ. Ɨ kɨ miɨ lə na ji lə yu kɨ tɨfiə bənɨ, yu kɨ tɨfiə. 8 Jilə kɨnya kɨ miɨ lə na ji lə yu kɨ kosɔ shəŋ yi bənɨ lə, yu kɨ kosɔ. Jilə kɨ miɨ lə kɨnya na ji lə yu kɨ nya bənɨ biɔŋ bi yu na keŋkɛ, yu gu kaŋ yihi. Jilə kɨ miɨ lə kɨnya na ji lə yu kɨ jiŋgə bənɨ, yu kɨ jiŋgə bɔ bə shəŋ yihi chi. Ɨ miɨ na ji wu kɨhɨ kɨnya na ji ŋkwese yi yaa bə bənɨ, yu kɨ kwesɛ bə kɨnlaŋ.
Kɨnse kɨ yɛyi
9 Kɨnse kɛnɨ naji lə kɨ kɨ ji kɨ yɛyi. Bə kɨ lo bə fiə wubiə, bə shiŋki ji fiə wu ndzeŋe wɨ. 10 Bə kɨ laŋkɨ gwɨ́ yənɨ bə shəŋ chi nɨ beŋ bə kpansɨ miu lə. Bə kɨ kuntə bənɨ bədɔ ya nɨ bə na kuntə gwɨ́ yənɨ.ª 11 Bə kə kɨ ya nə fiɔŋ fidɔ lɨ. Bə kɨ nɨntɨ nɨŋ yi Nyɔ tsá chi bə kɨgaŋ. 12 Bə kɨ woko buni bə fiɔŋ fi bə na jiŋgə fiə fi wɨ, bə kkɨ lə bə ná keŋkɛ lɨ fi. Bə kɨ kansɨ shəŋ bəŋgə bəchi ntɨŋ. Bə kɨ ji kɨntsɨsɨ ntɨŋ tsá chi. 13 Bə kɨ chitə bənɨ bə Nyɔ lə bə fiəŋkə. Bə kɨ ləkə bəbanə tsɔ́ŋ yɛnɨ ntɨŋ, bə chiŋfi bɔ buni.
14 Bə kɨ nende lə Nyɔ li budə bənɨ wɨ bə na sesɛ gbo bəŋ nəjiŋ. Bə kɨ nende ji budə bɔ lɨ. Bə kə̂ nendɛhɛ lə lɔŋ kwe bɔ. 15 Bə kɨ laŋkɨ bə bənɨ bə na laŋkɨ, bə dzudi gwɨ bə bənɨ bə na dzudi gwɨ. 16 Bə kɨ ji fiɔŋ'ɨ fimo. Bə kə kɨ dze gwɨ. Bə kɨ kwete bushə bə bənɨ bə wa. Bə kə kɨ donchɛ lə bə na kkɨ biɔŋ ya nɨ bə na kkɨ.
17 Bə kə̂ chisə bubiə bə bubiə. Bə kɨ dze tsa, bə ŋəŋ lə bə kɨ fɨtɨ ji biɔŋ bi bənɨ bəchi na ŋɨntɨ lə na bi ndzeŋe. 18 Jilə dzə ya su, chi bə na ŋɨntɨ, bə kɨ dio lə bə kɨ ji budə ntɨŋ bə miɨ chi. 19 Nsáŋ yɛŋ, bə ná kə̂ mɔŋkɔ lə bə chi bubiə bə bubiə. Bə gâ manɨ, Nyɔ dônchɛ bɔ shəŋ yihi yi bulo lə. Na nɨ fi na ji bubɔndɔ lə,
“Na mɨ wu naji lə nchi fie.
Na mɨ njiwa nsɔmbu bɔ.
Na Baba Nyɔ wu na chanyɛ.”