Nyɔ kə nɨŋŋkəhə bənɨ buhu Bəisla duka lɨ
11
Nna mbi lə Nyɔ' nɨŋŋ bənɨ buhu duka lɨ lə? Na manɨ kə! Mɨ kɨbɛɛ nna nji miɨ wu Isla. Nji wɛŋ nə Ablaham tsɔŋ, mɨ mfɔ nə ku wu Bɛnjamɛn lə ntɨŋ. 2 Nyɔ kə nɨŋŋkəhə bənɨ buhu duka lɨ bə yu nə̀ sabiɛ nə ndɛŋkəlɨ. Ntɨlə bə na kkɨ lɨ fiɔŋ fi Kɨŋwatɨ kɨ Nyɔ lə na chanyɛ tsukɔ Alaja wɨ, nɨ yu nə̀ dɨ bə Nyɔ tsukɔ fiɔŋ fi bənɨ bə Isla nə̀ fɨtɨ wɨ? 3 Yu nə̀ dɨ yu tɨdi bə Nyɔ lə,“Baba, bə́' kkpɨshɛ bənɨ bɔhɔ bə faŋə,
ba kpodiɛ tanyɛ yɔhɔ yi bintɔfiɛ lə.
Na mɨ kwa wu shə,
bɔ biəlɨ ba tɨ lə bɔ kanə bə mɨ.”
4 Yu nə̀ dɨ manɨ, Nyɔ chi bə yu lə la? Yu nə̀ chi bə yu lə,
“Mɨ ŋga bənɨ bɛŋŋ bəntsuku fumba (7,000),
bə kə tuŋkɔhɔ nu ba kuntə finyɔ fi bə́ nə̀ tsɨsə lə Baal.”
5 Na tɨ diəŋ nɨ fi na ji tsa nyi wɨ fɛŋ. Bənɨ bədɔ ba su tsəsɨ Isla bə shə bə na ji bə Nyɔ lə. Bɛmbɛ ji bə yu sabiɛ nə shəŋ yihi yi ndzeŋe ntɨŋ. 6 Jilə yu nə̀ sa bɔ ndzɨ shəŋ yihi yi ndzeŋe, kɨjilə na ndzɨ nɨŋ yidɔ yi bɔ nə̀ nɨŋə kə. Jilə nə̀ ndzɨ nɨŋ yidɔ yi bɔ nə̀ nɨŋə, ɨ shəŋ yi Nyɔ lə yi ndzeŋe tsukə jimiɛ shəŋ yi ndzeŋe yi yɛyi.
7 Fiɔŋ fi nna ntɨdi na lə la? Fi na ji lə bənɨ bə Isla kɨyɛŋ nə̀ kə jimiɛ diəŋ Nyɔ yəsɨ nɨ bɔ nə̀ se. Nə̀ kwa bənɨ bə Nyɔ nə̀ sabiɛ bə nə̀ keŋkɛ dzə yi jimiɛ diəŋ yu yəsɨ. Bəmanɨ, Nyɔ fə shəŋ yi bədɔ ba bənɨ lə tɛ ba kətə manɨ. 8 Fiŋfi ji nɨ bə́ nə̀ bɔndɔ lə,
“Nyɔ nə̀ fə bɔ kɨ jikijiki,
yəsɨ yibɔlə tsukə kɨ ŋɨntɨ biɔŋ wɨ,
bitiu bibɔlə tsukə kɨ woko.
Bɔ kətə manɨ sɨŋsɨŋ fɔ ndɛŋ.”
9 Dɛbi tɨ nə̀ chanyɛ lə,
“Nyɔ fə̂ bidiəŋ bi bɔ na diɨ bɔ woko buni,
bi fînchə bə bɔ nɨ gɨ,
ba kwe bɔ nɨ ntasɨ.
Bi tsû fiɔŋ fi naji ɨ fi shɔ bɔ ba gboso lɨ,
ɨ fi kɨ ji bikwəntsə bi fiə wubɔlə.
10 Nyɔ fə̂ yəsɨ yibɔlə nyimə fə bɔ tsɔ kə ŋəŋkəhə biɔŋ wɨ.
Fə̂ tɨ yasɨ yibɔlə guu ba kətə ma kamo lɨ.”
11 Nna mbi lə bənɨ bə Isla nə̀ chiŋkiɛ mɛ bə ŋgbɔ lə bɔ kətə fəkoso lə? Na manɨ kə. Bubiə bu bɔ nə̀ fəə nə̀ tsu ba ji bə mfɔ yi fo bənɨ bə na jimiɛhɛ Bəisla lɨ, fə kɨndɔ kɨ chindi bənɨ bə Isla. 12 Jilə bubiə bu bɔ nə̀ fəə nə̀ tsu ba ba ji bə bubəŋ mbi no ntɨŋ, ŋgbɔ yi bɔ nə̀ gbɔɔ ya ba ji bə bubəŋ bənɨ bə na jimiɛhɛ Bəisla lɨ, kɨjilə bubəŋ bu ná kɨ ji tsa yi bənɨ bə Isla bəchi ná bɨmiə Klistu ná kɨ ji nəŋ?
Bənɨ bə na jimiɛhɛ Bənɨ bə Isla kə kɨ kuntsɔ gulu
13 Nna nse lə nchanyɛ fɛŋ ji bə bəŋ bənɨ bə na jimiɛhɛ bənɨ bə Isla. Nɨ nna nji wɛŋ wu faŋə wu Jisɔs bə bənɨ bə na jimiɛhɛ Bəisla, mɨ ŋkɨ ndze nɨŋ yɛmɨ nyi lə na fiɔŋ fibəŋ. 14 Nna mfɨtɨ manɨ fə kɨndɔ kɨ chindi Bəju bɛmɨ, ɨ fi bukɔ bɔ wɨ, ɨ bədɔ nə bɔ ntɨŋ fɔfo. 15 Jilə Nyɔ nə̀ nɨŋŋ bənɨ bə Isla, fiŋfi fə bənɨ bədɔ nə mbi ntɨŋ fichə ba tsu fiɔŋ fimo bə Nyɔ, kɨjilə ná kɨ ji tsa yi yu ná chisə ləkə bɔ, ɨ fi kɨ ji nəŋ? Fi ná kɨ ji nɨ tsa yi miɨ sə kkpə ba dzakɔ nə kkpə lɨ. 16 Ɨ miɨ kpa kɨchəŋ kɨ fiəfiə ba nya bə Nyɔ, tə buna bwa buchi na bu Nyɔ lə. Jilə gaŋ yi kɨtɨ lə na yi Nyɔ lə, tə chɛ́ yi kɨtɨ ka lə na tɨ yi Nyɔ lə.
17 Bəmanɨ, jilə bə́ nə̀ shɔkiɛ chɛ́ yidɔ yi kɨtɨ lə tɔfiɛ lɨ ba dze ji bəŋ bə na ji ba kɨtɨ kɨ Ɔlif lə kɨ ji ba bɛsɛ kɨtɨ kɨ ɔlif lə kɨ bə́ tishɛ butishɛ dɨ wu chɛ́ yidɔ ya nə̀ fɔɔ, fə bə kɨ keŋkɛ tɨ ŋgɔŋ nə kɨtɨ ka wɨ, 18 kɨjilə bə na jimiɛhɛ lə bə kuntsu gulu bə chɛ́ ya. Ɨ bə na kuntsɔ gulu, bə kkə tɨ lə bə na ji kwa ji chɛ́. Ɨ jikə jimiɛ bəŋ bə na fɨtɨ lə gaŋ kɨ jisu. Na gaŋ yi fɨtɨ lə bə kɨ jisu. 19 Naji ɨ miɨ wudɔ nə bəŋ ntɨŋ dza kɨ tɨdi lə, “Bə́ nə̀ shɔkiɛ chɛ́ yiŋ lə bə́ chi ji mɨ mɨ.” 20 Na yɛyi. Bə́ nə̀ shɔkiɛ ba tɔfiɛ lɨ ndzɨ yi nə̀ sɨŋ bə kɨmbɨŋ. Bə na ji mɨ ŋkɨɨŋ ndzɨ shəŋ yi bə galə Klistu wɨ. Bəma, bə kə kɨ kuntsɔ gulu. Bə kɨ ji nyiŋ nyiŋ. 21 Bə kɨ kkɨ lə dzenəfə Nyɔ nə̀ kə bətə chɛ́ yi kɨtɨ kɨ na ji ka butishɛ lə, kɨjilə yu ná bətəhə tɨ bəŋ. 22 Bə bô bə ŋəŋ la, Nyɔ na ji bə shəŋ yi ndzeŋe kɨtso, yu ji tɨ bə shəŋ yilo. Yu na ba yu kɨ lo bə bənɨ bə sə gbɔɔ, bəmanɨ yu donchɛ shəŋ yi ndzeŋe bə bəŋ jilə bə' kətə kɨ biəlɨ dzə yihi. Jikə jimiɛ manɨ, ɨ yu ná shɔkiɛ tɨ bəŋ. 23 Jilə Bəju ba' tsu kɨmbɨŋ kɨbɔlə bɨŋ, ɨ Nyɔ chi bɔ dzɛɛ ba bɛsɛ kɨtɨ ka wɨ, ndzɨ Nyɔ na keŋkɛ buŋga bu chisə bɛsɛ bɔ. 24 Bə kɨ kkɨ lə, jilə bə na ji chɛ́ yi bə́' shɔkiɛ nə kɨtɨ kɨ ɔlif lə wɨ kɨ na ko kpa, ba bɛsɛ bəŋ kɨtɨ wɨ ji kɨ bə́ tishɛ butishɛ, ɨji fiɔŋ fi na jimiɛhɛ lə fi kɨ ji manɨ, tə naji ɨ bə́ jikə chisə dzɛɛ chɛ́ yi kɨtɨ kɨ bə́ tishɛ ka lə butishɛ yi bə́ nə̀ shɔkiɛ ba chi kɨtɨ kɨsu wɨ ya manɨ?
Yaa wu Nyɔ lə wu kwesɛ bə bənɨ bəchi
25 Bəŋgwɨŋ, nna nse lə bə kkə̂ kɨyɛyi kɨŋ kɨ na ji bunyələ, fə bə jɛkə kɨ dze gwɨ lə bə na fɨŋfə kɨtso. Fi na ji lə, bənɨ bə Isla bədɔ' tɛ fo kɨtso. Bɔ jiba ɨ bɔ kɨ tɛti kwa fo manɨ gəŋ fɔ tsa yi bənɨ bəchi bə na jimiɛhɛ Bəisla bə naji lə bɔ be kɨntsu kɨ bənɨ bə Klistu lə ntɨŋ ná bɛɛ. 26 Fi ná tɨchə manɨ, ɨ bənɨ bə Isla bəchi ná fɔɔfo. Fi na ji bubɔndɔ lə,
“Miɨ wu ná fosɔ bənɨ nə ŋgə ntɨŋ ná foto nə Dzayɔn.
Yu ná fosɔ fiə wubiə nə ku wu Jakɔ lə ntɨŋ.
27 Yiŋ na nchínə yi nná ndiə bə bɔ,
tsa yi nná nshiŋkiɛ bubiə bubɔlə.”
28 Kɨdia kɨ shɔŋ yi ndzeŋe yi Nyɔ lə, bənɨ bə Isla na ji bənɨ bə Nyɔ lə bə nchɛnɛ lə ɨji ndzɨ bəŋ. Kɨdia kɨ sabiɛ kɨ Nyɔ nə̀ sabiɛ bɔ, bɔ na ji bənɨ bə Nyɔ na laŋkɨ bɔ ndzɨ nchínə yi yu nə̀ diə bə bəchɛ chɛ bɔ. 29 Fi ji manɨ ndzɨ ɨ Nyɔ nya miɨ kɨnya, naji ɨ yu tsu ləkə kɨ kə, ɨ yu dɨ tɨ miɨ, ɨ yu jikə tɔkaŋ nə miɨ wa wɨ. 30 Chi bəŋ bənɨ bə na jimiɛhɛ Bəisla nə̀ sa bə jikə wɔkɔhɔ bə Nyɔ, bəmanɨ fɛŋ yu kwese yaa bə bəŋ ndzɨ bənɨ bə Isla na wokɔhɔ bə yu, 31 na diəŋ nɨ bɔ na wokɔhɔ tɨ bə Nyɔ fɛŋ, fə yaa wu Nyɔ lə wu kwesɛ bə bəŋ fəə ɨ yu kwese tɨ yaa bə bɔ. 32 Fiɔŋ fi na ji na lə, Nyɔ ga bənɨ bəchi bitiu bintaŋ ntɨŋ fə yu kwesɛ yaa bə bɔ bəchi.
Kɨŋkuntə kɨ ji bə Nyɔ
33 Bə bô bə ŋəŋ, bubəŋ bu Nyɔ lə bə mfɨŋfə yihi ma bufɨ buhu ji kɨtso, naji ɨ miɨ kkə dzə́ yi yu na kəmbiə biɔŋ yi ntɨŋ kə. Naji ɨ miɨ kkə dzə́ yihi kə. 34 Fi na ji bubɔndɔ Kɨŋwatɨ kɨ Nyɔ lə ntɨŋ lə,
“Na yəŋ su wu na kkɨ biŋgɔmbiɛ bi Baba lə?
Makə na yəŋ wu naji yu nya yu bitɨfiə?
35 Na yəŋ su wu nə̀ saa nya Nyɔ fiɔŋ
fə yu chisə?”
36 Biɔŋ bichi na foto nə yu lɨ, biɔŋ bichi chɛti yu kaŋ, biɔŋ bichi ji ndzɨ yu. Kɨŋkuntə kɨ ji bə yu tsá chi ŋka sɨŋ. Fi kɨ ji ma.