10
Bəŋgwɨŋ, fiɔŋ fi nna nse bə shəŋ yɛŋ, ma kɨntsɨsɨ kɛŋ bə Nyɔ, na lə bənɨ bɛmɨ Bəisla bɛŋ fɔfo. 2 Nna ŋkkɨ lɨ, ɨji naji nləŋ tɨ nsa lə bɔ na ji bə kɨgaŋ Nyɔ wɨ kɨtso. Bəmanɨ kɨgaŋ kɨbɔlə kɨŋ jikə biələ bufɨ bu Nyɔ lə. 3 Chi bɔ kə kkə dzə́ yi diəŋ yi Nyɔ lə yi yu ba yu kɨ dze miɨ lə yu naji diəŋ yu yəsɨ, bɔ kɨ se lə bɔ ga yibɔ dzə, bɔ jikə nyaha gwɨ́ yibɔlə lə bɔ biə dzə́ yi Nyɔ lə ya. 4 Chi Klistu nə̀ ba, dzə yi bilaŋ yi bənɨ nə̀ biəlɨ lə bɔ kɨ ji diəŋ Nyɔ yəsɨ nə̀ ka, fə fi kɨ ji lə bə njiŋ diəŋ Nyɔ nəfiə fɛŋ, na bə ŋga shəŋ Klistu wɨ.Mfɔ yi fo' ba miɨ chi lɨ
5 Mose nə̀ bɔndu tsukɔ njiŋ diəŋ Nyɔ nəfiə biəlɨ chi bilaŋ na se lə, “Miɨ wu na galɨ bilaŋ ná kɨ ji ndzɨ yu galɨ wa bilaŋ bia.” 6 Bəmanɨ, njiŋ diəŋ Nyɔ nəfiə biəlɨ ŋga yi shəŋ Nyɔ wɨ na ji bubɔndɔ lə,
“Wə kə kɨ bi nə wə shəŋ lə, ‘Na yəŋ wu jiwa yu bəndɨ bɔ́?’”
(Fi ji lə, yu shi bə Klistu.)
7 Makə lə,
“Ná shichi yəŋ mbi wu bəŋkkpə wa ntɨŋ?”
(Fi ji lə, ba dzakɔ Klistu nə kkpə lɨ.)
8 Bəmanɨ, fiŋ na tɨdi lə la? Fi na tɨdi lə,
“Diɛ yi Nyɔ ya gwɨgwɨ fə wə ku.
Yi na ji wə dze, yi ji tɨ wə shəŋ.”
Na diɛ yi kə na tɨdi ya tsukɔ ŋga yi shəŋ Jisɔs wɨ. 9 Ɨ wə chanyɛ bə bifuŋ biɔhɔ lə Jisɔs na Baba, ba bɨŋ wə shəŋ lə Nyɔ nə̀ dzakɔ yu nə kkpə lɨ, ɨ wə fɔfo. 10 Fi na ji lə miɨ ba yu bɨŋ bə shəŋ yihi fə Nyɔ tə dzɛɛ yu lə yu na sɨŋ bə ŋgbɔ. Ɨ miɨ chanyɛ bə bifuŋ bihi, ɨ Nyɔ fə yu fɔfo. 11 Kɨŋwatɨ kɨ Nyɔ lə chanyɛ lə,
“Mɛ yəŋ wu bɨmiə bə yu naji ɨ yaa kwe yu kə.”
12 Bə kɨ kkɨ lə kɨchichi na sɨŋ su Miɨbəju bə miɨ wu na jimiɛhɛ Miɨbəju ntɨŋ. Baba wu na ji Baba wu bənɨ bəchi na ji kwa miu. Yu ba yu kɨ guyi kaŋ yihi, yu nya bubəŋ bə miɨ chi wu na dɨ bə yu. 13 Fi na ji bubɔndɔ Kɨŋwatɨ kɨ Nyɔ lə ntɨŋ lə,
“Miɨ chi wu na dɨ, yu bɨndɨ yɨ wu Baba lə,
jiwa yu fɔfo.”
14 Bəmanɨ naji ɨ bənɨ fə nəŋ ba tə kɨ dɨ bɔ bɨndɨ yu ji bɔ kə galə shəŋ yu wɨ? Naji ɨ bɔ fə nəŋ tə ga shəŋ yu wɨ ji bɔ nə̀ kə saa wɔ kɨhɨ? Naji ɨ bɔ fə nəŋ tə wɔ lɨ ji miɨ kə tədiə bɔ? 15 Naji ɨ bənɨ fə nəŋ tə gəŋ ba tə shɔŋ yi ndzeŋe ɨji bə́ kə faŋkəhə bɔ? Fi na ji bubɔndɔ lə,
“Bənɨ na ba bɔ wɔ chí yi bənɨ bə na ba bə shɔŋ yi ndzeŋe lə,
bɔ kɨ laŋkɨ kɨtso.”
16 Bəmanɨ, na bənɨ bə Isla bəchi kə bə bɨmiə shɔŋ yi ndzeŋe nyi. Diəŋ nɨ Adzaya nə̀ chanyɛ lə,
“Baba, na yəŋ wu bɨmiə shɔŋ yi kə tɨfiə?”
17 Fi na ji lə, ŋga yi shəŋ Klistu wɨ na ba nə fiɔŋ fi miɨ sə wɔɔ wɨ, fiɔŋ fi miɨ na woko na ba nə fi bə́ sə tədiə yu tsukɔ Klistu wɨ. 18 Nna mbi lə, bɔ nə̀ kə wɔkɔhɔ lə? Yɛyi lɨ, bɔ nə̀ wɔ, ndzɨ Kɨŋwatɨ kɨ Nyɔ lə na tɨdi lə,
“Ŋgɔ yibɔ' gəndə mbi chi ntɨŋ,
nchanyɛ yibɔ gəŋ ba fɔ bo yi mbi lə ntɨŋ chi.”
19 Nchi mbiɛ lə, bənɨ bə Isla nə̀ wɔ ba jikə wɔlɔ lə? Mose nə̀ sa ba tə lə Nyɔ nə̀ tə lə,
“Njiwa mfə ɨ kɨndɔ chindi bəŋ bə
kɨtuŋ kɨ kɨlɔlɔ lə,
njiwa mfə ɨ shəŋ lɔ bəŋ bə kɨtuŋ kɨ bəŋfidi lə.”
20 Adzaya chi chanyɛ bə bɔ yu jikə lekɛhɛ, lə Nyɔ tə lə,
“Bənɨ bə nə̀ noŋkɔhɔ mɨ, na bɔ bə ŋəŋə mɨ wɨ.
Mɨ ndonchɛ gwɨ yɛŋ bə bənɨ bə nə̀ jɛkə biɛhɛ mɨ.”
21 Bəmanɨ, kɨ Bəisla lə, Nyɔ nə̀ tə lə,
“Nna nambɔ kaŋ díɔ chi lə nləkə bənɨ bə na tɛti fó,
bəmanɨ bɔ tɛti fo, bɔ gɨntɨ yibɔlə dzə́ ntɨŋ.”