Nyɔ nə̀ sa bənɨ bə Isla lə bɔ kɨ ji bənɨ buhu
9
Fiɔŋ fi nna nchanyɛ fiŋ nɨ miɨ wu Klistu na yɛyi. Nna ntɨdiɛhɛ dyɛ. Kɨn'yɨntɨ kɨ Ntsaaŋ na fɨtɨ shəŋ yɛmɨ bɨmi lə nna ntɨdiɛhɛ dyɛ. 2 Fi ji lə, nna ndzudi gwɨ kɨtso, ŋ'woko bulo bu na kaha nə mɨ shəŋ, 3 ndzɨ bəŋgwɨŋ bə kɨtuŋ kɛŋ'ə bə kə na ji ŋgwembe məmo bə bɔ. Naji ŋkɨ nse tɨmo lə lɔŋ kwe mɨ, njɛ gwɨ nə Klistu wɨ ndzɨ bɔ. 4 Bənɨ bɛŋ na bənɨ bə Isla bə Nyɔ nə̀ dzɛɛ ba fə lə bɔ kɨ ji beŋ buhu, yu donchɛ bɔ bubəŋ buhu, yu diə nchínə bə bɔ, yu nya bənchi buhu bɔ kaŋ, yu donchɛ bɔ chi naji ɨ bɔ kɨ kuntə Nyɔ, yu ka bɔ bikaŋə. 5 Bɔ na ji bənɨ bə bəchɛ bətɨɨ bəbɔlə nə̀ ji bənɨ bə Nyɔ lə bə yɛyi yɛyi. Nchitə wu Nyɔ nə̀ kaa wa nə̀ ba nɨ miɨbəwəŋ, bə́ bɛyɛ yu bənɨ bɛŋ ntɨŋ. Kɨŋkuntə kɨ ji tsá chi bə Nchitə wu na ji Nyɔ biɔŋ bichi bɨŋ. Fi kɨ ji ma.6 Fi na jimiɛhɛ lə fiɔŋ fi Nyɔ nə̀ kaa nə̀ chɛ koso kə, ndzɨ na kə bənɨ bə Isla bəchi bə na ji beŋ Bəisla bə yɛyi. 7 Naji tɨ ɨ beŋ bə fɔɔ nə Ablaham wɨ bəchi kɨ ji beŋ bə Ablaham lə bə yɛyi kə. Bəmanɨ fi ji nɨ Nyɔ nə̀ chanyɛ bə Ablaham lə,
“Na nə Adze wɨ wu wə jiwa wə bɛyɛ beŋ bə bɨmiə yɨ wɔhɔ.”
8 Kɨjilə, beŋ bə Ablaham lə bə na ji ŋgwembe muhu, bɔ bəchi na jimiɛhɛ beŋ bə Nyɔ lə. Na beŋ bə Nyɔ nə̀ kaa Ablaham bə bə́ na dze lə na beŋ bə Ablaham lə. 9 Nyɔ nə̀ kakɨ ŋka nyi, yu tɨdi lə,
“Ná kɨ ji nɨ fɛŋ kɨya kɨ na ba wɨ,
mfichə ba lɨ, ɨ Sɛla keŋkɛ wɛŋ wu nɨnsə.”
10 Na kwa fiŋ kə. Fiɔŋ diəŋ nɨ fiŋ nə̀ tɨchə tɨ bə Lɛbɛka wu chɛ beŋ buhu nə̀ ji kwa miu ɨji Adze chɛ bətaa baha. 11-12 Mɛfə bɔ nə̀ bambi kə bɛyɛ maŋ yiŋ, fə ná fɔɔ lə bɔ fə buni makə bubiə, Nyɔ nə̀ chanyɛ bə mə bɔ lə,
“Miɨntaŋ ná kɨ nɨntɨ wɛŋ wubiɨ lɨ.”
Nyɔ nə̀ chanyɛ manɨ bə ndonchɛ lə yu na sabi miɨ ɨ biəlɨ nɨ yu wu Nyɔ na se lə yu sa, ə jikə jimiɛ ndzɨ nɨŋ yidɔ yi miɨ wa sə fəə. Yu na sabi yu biəlɨ nɨ yu wu Nyɔ na se. 13 Na nɨ fi na ji bubɔndɔ lə,
“Nnə̀ nsa Jakɔ, ba nɨŋŋ Ɛsɔ.”
Nyɔ ba yu kɨ fɨtɨ ji fiɔŋ fi yu na se
14 Nɨ fi na ji manɨ, kə jiba kə tsu ba tə lə la? Kɨjilə Nyɔ na fɨtəhə fiə wu diəŋ? Na manɨ kə! 15 Nyɔ nə̀ chanyɛ bə Mose lə,
“Njiwa ŋkwese yaa bə miɨ wu nna nse,
ndə shəŋ bə miɨ wu nna nse.”
16 Bəma Nyɔ na sabiɛhɛ miɨ biəlɨ nɨ miɨbəwəŋ se makə nə nɨŋ yi miɨ nɨŋə wɨ. Yu na sabi ɨji ndzɨ yu na kwesɛ yaa bə bənɨ. 17 Fiŋfi ji tɨ nɨ bə́ nə̀ bɔndɔ Kɨŋwatɨ kɨ Nyɔ lə ntɨŋ chi Nyɔ nə̀ chanyɛ bə Fɛlɔ ŋkuŋ wu Ijip lə,
“Nnə̀ ŋga wə kɨtɨ bɨŋ nɨ ŋkuŋ lə
nná ndonchɛ buŋga bwɛŋ wə wɨ,
fə yɨ wɛŋ gəndə mbi ntɨŋ.”
18 Fiŋ na tseyɛ lə Nyɔ na kwesɛ yaa bə miɨ yɨla wu yu na se, yu nya fo wuntaŋ bə miɨ wu yu na se lə yu kɨ tɛti fo.
19 Miɨ jiwa ɨ yu tə tə bə mɨ lə, “Fɛŋ nɨ fi na ji mɛ, ɨ Nyɔ tsu kɨ kwente bənɨ ndzɨ la? Miɨ wu naji ɨ yu nɨŋŋ fiɔŋ fi Nyɔ na se lə fi kɨ ji na yəŋ?” 20 Miɨ kə̂ biɛhɛ manɨ kə. Na miɨbəwəŋ wu la wu naji ɨ yu yimbiɛ bə Nyɔ? Naji ɨ miɨ ma kɨyɨsɨ ɨ kɨyɨsɨ ka tsuba bi bə yu lə, “Wə ma mɨ mɛ ndzɨ la?” 21 Miɨ wu na ma kənsɨ na keŋkɛ buŋga bu dzenɛ ntsuntsu ya miu ba ma biɔŋ su chichi chichi, ɨ fidɔ kɨ ji fi keŋkɛ nɨŋ yibəŋ, fidɔ keŋkɛ nɨŋ yintse. 22 Na tɨ diəŋ nɨ Nyɔ fɨtɨ. Yu nə̀ se lə yu donchɛ bənɨ bulo buhu, ba fə tɨ lə bənɨ kkə buŋga buhu. Bəmanɨ yu dze tsa ba kansɨ shəŋ bə bənɨ bə yu nə̀ lo bə bɔ bə bə́ nə̀ ji lə bə́ jishi bɔ. 23 Yu nə̀ fə manɨ bə ndonchɛ bubəŋ buhu bu kɨtso lə bə bənɨ bə yu na kwesɛ yaa bə bɔ. Bənɨ bɛŋ ji bə yu nə̀ sesɛ tsakɨtɨ lə bɔ ná keŋkɛ bubəŋ buŋ. 24 Na bɨ kɨbɛɛ bənɨ ba, ə jikə jimiɛ kwa nə Bəju ntɨŋ, bənɨ bə na jimiɛhɛ Bəju na ji tɨ bɨ ntɨŋ. 25 Na fi tɨ, fi Nyɔ na chanyɛ kɨŋwatɨ kɨ miɨ wu shɔŋ wuhu Hɔsha lə ntɨŋ lə,
“Bənɨ bə nə̀ jimiɛhɛ bənɨ bɛŋŋ,
njiwa ŋkɨ bɨndɨ bɔ lə, ‘Bənɨ bɛŋŋ.’
Bə nnə̀ ŋkə nlaŋkəhə ba bɔ,
mbəndɨ bɔ lə, ‘Shəŋ yɛŋ.’”
26 “Dɨ wa wɨ wu Nyɔ nə̀ ba yu kɨ tɨdi bə bənɨ ba lə,
‘Bə na jimiɛhɛ bənɨ bɛŋŋ,’
bə́ na kɨ tsɨsə bɔ lə,
‘Beŋ bə Nyɔ wu buwəŋ'ə.’”
27 Adzaya miɨ wu shɔŋ yi Nyɔ nə̀ dɨ tsukɔ bənɨ bə Isla wɨ, yu tɨdi lə,
“Mɛfə bənɨ bə Isla na yɛnti tɨmo
nɨ mənshambu mə ŋgɔŋ məmbəŋ'ə,
na kwa tsəsɨ nə bɔ ntɨŋ bə ná keŋkɛ buwəŋ.
28 Fi ji lə Nyɔ ná kəmə bə nli ŋgə
mbi chi ntɨŋ tsa miu ba kanə fiɔŋ fichi.”
29 Yu wu Adzaya nə̀ wɔ ba tə lə,
“Tə nə̀ jikə jimiɛ lə Baba Nyɔ wu keŋkɛ buŋga buchi
nə̀ shə beŋ kɨtsɔŋ kaha ntɨŋ,
kə tə nə̀ tsu nɨ kɨtuŋ kɨ Sɔdɔm,
bə kɨ Gɔmɔla.”
Bənɨ bə Isla nə̀ nɨŋŋ dzə yi jimiɛ diəŋ yi ntɨŋ
30 Nɨ fi na ji manɨ, kə jiba ɨ kə tə lə la fɛŋ? Fi na ji lə bənɨ bə na jimiɛhɛ Bəju bə nə̀ kə diɔɔ lə bɔ jiŋ diəŋ Nyɔ nəfiə ba fɛŋ diəŋ Nyɔ nəfiə ndzɨ shəŋ yi bɔ galə yu wɨ. 31 Bəmanɨ, bənɨ bə Isla bə nə̀ diɔnɔ lə bɔ kɨ ji diəŋ Nyɔ nəfiə, bɔ biəlɨ dzə́ yi bilaŋ na tɨdi, nəjiŋ wusu, bɔ nə̀ kə jimiɛ diəŋ yu nəfiə. 32 Nə̀ ndzɨ la? Nə̀ ndzɨ bɔ nə̀ kə diɔɔ lə bɔ kɨ biəlɨ dzə yi naji lə bɔ ga ji shəŋ Nyɔ wɨ. Bɔ nə̀ gɔmbiɛ lə fiɔŋ fi na fɨtɨ miɨ ji diəŋ Nyɔ nəfiə na nɨŋ yidɔ yi miɨ wa na nɨntɨ. Bɔ fə manɨ ba tsu gwɨ ta wu bənɨ na tsukiɛ gwɨ wu wɨ. 33 Ta wuŋ ji wu fi na ji bubɔndɔ tsukɔ wu wɨ lə,
“Bə bô bə ŋəŋ, ŋgalɨ wa ta kɨtuŋ kɨ Dzayɔn ntɨŋ,
ɨji ta wu bənɨ ná kɨ tsukiɛ gwɨ́ wu wɨ,
ji biansɨ wu bənɨ ná kɨ gbɔyɛ wu bɨŋ.
Bəmanɨ, ɨ miɨ ga shəŋ yu wɨ, ɨ yu ná jikə keŋkɛ yaa.”