Njiŋ nɨ Kɨn'yɨntɨ kɨ Ntsaaŋ na se
8
Fi na ji fɛŋ lə miɨ wu na ji Jisɔs Klistu ntɨŋ naji ɨ yu be ŋgə ntɨŋ kə, 2 ndzɨ kɨlaŋ kɨ Kɨn'yɨntɨ kɨ Nyɔ lə kɨ na nya buwəŋ bə bənɨ bə na ji Jisɔs Klistu ntɨŋ' foso bɨ nə kɨlaŋ kɨ bubiə lə ntɨŋ, ba foso tɨ bɨ nə kkpə kaŋ. 3 Nyɔ fə fiɔŋ fi kɨlaŋ nə̀ kə keŋkɛ buŋga bufənə. Kɨlaŋ nə̀ kə keŋkɛ buŋga ə fɨtɨ kɨyee kɨ gwɨ yi miɨbəwəŋ'ə. Fiɔŋ fi Nyɔ fəə na lə yu nə̀ faŋ Wene, yu ba nɨ miɨbəwəŋ wu na fɨtɨ bubiə lə yu jishi bubiə. Cha chi Nyɔ nə̀ jishɛ buŋga bu bubiə lə nə miɨbəwəŋ ntɨŋ. 4 Yu nə̀ fə manɨ fə kə fəə biɔŋ bi diəŋ bichi bi kɨlaŋ na se, bɨ bə na ji nɨ Kɨn'yɨntɨ kɨ Nyɔ lə na se, jikə jimiɛ nɨ gwɨ́ yaha na se. 5 Bənɨ bə na ji bɔ biəlɨ nɨ gwɨ yi miɨ na se, bɔ ba bɔ kɨ galɨ bufɨ ji biɔŋ bi gwɨ na se wɨ, bə na ji bɔ biəlɨ nɨ Kɨn'yɨntɨ kɨ Nyɔ lə na se, ba bənɨ ba bɔ kɨ galɨ bubɔlə bufɨ ji biɔŋ bi Kɨn'yɨntɨ kɨ Nyɔ lə na se wɨ. 6 Ɨ miɨ ga bufɨ ji gwɨ wɨ, tə yu ná kkpɨ lɨ. Bəmanɨ, ɨ miɨ ga bufɨ Kɨn'yɨntɨ kɨ Nyɔ lə wɨ, tə yu ná keŋkɛ buwəŋ bə budə. 7 Nɨ fi na ji manɨ, miɨ wu na galɨ bufɨ ji biɔŋ bi gwɨ na se wɨ, yu ba yu kɨ ji miɨ wu nchɛnɛ wu Nyɔ. Wa miɨ ba yu jikə kɨ woko bə kɨlaŋ kɨ Nyɔ lə, ɨji yɛyi lə naji ɨ yu kɨ woko kə. 8 Miɨ wu na biəlɨ fiɔŋ fi gwɨ yihi na se, naji ɨ yu fə Nyɔ kɨ woko buni bə yu kə.9 Bəmanɨ, bə na jimiɛhɛ fiɛnɨ bənɨ bə na biəlɨ fiɔŋ fi gwɨ na se. Bə na biəlɨ ji nɨ Kɨn'yɨntɨ na se, jilə yɛyi Kɨn'yɨntɨ kɨ Nyɔ lə na ji bəŋ ntɨŋ. Mɛ yəŋ wu kə keŋkɛ Kɨn'yɨntɨ kɨ Klistu lə, tə yu na jimiɛhɛ miɨ wu Klistu. 10 Jilə Klistu na ji bəŋ ntɨŋ, mɛfə gwɨ́ yɛnɨ ná kkpə ndzɨ bubiə, bin'yɨntɨ biɛnɨ na ji biwəŋ ndzɨ Nyɔ fə bə kɨ ji diəŋ yu yəsɨ. 11 Jilə Kɨn'yɨntɨ kɨ yu wu nə̀ dzakɔ wa Jisɔs nə kkpə lɨ na ji bəŋ ntɨŋ, tə yu wu nə̀ dzakɔ wa Jisɔs Klistu nə kkpə lɨ jiwa ɨ yu nya tɨ buwəŋ bə gwɨ́ yɛnɨ yi ná kkpə. Yu ná nya ə ba nə Kɨn'yɨntɨ kɨhɨ kɨsu wɨ kɨ na ji bəŋ ntɨŋ.
12 Bəma bəŋgwɨŋ, kə na keŋkɛ fiɔŋ fi fənə, fiɔŋ fiŋ jikə jimiə lə kə kɨ ji kə biəlɨ nɨ gwɨ́ yaha na se. 13 Ɨ bə na biəlɨ nɨ gwɨ́ yɛnɨ na se, tə bə jiba ɨ bə kkpəyɛ. Bəmanɨ, ɨ bə ga ma lə Kɨn'yɨntɨ kɨ Ntsaaŋ fə lə bə jishi fiə wubiə wu gwɨ́ yɛnɨ na se, tə bə ná keŋkɛ lɨ buwəŋ. 14 Bənɨ bəchi bə na biəlɨ nɨ Kɨn'yɨntɨ kɨ Nyɔ lə na donchɛ na beŋ bə Nyɔ lə. 15 Nyɔ nə̀ kə nyaha ji kɨn'yɨntɨ kɨ buŋfia lə lə kɨ fə bə chi tsɔ bə nyiŋ. Yu nə̀ nya bəŋ ji Kɨn'yɨntɨ kɨ na fɨtɨ lə bə kɨ ji beŋ buhu. Kɨ fə bə kɨ tsɨsə yu lə, “Abaa,ª Taa waha.” 16 Kɨn'yɨntɨ kɨŋ kɨbɛɛ bə kɨn'yɨntɨ kaha na bɨmi lə kə na ji beŋ bə Nyɔ lə. 17 Fɛŋ jilə kə na ji beŋ bə Nyɔ lə, tə kə jiba ɨ kə diə bishəŋə, bishəŋə ji bi Nyɔ lə. Bɨ bəchi bə Klistu kə ná tɛshɛ ba diə lɨ jilə kə' wɔ ŋgə nɨ Klistu nə̀ wɔɔ cha, ɨ kə ná keŋkɛ tɨ nə bubəŋ buhu wɨ.
Bubəŋ bu ná kɨ ji
18 Nna ndze lə ŋgə wu kə na woko no fɛŋ kə kwətsə wu naji ɨ bə́ fɨkə bə bubəŋ bwaha bu kə ná keŋkɛ. 19 Biɔŋ bichi bi Nyɔ nə̀ fəə na wokɔ bə kɨshəntə tsa yi Nyɔ ná donchɛ beŋ buhu. 20 Fi na ji lə mbi wu Nyɔ nə̀ fəə nə̀ tsu wu kɨlɔlɔ. Yu nə̀ kə tsɔhɔ wu kɨlɔlɔ nə yu kaŋ. Nə̀ nɨ Nyɔ nə̀ se lə yu kɨ ji ma. Bəmanɨ kə na bobi kwa fiə kə kkɨ lə, 21 butsu budɔ bwa su bu Nyɔ ná fosɔ mbi nə buŋfia ntɨŋ bu nə̀ji lə mbi wa ná fɛɛ bu ntɨŋ. Yu ná fosɔ manɨ, ɨ mbi keŋkɛ ji bubəŋ bu beŋ bə Nyɔ lə. 22 Kə na kkɨ lə mbi chi wu Nyɔ nə̀ fəə na bɨnsɨ bə bulo nə mbɛyɛ bɨŋ ba tuŋ ndɛŋ nɨ kpansɨ wu' gbosɔ. 23 Na kwa mbi wu Nyɔ nə̀ fəə wu na ji funyi ntɨŋ kə. Bɨ bə na keŋkɛ kɨnya kɨ fiəfiə ɨji Kɨn'yɨntɨ kɨ Nyɔ lə kɨ yu nya bɨ, kə na bɨnsɨ tɨ ntɨŋntɨŋ nɨ kə na wokɔ kə shəntə lə Nyɔ fə kə kɨ ji beŋ buhu. Nyi ji ntsu yi yu ná tsuɔ gwɨ́ yaha chi nə ŋgə kaŋ. 24 Na fiɔŋ fisu fi kə na jiŋgə fiə kə kkɨ lə kə ná keŋkɛ lɨ, ɨji fi fi kə nə̀ fɔɔfo ndzɨ fi. Bəmanɨ fiɔŋ fi miɨ na jiŋgə fiə fi wɨ lə yu ná keŋkɛ lɨ, ɨji yu' ŋəŋ fi wɨ, naji ɨ fi tsu kɨ ji fiɔŋ fi yu na wokɔ fi buwokɔ kə. Na yəŋ wu naji ɨ yu kɨ chisə jiŋgə fiə fiɔŋ wɨ fi yu sə ŋəŋə? 25 Bəmanɨ, ɨ kə na jiŋgə fiə fiɔŋ wɨ, kə kkɨ lə kə ná keŋkɛ lɨ fi mɛfə kə na ŋɨntəhə fi wɨ, ɨ kə kansɨ shəŋ kɨ wokɔ.
26 Kɨn'yɨntɨ kɨ Ntsaaŋ tɨ na chitə bɨ nə kɨyee kaha wɨ, nɨ kə na kkəhə ntsɨsɨ nɨ kə naji lə kə kɨ tsɨsə. Kɨn'yɨntɨ kɨsu kɨbɛɛ na ba kɨ kɨ nende Nyɔ bɨ lɨ bə na ji bənɨ bə Nyɔ lə, kɨ dɨ bə yu dzə ntɨŋ yi naji ɨ miɨ jikə tədiə. 27 Nyɔ wu ba yu kɨ chənə shəŋ yi bənɨ lə, ba yu kɨ kkɨ kɨŋgɔmbiɛ kɨ Kɨn'yɨntɨ kɨ Ntsaaŋ'ə, ndzɨ Kɨn'yɨntɨ ba kɨ kɨ nende Nyɔ bənɨ bə Nyɔ lə lɨ dzə yi Nyɔ na se ntɨŋ.
28 Kə na kkɨ lə Nyɔ na nɨntɨ biɔŋ bichi, yu fɨtɨ bi gɨntɨ dzə yi ndzeŋe ntɨŋ bə bənɨ bə na laŋkɨ yu, bə yu bəndə ə ba nə fiɔŋ fi yu na se wɨ. 29 Bənɨ bə Nyɔ nə̀ kkɨ mbi bambi kə bɛyɛ, yu nə̀ nachɛ ba ga lə bɔ ná jiba ɨ bɔ yashənɨ kɨ ji nɨ Wene, fə wene no kɨ ji nsafiə wu bəwəmɛni bə kɨyɛŋ'ə. 30 Bənɨ bə yu nə̀ nachə ba galɨ manɨ, yu bəndɨ bɔ. Bənɨ bə yu nə̀ bəndə ba, yu nə̀ dze bɔ lə bɔ na sɨŋ bə ŋgbɔ. Bənɨ bə yu nə̀ dzɛɛ ba lə bɔ na sɨŋ bə ŋgbɔ, yu nə̀ fə bɔ be bubəŋ buhu ntɨŋ.
Miɨ wu naji ɨ yu tsu fə bɨ fiɔŋ na yəŋ?
31 Nɨ biɔŋ biŋ bichi na ji mɛ, naji ɨ kə tsu ba tə lə la? Nɨ Nyɔ na ji dia waha, miɨ wu naji ɨ yu tsu fə fiɔŋ bə bɨ na yəŋ? 32 Yu wu Nyɔ nə̀ kə yəkəhə yəsɨ bə Wene, bəmanɨ yu nya, yu kkpə bɨ lɨ bəchi, kɨjilə naji ɨ yu jikə nyaha bɨ biɔŋ bichi yinə su? 33 Na yəŋ su wu naji ɨ yu kɨ bambi yu noŋko nsa bə bənɨ bə Nyɔ sabiɛ? Na Nyɔ wu na dze bənɨ lə bɔ na sɨŋ bə ŋgbɔ. 34 Miɨ wasu wu naji ɨ yu chi galə bɨ ŋgə ntɨŋ? Jisɔs Klistu nə̀ kkpə, yu dzakɔ nə kkpə lɨ ba kɨ ji fɛŋ kɨbandə kɨ Nyɔ lə kɨ nədiɨ wɨ, yu nende Nyɔ ka waha. 35 Miɨ wu naji ɨ yu tsu ba jɛ bɨ nə kɨnse kɨ Klistu lə wɨ na yəŋ? Naji ɨ ŋgə, makə funyi, makə go yi bənɨ na sesɛ bɨ nəjiŋ, makə dzɔŋ, makə bichilə biya, makə biɔŋ bi na lesɛ, makə kkpə, jɛ bɨ nə yu wɨ? 36 Na diəŋ chi fi na ji bubɔndɔ bənɨ bədɔ tɨdi bə Nyɔ lə,
“Kə na gɨnsə kkpə díɔ chi ndzɨ wə.
Bənɨ ŋɨntɨ bɨ lə kə na ji nɨ shíŋ yi naji lə bə́ yembiɛ.”
37 Nə biɔŋ biŋ bichi ntɨŋ, kə na ji bənɨ bə na yakɨ buyaŋə buŋga bu Klistu lə ntɨŋ ndzɨ kɨnse kɨ yu nə̀ sɛ bɨ. 38 Nna ŋkkɨ lɨ buni lə kkpə makə buwəŋ, makə ŋgwe yi bənchinda bə la, makə bin'yɨntɨ bi sakɨ, makə biɔŋ bi na ji fɛŋ, makə bi ná kɨ ji, makə biɔŋ bi na keŋkɛ buŋga, 39 makə bi na ji bɔ́, makə bi na ji koso, makə fiɔŋ yɨla fi na ji mbi wu Nyɔ fəə ntɨŋ, naji ɨ fidɔ ná jɛɛ bɨ kə nə kɨnse kɨ Nyɔ lə wɨ kɨ yu na keŋkɛ bə bɨ ndzɨ Jisɔs Klistu Baba waha.