Budə bə buni bu wɔŋɔ
5
Fɛŋ nɨ Nyɔ fəə kə kɨ ji diəŋ ndzɨ shəŋ yi kə galə yu wɨ, budə bwa bɨ fəntɨŋ bə Nyɔ ndzɨ fiɔŋ fi Baba waha Jisɔs Klistu fəə. 2 Na yu wu fəə lə kə be kɨnse kɨ Nyɔ lə ntɨŋ kɨ kə na ji kɨŋ kɨ ntɨŋ fɛŋ, ndzɨ shəŋ yi kə galə yu wɨ. Kə na woko buni chi kə na jiŋgə fiə kə kkɨ lə kə jiba ɨ kə keŋkɛ bubəŋ nə Nyɔ lɨ. 3 Na kwa manɨ kə, kə na woko tɨ buni bəŋgə bə kə na ji bɔ ntɨŋ, ndzɨ kə na kkɨ lə ŋgə na nya shəŋ yi kansə, 4 shəŋ yi kansə fɨtɨ Nyɔ sɛnti miɨ lə yu' kwətsə. Ɨ Nyɔ na sɛnti miɨ lə yu kwətsə, ɨ miɨ wa kɨ jiŋgə kwa fiə fiɔŋ wɨ, yu kkɨ lə yu ná keŋkɛ lɨ fi. 5 Fiɔŋ fi kə na jiŋgə fiə fi wɨ naji ɨ fi chɛ koso kə, ndzɨ Nyɔ' yisəsɨ shəŋ yaha bə kɨnse kɨhɨ kɨ ba nə Kɨn'yɨntɨ kɨ Ntsaaŋ wɨ kɨ yu nya bɨ. 6 Tsa yi kə nə̀ bambi kə ji ŋkafu sɨŋ nchitə gwɨ́ yaha, Klistu nə̀ ba tsa yi diəŋ bɨŋ ba kkpə ndzɨ bɨ bə bəŋ bənɨ bə na kkəhə Nyɔ. 7 Fi na ji buntaŋ miɨ lɨ bə ŋkpə ka wu miɨ wudɔ wu diəŋ'ə, diŋkə naji ɨ miɨ wudɔ diɔ lə yu kkpə ndzɨ miɨ wudɔ wu ndzeŋe. 8 Bəmanɨ, Nyɔ na donchɛ kɨnse kɨhɨ bə bɨ dzə nyi ntɨŋ lə tsa yi kə nə̀ bambi bənɨ bəbiə, Klistu kkpə ndzɨ bɨ bə bəŋ. 9 Fɛŋ chi ŋgwembe muhu fəə Nyɔ dze bɨ lə kə na sɨŋ bə bubiə, yu jiwa yu gəŋ fiə ba fə fi na yakɨ fia ba tsu bɨ nə bulo bu Nyɔ lə kaŋ. 10 Fi na ji lə, tsa yi kə nə̀ bambi bənɨ bə nchɛnɛ lə bə Nyɔ, kkpə yi Wene tɛshɛ bɨ bə Nyɔ, fɛŋ nɨ kə na ji butɛshɛ Nyɔ wɨ, yɛyi lɨ kɨjilə yu jiwa ɨ yu gəŋ fiə ba fə ɨ kə fɔfo ndzɨ kɨjimiɛ kɨ wene lə. 11 Na kwa fiŋfi fi kə na woko buni ndzɨ fi kə. Kə na woko tɨ buni Nyɔ ntɨŋ ndzɨ Baba waha Jisɔs Klistu wu tɛshɛ bɨ bə Nyɔ.Fiɔŋ fi Adam nə̀ ba bə fi bə fi Klistu nə̀ ba bə fi
12 Chi bubiə nə̀ ba mbi no ntɨŋ nə miɨ miu wɨ, kkpə ba nə bubiə wɨ ba tsaŋ gəŋ miɨ chi wɨ, ndzɨ miɨ chi' fə bubiə. 13 Fə Nyɔ nə̀ nya bilaŋ, bubiə nə̀ ji lɨ su mbi ntɨŋ. Bəmanɨ ɨ bilaŋ na sɨŋ, ɨ bə́ jikə kɨ galɨ bubiə bu bənɨ lə fi. 14 Mɛfə fi nə̀ ji manɨ, dze nə tsa yi Adam bɨŋ ba fɔ yi Mose bɨŋ, kkpə nə̀ keŋkɛ buŋga bənɨ bəchi bɨŋ, ma bə nə̀ fɨtɨ bubiə, bɔ jikə kɨ fɨtɨ nɨ Adam wu nə̀ buŋɔ ji kɨlaŋ. Adam nə̀ ji dzə yidɔ ntɨŋ nɨ Klistu wu nə̀ji lə yu ba. 15 Bəmanɨ bɔ bəfɛ na jimiɛhɛ diəŋ ndzɨ shəŋ yi Nyɔ lə yi ndzeŋe yi yu na donchɛ bə bənɨ na jimiɛhɛ nɨ bubiə bu Adam nə̀ fəə. Ɨjilə bənɨ kɨyɛŋ nə̀ kkpəyɛ ndzɨ bubiə bu miɨ miu lə, kɨjilə na yɛyi lə nchitə yi Nyɔ bə kɨnya kɨ nə̀ ba nə shəŋ yi ndzeŋe yi miɨ miu lə wɨ, wu na ji Jisɔs Klistu, kɨ na ba bənɨ wɨ kɨyɛŋ ba ya lɨ. 16 Fiɔŋ fi kɨnya kɨ Nyɔ lə kɨŋ nə̀ ba bə fi na jimiɛhɛ diəŋ nɨ fiɔŋ fi bubiə bu miɨ miu wa lə nə̀ ba bə fi. Bubiə bu miɨ miu lə nə̀ ba bə nsa bənɨ bəchi wɨ ba ga bɔ ŋgə ntɨŋ. Bəmanɨ kɨnya kɨ Nyɔ lə kɨ nə̀ ba məmbiə kɨyɛŋ nəjiŋ, kɨ fə Nyɔ dze bɔ lə bɔ na sɨŋ bə bubiə. 17 Ɨjilə bubiə bu miɨ miu lə nə̀ fə kkpə kɨ keŋkɛ buŋga miɨ chi bɨŋ ndzɨ miɨ wa miu, kɨjilə bənɨ bə ləkə kɨnse kɨ Nyɔ lə kɨbəŋ kɨŋ bə kɨnya kɨ na ji ndze yi Nyɔ dzɛɛ bɔ lə bɔ na ji diəŋ, bɔ jiba bɔ keŋkɛ buwəŋ tɨmo ya lɨ ndzɨ miɨ miu wu na ji Jisɔs Klistu. 18 Bəma, nɨ bubiə bu miɨ miu lə nə̀ ba bə ŋgə bənɨ bəchi wɨ, na tɨ diəŋ nɨ fiɔŋ fi diəŋ fimo fi miɨ fəə Nyɔ dze bənɨ lə bɔ na sɨŋ bə bubiə, ɨ bɔ bəchi ná keŋkɛ buwəŋ. 19 Fi na ji lə, nɨ miɨ miu nə̀ tɛɛ fo bə Nyɔ, fiŋfi fə bənɨ kɨyɛŋ kɨ ji bənɨ bəbiə, ɨ ji tɨ diəŋ nɨ miɨ miu nə̀ wɔɔ bə Nyɔ, fi fə lə Nyɔ dze bənɨ kɨyɛŋ lə bɔ na ji diəŋ yu yəsɨ. 20 Nyɔ nə̀ nya bilaŋ bə mfə lə bubiə yɛŋ. Bəmanɨ nɨ bubiə nə̀ yɛŋɛ, nə̀ nɨ Nyɔ nə̀ donchɛ shəŋ yihi yi ndzeŋe kɨtso. 21 Fi ji manɨ bə mfə lə chi bubiə nə̀ keŋkɛ buŋga bənɨ bɨŋ bɔ kkpəyɛ, na tɨ diəŋ nɨ shəŋ yi Nyɔ lə yi ndzeŋe na keŋkɛ buŋga bənɨ bɨŋ ə ba nə ndze yi Nyɔ dzɛɛ bənɨ lə bɔ na ji diəŋ yu yəsɨ lə yu ná nya bɔ buwəŋ bu kəkaha ndzɨ Jisɔs Klistu Baba waha.