Ablaham na ŋgwe yi miɨ wu Nyɔ dzɛɛ lə yu na sɨŋ bə ŋgbɔ
4
Naji ɨ kə tə lə Ablaham chɛ ŋkɨkɨ waha nə̀ ŋəŋ lə la tsukɔ kɨdəndə kɨŋ wɨ? 2 Jilə Nyɔ nə̀ dze Ablaham lə yu na sɨŋ bə ŋgbɔ ɨji ndzɨ nɨŋ yi ndzeŋe yi yu nə̀ nɨŋə, kɨjilə naji ɨ Ablaham kuntsu gulu kɨsu. Bəmanɨ, yu jikə keŋkɛ fiɔŋ fi naji ɨ yu kuntsu gulu su Nyɔ nəfiə, 3 ndzɨ Kɨŋwatɨ kɨ Nyɔ lə na tɨdi lə,“Ablaham nə̀ ga shəŋ Nyɔ wɨ,
Nyɔ dze yu lə yu na ji miɨ wu diəŋ.”
4 Miɨ wu na nɨntɨ bə́ kwɨntɨ yu, yu nɨŋ bə́ kwəŋ yu, ɨ bə́ jikə dzɛɛ lə bikwəntsə bihi na kɨnya kɨ bə́ nya yu. Ɨ bə́ dze lə na bikwəntsə bi yu naji lə yu keŋkɛ. 5 Bəmanɨ, miɨ wu kə nɨŋkə fiɔŋ, yu galɨ ji shəŋ Nyɔ wɨ, wu dzɛɛ bənɨ bəbiə lə bɔ na sɨŋ bə ŋgbɔ yu yəsɨ, kɨjilə Nyɔ' dze miɨ wa yu yəsɨ lə yu na ji diəŋ ndzɨ shəŋ yi yu galə yu wɨ. 6 Dɛbi tɨ nə̀ chanyɛ lə kɨnlaŋ kɨbəŋ na bə bənɨ bə Nyɔ dzɛɛ lə bɔ na ji diəŋ yu yəsɨ ə jikə jimiɛ ndzɨ nɨŋ yi bɔ nɨŋə. 7 Yu nə̀ chanyɛ lə,
“Kɨnlaŋ kɨbəŋ na bə bənɨ bə Nyɔ gufiɛ chi bɔ na gboshɛ bilaŋ
ba shiŋkiɛ məmbiə məmbɔlə.
8 Kɨnlaŋ kɨbəŋ na bə miɨ wu Nyɔ na tsɔhɔ galə məmbiə muhu fi.”
9 Nɨ fi na ji manɨ, kɨjilə kɨnlaŋ kɨbəŋ kɨŋ na ji kwa bə bənɨ bə bə́ sɔmbɔ dzɔ́ yibɔlə? Maa lə kɨ na ji tɨ bə bə na bambi dzɔ́ yi ntsu lə? Kə sə tə lə shəŋ yi Ablaham nə̀ galə Nyɔ wɨ nə̀ fə Nyɔ dze yu lə yu na ji miɨ wu diəŋ. 10 Nə̀ tsa yi la yi Nyɔ nə̀ dzɛɛ Ablaham lə yu na ji miɨ wu diəŋ? Nə̀ ji bə́ sɔmbu yu dzɔ maa yu bambi dzɔ yintsu lə? Nə̀ ji yu bambi dzɔ yintsu. Bə́ nə̀ kə sɔmbɔhɔ yu dzɔ. 11 Bə́ nə̀ sɔmbu yu dzɔ nəjiŋ lə bə́ tsə yu lə yu na ji miɨ wu diəŋ, ndzɨ shəŋ yi yu nə̀ galə Nyɔ wɨ tsa yi yu nə̀ bambi dzɔ yintsu. Bəma Ablaham na ji chɛ bənɨ bəchi bə galə shəŋ Nyɔ wɨ, bə́ nsɔmbiɛ sɨŋ bɔ dzɔ́, fə Nyɔ dzɛɛ tɨ bɔ lə bɔ na ji bənɨ bə diəŋ yu yəsɨ. 12 Yu ji tɨ chɛ bənɨ bə bə́ sə sɔmbiɛ bɔ dzɔ́, ə jikə jimiɛ kwa ndzɨ bə́ sɔmbiɛ bɔ dzɔ́. Na ndzɨ bɔ' biə gbo wuhu bə shəŋ yi yu nə̀ galə Nyɔ wɨ, fə bə́ tə sɔmbu yu dzɔ.
Fiɔŋ fi nə̀ fəə lə Ablaham keŋkɛ bikaŋə nə Nyɔ lɨ
13 Ŋka yi Nyɔ nə̀ kaa ya Ablaham lə yu bə beŋ buhu na diɨ mbi nə̀ jimiɛhɛ ndzɨ Ablaham nə̀ galɨ bilaŋ, nə̀ ndzɨ shəŋ yi yu nə̀ galə Nyɔ wɨ, Nyɔ dze yu lə yu na ji diəŋ yu yəsɨ. 14 Jilə bəndiəku bə fiɔŋ fi Nyɔ nə̀ kaa lə na bənɨ bə galɨ bilaŋ, ɨ shəŋ yi bə́ na galɨ Nyɔ wɨ jikə keŋkɛ mbɨ, ɨ ŋka yi Nyɔ kaa ya kɨ ji tɨ kɨlɔlɔ. 15 Fiɔŋ fi na ji na lə bilaŋ ba bi kɨ fɨtɨ kwa shəŋ lo Nyɔ. Ndzɨ kɨlaŋ kə jimiɛ, ɨ fiɔŋ fidɔ jikə kɨ ji lə miɨ' buŋ kɨlaŋ. 16 Fi kɨ ji lə ŋka ya na biəlɨ ji shəŋ yi miɨ galə Nyɔ wɨ fə kɨ ji kɨnse kɨ Nyɔ donchɛ yu, fiɔŋ fi Nyɔ kaa fia na ji ŋkɨkɨ chi wu Ablaham lɨ, na kə kwa bə bənɨ bə ji bilaŋ nəkoso. Na tɨ bə bənɨ bə galə shəŋ Nyɔ wɨ diəŋ nɨ Ablaham nə̀ galə, ndzɨ Ablaham na taa waha bɨ bəchi bə na ji bənɨ bə Nyɔ lə. 17 Fiŋfi na ji nɨ bə́ nə̀ bɔndɔ Nyɔ tɨdi bə Ablaham lə,
“Mɨ mfə lə wə kɨ ji chɛ bituŋ kɨyɛŋ.”
Nyɔ nəfiə, Ablaham na ji taa waha. Na Nyɔ wu Ablaham nə̀ galə shəŋ yu wɨ, ə ji yu Nyɔ wu na fɨtɨ bənɨ bəŋkkpə tsu bəwəŋ. Na yu tɨ wu fɨtɨ lə biɔŋ bi nə̀ jikə jimiɛ kɨ ji. 18 Ablaham nə̀ jiŋgə kwa fiə yu kkɨ lə yu ná keŋkɛ lɨ bikaŋə bi Nyɔ nə̀ kaa yu lɨ, mɛfə yu nə̀ ji tɨmo yu njiŋgə sɨŋ fiə fiɔŋ wɨ. Bəmanɨ yu ga kwa shəŋ Nyɔ wɨ, nəjiŋ wusu yu kɨ ji, “Chɛ bituŋ kɨyɛŋ,” diəŋ nɨ Nyɔ nə̀ kaa yu lə,
“Beŋ bɔhɔ na kɨ yɛnti kɨtso.”
19 Ablaham nə̀ ji chi biya gbɨ, bəmanɨ yu jikə fosɔ shəŋ yi yu nə̀ galə Nyɔ wɨ. Mɛfə yu nə̀ ŋəŋə gwɨ yihi lə yu nə̀ ji nɨ miɨ wu ŋkkpə, yu ŋɨntɨ tɨ lə kpansɨ Sɛla nə̀ ji gbɔmbu, 20 yu nə̀ kə sa masə lɨ fə ná fɔɔ lə yu keŋkɛ shəŋ fiɛ tsukɔ bikaŋə bi Nyɔ nə̀ kaa yu. Shəŋ yi yu nə̀ galə Nyɔ wɨ nə̀ tɛ ba gəŋ fiə, yu kɨ nya Nyɔ bubəŋ. 21 Yu nə̀ bɨŋ bə shəŋ yihi chi lə Nyɔ na keŋkɛ buŋga bu fənə fiɔŋ fi yu nə̀ kaa. 22 Fiŋ nə̀ fiɔŋ fi nə̀ fəə Nyɔ dze lə yu na ji miɨ wu diəŋ yu yəsɨ. 23 Bəmanɨ, nchanyɛ nyi lə, “Nyɔ dze yu lə yu na ji miɨ wu diəŋ yu yəsɨ,” bə́ kə bɔndɔhɔ yi Ablaham lɨ kwa kə. 24 Yi na ji tɨ bɨ lɨ. Nyɔ wu kə galə shəŋ yu wɨ jiwa ɨ yu dze bɨ tɨ manɨ. Na yu wu nə̀ dzakɔ Baba waha Jisɔs nə kpə lɨ. 25 Jisɔs na wu bə́ nə̀ nya wa yu, yu kpə ndzɨ məmbiə maha. Nyɔ dzakɔ yu nə kpə lɨ, fə yu fəə bɨ diəŋ Nyɔ nəfiə.