Nyɔ ba yu kɨ lɨmi kwa ji kɨyɛyi bɨŋ
3
Nɨ fi na ji manɨ, mbɨ wu Bəju na keŋkɛ ba ya bənɨ bədɔ na la? Mbɨ wa su wu naji lə bə́ kɨ sɔmbiɛ dzɔ́ yi bənɨ lə? 2 Ɨŋŋ, Bəju na yakɨ bənɨ bədɔ dzə́ ntɨŋ kɨyɛŋ. Fiɔŋ fibəŋ na ji lə Nyɔ nə̀ nya diɛ yihi ji bɔ kaŋ. 3 Naji ɨ bə́ tə lə la, nɨ bənɨ bədɔ nə bɔ ntɨŋ nə̀ kə ləmiə diɛ ya bɨŋ, kɨjilə fia fiɔŋ naji fi fə ɨ Nyɔ jikə tsɔhɔ ləmiə diɛ yihi bɨŋ? 4 Naji ɨ fi tɨchə manɨ kə! Mɛfə bənɨ bəchi na ji bə dyɛ lə, Nyɔ ba yu kɨ lɨmi kɨyɛyi bɨŋ, nɨ fi na ji bubɔndɔ lə,“Nyɔ, wə ba wə dze nchanyɛ, nchanyɛ yɔhɔ kɨ ji yi diəŋ,
wə ba wə diə nsa yɔhɔ.”
5 Bəmanɨ ɨ fiə waha wu na jimiɛhɛ diəŋ na fɨtɨ lə fiə wu Nyɔ lə wu diəŋ kɨ yinshi buni, ɨ kə tə lə la? Naji ɨ kə tə lə Nyɔ na fɨtəhə diəŋ chi yu na liyi ŋgə bɨ bɨŋ? Nna mbi mɛ ɨji nɨ miɨbəwəŋ ba kɨ bi. 6 Naji ɨ fi kɨ ji manɨ kə! Jilə fi na ji manɨ, ɨ Nyɔ tə fə nəŋ ba tə sa mbi? 7 Bəmanɨ jilə nna n'yalə lɨ, fi fɨtɨ kɨyɛyi kɨ Nyɔ lə yinshi kɨ gɨntɨ fiə fiə, kɨ ba bə bubəŋ yɨ wuhu wɨ, bə́ tə kɨ sakɨ mɨ lə nna nji miɨ wubiə ndzɨ la? 8 Jilə fi na ji manɨ ɨ kə jikə tədiə lə, “Fi na ndzeŋe lə kə kɨ fɨtɨ bubiə fə biɔŋ bi ndzeŋe kɨ ba?” Nchanyɛ nyi na yi bənɨ na bɨsə yɨ waha su, bɔ tɨdi lə na bɨ bə na tɨdi. Ba bənɨ ná keŋkɛ lɨ ŋgə wu bɔ naji lə bɔ keŋkɛ.
Miɨ wu diəŋ su na sɨŋ
9 Naji ɨ kə tə lə la fɛŋ? Bɨ Bəju, kə na yakɨ bənɨ bədɔ? Yɛɛ! Kə' ŋəŋ lə Bəju bə bənɨ bə na jimiɛhɛ Bəju na ji bubiə kaŋ. 10 Fiŋfi na nɨ fi na ji bubɔndɔ lə,
“Miɨ wu diəŋ su na sɨŋ, ma tɨ miu.
11 Miɨ wu fɨ na sɨŋ su,
miɨ na sɨŋ su wu na noŋko Nyɔ.
12 Bənɨ bəchi' fichə yasɨ Nyɔ wɨ.
Bɔ bəchi tsu fiɔŋ fi kɨlɔlɔ lə.
Miɨ na sɨŋ su wu na fɨtɨ fiɔŋ fi diəŋ, ma tɨ miu.
13 Bɔ' gu bigbɨlə bibɔlə ba ga nɨ dzə́ŋ yiya.
Bɔ ji bənɨ bə dyɛ lə.
Nchanyɛ yi na foto nə bɔ dze naji ɨ yi kkpɨsɨ miɨ nɨ gəsɨ yi ye lə.
14 Lɔŋ bə díɛ yi lo' yi bɔ dze.
15 Bɔ ba bɔ kɨ ji fɔfɔ bə ŋkkpɨsɨ yi miɨ.
16 Bɔ ba bɔ kɨ bɨshɛ biɔŋ,
bɔ ba bə bəŋgə bidɨ bichi bi bɔ na gɨntɨ.
17 Bɔ na kkəhə fiɔŋ tsukɔ kɨjimiɛ kɨ budə lə wɨ,
18 bɔ jikə lekɛhɛ Nyɔ.”
19 Kə kkə fɛŋ lə fiɔŋ fi bilaŋ na chanyɛ, bi na chanyɛ bə bənɨ bə na ji bi nəkoso, fə miɨ chi fiəŋkə fiɔŋ fi chanyɛ, nɨ mbi chi ná ləmiə nsa Nyɔ nəfiə. 20 Bə kkə̂ lə miɨbəwəŋ wudɔ na sɨŋ su wu Nyɔ ná dzɛɛ lə yu na ji diəŋ yu yəsɨ ndzɨ miɨ wa na fɨtɨ fiɔŋ fi bilaŋ na tɨdi. Bilaŋ na fɨtɨ ji lə miɨ kkə lə yu' gbɔ.
Dzə yi Nyɔ na dze lə miɨ na ji diəŋ yi ntɨŋ
21 Bəmanɨ, fɛŋ Nyɔ' donchɛ dzə yi yu na dze miɨ lə miɨ wa na ji diəŋ yu yəsɨ, dzə ya ŋkeŋkɛ sɨŋ fiɔŋ fi fənə bə bilaŋ, biŋwatɨ bi Mose lə bə bi bənɨ bə shɔŋ yi Nyɔ lə na tambi lɨ tɨ. 22 Dzə yi Nyɔ na dze lə miɨ na ji diəŋ na ba nə shəŋ yi miɨ wa sə galə Jisɔs Klistu wɨ. Nyɔ na fɨtɨ fiŋ bə miɨ chi wu galə shəŋ Klistu wɨ, ndzɨ nə Nyɔ lɨ miɨ wudɔ na jimiɛhɛ chichi, 23 nɨ miɨ chi fəə bubiə ba tə kɨ ji dzəbudə nə bubəŋ bu Nyɔ lə wɨ. 24 Bəmanɨ, Nyɔ dze bənɨ lə bɔ na sɨŋ bə ŋgbɔ ɨji ndzɨ shəŋ yihi yi ndzeŋe yi yu nə̀ donchə bə bənɨ nɨ kɨnya, ə ba nə Jisɔs Klistu wɨ biəlɨ chi yu nə̀ tsuɔ bənɨ nə ŋgə ntɨŋ. 25 Nyɔ nə̀ nya yu nɨ bintɔfiɛ lə yu gweŋ gbeme bə ŋgwembe muhu. Gbeme wuŋ ji bənɨ bəchi bɨŋ bə galə shəŋ yu wɨ. Yu nə̀ gweŋ gbeme wuŋ bə ndonchɛ lə yu wu Nyɔ na ji miɨ wu diəŋ, ndzɨ yu wu Nyɔ nə̀ kansɨ shəŋ bə bubiə bubɔlə bu bɔ nə̀ shɨ bɔ fɨtɨ fiəfiə. 26 Fiŋ nə̀ ji bə ndonchɛ tsa yi fɛŋ nyi ntɨŋ lə yu wu Nyɔ kɨbɛɛ, yu na ji Nyɔ wu na fɨtɨ biɔŋ diəŋ, ɨji tɨ yu wu na dze miɨ wu' galə shəŋ Jisɔs wɨ lə miɨ wa na ji diəŋ. 27 Nɨ fi na ji manɨ, fiɔŋ bambi fia su fi naji ɨ kə kɨ dze gwɨ ndzɨ fi? Fiɔŋ na sɨŋ su! Fi na sɨŋ ndzɨ la? Naji ɨ fi kɨ ji ndzɨ nɨŋ yidɔ yi kə na nɨntɨ? Na ma kə! Fi na ji ma ɨji ndzɨ shəŋ yi kə galə Jisɔs wɨ. 28 Kə na lɨmi fiŋ wɨ lə Nyɔ na dze miɨ lə miɨ wa na sɨŋ bə ŋgbɔ, ɨji ndzɨ shəŋ yi miɨ wa sə galə Jisɔs wɨ, ɨjikə jimiɛ ndzɨ yu na fɨtɨ fiɔŋ fi bilaŋ na tɨdi. 29 Maa lə Nyɔ na ji kwa Nyɔ wu Bəju lə? Yu na jimiɛhɛ tɨ Nyɔ wu bənɨ bə na jimiɛhɛ Bəju? Yɛɛ, yu na ji tɨ Nyɔ wu bənɨ bə na jimiɛhɛ Bəju, 30 nɨ Nyɔ na ji kwa miu, ɨji yu wu ná dzɛɛ bənɨ bə bə́' sɔmbiɛ dzɔ́ yibɔlə lə bɔ na sɨŋ bə ŋgbɔ, ə ji kwa ndzɨ shəŋ yi bɔ' galə Klistu wɨ, diəŋ nɨ yu ná dzɛɛ bənɨ bə na ji dzɔ́ yi ntsu lə bɔ na sɨŋ bə ŋgbɔ, ɨji tɨ ndzɨ shəŋ yi bɔ' galə Klistu wɨ. 31 Fɛŋ na ji lə kə tɔ̂fu bilaŋ ndzɨ shəŋ yi kə galə Klistu wɨ? Dzə na sɨŋ, naji ɨ fi kɨ ji manɨ kə! Fi na ji lə kə kɨ chiŋfi bilaŋ wɨ.