Nyɔ ná kɨ sakɨ miɨ yu biəlɨ fiə wu miɨ wa lə
2
Bəma wə wu na sakɨ fiə wu miɨ wudɔ lə, mɛ ɨji wə yəŋ, kɨ kkɨ lə wə na keŋkɛ tɨ ŋgbɔ. Kɨ kkɨ lə nɨ wə na sakɨ fiə wuhu, wə na galɨ ji gwɨ yɔhɔ ŋgə ntɨŋ, ndzɨ wə wu na sakɨ fiə wu miɨ wudɔ lə, wə na fɨtɨ tɨ fiɔŋ fi yu na fɨtɨ. 2 Kə na kkɨ lə, ɨ Nyɔ li ŋgə bənɨ bə na fɨtɨ biŋ biɔŋ wɨ, tə yu na liyi dzə yi kɨyɛyi ntɨŋ. 3 Bəma wə wu na sakɨ wa fiə wu bənɨ bə na fɨtɨ ŋgwe yi bia biɔŋ'ə, wə tsu wə fɨtɨ tɨ bi, wə na gɔmbiɛ lə wə jiwa ɨ wə ná fɔɔfo nə nsa yi Nyɔ kaŋ? 4 Maa lə wə na ŋɨntəhə lə Nyɔ na keŋkɛ shəŋ yi ndzeŋe bə bənɨ kɨtso, yu kansɨ shəŋ kɨtso, yu ji tɨ nshiiŋ lə? Wə na ŋɨntɨ manɨ wə dze lə na fiɔŋ fi kɨlɔlɔ lə? Kɨ kkɨ lə shəŋ yi Nyɔ lə yi ndzeŋe bə wə na donchɛ lə wə fîchə shəŋ yɔhɔ.5 Bəmanɨ nɨ wə nɨŋŋə lə naji ɨ wə fichə shəŋ yɔhɔ kə, wə fɨtɨ fi ko fi gɨntɨ ji fiə, wə na yinə ji ŋgə wə fi, wu ná kɨ ji butsu bu Nyɔ ná kɨ fu bə bulo buhu tsa yi yu ná kɨ sakɨ bənɨ bəchi nə dzə yi diəŋ ntɨŋ. 6 Nyɔ jiwa yu sɔmbu miɨ chi, chi miɨ wa nə̀ nɨntɨ. 7 Bənɨ bə na kansɨ shəŋ nɨŋ yi ndzeŋe ntɨŋ fə bɔ keŋkɛ bubəŋ bə kɨŋkuntə ma buwəŋ bu tsɨ butsənə, Nyɔ jiwa ɨ yu nya bɔ buwəŋ bu kəkaha. 8 Bəmanɨ bənɨ bə na jiŋgə kwa ji gwɨ́ yibɔlə, bɔ nɨnntɨ ŋ'wɔ kɨyɛyi, bɔ fɨtɨ ji biɔŋ bibiə, Nyɔ jiwa yu donchɛ bɔ shəŋ yi funɔ, bə ŋgə. 9 Funyi bə bulo bu kɨtso lə ná kɨ ji bə miɨ chi wu na fɨtɨ bubiə, dze nə Bəju wɨ, gəŋ fɔ bənɨ bə na jimiɛhɛ Bəju wɨ. 10 Bəmanɨ, bubəŋ bə kɨŋkuntə bə budə ná kɨ ji bə bənɨ bə na ji bə fiə wu ndzeŋe dze nə Bəju wɨ, gəŋ fɔ bə bənɨ bə na jimiɛhɛ Bəju. 11 Fi na ji manɨ ndzɨ Nyɔ letɛhɛ yəsɨ.
12 Bənɨ bəchi bə na fɨtɨ bubiə bɔ ŋkeŋkɛ sɨŋ tɨmo bilaŋ bi Mose lə, bɔ ná beke ŋgə ntɨŋ mɛfə bɔ na keŋkɛhɛ tɨmo bilaŋ. Bənɨ bəchi bə na fɨtɨ bubiə bɔ ji bilaŋ nəkoso, bə́ ná kɨ sakɨ bɔ bə́ biəlɨ bilaŋ bia. 13 Fi ji manɨ ndzɨ Nyɔ ná dzɛhɛ miɨ wudɔ lə yu na ji diəŋ yu yəsɨ ndzɨ miɨ wa na woko fiɔŋ fi bilaŋ na tɨdi. Yu ná dze miɨ lə yu na ji diəŋ ndzɨ miɨ wa na fɨtɨ fiɔŋ fi bilaŋ na tɨdi. 14 Jilə bənɨ bə na jimiɛhɛ Bəju, bɔ sɨŋ bə bilaŋ nə̀ fɔ kɨ fɨtɨ biɔŋ bi bilaŋ na tɨdi, tə bɔ bəbɔlə nə̀ ji tɨ bilaŋ nə bɔ kaŋ, mɛfə bɔ nə̀ kə keŋkɛ tɨmo bilaŋ bi Nyɔ nə̀ nya bə Bəju. 15 Fia na donchɛ lə fiɔŋ fi bilaŋ na tɨdi, Nyɔ' bɔndu fi shəŋ yibɔlə ntɨŋ lə yi kɨ sakɨ bɔ. Tsa yi bɔ fəə fiɔŋ fibiə, njɔ kwe bɔ. Bɔ fə fiɔŋ fi ndzeŋe, shəŋ yibɔlə tambi bɔ. 16 Biɔŋ biŋ ná tɨchə butsu bu Nyɔ ná kɨ sakɨ biɔŋ bi bənɨ lə bichi bi bɔ na fɨtɨ bunyələ. Yu ná kɨ sakɨ ɨji yu' chɛ Jisɔs Klistu ntɨŋ, nɨ shɔŋ yi ndzeŋe yi nna ntɨdi na donchɛ.
Bəju na dze gwɨ bə bilaŋ
17 Wə wu na tsɨsə gwɨ yɔhɔ lə Miɨbəju, wə nɨkɨ bilaŋ bi Mose lə wɨ, wə dze gwɨ lə wə na ji miɨ wu Nyɔ, 18 ɨji bə́' tɨfiə wə bilaŋ biŋ, wə kkə fiɔŋ fi Nyɔ na se ba kkə tɨ fiɔŋ fi na ndzeŋe kɨtso, 19 jilə wə na kkɨ yɛyi yɛyi lə wə na ji miɨ wu na donchɛ bənyimə dzə, wə ji kɨbɨlə bənɨ lɨ bə na ji kɨjuwɔ ntɨŋ, 20 wə kkɨ tɨ lə wə na ji miɨ wu na nya bitɨfiə bə bəŋfidi, wə tɨfiə tɨ bənɨ bə na ji nɨ beŋ, bɔ ŋkkə sɨŋ biɔŋ buni. Wə na fɨtɨ ma ndzɨ bilaŋ' nya wə bufɨ buchi bə kɨyɛyi. 21 Wə wu na tɨfiə wa bənɨ manɨ, wə na tɨfiə tɨ gwɨ yɔhɔ? Wə wu na tɨdi lə miɨ kə̂ yəhə, wəwuwə na yəhə tɨ? 22 Wə wu na chɛnti lə nomə miɨ makə kpansɨ miɨ kə kɨ dzenɛ binchi, wə na chɛnti tɨ ma bə gwɨ yɔhɔ? Wə wu na sɛhɛ fiɔŋ fi na tsukɔ munyɔ wɨ, wə na yəhə biɔŋ tsɔ́ŋ yi bintɔfiɛ yi munyɔ lə ntɨŋ? 23 Wə wu na sɛnti gwɨ bə bilaŋ bi Nyɔ lə, wə na ba wə jikə shisəsɨ kɨŋkuntə kɨ Nyɔ lə tsa yi wə na ba wə buŋ bilaŋ bia? 24 Na fiɔŋ fi na ji bubɔndɔ lə, “Bənɨ bə na jimiɛhɛ Bəju na ba bɔ kɨ bɨsə yɨ wu Nyɔ lə, ə ji bəŋ Bəju bə na fɨtɨ.”
25 Nsɔmbu yi dzɔª yi miɨ na ji bə mbɨ jilə miɨ wa na fɨtɨ fiɔŋ fi bilaŋ na tɨdi. Bəmanɨ, jilə wə na bunchi bilaŋ, tə nsɔmbu yi bə́ sɔmbɔ ya wə dzɔ na ji wələ wə bambi wa dzɔ yi ntsu. 26 Ɨ miɨ na bambi dzɔ yi ntsu, dubəma yu fɨtɨ fiɔŋ fi diəŋ fi bilaŋ na tɨdi, mɛfə yu na bambi manɨ, ɨ bə́ jikə dzɛɛ lə bə́' sɔmbu yu dzɔ? 27 Bəma, bənɨ bə na bambi dzɔ́ yi ntsu ɨji bɔ galɨ bilaŋ, bɔ ná fɨtɨ ɨ bə́ ga bəŋ Bəju ŋgə ntɨŋ, bəŋ bə na ji bə bilaŋ bi bə́ nə̀ bɔndɔ, ɨji tɨ bə́ nə̀ sɔmbiɛ dzɔ́ yɛnɨ, bəmanɨ bə tsu bə gbosɔ bi. 28 Bə kɨ kkɨ lə Miɨbəju wu diəŋ na jimiɛhɛ wu na yinshi wa nə gwɨ kwa. Fiɔŋ fi diəŋ tsukɔ nsɔmbu yi dzɔ wɨ na jimiɛhɛ fiɔŋ fi bə́ na ŋɨntɨ nə gwɨ. 29 Miɨ Bəju wu diəŋ na wu na tsalə nəshəŋ. Nsɔmbu yi dzɔ yi yɛyi ji fiɔŋ fi nəshəŋ, fi na ji mfə yi Kɨn'yɨntɨ kɨ Nyɔ lə, ɨjikə jimiə fiɔŋ fi na biəlɨ ji bilaŋ bi bə́ nə̀ bɔndɔ bubɔndɔ. Wa miɨ na Nyɔ wu ba kɨ sɛnti yu. Na bənɨ bə na ba bɔ kɨ sɛnti yu kə.