Kɨŋwatɨ kɨ Pɔl nə̀ bɔndɔ bə ntɛshɛ yi
Lom
1
Na mɨ Pɔl, wɛŋ wu nɨŋ wu Jisɔs Klistu. Yu ga lə ŋkɨ ntɨdi shɔŋ yi Nyɔ yi ndzeŋe. 2 Shɔŋ yi ndzeŋe nyi na yi Nyɔ nə̀ kaa bənɨ nə ndɛŋkəlɨ, yu chanyɛ ə chɛti bənɨ buhu bə shɔŋ'ə wɨ chi fi na ji bubɔndɔ kɨŋwatɨ kɨhɨ kɨ ntsaaŋ ntɨŋ. 3 Shɔŋ ya na ji tsukɔ Wene wɨ wu bə́ nə̀ bɛyɛ nɨ miɨbəwəŋ, kɨtsɔŋ kɨ Ŋkuŋ Dɛbi lə ntɨŋ. 4 Nyɔ nə̀ donchɛ Baba waha Jisɔs Klistu Kɨn'yɨntɨ kɨ Ntsaaŋ ntɨŋ lə yu na ji Wene wu na ji bə buŋga tsa yi yu nə̀ dzakɔ yu nə kkpə lɨ.ª 5 Na Jisɔs Klistu wu fəə lə Nyɔ chiŋ mɨ ba fə lə ŋkɨ nji wene wu faŋə fə mfəə lə bənɨ bə bituŋ bichi lə bə na jikə jimiɛ Bəju kɨ galɨ shəŋ yu wɨ, bɔ woko bə yu, bɔ kuntəə yɨ wuhu. 6 Bə na ji tɨ bənɨ bə bə́ nə̀ bəndə lə bə kɨ ji bənɨ bə Jisɔs klistu lə.7 Mɨ mbɔndu kɨŋwatɨ kɨŋ bə bəŋ bəchi bə Nyɔ na laŋkɨ bə na ji kɨtuŋ kɨ Lom ntɨŋ, bə yu bəndə lə bə kɨ ji buhu.
Taa waha Nyɔ bə Baba Jisɔs Klistu dônchə bəŋ shəŋ yi ndzeŋe ba nya bəŋ budə.
Pɔl kɨ se lə yu lɛ jii Lom
8 Nna nse lə nsa nnya kɨmbafə bə Nyɔ wɛŋŋ bəŋ'ɨ bəchi, yɨ wu Jisɔs Klistu lə lɨ, ndzɨ mbi chi na chanyɛ tsukɔ shəŋ yi bə galə yu wɨ. 9 Nyɔ wu nna nnɨntɨ yu lɨ bə shəŋ yɛŋ chi, ntɨdi shɔŋ yi ndzeŋe kɨ wene lə, na bɨmi yɛyi yɛyi lə nna mba ŋkɨ ŋgɔmbiɛ bəŋ tsá chi kɨntsɨsɨ kɛŋ ntɨŋ. 10 Nna mba ŋkɨ ntsɨsə nnende lə, ɨ dzə na ji lɨ, mba fə bəŋ ku fɛŋ jilə Nyɔ sə bɨŋ, 11 ndzɨ nna nlaŋkɨ kɨtso lə ŋŋəŋ bəŋ fə nnya bəŋ kɨnya kɨ Kɨn'yɨntɨ lə, kɨ fə, ɨ bə kɨ tɛti gwɨ. 12 Fi ji lə, ɨ kə koso shəŋ yaha, ɨ shəŋ yi bə galə Nyɔ wɨ koso yɛmɨ, ɨ yɛmɨ koso yɛnɨ. 13 Bəŋgwɨŋ, nna nse lə bə kkə̂ lə, nna mba ŋgəŋ ŋka tsá chi lə njiwa mba ŋəŋ bəŋ, fiɔŋ fidɔ bɨsɨ, dubəma nse lə mba fə ŋkeŋkɛ fiɔŋ nə bəŋ'ɨ nɨ nnə̀ ŋkeŋkɛ bəbanə ntɨŋ. 14 Nɨŋ yi bənɨ bɛŋ bəchi na ji mɨ fi, bənɨ bə mbi wu ŋgulɔ ntɨŋ, makə bə na ji bijili ntɨŋ, bənɨ bə bufɨ lə, makə bə buŋfidi lə. 15 Fia na fiɔŋ fi nna nse kɨtso lə ntɨfiə shɔŋ yi ndzeŋe bə bəŋ tɨ bə na ji Lom.
Buŋga bu shɔŋ yi ndzeŋe lə
16 Bə kkə̂ lə yaa mɨ na kwetɛhɛ bə fiɔŋ fi na tsukɔ shɔŋ yi ndzeŋe yi Nyɔ wɨ, ndzɨ yi na ji buŋga bu Nyɔ lə bu fənə lə miɨ chi wu galə shəŋ yu wɨ fɔfo. Shɔŋ nyi na gɨntɨ fiəfiə bə Bəju fə yi tə gəŋə tɨ bə bənɨ bə na jimiɛhɛ Bəju. 17 Fi na ji lə shɔŋ yi ndzeŋe nyi na tseyɛ dzə yi Nyɔ na ŋɨntɨ lə miɨ na ji diəŋ yu nəfiə, ə bɛyɛ bə shəŋ yi miɨ' galə yu wɨ ba kpɨyi bə shəŋ yi miɨ' galə yu wɨ. Na fiɔŋ fi bə́ nə̀ bɔndɔ lə, “Miɨ wu na ji diəŋ ná kɨ ji su ndzɨ shəŋ yi yu' galə Nyɔ wɨ kwa.”
Shəŋ na lo Nyɔ ndzɨ məmbiə mə bənɨ lə
18 Nna nchanyɛ mɛ ntɨdi lə Nyɔ na fu bə bulo nə bɔ́ bə bənɨ bə na kkəhə yu, bə bə na ji bə kɨbiə, fiə wubɔlə wubiə kusə kɨyɛyi kɨ na tsukɔ Nyɔ wɨ. 19 Fi ji mɛni ndzɨ fiɔŋ fi naji ɨ bənɨ kkə kɨ Nyɔ lə na ji ŋgbooŋ ndzɨ yu donchɛ fi bə bɔ. 20 Tsakɨtɨ, nɨ Nyɔ nə̀ fəə mbi, bənɨ ba bə ŋɨntɨ buŋga buhu bu na ji tsá chi, bə chi yu wu Nyɔ ji. Bɔ ŋəŋ nə biɔŋ bi yu fəə wɨ, mɛfə bənɨ na ŋɨntəhə yu wɨ. Bəma dzə na sɨŋ su yi naji ɨ bɔ yalə lə bɔ na kkəhə Nyɔ.
21 Mɛfə bɔ nə̀ kkɨ Nyɔ manɨ, bɔ nə̀ kə kuntə yu chi Nyɔ, makə lə bɔ nya yu kɨmbafə. Biŋgɔmbiɛ bibɔlə tsu bi kɨlɔlɔ lə. Biŋgɔmbiɛ bibɔlə biya yi təəə bə kɨjuwɔ. 22 Bɔ nə̀ tɨdi lə bɔ nə̀ ji bəfɨ, bɔ tsu ba kɨ ji ji bəŋfidi. 23 Bɔ shə ntsɨsɨ bə Nyɔ wu na keŋkɛ bubəŋ wu na kkpəhə ba kɨ tsɨsə ji bə bənyɔ bə bə́' fəə bə kaŋ bə na boto bənɨ bə na ba bɔ kkpə, bə munyinyi ma nyɛ́ŋ yi na gəndə bə go bə yi na kpa tɔ.
24 Bə fimanɨ lə, Nyɔ tɔkaŋ nə bɔ wɨ lə bɔ kɨ fɨtɨ biɔŋ bi shəŋ yibɔlə na se, ɨji biɔŋ bi yaa lə, bɔ fɨtɨ manɨ bə gwɨ́ yibɔlə, bɔ nyaa gwɨ́ yibɔlə yaa. 25 Bɔ yashənɨ kɨyɛyi kɨ Nyɔ lə kɨ tsu ji dyɛ ba kɨ kuntə bɔ nɨntɨ ji biɔŋ'ɨ, bi bə́ nə̀ fəə ya Nyɔ wu nə̀ fəə wa bi, ɨji yu wu naji lə bə́ kɨ kuntə tsá chi. Fi kɨ ji ma. 26 Nɨ bɔ nə̀ fɨtɨ manɨ, Nyɔ shə bɔ lə gwɨ́ yibɔlə kɨ shi bə mfə yi biɔŋ bi yaa lə. Bəkansɨ me bə bəkansɨ, Nyɔ nə̀ kə maa bəkansɨ lə bɔ kɨ fɨtɨ manɨ. 27 Na tɨ diəŋ nɨ bənɨnsə nə̀ shɨkɨ ndze yi bəkansɨ, bɔ shi tsoo, bɔ dzenɛ ji bə gwɨ́ yibɔlə, bənɨnsə fɨtɨ fiɔŋ fi nə̀ ba bɔ bə yaa. Bɔ nə̀ fɨtɨ ma bɔ galɨ ŋgə bɔ fi, ɨji bikwəntsə bi bubiə bubɔlə.
28 Nɨ bənɨ ba nə̀ kə ŋəŋkəhə lə fi na ji diəŋ lə bɔ kkə Nyɔ, Nyɔ tɔkaŋ lə bɔ keŋkɛ ji buŋfidi fə bɔ kɨ fɨtɨ fiə yi fətsutsu. 29 Shəŋ yibɔlə bu yi bə biɔŋ bibiə chichi chichi. Bɔ ji bə kɨbiə, bɔ yɨtɨ yəsɨ, bɔ keŋkɛ shəŋ yi yii, bɔ chindəsɨ bindɔ bə bənɨ, bɔ kkpɨshə bənɨ, bɔ dio məndiɔ, bɔ fukiɛ bənɨ, bɔ jiŋgə bənɨ bə yəsɨ yibiə, bɔ ji bə ntsúŋ, 30 bɔ bɨshə yɨ yi bənɨ lə, bɔ lo bə Nyɔ, bɔ ji bə tsasɨ, bɔ tɛti fo, bɔ dzee gwɨ bɔ́, bɔ bunsɔ məmbiə, bɔ tɛti fo bə bətɨɨ bəbɔlə ma bə bəmɛni bəbɔlə. 31 Bɔ ji bə buŋfidi, bɔ jikə ləmiə diɛ yibɔ bɨŋ, bɔ jikə keŋkɛ tsa yi bənɨ, bɔ jikə kwesɛ yaa bə bənɨ. 32 Bɔ fɨtɨ manɨ bɔ kkɨ ŋgbooŋ lə Nyɔ nə̀ ga lə miɨ wu na fɨtɨ jimə biŋ biɔŋ naji lə yu kkpə. Bəmanɨ, bɔ bu fəə kwa bɔ gɨntɨ fiə, bɔ tambi tɨ bənɨ bə na fɨtɨ ŋgwe yi bia biɔŋ.