Miɨ wu na ji Klistu ntɨŋ, yu' kkpə ba jɛ gwɨ nə bubiə wɨ
6
Kə jiba ɨ kə tə lə la? Fi fɛŋ na ji lə kə kə̂tə kɨ bu fəə bubiə kə gɨntɨ fiə fə Nyɔ kɨ bu donchə bɨ shəŋ yihi yi ndzeŋe? 2 Yɛ, na manɨ kə! bɨ bə nə̀ kkpə ba jɛ gwɨ nə bubiə wɨ naji ɨ kə tsu kɨ bambi bubiə busu ntɨŋ nəŋɨlɨ? 3 Bə na kkəhə lə bɨ bəchi bə bə́ nə̀ chɛsɛ biɔ ba tɛshɛ bɨ Jisɔs Klistu ntɨŋ, bə́ nə̀ chɛse bɨ ma bə́ tɛshɛ bɨ ji kkpə yihi ntɨŋ? 4 Bə́ nə̀ chɛse bɨ biɔ manɨ, fi kɨ ji lə bə́ sə tɛshɛ bɨ bə Klistu kkpə yihi ntɨŋ ba di lɨ, fə nɨ buŋga bu Tɨɨ lə bubəŋ nə̀ dzakɔ yu nə kkpə lɨ, bɨ tɨ kə kɨ ji kɨjimiɛ kɨfa ntɨŋ.5 Fi na ji ma ndzɨ, jilə kə na ji ntɛshɛ bə Klistu kkpə yihi ntɨŋ, kə kɨ jikə masə lə kə jiba ɨ kə ná dzakɔ tɨ nə kkpə lɨ nɨ yu nə̀ dzakɔ cha. 6 Kə na kkɨ lə bə́ nə̀ bandɨ gwɨ́ yaha yi na ji fiə waha wu ko kɨtɨ kɨ ŋ'wa lə wɨ bə Klistu, fə gwɨ́ yaha yi bubiə lə ya bəfiɛ, ɨ kə tsukə jimiɛ bəŋfia bubiə kaŋ, 7 ndzɨ miɨ ba yu kkpə lɨ, tə yu' fɔfo nə bubiə kaŋ. 8 Nɨ kə kkpə bə Klistu, kɨjilə kə na bɨmi lə kə jiba ɨ kə kɨ ji bəwəŋ bə yu, 9 ndzɨ kə na kkɨ lɨ lə nɨ Nyɔ nə̀ dzakɔ Klistu nə kkpə lɨ, Klistu ná tsɔhɔ kkpə. Kkpə na tsɔhɔ keŋkɛ buŋga yu bɨŋ. 10 Kkpə yi yu nə̀ kkpə, nə̀ ndzɨ bubiə kamo lɨ, fi ka manɨ. Buwəŋ bu yu na keŋkɛ fɛŋ na ji ji Nyɔ lɨ. 11 Bəma bə naji tɨ lə bə dze gwɨ́ yɛnɨ lə bə' kkpə dia wu bubiə lə ba kɨ ji bəwəŋ fɛŋ Nyɔ lɨ, nɨ bə na ji ntɛshɛ bə Jisɔs Klistu.
12 Bə na jimiɛhɛ lə bə ga lə bubiə kɨ bambi bu keŋkɛ buŋga gwɨ́ yɛnɨ wɨ, bə mfə lə bə kɨ keŋkɛ kɨshəntə kɨ fənə biɔŋ bi gwɨ́ yɛnɨ na laŋkɨ. 13 Bə kə̂ nyaha biŋuni bi gwɨ́ yɛnɨ lə bə bubiə nɨ biɔŋ bihi bi nɨŋ'ə lə yu kɨ fɨtɨ bubiə su. Bə nyâ gwɨ́ yɛnɨ ji bə Nyɔ nɨ bənɨ bə bə́ sə dzakɔ bɔ nə kkpə lɨ ba nya bɔ buwəŋ. Bə nyâ tɨ biŋuni bi gwɨ́ yɛnɨ lə bə Nyɔ nɨ biɔŋ bi nɨŋ'ə bi fənə biɔŋ bi diəŋ su. 14 Bubiə na jimiɛhɛ lə bu tsu keŋkɛ buŋga bəŋ bɨŋ, ndzɨ bə na jimiɛhɛ bilaŋ nəkoso. Bə na ji ji shəŋ yi Nyɔ lə yi ndzeŋe nəkoso.
Miɨ wu na ji Klistu ntɨŋ na mfia wu fiə wu diəŋ
15 Nɨ fi na ji ma kə jiba ɨ kə tə lə la? Kə kɨ fɨtɨ bubiə fɛŋ chi kə na jimiɛhɛ bilaŋ nəkoso, ndzɨ kə na ji ji shəŋ yi Nyɔ lə yi ndzeŋe nəkoso? Dzə na sɨŋ! 16 Bə na kkəhə lə ɨ miɨ nya gwɨ yihi bə miɨ wudɔ nɨ mfia, kɨjilə yu jiwa ɨ yu kɨ ji mfia miɨ wa lɨ kwa, yu woko bə yu? Ɨ miɨ nya gwɨ ɨji bə bubiə, kɨjilə yu naji mfia wu bubiə. Bubiə na ba ji bə kkpə. Ɨ wə na woko bə Nyɔ, kɨjilə wə na ji ji mfia wu Nyɔ. Fiŋ na fɨtɨ lə wə keŋkɛ fiə wu diəŋ. 17 Bəmanɨ kɨmbafə bə Nyɔ ndzɨ fiəfiə bə nə̀ ji bəŋfia bə bubiə lə, fɛŋ bə bɨŋ bitɨfiə bi bə́ nə̀ nya bəŋ bə shəŋ yɛnɨ chi. 18 Bə́' foso bəŋ nə bubiə kaŋ, bə tsu ji bəŋfia bə fiə wu diəŋ'ə. 19 Nna nchanyɛ fiŋ nɨ miɨbəwəŋ ndzɨ bəŋ bənɨ bəwəŋ na kkəhə biɔŋ gəŋ fiə. Bə kɨ kkɨ lə fiəfiə bə nə̀ ga gwɨ́ yɛnɨ buŋfia ntɨŋ bə biɔŋ bi kɨnyənə lə nɨ bə nə̀ mənə bubiə budɔ bɨŋ. Bə fɛŋ, bə fə̂ gwɨ́ yɛnɨ kɨ ji bəŋfia bə fənə biɔŋ bi diəŋ bi na ba bə ntsaləsɨ. 20 Tsa yi bə nə̀ ji bəŋfia bə bubiə lə, fiə wu diəŋ nə̀ keŋkɛhɛ fiɔŋ fi fənə bə bəŋ. 21 Nɨ bə nə̀ ji manɨ, mbɨ wu bə nə̀ keŋkɛ nə biɔŋ bi bə na ji biŋ yaa kwete bəŋ bə bi nə̀ la? Biɔŋ biŋ na kpɨyi ji bə kkpə. 22 Bəmanɨ fɛŋ nɨ bə́ fosɔ bəŋ nə bubiə kaŋ, bə' tsu ji bəŋfia bə Nyɔ lə, mbɨ wa na ji lə bə tsu ba bənɨ bə bə́ na tsaləsɨ bɔ, kɨfəŋgbɨŋ kɨsu ná kɨ ji buwəŋ bu kəkaha. 23 Bə kɨ kkɨ lə bikwəntsə bi bubiə lə na kkpə, bəmanɨ buwəŋ bu kəkaha na kɨnya kɨ Nyɔ nya kɨlɔlɔ lɨ bə bənɨ bə na ji Jisɔs Klistu Baba waha ntɨŋ.