Bə́ faŋ Pɔl Lom
27
Lə bə́ sese lə kə be bə Pɔl kɨkpɔŋkɔ kɨ biɔ ntɨŋ ba gəŋ sha yi Itali ntɨŋ, bɔ nya Pɔl ma bənɨ bə buŋfia lə bədɔ Julius kaŋ wu nə̀ ji fo wu kɨntsu kɨ bənɨ bə bitsa lə kɨdɔ kɨ Ŋkuŋ wu Lom lə. 2 Bɨ bə bɔ be kɨkpɔŋkɔ kɨ nə̀ fɔɔ nə Adamitium kɨ nə̀ji lə kɨ kɨ gɨntɨ kɨ lɨmi ŋgɔŋ nəkpo, dia wu Ɛsha. Alistakus miɨ wu Tɛsalɔnika, sha yi Mɛsɛdɔnia ntɨŋ nə̀ ji tɨ bə bɨ. Bɨ bə bɔ kɨ gɨntɨ. 3 Lə butsu wɔ, kə fɔ Sidɔn, Julius donchɛ kɨnse bə Pɔl ba shə yu lə yu fɔ binchi, yu gəŋ ŋəŋ nsáŋ yihi yi chitə yu bə fiɔŋ fi yu na se. 4 Kə chi bɛɛ kɨkpɔŋkɔ ntɨŋ mɨ ba kɨ gɨntɨ, fiəfɨ kɨ ba nəfiə yi baŋkɨ bɨ, kə kɨ kɨŋkɨ bukəŋ bukəŋ fə Saiplus sha yi ŋgɔŋ fəntɨŋ ku, yi bakɨ fiə ya. 5 Lə kə gəŋ llə ŋgɔŋ məmbəŋ mə na ji gwɨgwɨ fə sha yi Silisha bə yi Paŋfilia ku, kə fɔ kɨtuŋ kɨ Maila, sha yi Lisha ntɨŋ. 6 Fo wu kɨntsu kɨ bənɨ bə bitsa lə wa ŋəŋ kɨkpɔŋkɔ kɨ biɔ wɨ sɔ kɨ nə̀ fɔɔ nə Alɛdzandia ba kɨ gɨntɨ Itali, yu foso bɨ ba chi ji ka ntɨŋ. 7 Lə kə dza nə mɨ, kə dze díɔ kɨyɛŋ kə gɨntɨ wəəə wəəə, nə̀ mɛ ŋkɨɨŋ wɨ fə kə tə fɔɔ fə kɨtuŋ kɨ Sinidus ku. Nɨ fiəfɨ nə̀ kə bɨmiə lə kə gəŋ fiə nyɨlɨlɨ, kə kɨ kɨŋkɨ bukəŋ bukəŋ sha yi Klɛt wɨ, kɨtuŋ kɨ ŋgɔŋ fəntɨŋ, Klɛt no kɨ bakɨ bɨ nə fiə wɨ, kə gəŋ ba chɛ Salmɔni dɨ wu na beke wu gɨntɨ biɔ kɨtuŋ ka ntɨŋ. 8 Kə kətə kwa kə kɨŋkɨ kə tsu ŋgɔŋ nəkpo, nə̀ mɛ ŋkɨɨŋ wɨ fə kə tə gəŋə ba fɔ dɨ wu bə́ nə̀ tsɨsə lə Bifuŋ bi Ŋgɔŋ mə Budə lə, wu nə̀ ji gwɨgwɨ fə kɨtuŋ kɨ Lasha ku.9 Nɨ kə nə̀ chɛsɛ tsa dzə kɨtso, ɨji Butsu Bubəŋ bu Gbeme lə' ba ba chɛ lɨ, ɨji nə̀ tsa yi fiəfɨ yintaŋ, Pɔl nya bitɨfiə bə bənɨ bə kɨkpɔŋkɔ ntɨŋ lə, 10 “Bətaa, nna ŋŋɨntɨ lə dze nə fɛŋ bɨŋ gəŋ fiə gbəndɨ waha jiwa wu bə, kɨnla jika kɨ kɨ ji su, ɨ jikə jimiɛ biɔŋ bə kɨkpɔŋkɔ kwa kə, bənɨ jiba bɔ kkpəyə tɨ.” 11 Bəmanɨ, fo wu bənɨ bə bitsa lə jikə wɔkɔhɔ nchanyɛ yi Pɔl, yu wɔ fihi ji bə miɨ wubəŋ wu kɨkpɔŋkɔ ka ma nə chɛ kɨkpɔŋkɔ wa lɨ. 12 Nɨ dɨ wu ŋgɔŋ fəkpa lə wa nə̀ ndzeŋɛhɛ njiŋ mɨ tsa yi kɨkumɔ kɨntaŋ ntɨŋ, bənɨ kɨyɛŋ kɨ bɨmi lə na ndzeŋe lə bə́ kɨ gɨntɨ fiə, bɔ dio lə naji ɨ bɔ fɔ Fɔniks dɨ wu ŋgɔŋ fəkpa lə, ɨji wu na ji sha yi Klɛt ya ntɨŋ, ba chɛse tsa ji mɨ. Bifuŋ bi ŋgɔŋ'ə biŋ nə̀ jiŋgə dzə nəgo bi jiŋgə tɨ dzə nəshiŋ dia wu diɔ midi.
Kɨkumɔ tɔ kɨkpɔŋkɔ
13 Fiəfɨ yidɔ gbɔ kɨ bɨndɨ dzə nəshiŋ mɛ wəəə, bənɨ bə kɨkpɔŋkɔ lə kɨ gɔmbiɛ lə bɔ keŋkɛ fiɔŋ fi bɔ sə noŋko. Bɔ foso findze fi kɨkpɔŋkɔ lə ba kɨ gɨntɨ biɔ, bɔ tsu kwa bukəŋ bukəŋ Klɛt wɨ. 14 Kɨkumɔ kɨntaŋ kɨ bə́ tsɨsə lə, “Kɨ dzə nəməsə dɨ wu díɔ boso,” kɨ jiji ba lafu sha ya ntɨŋ ba shi biɔ. 15 Lə kɨ shi, kɨ tsu kɨkpɔŋkɔ ka dzə jikə jimiə yi gəŋə su kɨkumɔ ka wɨ, bɔ tɔkaŋ nə kɨkpɔŋkɔ ka wɨ, kɨkumɔ kɨntaŋ ka kɨ toto kɨ gɨntɨ bə kɨkpɔŋkɔ ka. 16 Kə bu kɨ gɨntɨ kwa, kə gəŋ chɛ kɨtuŋ kɨntse kɨdɔ nəshiŋ ŋgɔŋ fəntɨŋ bə́ tsɨsə lə Kawda. Kɨtuŋ ka kɨ bakɨ fiəfɨ, kə kɨ diɔnɔ lə kə bəndɨsɨ kɨkpɔŋkɔ kɨntse ba ga kɨbəŋ bɨŋ. 17 Lə kə bəndəsɨ, kə kansɨ kɨkpɔŋkɔ kɨbəŋ ka bə gɨ lə kɨ tə kə gbədiɛ, kə kɨ gɨntɨ kə lete lə kɨkpɔŋkɔ jika kɨ gəŋ tsu gwɨ nshantɨŋ fə sha yi Libia ku. Bɔ shisəsɨ kɨndzu kɨ fiəfɨ na meke kɨkpɔŋkɔ su ba tɔkaŋ kɨkpɔŋkɔ ka kɨ gɨntɨ nə kɨ kaŋ. 18 Kɨkumɔ ka kɨ tɛti kɨ gɨntɨ fiə sɨŋsɨŋ butsu wɔ, bə́ gbɔ kɨ foshɛ biɔŋ nə kɨkpɔŋkɔ ntɨŋ, bə́ liyɛ biɔ. 19 Lə butsu chi wɔɔ, bənɨ bə kɨkpɔŋkɔ lə foshɛ biɔŋ bi kɨkpɔŋkɔ lə bə kaŋ yibɔlə ba tɔfiɛ biɔ. 20 Kə jikə ŋəŋkəhə diɔ wɨ makə mbíansɨ díɔ kɨyɛŋ ntɨŋ, kɨkumɔ dzumu kwa ɨjikə jimiə kɨ tsəsɨ, kə tə kkə lə fiaha ka.
21 Lə bənɨ tsə díɔ kɨyɛŋ ndiə sɨŋ fiɔŋ, Pɔl dza ba kɨnɨ ləŋ nəfiə ba tə lə, “Bətaa, bə tə sə wɔ bə mɨ lə kə kətə Klɛt, kə tə jikə keŋkɛ ŋgə no bə kɨnla kɨŋ mɛ. 22 Bəmanɨ, nna nnende lə bə kansɨ shəŋ ndzɨ naji ɨ miɨ wudɔ nə bəŋ ntɨŋ la kə, na kwa kɨkpɔŋkɔ kɨ jika kɨ la. 23 Nna nchanyɛ mɛ ndzɨ Nyɔ wu na keŋkɛ mɨ, wu nna ntsɨsə, sə faŋ nchinda wuhu bbutsu yu ba ləŋ fə mɨ ku 24 ba tə bə mɨ lə, ‘Pɔl, wə kə̂ lekɛhɛ. Wə naji lə wə ləŋ Ŋkuŋ wu Lom nəfiə. Bô ŋəŋ, Nyɔ donchɛ kɨnse bə wə ba fə lə miɨ wudɔ nə kɨntsu kɨ bənɨ bə bəŋ bə bɔ na ji kɨkpɔŋkɔ ntɨŋ naji ɨ yu la kə.’ 25 Bəma, bətaa, bə kânsɨ shəŋ. Nna ŋkeŋkɛ kɨmbɨŋ Nyɔ wɨ lə fiɔŋ fi yu chanyɛ bə mɨ jifia ɨ fi tɨchə diəŋ nɨ yu chanyɛ. 26 Nɨ fi na ji manɨ, kɨkpɔŋkɔ naji lə kɨ tsu gwɨ kɨtuŋ kɨdɔ wɨ ŋgɔŋ fəntɨŋ.”
27 Lə ba kɨ ji díɔ yɔɔ ntse nna kɨkumɔ bambi kɨ finchɛ bə bɨ ŋgɔŋ məmbəŋ mə Adiaª ntɨŋ. Lə kɨ ji nɨ bbutsu kɨntɨŋ kɨntɨŋ, ŋgwembe mə bənɨ bə nə̀ nɨntɨ ba kɨkpɔŋkɔ ka ntɨŋ gbɔ kɨ tɨdi bɔ lə bɔ foto ba gwɨgwɨ fə sha ku. 28 Bɔ fɨkə bundzumbɔ bu ŋgɔŋ ma lə bə gbɨ bɔ shiŋkə fiɔŋ su ba ŋəŋ lə mɔ na ji bəntaŋ mbaafiɛ. Bɔ kɨnɨ nəfiə ba chi fɨkə, bɔ ŋəŋ mɔ ji bəntaŋ yɔɔ ntse bətɨŋ. 29 Bɔ kɨ lete lə naji ɨ kɨkpɔŋkɔ tsu gwɨ bíansɨ wɨ, bɔ tə shisəsɨ mundze munɛŋ ŋgɔŋ ntɨŋ kɨkpɔŋkɔ ka nəjiŋ, kɨ tsɨsə kwa lə butsu wɔ. 30 Bənɨ bə nə̀ nɨntɨ kɨkpɔŋkɔ ka ntɨŋ kɨ se lə bɔ fɔ ba lətə nə kɨkpɔŋkɔ ka ntɨŋ, bɔ shisəsɨ kɨkpɔŋkɔ kɨntsekiɛ ka biɔ, kɨ lənə lə bɔ na se lə bɔ shisəsɨ mundze mu nəfiə mu kɨkpɔŋkɔ lə biɔ. 31 Pɔl tə bə fo wu bənɨ bə bitsa lə bə bənɨ buhu lə, “Ɨ bənɨ bɛŋ mɔŋ lə bɔ fɔ nə kɨkpɔŋkɔ kɨŋ ntɨŋ, ɨ miɨ wudɔ nə bəŋ ntɨŋ jikə fɔkɔ fo.” 32 Bənɨ bə bitsa lə kəmbiə gɨ yi bɔ nə̀ suɔ ya kɨkpɔŋkɔ kɨntsekiɛ ka kɨbəŋ ka wɨ ba tɔkaŋ, kɨ kɨ lɨŋkɨ kɨ gɨntɨ.
33 Lə butsu kɨ woto, Pɔl nende bənɨ bəchi lə bɔ diə, yu tɨdi lə, “Ndɛŋ na díɔ yɔɔ ntse nna nɨ bə na ji nyiŋ ntɨŋ, fiɔŋ kə bekɛ bəŋ dze. 34 Nna nnende kwa lə bə diə fiɔŋ, gwɨ yɛnɨ tsu ntɨŋ. Naji tɨmo ɨ yu miu la nə miɨ fi kə.” 35 Lə yu chanyɛ manɨ, yu dze blɛ ba nya kɨmbafə bə Nyɔ ba gbə kɨ diɨ bənɨ bəchi yəsɨ. 36 Bɔ tə kansɨ shəŋ bəchi ba diə lɨ. 37 Bɨ bəchi bə nə̀ ji kɨkpɔŋkɔ ka ntɨŋ nə̀ bənɨ gɨ fɛ bə gbɨ fumba ntse buse (276). 38 Bənɨ bəchi diə ba fulu lɨ, bɔ foso jiŋ yi nə̀ ji kɨkpɔŋkɔ ntɨŋ ba tɔfu biɔ bə mfə lə kɨ yɨŋkɨlɨ.
Kɨkpɔŋkɔ gbədiɛ
39 Lə butsu wɔ, kɨbinchi tsalə, bənɨ bə nə̀ nɨntɨ kɨkpɔŋkɔ ka ntɨŋ jikə kkə dɨ wu bɔ na ji wa. Bəmanɨ, bɔ ŋəŋ kɨfɨsə kɨdɔ ɨji kɨ be ba gəŋ fɔ mənshambu wɨ, bɔ ŋəŋ lə bɔ jiba ɨ bɔ diɔ ba gəŋ bə kɨkpɔŋkɔ ka mɨ, kɨ be ba gəŋ me mənshambu ma bɨŋ, ŋgɔŋ ma nəkpo. 40 Bɔ kəmbiə mundze mwa, mu shi sɔ biɔ ba yanshɛ gɨ yi bɔ nə̀ suɔ kɨkalə kɨ kɨkpɔŋkɔ ka lə su ba bəndəsɨ tɨ kɨndzu kɨ fiəfɨ lə kɨ nəfiə, fiəfɨ be sɔ kɨ meke kɨkpɔŋkɔ ka kɨ gɨntɨ kɨfɨsə ka wɨ. 41 Bəmanɨ, lə kɨ kɨ gɨntɨ, kɨ tsu gwɨ nshantɨŋ. Kɨdia kɨ kɨkpɔŋkɔ lə kɨ nəfiə be ba fasə sɔ ba jikə kɨ nɨkə. Ŋgɔŋ kɨ tsuku kɨdia kɨ nəjiŋ, kɨ gbədiə.
42 Bənɨ bə bitsa lə kɨ se lə bɔ kkpɨshə bənɨ bə tsɔŋ yi buŋfia lə bəchi fə wudɔ nə bɔ ntɨŋ tə kə dza ba talə fɔ lətə lɨ. 43 Bəmanɨ, fo wu bənɨ bə bitsa lə kɨ se lə yu chitə Pɔl, yu loso lə bɔ kə̂ fəkə manɨ, yu tə yihi lə bənɨ bə na kkɨ ntalə bɔ sa təkiə biɔ ba talə fɔ kpa, 44 Bədɔ ba bənɨ kɨ biəlɨ bidiadia bi bitɨ lə bɨŋ, makə bidiadia bi kɨkpɔŋkɔ ka lə bɨŋ. Chinchi kə nə̀ gəndə fə kə tə shafɔ kpa nyəkə.