Bifənə 26

Pɔl tambi gwɨ yihi Ŋkuŋ Aglepa nəfiə

Ŋkuŋ Aglepa tə bə Pɔl lə, “Na shi yɔhɔ fɛŋ yi naji lə wə chanyɛ bə bifuŋ biɔhɔ.” Pɔl tɔ kɨbandə bɔ́ ba gbɔ kɨ tambi gwɨ yihi, yu tɨdi lə, 2 “Mbɛɛ, nna ŋŋɨntɨ lə mɨ mfɔ bə sa kɨtso bə nləŋ lə ntambi gwɨ yɛmɨ wə nəfiə ndɛŋ nə biɔŋ bichi ntɨŋ bi Bəju na bunchi mɨ wɨ. 3 Nna nchanyɛ mɛ ndzɨ wə na kkɨ fiə wu Bəju lə buni bə yímbiɛ yi bɔ ba bɔ kɨ keŋkɛ. Bəma, ŋkɨ nnende lə wə wokɔ ba wɔ fiɔŋ fi nchanyɛ.

4 Bəju bəchi na kkɨ fiə wɛŋ dze nə bubiɨlɨ lɨ. Bɔ na kkɨ nɨ nnə̀ nji kɨtuŋ kaha ntɨŋ ma Jɛlosalɛm. 5 Bɔ na kkɨ buni tɨ lə nə ndɛŋkəlɨ nna nji miɨ wu kɨntsu kɨ Bəfalasi lə ɨji kɨntsu kɨ na ji buntaŋ bə kɨdəndə kɨ Nyɔ lə kɨtso kɨ yakɨ bidɔ bia bichi. Fiŋ na fiɔŋ fi naji lə, ɨ bɔ na se lə bɔ chanyɛ, ɨ bɔ bɨŋ lə na yɛyi. 6 Mɨ ŋkɨ nlɨmi mɛni fɛŋ nsa ntɨŋ ndzɨ nna njiŋgə fiə ŋkkɨ tsukɔ bikaŋə bi Nyɔ nə̀ kaa bətaa baha. 7 Bikaŋə biŋ ji bi bitsɔŋ biaha bi yɔɔ ntse bifɛ na wokɔ lə bi ŋəŋ fi fɔ diəŋ nɨ bɔ na tsɨsə Nyɔ bɔ galɨ shəŋ bbutsu bə bbushə. Mbɛɛ, na ndzɨ bikaŋə biŋ wu Bəju na ji bə nsa bə mɨ. 8 Nna mbi bə bəŋ bəchi lə, ə fə la fi bə́ na ŋɨntɨ lə dzə na sɨŋ yi naji ɨ Nyɔ dzakɔ miɨ nə kkpə lɨ lə?

9 Mɨ kɨbɛɛ nnə̀ ŋgɔmbiɛɛ lə nna nji lə mfə fiɔŋ fichi ba shiŋkiɛ yɨ wu Jisɔs wu Nadzalɛt lə. 10 Fiŋ na fiɔŋ fi nnə̀ mfəə Jɛlosalɛm. Nnə̀ nləkə buŋga nə bəchɛ bintɔfiɛ bəbəŋ'ɨ, ŋkwediɛ bənɨ bə Nyɔ lə kɨyɛŋ, mfashɛ tsɔŋ yi buŋfia ntɨŋ. Nə̀ kwa fiŋ kə. Tsa yi nə̀ji lə bə́ jiba bə́ kkpɨshɛ bɔ, mbɨŋ tɨ. 11 Tsá kɨyɛŋ nnə̀ nnya bɔ ŋgə tsɔ́ŋ yi kɨntsɨsɨ lə ntɨŋ chi, ndio lə bɔ kɨ chanyɛ díɛ yibiə tsukɔ Jisɔs wɨ. Shəŋ lo mɨ bə bɔ kɨtso, nsesɛ gbo bɔ nəjiŋ, ŋgɨntɨ mfoto ku yi bituŋ bidɔ lə ntɨŋ.

Pɔl chi chanyɛ nɨ yu nə̀ yashənɨ kɨ ji miɨ wu kɨmbɨŋ

12 Ndza ŋkɨ ŋgɨntɨ Damaskus, ɨji bəchɛ bintɔfiɛ bəbəŋ' bɔndu kɨŋwatɨ ba nya mɨ buŋga. 13 Lə kɨ ji bbushə ŋgaaaŋ, njiji ba ŋəŋ kɨŋgbooŋ kɨdɔ tsalə nə bɔ́ ba ya diɔ, kɨ tsalə ba shi mɨ wɨ bə bənɨ bə kə nə̀ gəndəə ba bə bɔ. 14 Kə gbɔyɛ fəkoso bəchi, ŋ'wɔ diɛ bi bə mɨ díɛ yi Hiblu ntɨŋ lə, ‘Sɔl, Sɔl, wə na sesɛ gbo mɨ nəjiŋ mɛ ndzɨ la? Wə na fɨtɨ ma wə kwɨntɨ ji gwɨ yɔhɔ, nɨ naŋ wu nɨŋ wu na kwɨntɨ gwɨ yihi kɨntɛ kɨ tɨɨ lə wɨ.’ 15 Mbi lə, ‘Na wə yəŋ Baba?’ Yu chi lə, ‘Na mɨ Jisɔs, ɨji mɨ wu wə na sesɛ wa gbo yu nəjiŋ. 16 Dzâ, ləŋ wə. Fiɔŋ fi fəə lə nlafu wə nəfiə na lə nsa wə, wə kɨ ji miɨ wɛmɨ wu nɨŋ, wə kɨ tɨfiə biɔŋ bi wə ŋəŋə ndɛŋ bə bi nna mbambi lə ndonchɛ wə. 17 Njiwa ntsu wə nə Bəju ma bənɨ bə na jimiɛhɛ Bəju kaŋ, ɨji bɔ bə njiwa mfaŋ wə bɔ lɨ. 18 Wə jiwa wə gəŋ guyɛ yəsɨ yibɔlə ba foso bɔ nə kɨjuwɔ ntɨŋ, ba ga bɔ kɨŋgbooŋ ntɨŋ, ɨ bɔ fɔ nə Satan kaŋ ba kɨ ji bə Nyɔ, ɨ bɔ ga shəŋ mɨ wɨ, ɨ Nyɔ gufiɛ məmbiə məmbɔlə. Ɨ bɔ tə keŋkɛ dɨ bənɨ ntɨŋ bə yu tsaləsɨ bɔ.’

19 Mbɛɛ, nɨ fi nə̀ tɨchə manɨ, mbu mfə kwa chi yu nə̀ chanyɛ bə mɨ nə bɔ́. 20 Shi yi fiəfiə yi nnə̀ ŋgbɔɔ kɨ tɨfiə nə̀ Damaskus, ntə ŋgəŋ Jɛlosalɛm. Ŋkɨ ŋgəndə sha yi Judɛya ntɨŋ chi ma bituŋ bichi ntɨŋ bi na jimiɛhɛ bi Bəju lə, ntɨfiə bɔ lə bɔ fîchə shəŋ yibɔlə, bɔ tsu bə Nyɔ ba kɨ fɨtɨ ji biɔŋ bi na donchɛ lə bɔ' fichə shəŋ yibɔlə. 21 Nə̀ ndzɨ fiŋ fi Bəju nə̀ kwɛɛ mɨ tsɔŋ yi bintɔfiɛ ntɨŋ kɨ se lə bɔ kkpɨsɨ mɨ. 22 Bəmanɨ, Nyɔ na chitə mɨ ba tuŋ ndɛŋ. Mɨ ŋkɨ nlɨmi mɛni mbɨmi bənɨ bəbəŋ bə bəntse nəfiə. Fiɔŋ fi nna mbɨmi, na tɨ fi fi Mose bə bənɨ bə shɔŋ yi Nyɔ lə nə̀ tɨdi lə fi ná tɨchə lɨ. 23 Bɔ nə̀ tɨdi lə Nchitə wu Nyɔ nə̀ kaa wa naji lə yu ná wɔɔ ŋgə, ɨ yu kɨ ji miɨ wu fiəfiə wu dzakɔ nə kkpə lɨ, ɨ yu donchɛ kɨŋgbooŋ bə Bəju ma bə bənɨ bə na jimiɛhɛ Bəju.”

24 Nɨ Pɔl nə̀ bu tambiɛ gwɨ yihi yu gɨntɨ fiə, Fɛstus dza ba chichə yu bə diɛ buntaŋ lə, “Pɔl, wə gbɔ dza! Mfɨyə yɔhɔ yi kɨtso' fə wə gbɔ dza.” 25 Pɔl chi bə Fɛstus lə, “Ŋkə ŋgbɔɔ dza miɨ wubəŋ. Fiɔŋ fi nna nchanyɛ na yɛyi, nna nchanyɛ bə bufɨ bwɛŋ. 26 Nna nchanyɛ bə Ŋkuŋ ŋgbooŋ mɛ ndzɨ yu na kkɨ biɔŋ biŋ, bi nə̀ kə tɨchə bunyələ, fidɔ na sɨŋ fi yu na jikə kkə. 27 Mbɛɛ, ntɨlə wə' bɨŋ fiɔŋ fi Biŋwatɨ bi bənɨ bə shɔŋ yi Nyɔ lə na tɨdi? Nna ŋkkɨ lə wə' bɨŋ.” 28 Ŋkuŋ Aglepa bi bə Pɔl lə, “Wə na gɔmbiɛ lə naji ɨ wə yashənɨ mɨ tsa yi dzulu ntɨŋ, ntsu miɨ wu Klistu?” 29 Pɔl chi lə, “Mɛ kɨ ji tsa yi dzulu, mɛ kɨ ji yi dəŋfɨ, kɨntsɨsɨ kɛmɨ bə Nyɔ na ji lə, kə kətə kwa wə. Miɨ chi wu na ji mɛni ndɛŋ yu woko nɨ nna nchanyɛ, yu yâshənɨ tɨ kɨ ji nɨ mɨ, bəmanɨ, yu fîəŋkə kwa ji mfíaŋ yiŋ.”

30 Ŋkuŋ jiji ba dza wə, miɨ wu sakɨ bə Bɛnis ma bənɨ bə bɔ bə bɔ nə̀ jimiɛ biə yu. 31 Lə bɔ fɔ, bɔ kɨ chanyɛ bɔ bɔ lə, “Miɨ no kə fəkə fiɔŋ fi naji lə bə́ kkpɨsɨ yu makə lə bə́ ga yu tsɔŋ yi buŋfia ntɨŋ.” 32 Ŋkuŋ Aglepa tə bə Fɛstus lə, “Tə nə jikə jimiɛ lə miɨ no' nende lə nsa yihi gəŋ fə Ŋkuŋ wu Lom ku, bə́ tə tɔkaŋ nə yu wɨ.”