Pɔl dze nsa yihi lə yu gəŋ bə yi fiə fə Ŋkuŋ wu Lom ku
25
Lə kɨ ji díɔ tɛ nɨ Fɛstus gbɔɔ kɨ sakɨ dia wu sha yi Judɛya, yu dza nə Kasaliya ba bəndɨ Jɛlosalɛm. 2 Bəchɛ bintɔfiɛ bəbəŋ bə fó yi Bəju lə yi kɨtuŋ'ə ba ŋəŋ yu ba ga nsa yi bɔ na keŋkɛ bə Pɔl yu nəfiə ba nende yu lə, 3 yu donchɛ la bɔ shəŋ yi ndzeŋe ba faŋ Pɔl Jɛlosalɛm. Bɔ nə̀ fɨtɨ manɨ ji bɔ' sese lə bɔ jiba ɨ bɔ kɨɨ yu dzə ba kkpɨsɨ lɨ. 4 Fɛstus chi bə bɔ lə, “Pɔl na ji tsɔŋ yi buŋfia ntɨŋ Kasaliya, mɨ kɨbɛɛ njiwa mfichə ba tsu sɔ díɔ yiŋ ntɨŋ. 5 Bənɨ bə na keŋkɛ buŋga bu bənsa lə bədɔ biə mɨ Kasaliya ba chanyɛ fiɔŋ fi yu gbɔɔ ji sɔ, jilə fiɔŋ fia su.”6 Fɛstus jiŋ bə bɔ nɨ díɔ yaŋ gɨntɨ yɔɔ bɨŋ, tə fichə tsu jiŋ Kasaliya. Lə butsu wɔ, yu gəŋ jiŋ kansu ntɨŋ ba tə lə bə́ ba bə Pɔl. 7 Lə Pɔl lafu, Bəju bə nə̀ fɔɔ nə Jɛlosalɛm shi sɔ ba ləmiə fiədiɛ yu kɨ bunchi biɔŋ bintaŋ yu wɨ kɨyɛŋ. Bəmanɨ, fiɔŋ fidɔ nə̀ sɨŋ fi nə̀ donchɛ lə Pɔl' gbɔ. 8 Pɔl tambi gwɨ yihi ba tə lə, “Ŋkə ŋgbɔɔ tɨmo kɨlaŋ kɨ Bəju lə, makə kɨ tsɔŋ yi bintɔfiɛ lə, makə kɨ Ŋkuŋ wu Lom lə.” 9 Bəmanɨ, Fɛstus kɨ se lə yu fə Bəju kɨ laŋkɨ yu, yu bi bə Pɔl lə, “Wə se wa lə wə bəndɨ Jɛlosalɛm mɨ kɨbɛɛ nsa nsa yɔhɔ yi biɔŋ biŋ sɔ?” 10 Pɔl chi lə, “Nna nlɨmi mɛ kɔlɔ wu nsa ntɨŋ, ɨji wu Ŋkuŋ wu Lom. Wuŋ na dɨ wu bə́ naji lə bə́ sa nsa yɛmɨ. Wə kɨbɛɛ na kkɨ tɨ buni lə ŋkə mfəkə fiɔŋ fidɔ fibiə bə Bəju. 11 Jilə mɨ mbuŋ kɨlaŋ ba fə fiɔŋ fi naji lə bə́ kkpɨsɨ mɨ, njikə nɨŋŋkəhə ŋkkpə. Bəmanɨ, jilə biɔŋ bi bə́ na bunchi biŋ mɨ wɨ na biyɔndu, tə miɨ na sɨŋ su wu naji ɨ yu nya mɨ Bəju bɛŋ kaŋ. Nna nnende lə nsa yɛmɨ gəŋ fiə ba fɔ Ŋkuŋ wu Lom wɨ.” 12 Lə Fɛstus wɔ manɨ, bɔ bə bənɨ buhu bə nə̀ sakɨ bənsa wənənɨ. Yu tə tə bə Pɔl lə, “Nɨ wə nendɛ lə nsa yɔhɔ gəŋ fɔ Ŋkuŋ wu Lom wɨ, kɨjilə yi jiya ɨ yi gəŋ mɨ.”
Fɛstus ga nsa yi Pɔl Ŋkuŋ Aglepa nəfiə
13 Nəjiŋ wusu, Ŋkuŋ Aglepa bə Bɛnisª gəŋ Kasaliya lə bɔ tsɨsɨ Fɛstus. 14 Lə bɔ jiŋ sɔ díɔ kɨyɛŋ, Fɛstus jiji ba ga nsa yi Pɔl Ŋkuŋ nəfiə ba tə lə, “Miɨ wudɔ wa mɛni wu Fɛlis nə̀ shə tsɔŋ yi buŋfia ntɨŋ, 15 Lə ŋgəŋ Jɛlosalɛm, bəchɛ bintɔfiɛ bəbəŋ bə bənɨ bə sakɨ kɨtuŋ kɨ Bəju lə ga nsa yihi mɨ nəfiə lə ntə lə yu' gbɔ nsa. 16 Ntə bə bɔ lə, fiə wu bənɨ bə Lom lə kə bɨmiə lə bə́ kəmbɨ lə miɨ' gbɔ nsa ɨji bə́ kə nyaha dzə bə miɨ wa lə yu ləŋ ba tambi gwɨ yihi bənɨ bə bɔ na keŋkɛ ba nsa bə bɔ nəfiə, tsukɔ biɔŋ bi bə́ na chanyɛ yu wɨ. 17 Lə bɔ ba mɛni, njikə chɛsɛ tsa. Butsu wɔ, ŋgəŋ njiŋ kansu ntɨŋ ba tə, bɔ ba bə miɨ wa. 18 Bənɨ bə bɔ nə̀ keŋkɛ ba nsa bə bɔ ləŋ wə, bɔ jikə donchɛ fiɔŋ fibiə fi nnə̀ ŋgɔmbiɛɛ lə naji ɨ bɔ tə yu wɨ. 19 Bɔ tsu kɨ chanyɛ ji biɔŋ bi yímbiɛ lə bi na tsukɔ fiə wubɔlə tsukɔ Nyɔ wɨ, ma tsukɔ miɨ wudɔ wɨ wu bə́ na tsɨsə lə Jisɔs wu nə̀ kkpə, bəmanɨ Pɔl tɨdi kwa lə yu wa wuwəŋ. 20 Nɨ nnə̀ ŋkkəhə nɨ naji mbe biɔŋ biŋ ntɨŋ, ntə mbi bə Pɔl lə yu se wa lə yu gəŋ Jɛlosalɛm bə́ sa nsa yihi sɔ tsukɔ biɔŋ biŋ wɨ lə? 21 Yu chi lə, ‘Njiwa ŋkətə tsɔŋ yi buŋfia ntɨŋ, na Ŋkuŋ wu Lom wu jiwa yu kəmbɨ nsa yɛmɨ.’ Ntə ntə lə bə́ ga yu tsɔŋ, kɨ wokɔ gəŋ fɔ tsa yi mfaŋə yu bə Ŋkuŋ wu Lom.” 22 Lə Aglepa wɔ mɛ, yu tə bə Fɛstus lə, “Mɨ kɨbɛɛ nna nse lə ŋ'wɔ biɔŋ biŋ nə miɨ wa dze.” Fɛstus chi lə, “Wə ná foto wɔ wɔki.”
23 Butsu wɔ, Aglepa bə Bɛnis gəndə bə kɨyunu kɨbəŋ. Bɔ bə fó yi bənɨ bə bitsa lə bə bənɨ bəbəŋ bə kɨtuŋ'ə gəndə ba be tsɔŋ yi kɨntsɨsɨ ntɨŋ. Fɛstus tə bə́ ba bə Pɔl. 24 Lə bə́ ba bə yu, Fɛstus tə lə, “Ŋkuŋ Aglepa bə bənɨ bəchi bə na ji mɛ, bə ŋə̂ŋ miɨ no. Na miɨ wu Bəju bəchi na ba bɔ funsə mɨ sɛŋ ma Jɛlosalɛm tsukɔ yu wɨ, bɔ wɛnti, bɔ tɨdi lə naji ɨ yu kɨ ji wuwəŋ kə. 25 Bəmanɨ, ŋkə ŋəŋkəhə lə yu' fə fiɔŋ fi naji lə bə́ kkpɨsɨ yu. Nɨ yu nə nendɛ lə nsa yihi gəŋ fiə ji fə Ŋkuŋ wu Lom ku, ŋŋəŋ lə njiwa mfaŋ yu fə ŋkuŋ wa ku. 26 Bəmanɨ, nna ŋkkəhə fiɔŋ fi naji mbɔndu tsukɔ yu wɨ bə Ŋkuŋ waha wubəŋ. Bəma, mɨ ntə ŋga yu bəŋ nəfiə fɛŋ gwɨtɛɛ wə Ŋkuŋ Aglepa nəfiə, lə bə tɛshɛ ba chənə nsa yihi, fə ŋkeŋkɛ fiɔŋ fi naji mbɔndu. 27 Nna ŋŋɨntɨ lə fi na jimiɛhɛ diəŋ lə mfaŋ miɨ wu tsɔŋ yi buŋfia fə Ŋkuŋ ku ndonchɛ sɨŋ fiɔŋ fi bə́ na kwente yu ndzɨ fi.”